1, 2. (a) Niki ekirikushemeza abaheereza ba Ruhanga obunaku obu? (b) Abazaire Abakristaayo n’abareeberezi nibabaasa kuhwera bata abato kwetegyereza amakuru g’okubatizibwa?

OMUREEBEREZI akagambira Christopher ow’emyaka 12 ati: “Ntwire ninkumanya kuruga obu waazaarwa, kandi nshemereirwe ku mpuriire ngu nooyenda kubatizibwa. Niinyenda kukubuuza, ‘Ahabw’enki nooyenda kubatizibwa?’” Omureeberezi ogwo akaba aine ekigyendererwa kirungi kubuuza ekibuuzo ekyo. Twena nikitureetera okushemererwa kureeba eminyeeto baingi munonga omu nsi yoona nibabatizibwa buri mwaka. (Mub. 12:1) Kwonka, abazaire Abakristaayo n’abareeberezi omu kibiina nibaba nibenda ngu abato betegyereze amakuru g’okubatizibwa kandi beecweremu kubatizibwa.

 ² Ekigambo kya Ruhanga nikyoreka ngu okwehayo n’okubatizibwa n’entandikiriro y’Omukristaayo ey’okutunga emigisha ya Yehova n’okutandika kuhiiganisibwa Sitaane. (Enf. 10:22; 1 Pet. 5:8) N’ahabw’ekyo, abazaire Abakristaayo nibatwara obwire kwegyesa abaana baabo ekirikutwarirwa omu kuba omwegi wa Kristo. Eminyeeto abataine abazaire Abakristaayo, abareeberezi omu kibiina nibabahwera kumanya ekirikutwarirwa omu kuba abeegi ba Kristo. (Shoma Luka 14:27-30.) Nk’oku kirikwetengyesa okubariirira gye kubaasa kuheza ekyombeko, nikyetengyesa okutebeekanisa gye kuheereza Yehova omu bwesigwa “kuhitsya aha muheru.” (Mat. 24:13) Kwonka shi abato bo nibabaasa kukora ki kumariirira kuheereza Yehova ebiro byona? Ka tureebe.

3. (a) Ebigambo bya Yesu na Petero nibitwegyesa ki aha bukuru bw’okubatizibwa? (Mat. 28:19, 20; 1 Pet. 3:21) (b) Ni bibuuzo ki ebi turaashwijume, kandi n’ahabw’enki?

³ Ori omunyeeto orikwenda kubatizibwa? Ku kiraabe nikwo kiri, noosiimwa munonga! N’omugisha gw’amaani munonga kubatizibwa okaba omwe aha Bajurizi ba Yehova. Kandi boona abarikwenda kuba Abakristaayo baine kubatizibwa, kandi okubatizibwa n’eidaara rikuru ery’okutunga okujunwa. (Mat. 28:19, 20; 1 Pet. 3:21) Ahabw’okugira ngu nooba oine ekyetengo ky’okuhikiiriza ebi orikuraganisa Yehova, oine kuba oyetebeekanisiize gye eidaara rikuru eri. N’ahabw’ekyo, okuteekateeka aha bibuuzo bishatu ebi nikibaasa kukuhwera kureeba ku oraabe oyeteekateekire kubatizibwa. Ebibuuzo nibyo ebi: (1) Nkuzire ekirikumara kubaasa kwecweramu? (2) Nyine ekyetengo ky’okukora ekyo? (3) Ninyetegyereza gye eki kirikumanyisa okwehayo ahari Yehova? Ka tushwijume ebibuuzo ebyo.

4, 5. (a) Ahabw’enki okubatizibwa kutari okw’abakuru omu myaka bonka? (b) Nikimanyisa ki Omukristaayo kuba okuzire?

⁴ Baibuli terikworeka ngu abakuzire omu myaka bonka nari abaine emyaka eti n’eti nibo baine kubatizibwa. Enfumu 20:11 nihagira hati: “Omuntu n’obu yaakuba  omwana amanyirwa aha bi arikukora, omurimo gwe gwaba gushemeire, kandi guhikire.” Orikuba ari muto omu myaka naabaasa kumanya eki kirikumanyisa okukora ekihikire n’okwehayo aha Muhangi we. N’ahabw’ekyo, okubatizibwa n’eidaara rikuru kandi erishemeire aha munyeeto orikworeka ngu akuzire kandi oyehaireyo ahari Yehova.​—Enf. 20:7.

