NINYIJUKA akasheeshe kamwe obu haabaire hariho embeho emyaka mingi ehingwire ndi omuri Brookings, oburugwa-izooba bwa Dakota, U.S.A. Obwire bw’obutiti bukaba buri haihi kutandika. Nkaba ndi n’abandi bantu bakye turi omu kaju kakye katarimu muriro gw’okwota, kandi twena tukaba nitutengyeza. Tukaba twemereire haihi n’ekintu kirimu amaizi, kandi gakaba nigafukiirira! Ka mbagambire ebirikunkwataho kugira ngu mumanye ahabw’enki twabaire turiyo.

Nkazaarwa omu Kwakashatu 7, 1936. Abazaire bangye bakaba baine abaana bana, kandi niinye naabaire nimpererukayo obuto. Tukaba nitutuura omu iriisizo rikye omu burugwa-izooba bwa Dakota. Okuriisa kukaba kuri kukuru aha ka yaitu, kwonka tikwo kwabaire nikukirayo obukuru. Abazaire bangye bakabatizibwa baaba Abajurizi ba Yehova omuri 1934. Bakaba beehaireyo ahari Yehova, n’ahabw’ekyo okukora ebi arikukunda kikaba kiri kikuru munonga aharibo. Tata, Clarence, na bwanyima tatento Alfred, bakaba bari abaheereza b’ekigombe (hati abarikwetwa abahikaanisa b’akakiiko k’abareeberezi) omu kibiina kyaitu kikye omuri Conde, oburugwa-izooba bwa Dakota.

Butoosha omu ka yaitu tukaba tuza omu nteerane, kandi tubuurira enju aha nju kugambira abandi aha matsiko g’ebiro by’omumaisho agari omu Baibuli. Eky’okureeberaho ky’abazaire bangye n’oku baatutendekire bikatuhwera kukunda Yehova. Nyowe na munyaanyazi, Dorothy, tukaba ababuurizi twine emyaka mukaaga. Omuri 1943, nkaza omu Ishomero ry’Obuheereza obu ryabaire riherize kutandika.

Enteerane empango zikaba ziri nkuru ahariitwe. Ninyijuka oruteerane oruhango orwabaireho omuri 1949 omu Sioux Falls, oburugwa-izooba bwa Dakota. Ow’eishe-emwe Grant Suiter  akaha orubazo “Emperu Eri Haihi Okukira oku Orikuteekateeka!” Akahamiiriza enshonga ngu Abakristaayo boona ababatiziibwe baine kwehayo kubuurira amakuru marungi g’Obukama bwa Ruhanga. Bwanyima y’oruteerane orwo, nkeehayo ahari Yehova. Nkaija naabatizibwa aha ruteerane oruhango orwakuratsireho, omuri Brookings, Okwaikumi-na-kumwe 12, 1949. Niyo nshonga ahabw’enki naabaire ndi omu kaju karikufukiirira, nk’oku naaba naagambire. Itwe bana tukabatirizibwa omu kintu ky’amaizi ekikozirwe omu byoma.

Bwanyima nkacwamu kuba payoniya. Nkatandika Okwokubanza 1, 1952, obu naabaire nyine emyaka 15. Baibuli neegira ngu “ogyenda n’abanyabwengye, nawe ahinduka omunyabwengye,” kandi hariho baingi omu ka yaitu abaashagikire okucwamu kwangye kuba payoniya. (Enfumu 13:20) Nkaba nkira kugyenda na tatento Julius, owaabaire aine emyaka 60. N’obu araabe yaabaire naankira munonga, tukaba nitushemererwa kuba hamwe omu buheereza. Nkamwegyeraho bingi, ahabw’okugira ngu akaba naamanya bingi. Dorothy nawe bwanyima y’obwire bukye akaba payoniya.

Obu naabaire ndi muto, abazaire bangye bakaba nibakira kweta abareeberezi abarikutaayaayira ebibiina n’abakazi baabo kwija kuraara owaitu. Omureeberezi n’omukazi we Jesse na Lynn Cantwell, bakampwera munonga. Bakaba nibanfaho kandi bakaba nibangaruramu amaani. Ku baabaire baba bataayaayiire ebibiina ebiri haihi, obumwe bakaba banyeta kuza omu kubuurira nabo. Buzima nkaba nikunda kuba nabo! Nkaba niinyenda kugira bingi by’okukora omu kuheereza Yehova nkabo, ndikuba payoniya.

Ondiijo omureeberezi orikutaayaayira ebibiina akaba ari Bud Miller. Obu we n’omukazi we Joan baataayaayira ekibiina kyaitu, nkaba nyine emyaka 18. Obwire obwo nkaba nyine kuza omu maisho g’akakiiko akarikutoorana abarikuza omu mahe. Bakaba nibenda ngu nkore omurimo ogu naateekateekire ngu niguhenda ekiragiro kya Yesu eky’okutagira rubaju omu by’obutegyeki. Kwonka nkaba niinyenda kubuurira amakuru marungi g’Obukama. (Yohaana 15:19) N’ahabw’ekyo nkabashaba kundeeba nk’omuheereza.

