1. Kuruga omu kutandika, niki ekitwire nikireebwa omu buheereza bwa Yehova?

YEHOVA na Yesu kuruga obu ebintu byahangwa batwire baine obumwe. Yesu ou Yehova yaabandize kuhanga akagira ati: “Nkaba ndi hamwe nawe, ndi omukozi mukuru; obutoosha niinye naabaire ndi okushemererwa kwe, niinyesiimira omu maisho ge buri izooba.” (Enf. 8:30) Bakakwatanisa baahanga ebintu by’emiringo mingi ebi turikureeba hati. Abaheereza ba Yehova bakaba bakwatanisa omu mirimo ei baabaire nibakora. Nk’eky’okureeberaho, Noa n’ab’omu ka ye bakoombeka hamwe obwato. Bwanyima, Abaisraeli bakaba bakora hamwe kwombeka eihema, kurishambuura n’okurifurura omu mwanya kuza omu gundi. Aha ihema bakaba beeshongora kuhimbisa Yehova. Ebi byona bakaba babikora ahabw’okukwatanisa.​—Kut. 6:14-16, 22; Kub. 4:4-32; 1 Bus. 25:1-8.

2. (a) Omu kyasha ky’okubanza ni mutwarize ki ogwabaire nigureebwa omu kibiina Ekikristaayo? (b) Ni bibuuzo ki ebi turikuza kushwijuma?

² Omu kyasha ky’okubanza, ekibiina Ekikristaayo ekirikwebemberwa Yesu Kristo kikaba kirimu okukwatanisa. