1, 2. (a) Ni kurabura ki okukirize bantu baingi? (Reeba ekishushani aha kutandika.) (b) Abaheereza ba Ruhanga baine buhabuzi ki oburikubaasa kubakiza?

“YEMERERA, REEBA, HURIKIZA.” Ebigambo ebyo bikirize abantu nyamwingi. Emyaka erikurenga 100 enyima, ebyapa ebirikworeka ebigambo ebyo bikaba bihanikire ahu enguuto z’egaari y’omwika zirikurabaniraho n’ez’emotoka omuri North America. Ahabwa nshonga ki? Ahabw’okwenda kuzibira ebiiruka kuraba aha ruguto orwo omu bwire butahikire reero bikatomerwa egaari y’omwika. Buzima, okuta omutima aha kurabura okwo kikirize abantu.

² Oku Yehova arikutuhabura nikukirira kimwe okuhanika ebyapa by’okurabura. Naayebembera abantu be kugira ngu babaase kukira akabi, reero batunge amagara agatahwaho. Yehova ni nk’omuriisa w’entaama orikwebembera gye entaama ze kandi akazihabura kwetantara omuhanda mubi.​—Shoma Isaaya 30:20, 21.

3. Abantu boona bakaza bata omu muhanda gw’okufa?

³ Kuruga ira, Yehova atwire naaha abantu obuhabuzi nari eby’okukuratira. Nk’eky’okureeberaho, omu kibanja Edeni, Yehova  akaha abantu obuhabuzi obwabaire nibubaasa kubeebembera kutunga amagara agatahwaho n’okushemererwa. (Kut. 2:15-17) Ku ogire ngu Adamu na Haawa bakoorobera obuhabuzi obwo, bakaba nibaija kukira akabi k’obugomi, nibwo busaasi n’okufa n’okutagira matsiko. Haawa omu mwanya gw’okworoba, akahurikiza obuhabuzi obwabaire nibureebeka nk’oburikugambwa enjoka. Adamu, nawe akahurikiza iraka ry’omukazi we. Bombi bakeehuzya obuhabuzi bwa Ishebo. Ekyarugiremu, abantu boona bakaza omu muhanda gw’okufa.

4. (a) Ahabw’enki Ruhanga yaahaire obuhabuzi obundi bwanyima y’omwegyemure? (b) Embeera nsya zikooreka zita emiteekateekyere ya Ruhanga?

⁴ Omu biro bya Noa, Ruhanga akaha obuhabuzi obwakirize abantu. Bwanyima y’omwegyemure, Yehova akaha ekiragiro ekirikuzibira abantu kurya eshagama. Ahabw’enki ekyo kyabaire nikyetengyesa? Ahakuba hakaijaho embeera nsya. Yehova akaikiriza abantu kurya enyama y’enyamaishwa. Kwonka bakaba baine kukuratira obuhabuzi obu “mutarirya enyama n’amagara gaayo, niyo shagama yaayo.” (Kut. 9:1-4) Embeera nsya egi ekooreka gye emiteekateekyere ya Ruhanga aha kintu eki aineho obushoboorozi, nigo magara. Nk’omuhangi kandi obukomooko bw’amagara, aine obushoboorozi kutuha ebiragiro ebirikukwata aha magara gaitu. Nk’eky’okureeberaho, akaragiira abantu ngu tibashemereire kwita bagyenzi baabo. Naatwara amagara n’eshagama nk’ebirikwera, kandi naafubira omuntu weena otarikubiha ekitiinisa.​—Kut. 9:5, 6.

5. Nituza kushwijuma ki, kandi n’ahabw’enki?

⁵ Ka tureebe oku Ruhanga atwire naaha obuhabuzi kumara ebyasha bingi. Ebi turaareebe nibiija kutuhwera kumariirira kukuratira obuhabuzi bwa Yehova kuhika omu nsi ensya.

