1, 2. Ahabw’enki turikuza kushwijuma ebyahikire aha bagabe bana ba Yuda?

WAABA orareebireho omuntu arikuterera akagwa omu muhanda, naiwe obundi noija kwegyendesereza waaba nooraba omu muhanda ogwo. Omu muringo nigwo gumwe, twashwijuma enshobe ezi abantu baakozire, nitubaasa kwetantara kukora enshobe nk’ezaabo. Nk’eky’okureeberaho, haine eki turikwegyera aha nshobe z’abantu abarikugambwaho omu Baibuli.

² Abagabe bana ba Yuda abu tugambireho omu kicweka ekihwaire, bakaheereza Yehova n’omutima gwabo gwona. Kwonka bakakora enshobe z’amaani. Ebirikubakwataho bikahandiikwa omu Baibuli kugira ngu tubiteekateekyeho kandi tubyegyereho. Nitubaasa kubyegyeraho ki, kandi nitubaasa kwetantara tuta kukora enshobe nk’ezi baakozire?—Shoma Abarooma 15:4.

3-5. (a) N’obu Asa araabe yaabaire ayemariire aha kuheereza Yehova, akakora nshobe ki? (b) Niki ekirikubaasa kuba kyareeteire Asa kwesiga abantu obu yaabaire naarwana na Baasha?

³ Ka tubanze tugambe ahari Asa. Akeesiga Yehova obu Abaesiopia akakaikuru kamwe baataahirira Yuda. Kwonka  akanga kwesiga Yehova obu yaabaire naarwana na Baasha, omugabe wa Israeli. Asa akaba naayenda kuremesa Baasha kuhamya orurembo Raama, orwabaire ruri rukuru omuri Israeli haihi n’emyatano y’obugabe bwa Yuda. (2 Obusingye 16:1-3) Asa akareeba ngu ni kirungi kuguriirira omugabe wa Siria kumuhwera. Abasiria ku baataahiriire endembo za Israeli, Baasha ahonaaho akarekyera aho “kwombeka Raama, yaayemereza omurimo.” (2 Obusingye 16:5) Omu kubanza, Asa naabaasa kuba yaateekateekire ngu acwiremu ekihikire.

⁴ Kwonka shi Yehova akeehurira ata? Yehova tarashemereirwe ahabw’okugira ngu Asa akanga kumwesiga, kandi akoohereza nabi Hanania kuhana Asa. (Shoma 2 Obusingye 16:7-9.) Hanania akagira Asa ati: “Okuruga hati noija kuguma noogira obweme” nari entaro. Omugabe Asa akeegarurira orurembo Raama, kwonka we n’abantu be bakaguma nibarwana entaro nyingi kuhitsya obu yaafa.

⁵ Omu kicweka ekihwaire, tureebire ngu Yehova akasiima Asa. N’obu Asa araabe yaabaire atahikiriire, Yehova akareeba ngu Asa akaba ayemariire aha kumuheereza. (1 Abagabe 15:14) N’obu kiraabe kiri kityo, Asa ku yaacwiremu kubi, akaba atarikubaasa kwetantara ebirikuruga omu kucwamu kubi kwe. Ahabw’enki yaayesigire emiteekateekyere ye, kandi akeesiga n’abantu abandi omu mwanya gw’okwesiga Yehova? Obundi Asa akateekateeka ngu naija kukoresa obukoryo burungi bw’ekiserukare kusingura orutaro. Nari naabaasa kuba yaahurikiize obuhabuzi bubi kuruga aha bandi.

6. Nitubaasa kwegyera ki aha nshobe za Asa? Ha eky’okureeberaho.

⁶ Nitubaasa kwegyera ki aha nshobe ya Asa? Omu mbeera zoona twine kwesiga Yehova, beitu etari miteekateekyere yaitu. Twine kumushaba obuhwezi, yaaba twine oburemeezi bw’amaani nari bukye. Ni kirungi kuteekateeka hari eki: Obumwe nitweyesiga twaba nitushoboorora oburemeezi omu muringo ogu turikuteekateeka ngu ni murungi? Nari nitubanza kuteekateeka aha bi Baibuli erikugamba reero tubikoresa kushoboorora oburemeezi? Nk’eky’okureeberaho, ka tugire ngu eka yaawe neekuremesa kuza omu ruteerane orukye nari oruhango. Noija kushaba Yehova kukuhwera kumanya eki oine kukora omu mbeera egyo? Nari ka tugire ngu bwanyima y’okumara obwire otaine murimo, waatunga omuntu orikwenda kukuha omurimo. Mbwenu shi noija kumugambira ngu buri saabiiti oine kuba nooza omu nteerane, ekirikubaasa kukureetera kutaheebwa omurimo ogwo? Oburemeezi bwona obu turikuba turimu, twine kwijuka obuhabuzi bw’omuhandiiki wa zaaburi obu: “Orugyendo rwawe orwegyekyerere Mukama; kandi omwesigye; nawe aryaruhikiiriza.”—Zaaburi 37:5.