Nkashemererwa Ow’eishe-emwe Miller ku yaangizire  ngu naija kugyenda naanye kugaaniira n’ab’akakiiko ako. Akaba ari omuntu otaine nshoni, kandi otarikutiinisibwa bantu. Kandi akaba naamanya gye Ebyahandiikirwe. Okuba hamwe nawe kikampa obumanzi bwingi! N’ekyarugiremu, omuri 1954 akakiiko ako kakaikiriza okushaba kwangye kutwarwa nk’omuheereza. Hati nkaba nyine obugabe bw’okukorera Yehova bingi.

Ahonaaho bwanyima y’ekyo, nkeetwa kuza kuheereza aha Beseeli, obwire obwo omu mwanya ogwabaire nigwetwa iriisizo rya Watchtower, aha kirwa kya Staten, omuri New York. Nkaheerezayo kumara emyaka nk’eshatu. Nkatunga ebirungi bingi ahakuba nkashangayo ab’eishe-emwe na banyaanyazi baingi ab’obwengye kandi naakora nabo.

Iriisizo eryabaire riri aha kirwa kya Staten rikaba ririho na radiyo erikwetwa WBBR. Ekaba eri ey’Abajurizi ba Yehova kuruga 1924 kuhika 1957. Ababeseeli 15 kuhika ahari 20 nibo baabaire nibaheereza aha iriisizo eri. Baingi ahariitwe tukaba turi bato tutarikumanya bingi. Kwonka ow’eishe-emwe okuzire oshukirweho amajuta orikwetwa, Eldon Woodworth, akaba naakora naitwe. Akaba ari nka tataitwe kandi akatwegyesa ebintu bingi. Obumwe ku twabaire tutunga obutaikirizana, Ow’eishe-emwe Woodworth akaba agira ati: “Ebi Yehova atwire naakora ni birungi munonga oyihireho obutahikiirira bw’abantu abu arikukoresa.”

Ow’eishe-emwe Frederick W. Franz nawe akaba ari naitwe, kandi akatuhwera twena. Akaba ari omunyabwengye kandi arikumanya gye Baibuli. Kandi akaba naafayo ahari buri omwe ahariitwe. Harry Peterson niwe yaabaire ari omuteeki waitu. Kikaba nikitworobera kukoresa eiziina rye erya kabiri omu mwanya gw’eiziina rye ryenyine, Papargyropoulos. Nawe akaba ari omwe aha bashukirweho amajuta, kandi akaba naakunda kubuurira. Ow’eishe-emwe Peterson akaba naakora gye emirimo ye aha Beseeli, kwonka n’okubuurira akaba atarikukunagiirira. Akaba agaba magaziini nyingi omu kwezi. Nawe akaba naamanya gye Baibuli, kandi akaba naabaasa kugarukamu ebibuuzo bingi.

Aha iriisizo, tukaba tutebeekanisa ebijuma n’emboga tubita omu mikyebe. Emikyebe nka 45,000 ey’ebijuma n’emboga niyo yaabaire etebeekanisibwa kwija kuriibwa Ababeseeli. Nkakora na Etta Huth, munyaanyazi-itwe  omunyabwengye. Niwe yaabaire atuha ebirungo by’okukoresa omu kutebeekanisa ebijuma n’emboga. Banyaanyazi-itwe omu kicweka ekyo bakaba baija kukora naitwe, kandi Etta niwe yaabaire naabatebeekanisiza emirimo. N’obu Etta araabe yaabaire naamanya bingi aha bikwatiraine n’okutebeekanisa ebijuma n’emboga, butoosha akaba naaha ekitiinisa ab’eishe-emwe abaabaire nibareeberera iriisizo. Akatuteeraho eky’okureeberaho kirungi twena.

Angela Romano akaba ari omwe ahari banyaanyazi-itwe abato abaizire kuhwera aha iriisizo. Etta akaba amuhwereire obu yaija omu mazima. Angie naanye tukataaha omu bushwere omu Kwakana 1958, kandi tumazire emyaka 58 turikuheereza Yehova hamwe. Kumara emyaka mingi, Angie atwire naahamira ahari Yehova, kandi ekyo kibaasiise obushwere bwaitu kuhama. N’omunyabwengye, kandi nimbaasa kumwesigira kimwe n’obu twakuba twine buremeezi ki.

Ab’eishe-emwe ku baagurize ekyombeko ekyabaire kirimu WBBR aha kirwa Staten omuri 1957, nkaheereza aha Beseeli Brooklyn kumara akaire kakye. Nyowe na Angie ku twatahire omu bushwere, nkaruga aha Beseeli. Kumara emyaka eshatu, tukaba turi baapayoniya aha kirwa Staten. Kumara obwire, nkaba ninkorera abaaguzire radiyo yaitu, ei baayetsire WPOW.