6. Ahabw’enki Abaisraeli baabaire baine kworobera ebiragiro bya Musa, kandi bakaba baine kugira miteekateekyere ki?

⁶ Omu biro bya Musa, hakaba niheetengyesa obuhabuzi burungi oburikukwata aha mitwarize n’okuramya. Ahabw’enki? Nabwo, embeera zikaba zihindukire. Kumara obwire oburengire ebyasha bibiri, Abaisraeli bakaba bari abahuuku omuri Misri ei abantu baabaire nibaramya abafu, ebishushani, baine n’enyikiriza ezindi, n’ebikorwa ebitarikuhaisa Ruhanga ekitiinisa. Ku baarugire omu butegyeki bubi obwo, bakaba baine kutunga obuhabuzi busya. Bakaba nibaija kuhinduka eihanga eririkukuratira ebiragiro bya Yehova byonka. Ebitabo ebimwe nibigira ngu ekigambo ky’Oruheburaayo “ebiragiro” kiine amakuru “g’okuhabura, okwebembera, n’okuragiira.” Ebiragiro bikakora nk’ekisiika ky’okurinda Abaisraeli kuteejumba omu bushambani n’ediini z’ebishuba ez’amahanga agaabaire gabetooroire. Abaisraeli ku baabaire bahurikiza Ruhanga, bakaba batunga emigisha. Ku baabaire banga kumuhurikiza, bakaba bahikwaho akabi.​—Shoma Eky’Ebiragiro 28:1, 2, 15.

7. (a) Shoboorora ahabw’enki Yehova yaahaire abaheereza be obuhabuzi. (b) Ebiragiro bikaba bita omwegyesa w’Abaisraeli?

⁷ Obuhabuzi bukaba nibwetengyesa ahabw’enshonga endiijo. Ebiragiro bikahwera Abaisraeli kwetebeekanisiza ekintu kikuru ekirikukwata aha kigyendererwa kya Yehova. Nikwo kwija kwa Mesia, Yesu Kristo. Ebiragiro bikaba biijutsya Abaisraeli ngu tibahikiriire. Kandi bikabahwera kwetegyereza ngu bakaba nibeetenga ekitambo, nikyo kiheebwayo ekihikiriire ekyabaire nikibaasa kwihiraho kimwe ekibi. (Gal. 3:19; Heb. 10:1-10) Kandi, ebiragiro bikahwera omu kurinda obukomooko bwa Mesia n’okumumanyisa abantu ku yaareebekire. Buzima, ebiragiro bikakora nk’omurezi  w’obwire bukye, nari “omwegyesa” w’okuhitsya ahari Kristo.​—Gal. 3:23, 24.

8. Ahabw’enki twine kugyendera aha misingye eri omu Biragiro?

⁸ Naitwe Abakristaayo nitubaasa kugasirwa omu buhabuzi obwabaire buri omu Biragiro ebyahairwe eihanga rya Israeli. Mu muringo ki? Nitubaasa kwetegyereza emisingye eri omu Biragiro. N’obu turaabe tutarikutegyekwa ebiragiro ebyo, bingi aharibyo birimu obuhabuzi oburikwesigwa oburikubaasa kutuhwera omu bi turikukora buri izooba, n’omu kuramya Ruhanga waitu orikwera Yehova. Akahwera abantu baahandiika ebiragiro ebyo omu Baibuli kugira ngu tugire eki twabyegamu, tugyendere aha misingye yaabyo, kandi ngu tushemererwe ahabw’okugira ngu Yesu akatwegyesa ekintu ekirikukira Ebiragiro. Yetegyereze eki Yesu yaagambire, obu yaagira ati: “Mukahurira ku kyaragiirwe ngu: Otarishambana. Kwonka nyowe nimbagambira nti: Orikureeba omukazi akamwetenga, biri aherize kumushambanaho omu mutima gwe.” N’ahabw’ekyo, titwine kwetantara ekikorwa ky’obushambani kyonka, beitu n’ekyetengo kyona ekibi ekirikubaasa kurugamu obushambani.​—Mat. 5:27, 28.

9. Hakabaho mbeera ki ensya ezaareeteire Yehova kuha obuhabuzi busya?

⁹ Yesu ku yaizire nka Mesia, Yehova akaha obuhabuzi busya kandi yaayoreka na bingi ebirikukwata aha kigyendererwa kye. Ahabw’enki? Ahabw’okuba hakabaho embeera nsya ezindi. Omu mwaka gwa 33, Yehova akaiha emigisha ye aha ihanga rya Israeli yaatandika kugiha ekibiina Ekikristaayo.