7, 8. Yehoshafaati akakora nshobe ki, kandi hakarugamu ki? (Reeba ekishushani aha kutandika.)

⁷ Ka tureebe ebyahikire ahari mutabani wa Asa orikwetwa Yehoshafaati. Akaba aine emitwarize mirungi mingi ei Yehova yaabaire naasiima. Kandi ku yaabaire ayesiga Yehova, akaba akora ebintu birungi. Kwonka nabwo haine ebi yaacwiremu ebigwire. Nk’eky’okureeberaho, akakora entebeekanisa ngu omutabani ashwere muhara w’Omugabe mubi Ahabu. Bwanyima, Yehoshafaati akeegaita ahari Ahabu kurwanisa Abasiria, n’obu nabi Mikaaya yaamurabwire kutakikora. Omu rutaro, Abasiria bakatangiza Yehoshafaati kandi baateeraho kumwita. (2 Obusingye 18:1-32) Ku yaagarukire Yerusaalemu, nabi Yehu akamubuuza ati: “Oshemereire kuha ababi emikono, n’okukunda abarikwanga” Yehova?—Shoma 2 Obusingye 19:1-3.

⁸ Yehoshafaati akeegyera aha kyamuhikireho n’okurabura kwa nabi? Ngaaha buzima. N’obu Yehoshafaati araabe yaabaire naakikunda Yehova, kandi arikwenda kumushemeza, akagaruka yaakora omukago n’omushaija owaabaire atarikwenda kuramya Yehova. Omushaija ogu akaba ari Omugabe Ahazia, mutabani wa Ahabu. Yehoshafaati na Ahazia bakoombeka emeeri hamwe. Kwonka emeeri ezi baayombekire zikacweka n’okuzikoresa batakazikoreise.—2 Obusingye 20:35-37.

9. Nihabaasa kubaho ki twatoorana abanywani babi?

⁹ Nitubaasa kwegyera ki aha kyahikire ahari Yehoshafaati? Yehoshafaati akakora ekyabaire kihikire kandi yaasherura Yehova “n’omutima gwe gwona.” (2 Obusingye  22:9) Kwonka akacwamu kumara obwire ari n’abantu abaabaire batarikuheereza Yehova, kandi eki kikamureetera oburemeezi bw’amaani. Nangwa bakaba bari haihi n’okumwita. Ijuka enfumu y’omu Baibuli egi: “Ogyenda n’abanyabwengye, nawe ahinduka omunyabwengye, kwonka mugyenzi w’abashema aryakizira.” (Enfumu 13:20) Nituba nitwenda kugambira abandi ebirikukwata ahari Yehova. Kwonka, nikiba kiri eky’akabi munonga kunywana munonga abantu abatarikumuheereza.

10. (a) Twaba nitwenda kutaaha omu bushwere, niki eki turikubaasa kwegyera ahari Yehoshafaati? (b) Niki eki twine kwijuka?

¹⁰ Nk’eky’okureeberaho twaba nitwenda kutaaha omu bushwere, niki eki turikubaasa kwegyera ahari Yehoshafaati? Obundi nitubaasa kutandika kurigira omuntu otarikukunda Yehova. Nitubaasa kuteekateeka ngu titurikubaasa kutunga ow’okutaaha nawe omu bushwere omu barikuheereza Yehova. Nari bamwe aha banyabuzaare baitu nibabaasa kuguma nibatugambira ngu twine kutaaha omu bushwere tutakakuzire munonga. N’amazima Yehova akatuhanga twine ekyetengo ky’okundwa n’okukunda abandi. Kwonka shi ku twakuba tutatungire omuntu ohikire ow’okutaaha nawe omu bushwere, nitwija kukora ki? Ekintu kimwe ekirikubaasa kutuhwera n’okuteekateeka aha kyahikire ahari Yehoshafaati. Akaba ashaba Yehova obuhabuzi. (2 Obusingye 18:4-6) Kwonka ku yaahindukire munywani wa Ahabu, owaabaire atarikukunda Yehova, akeehuzya okurabura kwa Yehova. Yehoshafaati akaba ashemereire kwijuka ngu “amaisho ga Mukama gairuka oku n’oku nigabuga ensi yoona, okweyoreka ku ari ow’amaani kuhwera abaine emitima eshugaine ahariwe.” (2 Obusingye 16:9) Naitwe tushemereire kwijuka ngu Yehova naayenda kutuhwera. Naayetegyereza embeera zaitu kandi naatukunda. Noikiriza ngu Ruhanga naija kwigutsa ekyetengo kyawe eky’okukundwa n’okutunga ow’okuba nawe? Gira obuhame ngu naija kurugaho ekyo naakikora!