⁵ Okuba okuzire nikimanyisa ki? Okukura nikitwariramu ekirikukira aha kukura omu myaka. Baibuli neegira ngu abantu abakuzire “emitima yaabo eherize kumanyiira kutaanisa ekirungi n’ekibi.” (Heb. 5:14) N’ahabw’ekyo, abantu abakuzire nibamanya ekihikire omu maisho ga Yehova kandi nibamariirira omu mitima yaabo kukihamiraho. N’ekirikurugamu, tibarikurahuka kubeihwabeihwa kukora ebitahikire, nari butoosha kuba nibabagyema kukora ekihikire. Buzima, nikiba kiri eky’oburyo kuteekateeka ngu eminyeeto abarikubatizibwa nibaija kuhamira aha mitindo ya Ruhanga n’obu abazaire baabo nari abakuru abandi baakuba batariho.​—Gyeragyeranisa Abafilipi 2:12

6, 7. (a) Danieli akaba ari mu mbeera ki ezigumire obu yaabaire ari omu Babulooni. (b) Danieli akooreka ata ngu akuzire?

⁶ Mbwenu shi eminyeeto nibabaasa kworeka ngu bakuzire? Teekateeka ahari Danieli. Naabaasa kuba yaabaire aine emyaka nka ikumi n’eshatu obu yaatwarwa kifuba kuruga aha bazaire kuza omu buzaahe omuri Babulooni. Ahonaaho Danieli akeeshanga naatuura n’abantu abaabaire baine emiteekateekyere y’omutaano aha kihikire n’ekigwire. Okwongyera ahari ekyo, haine ekindi ekyareeteire embeera ya Danieli kuguma. Omuri Babulooni akaba naatwarwa nk’ow’omutaano. Danieli akaba ari omwe aha batsigazi bato abatoorainwe kwemerera omu maisho g’omugabe! (Dan. 1:3-5, 13) Danieli akaba aine emigisha mingi y’okutunga ebirungi omuri Babulooni okukira omuri Israeli.

⁷ Danieli akatwaza ata omuri ebyo byona? Mbwenu shi akabeihwabeihwa ebirungi ebyabaire biri omuri Babulooni? Tugire ngu shi akaikiriza ebi mwetooroire kumuhindura nari kutuubya okwikiriza kwe? Ngaaha buzima! Baibuli neegira ngu obu Danieli yaabaire ari omuri Babulooni, akamariirira “omu mutima gwe okuteeshiisha” n’ekintu kyona ekiine akakwate n’okuramya kw’ebishuba. (Dan. 1:8) Danieli akooreka ngu buzima akuzire!

8. Niki eki orikubaasa kwegyera ahari Danieli?

⁸ Noobaasa kwegyera ki ahari Danieli? Omuntu omuto kwonka orikuba akuzire omu by’omwoyo naahamira aha bi arikwikiriza nangwa n’omu mbeera zigumire. Naaba atari nk’enyaruju, erikuhindura erangi kuhikaana n’omwanya ogu erimu. Tarikutwaza nka munywani wa Ruhanga aha Kyombeko ky’Obukama reero akaba munywani w’ensi yaaba ari aha ishomero. Omu mwanya gw’okwehindahindura, naahamira ahari Yehova n’omu kugyezibwa kw’amaani.​—Shoma Abaefeso 4:14, 15.

9, 10. (a) Omuto naabaasa kugasirwa ata yaateekateeka aha ku yaatwarize obu yaabaire naagyezibwa? (b) Okubatizibwa nikimanyisa ki?

⁹ Tihariho ohikiriire, abato n’abakuru boona obumwe n’obumwe nibakora enshobe. (Mub. 7:20) Kwonka waaba nooyenda kubatizibwa, nikiba kiri eky’obwengye kweshwijuma kumanya yaaba omaririire kuhamira aha mitindo ya Yehova. Noobaasa kupima ota okumariirira kwawe? Yebuuze oti: ‘Ntwire ninyorobera Yehova kumara obwire?’ Teekateeka oku waatwarize obu waabaire noogyezibwa. Waayorekire ngu buzima noobaasa kutaanisa ekibi  n’ekirungi? Kandi shi omuntu omu nsi ya Sitaane ku yaakukutwara nk’ow’omutaano nk’oku baatwariize Danieli? Mbwenu shi waayohibwa, noija kuguma noomanya ebi Yehova arikwenda?​—Efe. 5:17.