10. Ahabw’enki Abakristaayo baahairwe ebiragiro bisya, kandi bikaba nibitaana bita n’eby’Abaisraeli?

¹⁰ Omu kyasha ky’okubanza, abaheereza ba Ruhanga abaabaire bari omu kibiina Ekikristaayo, bakatunga obuhabuzi busya aha bikwatiraine n’okuramya n’emitwarize. Abaheereza ba Ruhanga aba abeehaireyo bakaba bari omu ndagaano nsya. Ebiragiro bya Musa bikaba bihairwe eihanga rimwe ryonka, Israeli. Okutaana n’ekyo, Israeli ey’omwoyo ekaba neija kuba erimu abantu kuruga omu mahanga mingi n’obukomooko butarikushushana. Buzima, ‘Ruhanga tarikushoroora mu bantu, kureka omu mahanga goona orikumutiina, akakora eby’okuhikiirira, ogwo niwe arikusiimwa.’ (Byak. 10:34, 35) Ebiragiro bya Musa bikeebembera Abaisraeli omu Nsi Eyaaraganisiibwe kandi bikaba bihandiikirwe aha mabaare. Kwonka aha Baisraeli ab’omwoyo, “ekiragiro kya Kristo” kikaba nikyegamira aha misingye kandi kihandiikirwe aha mitima yaabo. “Ekiragiro kya Kristo” kikaba nikiija kugasira Abakristaayo hoona ahu barikutuura.​—Gal. 6:2.

11. Ni biragiro ki bibiri ebirikutwarirwa omu ‘kiragiro kya Kristo’ ebirikukwata aha mitwarize y’Abakristaayo?

¹¹ Israeli ey’omwoyo ekaba neija kugasirwa omu buhabuzi bwa Ruhanga kurabira omu Mwana we. Obwire bukye Yesu atakatandikireho endagaano ensya, akaha ebiragiro bibiri bikuru. Kimwe kikaba nikikwata aha murimo gw’okubuurira. Ekindi kikaba nikikwata aha mitwarize y’abakuratsi be n’oku baine kutwariza ab’eishe-emwe bagyenzi baabo. Ebiragiro ebi bikaba biri eby’Abakristaayo boona, n’ahabw’ekyo nibitukwataho twena obunaku obu, yaaba twine amatsiko g’okuza omu iguru nari ag’okutuura omu nsi.

12. Ni kintu ki ekisya ekyabaireho omu murimo gw’okubuurira?

¹² Teekateeka aha murimo gw’okubuurira amakuru marungi ogu abakuratsi ba Yesu baabaire nibaija kukora. Emiringo y’okubuurira n’obuhango bw’omurimo ogwo, byona bikaba biri bisya. Ira, abantu b’amahanga  bakaba baakiirwa ku baabaire baija omuri Israeli kuheereza Yehova. (1 Bag. 8:41-43) Obwo ni ira Yesu atakahaire ekiragiro ekiri omuri Matayo 28:19, 20. (Kishome.) Abeegi ba Yesu bakaragiirwa ‘kugyenda’ kubuurira abantu boona. Aha izooba rya Pentekoote omu gwa 33, Yehova akooreka ngu akaba naayenda ngu amakuru marungi gabuurirwe omu nsi yoona. Omwoyo gwe gurikwera kukaha amaani abantu 120 abaabaire bari omu kibiina kisya, kugamba omu muringo gw’eky’okutangaaza endimi zitarikushushana ez’Abayudaaya n’ez’abaahindukire. (Byak. 2:4-11) Ekyakuratsireho, Samaria ekeeyongyera aha kicweka ky’okubuuriramu. Bwanyima omu mwaka gwa 36, bakeeyongyerayo kuza kubuurira Abanyamahanga abatashazirwe. Ekyo nikimanyisa ngu Abakristaayo bakaba baine kubuurira buri omwe omu nsi!

13, 14. (a) Niki ekirikutwarirwa omu ‘kiragiro kisya’ ekya Yesu? (b) Nitwega ki aha ky’okureeberaho eki Yesu yaateireho?

¹³ Hati ka tureebe oku turikutwariza ab’eishe-emwe bagyenzi baitu. Yesu akatandikaho “ekiragiro kisya.” (Shoma Yohaana 13:34, 35.) Ekiragiro ekyo tikirikutwariramu okukundana omu mbeera eza butoosha kwonka, beitu n’okuba tweteekateekire kufeererera ab’eishe-emwe bagyenzi baitu. Enshonga egi ebiragiro bya Musa bikaba bitarikugigambaho.​—Mat. 22:39; 1 Yoh. 3:16.

¹⁴ Yesu akatuteeraho eky’okureeberaho kirungi. Akaba naakunda abeegi be omu muringo gw’okwefeerereza. Akaba naakunda abeegi be munonga kandi akaba ayeteekateekire kubafeera. Kandi naayenda ngu abakuratsi be boona bakore batyo. N’ahabw’ekyo twine kuba tweteekateekire kuraba omu mbeera zigumire, nangwa n’okufeererera ab’eishe-emwe bagyenzi baitu.​—1 Tes. 2:8.