11, 12. (a) Hezekia akakora ki ekyayorekire ebiri omu mutima gwe? (b) Ahabw’enki Yehova yaasaasiire Hezekia?

¹¹ Nitubaasa kwegyera ki ahari Hezekia? Yehova akahwera Hezekia kureeba ebyabaire biri omu mutima gwe. (Shoma 2 Obusingye 32:31.) Hezekia akarwara munonga, Ruhanga akamugira ngu akaba naija kuba gye, kandi yaamuha n’akamanyiso kumuhamiza. Yehova akareetera ekicuucu kugaruka enyima entambwe ikumi. Bwanyima, nikireebeka ngu abanyiginya ba Babulooni bakaba nibenda kumanya ebirikukwata aha kamanyiso ako, kandi bakoohereza abashaija, owa Hezekia kumubuuza. (2 Abagabe 20:8-13; 2 Obusingye 32:24) Yehova taragambiire Hezekia oku yaabaire  aine kubatwariza. Baibuli neegira ngu Yehova “akabimurekyera” kureeba eki araakore. Abashaija abaarugire Babulooni Hezekia akabooreka eby’omuhendo byona ebi yaabaire aine. Eki kikooreka ebyabaire biri omu mutima gwa Hezekia. Mu muringo ki?

¹² Eki kikooreka ngu Hezekia akaba atandikire kugira amaryo. N’ekyarugiremu, tarakozire “nk’embabazi ezi yaagiriirwe oku zaabaire ziri.” Baibuli terikworeka ahabw’enki emiteekateekyere ye yaahindukire. Obundi n’ahabw’obusinguzi obu yaatungire obu yaasingura Abasiria nari n’ahabw’okugira ngu Yehova akamukiza. Nari n’ahabw’okuba akaba ari omugaiga, kandi arikumanywa munonga. N’obu Hezekia araabe yaaheereize Yehova n’omutima gwe gwona, akagira amaryo, kandi ekyo tikirashemeize Yehova. Ku haahingwireho obwire, “Hezekia yaayecureeza,” kandi Ruhanga akamusaasira.—2 Obusingye 32:25-27; Zaaburi 138:6.

13, 14. (a) Ni mbeera ki erikubaasa kworeka ebiri omu mitima yaitu? (b) Tushemereire kutwaza tuta abandi baatusiima?

¹³ Niki eki turikwegyera ahari Hezekia n’enshobe ei yaakozire? Ijuka ngu Hezekia akagira amaryo ahonaaho Yehova aherize kumuhwera kusingura Abasiria n’okumukiza endwara ye. Mbwenu shi twatunga ebirungi nari abandi bakatusiima, nitwija kutwaza tuta? Omuringo ogu turikutwazamu nigubaasa kworeka ekiri omu mutima gwaitu. Nk’eky’okureeberaho, ow’eishe-emwe naabaasa kuba akozire munonga kutebeekanisa orubazo, kandi akaruha omu maisho g’abantu baingi. Abantu baingi nibamusiima ahabw’okutebeekanisa orubazo kandi akaruha. Naija kutwaza ata baamusiima?

¹⁴ Butoosha twine kuguma nitwijuka ebi Yesu yaagambire obu yaagira ati: “Ku muragume mwaheza kukora byona ebi muragiirwe, mugire muti: Turi abahuuku abataine mugasho; ebi twakora nibyo ebyo ebi tushemereire kukora.” (Luka 17:10) Ijuka ngu obu Hezekia yaagira amaryo, tarasiimire oku Yehova yaabaire amuhwereire. Mbwenu shi abandi baatusiima ahabw’orubazo oru twaha, niki ekiraatuhwere kuguma turi abacureezi? Nitubaasa kuteekateeka aha bi Yehova atukoreire. Kandi nitubaasa kumugambaho, n’oku atuhwereire. Ahakuba niwe arikuba atuhaire Baibuli n’omwoyo gwe gurikwera, kubaasa kutebeekanisa orubazo.

15, 16. Yosia akakora ki ekyamurugiiremu okufa?