¹⁰ Ahabw’enki twine kwebuuza ebibuuzo nk’ebi? Bigyendereire kutuhwera kuteekateeka aha bukuru bw’okubatizibwa. Nk’oku twaba twareebire, okubatizibwa nikworeka ngu oraganiise Yehova. Noomuraganisa ngu noija kumukunda kandi omuheereze ebiro byona n’omutima gwawe gwona. (Mak. 12:30) Omuntu weena orikubatizibwa aine kumariirira kuhikiiriza okuraganisa kwe.​—Shoma Omubuurizi 5:4, 5.

11, 12. (a) Omuntu orikwenda kubatizibwa niki eki aine kuba naahamiza kimwe? (b) Niki ekiraakuhwere kuguma oine emiteekateekyere ehikire aha ntebeekanisa ya Yehova ey’okubatizibwa?

¹¹ Baibuli neeyoreka ngu abaheereza ba Yehova otwariiremu n’abato, nibeehayo “beekundiire” kumuheereza. (Zab. 110:3) N’ahabw’ekyo omuntu orikwenda kubatizibwa aine kuba naahamya ngu eki n’ekyetengo kye nari okucwamu kwe. Eki nikibaasa kwetengyesa okweshwijuma gye. Ahabw’enki? Ahakuba noobaasa kuba oine embeera z’omutaano. Nk’eky’okureeberaho, noobaasa kuba waazaariirwe omu ka eri omu mazima.

¹² Kumara emyaka, noobaasa kuba oreebire abantu baingi nibabatizibwa, otwariiremu n’ab’orwingano rwawe nangwa na beene sho. Ku kiraabe nikwo kiri, niki eki oine kwegyendesereza? Yegyendesereze otakaateekateeka ngu oine kubatizibwa ahabw’okugira ngu ohikize emyaka nanka nari ahabw’okugira ngu abandi nibabatizibwa. Noobaasa kukora ki kuguma oine emiteekateekyere mirungi aha ntebeekanisa ya Yehova ey’okubatizibwa? Gira obwire bw’okuteekateeka ahabw’enki okubatizibwa kuri kukuru munonga. Buzima, noija kushanga obuhabuzi bwingi burungi omu kicweka eki n’omu kirikukurataho.

13. Noobaasa kumanya ota yaaba okucwamu kubatizibwa nikuruga omu mutima gwawe?

¹³ Hariho emiringo mingi ei orikubaasa kumanyamu yaaba ekyetengo kyawe eky’okwenda kubatizibwa nikiruga omu mutima. Nk’eky’okureeberaho, ekyetengo kyawe eky’okwenda kuheereza Yehova noija kuba nookyoreka omu kushaba kwawe. Emirundi ei orikushaba n’okugamba kyenyine eki orikwenda omu kushaba, nibibaasa kworeka omukago ogu oine na Yehova. (Zab. 25:4) Omuringo gumwe omukuru ogu Yehova arikugarukamu okushaba kwaitu, n’okutuhwera kuteekateeka aha biri omu Kigambo kye. N’ahabw’ekyo, okuteeraho kwaitu kwega Baibuli, nakyo nikyoreka ngu buzima nitwenda kwirira haihi Yehova, n’okumuheereza kuruga aha mutima. (Yos. 1:8) Noobaasa kwebuuza oti: ‘Ninshaba kyenyine eki ndikuba niinyenda? Ninkira kweshomesa Baibuli?’ Ninyejumba omu kuramya kw’eka nyekundiire?’ Eby’okugarukamu by’ebibuuzo ebi, nibiija kukuhwera kureeba yaaba okucwamu kwawe kubatizibwa kiri ekyetengo kyawe.

14. Shoboorora oku okwehayo kurikutaana aha kubatizibwa.

¹⁴ Eminyeeto abamwe nibabaasa kuba batarikumanya oku okwehayo kurikutaana aha kubatizibwa. Nk’eky’okureeberaho, abato abamwe nibagira ngu beehaireyo ahari Yehova kwonka ngu tibeteekateekire kubatizibwa. Mbwenu shi ekyo nikikora amakuru? Okwehayo nikimanyisa okugambira Yehova ngu oyeteekateekire kumuheereza ebiro byona. Aha kubatizibwa omuntu naaba naayoreka abandi ngu  ayehaireyo. N’abw’ekyo, okubatizibwa n’okworeka muranga ngu waayehaireyo omu mubonano orikushaba Yehova. Otakabatiziibwe, oshemereire kuba noohamya ngu nooyetegyereza eki okwehayo kirikumanyisa.