15, 16. Obunaku obu twine mbeera ki ensya, kandi Ruhanga naatwebembera ata?

¹⁵ Kuruga obu Yesu yaataho ‘omwambari omwesigwa kandi ow’obwengye,’ atwire naaha abantu be eby’okurya eby’omwoyo omu bwire obuhikire. (Mat. 24:45-47) Eby’okurya ebi nibitwariramu obuhabuzi bw’omuhendo oburikukwata aha mbeera nsya.

¹⁶ Turi omu bwire obu Baibuli erikweta ‘ebiro by’emperu,’ kandi omumaisho hariyo okubonabona kwingi okutakabahoga. (2 Tim. 3:1; Mak. 13:19) Sitaane na baadaimoni be bakabingwa omu iguru baanagwa omu nsi, ekireeteire abantu omu nsi kubonabona munonga. (Kush. 12:9, 12) Kandi, nitworobera ekiragiro kya Yesu turikubuurira omu nsi yoona abantu baingi omu ndimi nyingi kukira ira!

17, 18. Tushemereire kutwara tuta obuhabuzi oburikutuheebwa?

¹⁷ Ekibiina kya Ruhanga kituhaire ebintu bingi ebirikutuhwera omu murimo gw’okubuurira. Noobikoresa? Omu nteerane zaitu nitutunga obuhabuzi aha bikwatiraine n’oku turikubaasa kubikoresa omu muringo murungi. Nooreeba obuhabuzi obu nk’oburikuruga ahari Yehova?

¹⁸ Buzima, kubaasa kuguma nitutunga emigisha ya Ruhanga, twine kuta omutima aha buhabuzi bwona oburikutuheebwa kurabira omu kibiina Ekikristaayo. Ku turaabe nitworoba hati, nikiija kutuhwera kukuratira obuhabuzi omu ‘kubonabona kwingi,’ obu ensi ya Sitaane yoona eraacwekyerezibwe. (Mat. 24:21) N’ahabw’ekyo, nitwija kwetenga obuhabuzi busya kubaasa kutuura omu nsi ensya etarimu ebikorwa bya Sitaane.

19, 20. Ni mizingo ki erikwija kushuuruurwa, kandi nihaija kurugamu ki?

¹⁹ Omu biro bya Musa, eihanga rya Israeli rikaba niryetenga obuhabuzi, n’ahabw’ekyo  Ruhanga akabaha Ebiragiro. Bwanyima ekibiina Ekikristaayo kikaba kiine kukuratira “ekiragiro kya Kristo.” Nikyo kimwe, Baibuli neegira ngu omu nsi ensya, nitwija kutunga emizingo emisya erimu obuhabuzi busya. (Shoma Okushuuruurwa 20:12.) Emizingo egi neebaasa kwija kuba neeshoboorora ebi Ruhanga arikwenda ngu abantu bakore omu bwire obwo. Abantu boona otwariiremu n’abaraazookye, nibaija kumanya eki Ruhanga arikwenda ngu bakore. Emizingo egyo neija kutuhwera kwega bingi ebirikukwata aha miteekateekyere ya Yehova. Kandi nitwija kwetegyereza gye ebiri omu Kigambo kya Ruhanga, n’ahabw’ekyo abantu omu Paradiso nibaija kuba nibakundana kandi nibahaana ekitiinisa. (Isa. 26:9) Ka nitwija kwega bingi kandi tukabyegyesa abandi turikwebemberwa Omugabe waitu Yesu Kristo!

²⁰ Abaraatungye amagara agatahwaho n’abo abaraakuratire ‘ebihandiikirwe omu’ mizingo. Abo abaraagume niboorobera Ruhanga kuraba omu kugyezibwa kw’aha muheru, amaziina gaabo Yehova naija kugahandiikira kimwe omu kitabo ‘ky’amagara.’ Buzima nitwija kutunga amagara agatahwaho! N’ahabw’ekyo TWAYEMERERA, tukateekateeka aha Kigambo kya Ruhanga, TUKAREEBA kubaasa kwetegyereza eki kirikumanyisa ahariitwe, kandi TUKAHURIKIZA turikworobera obuhabuzi bwa Ruhanga hati, nitugira amatsiko g’okuhonokaho omu kubonabona kwingi, n’ag’okwija kwega ebiro byona ahari Yehova Ruhanga waitu ow’obwengye na rukundo.​—Mub. 3:11; Rom. 11:33.