¹⁵ Turikuhendera, niki eki turikwegyera ahari Yosia? N’obu Yosia araabe yaabaire ari omugabe murungi, akakora enshobe ezaarugiremu okufa kwe. (Shoma 2 Obusingye 35:20-22.) Niki ekyabaireho? Yosia akarwana orutaro na Neeko, omugabe wa Misri, n’obu haraabe haabaire hatariho nshonga eshemereire kumureetera kukikora. Nangwa na Neeko akagambira Yosia ngu we akaba atarikwenda kurwana nawe.  Baibuli neegira ngu ebigambo bya Neeko bikaba birugire “omu kanwa ka Ruhanga.” Kwonka Yosia akagumizamu yaaza omu rutaro yaitirwayo. Mbwenu shi ahabw’enki yaarwanire na Neeko? Baibuli terikworeka enshonga.

¹⁶ Yosia akaba aine kuhamya yaaba ebi Neeko yaagambire bikaba nibiruga ahari Yehova. Ata shi? Akaba naabaasa kubuuza Yeremia, omwe ahari baanabi ba Yehova. (2 Obusingye 35:23, 25) Kandi, Yosia akaba aine kumanya enshonga ezihikire. Neeko akaba naaza Kakemeshi kurwanisa eihanga erindi, beitu etari Yerusaalemu. Kandi Neeko tarateireho kugwisa kubi Yehova nari abaheereza be. Yosia tarateekateekire aha nshonga ezi atakacwiremu. Eki nitukyegaho ki? Twaba twine oburemeezi kandi turikwenda kucwamu, tushemereire kubanza twateekateeka aha ki Yehova arikwenda ngu tukore.

17. Twaba twine oburemeezi, nitubaasa kwetantara tuta okukora enshobe nk’ei Yosia yaakozire?

¹⁷ Twaba twine kucwamu, tushemereire kubanza twateekateeka aha misingye ya Baibuli erikubaasa kutuhwera, kandi tumanye n’oku turikubaasa kugigyenderaho. Obumwe, nituba twine kucoondoza omu bitabo byaitu nari kushaba omureeberezi kutuha obuhabuzi. Naabaasa kutuhwera kuteekateeka aha misingye ya Baibuli endiijo. Teekateeka aha mbeera egi: Munyaanyazi-itwe ari omu bushwere n’otari Mujurizi wa Yehova. Aine entebeekanisa y’okuza kubuurira aha izooba nanka. (Ebyakozirwe 4:20) Kwonka aha izooba eryo, iba tarikwenda ngu aze omu kubuurira. Iba amugira ngu bamazire omwanya muraingwa batarikubaho hamwe, kandi ngu haine ahu arikwenda kumutwara. Munyaanyazi-itwe ateekateeka aha misingye ya Baibuli erikubaasa kumuhwera kucwamu gye. Naamanya ngu aine kworobera Ruhanga, kandi ngu Yesu akaha ekiragiro ngu twine kuhindura abantu abeegi. (Matayo 28:19, 20; Ebyakozirwe 5:29) Kwonka nabwo aijuka ngu omukazi aine kworobera iba, kandi ngu abaheereza ba Ruhanga baine kugira emiteekateekyere etagwereire rubaju. (Abaefeso 5:22-24; Abafilipi 4:5) Mbwenu shi iba ariyo naateeraho kumuremesa kubuurira, nari naayenda kubaho nawe eizooba eryo? Abaheereza ba Yehova nitwenda kucwamu ebitarikugwera orubaju, kandi ebirikushemeza Yehova.

18. Noobaasa kwega ki waateekateeka aha byahikire aha bagabe bana ba Yuda?

¹⁸ Naitwe nitubaasa kukora enshobe ezi abagabe baana ba Yuda baakozire. Nitubaasa (1) kwesiga emiteekateekyere yaitu, (2) kutoorana abanywani babi, (3) kugira amaryo, nari (4) kucwamu tutabandize kuteekateeka aha ki Ruhanga arikwenda. N’obu kiraabe kiri kityo, tihariho enshonga eshemereire kutureetera kuteekateeka ngu titurikubaasa kushemeza Yehova. Naatureebamu ebirungi nk’oku yaabireebire omu bagabe bana abo. Kandi Yehova naareeba oku turikumukunda n’oku turikwenda kumuheereza. N’ahabw’ekyo atuhaire eby’okureeberaho ebirikubaasa kutuhwera kwetantara okukora enshobe z’amaani. Ka tuteekateekye ahari ebyo ebihandiikirwe omu Baibuli, kandi twebaze Yehova ahabw’okubituha!