15. Okwehayo nikimanyisa ki?

¹⁵ Ku orikwehayo ahari Yehova, noomugambira ngu hati ori owe. Noomuraganisa ngu noija kwebembeza okukora ebi arikukunda okukira ekindi kintu kyona. (Shoma Matayo 16:24.) Buri ki orikuraganisa oshemereire kukitwara nka kikuru, kwonka ebi turikuraganisa Yehova Ruhanga byo twine kubitwara nka bikuru munonga! (Mat. 5:33) Kwonka shi, noobaasa kworeka ota ngu buzima hati tokiriho ahabwawe kureka ngu oriho ahabwa Yehova?​—Rom. 14:8.

16, 17. (a) Shoboorora eki kirikumanyisa okutabaho ahabwawe. (b) Omuntu orikwehayo ahari Yehova naaba naamuraganisa ki?

¹⁶ Nk’eky’okureeberaho, ka tugire ngu munywani waawe yaakuha ekiconco ky’emotoka. Yaakuha ebihandiiko byayo reero yaakugira ati: “Emotoka n’eyaawe.” Kwonka agira ati: “Niinyija kuguma n’ebishumuurizo byayo. Kandi niinye ndagume ninvuga emotoka egi, beitu atari iwe.” Noija kutwara ota ekiconco ekyo? Noija kutwara ota munywani waawe owaakuha emotoka egyo?

¹⁷ Omuntu ku arikwehayo ahari Yehova, naamugambira ati: “Naakweha. Ndi owaawe.” Kwonka shi omuntu ogwo ku yaakuba endyarya, akatandika kuriima bwesherekye omuntu otarikuheereza Yehova? Kandi shi ku yaakwikiriza omurimo ogurikumuremesa kwejumbira kimwe omu kubuurira nari kuza omu nteerane z’ekibiina? Mbwenu shi naaba atarikushushana n’ogwo orikuha munywani we emotoka kwonka akanga kumuha ebishumuurizo byayo? Omuntu orikwehayo ahari Yehova, naaba ari nk’orikugira ati: “Niiwe onyineho obushoboorozi kukira oku mbweyineho. Ebi ndikukunda byaba bitarikuhikaana n’ebi orikwenda, butoosha ninyija kuguma ninkora ebi orikwenda.” Eki nikiba nikihikaana n’emiteekateekyere ya Yesu, obu yaabaire ari omu nsi owaagizire ati: “Tindarugire mu iguru kukora ebi ndikweyendera, kureka okukora ebi Owantumire akunda.”​—Yoh. 6:38.

18, 19. (a) Ebyagambirwe Rose na Christopher nibyoreka bita ngu okubatizibwa nikureeta emigisha mingi? (b) Nootwara ota omugisha gw’okubatizibwa?

¹⁸ Buzima, okubatizibwa n’eidaara rikuru eri tutashemereire kuzaanisa. Kandi nabwo, n’omugisha gw’amaani okwehayo n’okubatizibwa. Abato abarikukunda Yehova kandi abarikwetegyereza eki okwehayo kirikumanyisa tibarikweziringa kubatizibwa, kandi tibarikwefuuza ahabw’okucwamu batyo. Omunyeeto orikwetwa Rose naagira ati: “Ninkunda Yehova, kandi tihaine ekindi ekirikundeetera okushemererwa, okukira okumuheereza. Tihariho ekindi kintu eki nyineho obuhame bw’amaani okukira okucwamu kwangye kubatizibwa.”

¹⁹ Kandi shi Christopher, owaaba yaagambirweho aha kutandika kw’ekicweka eki? Naayehurira ata aha bikwatiraine n’okucwamu kwe kubatizibwa aine emyaka 12? Christopher naagira ngu ashemereirwe munonga ahabw’okucwamu atyo. Akatandika kuheereza nka payoniya ow’obutwire aine emyaka 17, kandi akatooranwa kuba omuheereza omu kibiina aine emyaka 18. Hati naaheereza aha Beseeli. Naagira ati: “Okubatizibwa kukaba kuri okucwamu kurungi. Nyine okumarwa ahabw’okukorera Yehova n’ekibiina kye.” Ku oraabe nooyenda kubatizibwa, noobaasa kukwetebeekanisiza ota? Ekicweka ekirikukurataho nikiija kugarukamu ekibuuzo ekyo.