Angie naanye tukaguma tutaine bintu bingi kugira ngu tubaase kuza kuheereza hoona ahu turikwetengwa. N’ekyarugiremu, omuri 1961 tukaikiriza kuza kuheereza nka baapayoniya ab’omutaano omuri Falls City, Nebraska. Kwonka ahonaaho ku twahikireho, bakatweta kuza South Lansing, omuri New York, kumara okwezi kumwe turi omu Ishomero ry’Obukama. Tukakunda okutendekwa oku twatungire, kandi tukaba nituteekateeka ngu twaruga omu ishomero eryo nitugaruka Nebraska. Kwonka kikatutangaaza ku twatungire obuheereza busya. Tukaba nituza kuheereza nk’abamiisani omuri Cambodia! Omu ihanga rirungi eryo eriri omu Asia, tukareeba, twahurira, kandi twaroza aha bintu bingi ebyabaire biri bisya ahariitwe. Buzima tukaba nitukunda kugambira abantu aha makuru marungi g’Obukama.

Kwonka embeera y’eby’obutegyeki ekahinduka omuri Cambodia, n’ahabw’ekyo tukaba twine kuza omuri Vietnam. Bwanyima y’emyaka ebiri nkarwara munonga, kandi eky’obusaasi tukaba twine kugaruka omuri United States. Nkaba nyine kutunga obwire kubaasa kuba gye. Ku naabaire gye, tukagaruka twaba baapayoniya.

Omu Kwakashatu 1965 tukatandika kuheereza ebibiina turikubitaayaayira. Kumara emyaka 33, Angie naanye tukaba nitutaayaayira ebibiina na disiturikiti, kandi tukaba nituhwera omu kutebeekanisa enteerane empango ez’ebiro bishatu. Nkaba ninkunda omurimo ogu, obu enteerane empango ez’ebiro bishatu zaabaire zirimu ebirikushemeza ahariinye. Kumara emyaka tukataayaayira ebibiina omu rurembo New York, kandi enteerane enyingi zikaba nizikira kuba omu kishaayi Yankee.

Angie naanye kumara emyaka tutungire obuheereza bwingi busya kandi obugumire. Omuri 1995, nkashabwa kwegyesa omu Ishomero  ry’Okutendeka Abaheereza. Bwanyima y’emyaka eshatu, bakagaruka baatweta aha Beseeli. Bwanyima y’emyaka 40, nkashemererwa kugaruka aha Beseeli, ahu naabaire ntandikiire obuheereza obw’omutaano. Kumara obwire, nkaba ninkora aha by’Obuheereza, kandi ndikwegyesa omu mashomero maingi g’obuheereza. Omu 2007, Akakiiko Akareeberezi kakataho Ekitongore ky’Amashomero g’Obuheereza kureebera amashomero goona ag’aha Beseeli, kandi kumara emyaka mingi niinye naabaire ninkikurira.

Omu myaka egi, habaireho empindahinduka nyingi omu mashomero aga. Eishomero ry’Abareeberezi b’Ekibiina rikatandika omu 2008. Kandi emyaka ebiri eyaakuratsireho, abareeberezi abarikurenga omu 12,000 nibo baizire Patterson na Brooklyn kwegyesibwa. Eishomero eri hati niriba omu myanya mingi. Omu 2010 eishomero ry’Okutendeka Abaheereza rikahindurwa ryayetwa Eishomero ry’Ab’eishe-emwe Abatakataahire omu Bushwere, kandi bwanyima hakatandikaho erindi eryabaire niryetwa Eishomero ry’Abakristaayo Abashweraine.

Omu Kwamwenda 2014, amashomero ago gakakorwamu eishomero rimwe ryayetwa Eishomero ry’Ababuurizi b’Obukama. Abarikurizamu nibabaasa kuba bari omu bushwere, nari abatakabugiiremu. Baingi omu nsi bakashemererwa munonga kumanya ngu nibabaasa kugira eishomero eri omu ihanga ryabo. Nikishemeza kureeba ngu baingi nibaija kutunga omugisha gw’okuza omu mashomero aga. Kandi ninshemererwa ahabw’omugisha ogu ntungire ogw’okumanya baingi abaakozire empindahinduka kwija kutunga okutendekwa oku.

Ku ndikuteekateeka obu naabaire ntakabatiziibwe ndi omu kaju karikufukiirira, kuhitsya na hati ninyebaza Yehova ahabw’abantu b’obwengye abu mbaasize kubugana. Baampwereire kwongyera kumanya gye Yehova n’okumuheereza gye. Abamwe bakaba bari bato ahariinye, kandi abandi barikunkira. Kandi baingi bakaba nibaruga omu nganda ezirikutaana n’orwangye. Kwonka mbaasize kureebera aha bikorwa byabo n’emiteekateekyere yaabo ngu nibakundira kimwe Yehova. Nikinyesiimisa kugira abanywani baingi omu baheereza ba Yehova abu nyegiireho ebintu bingi.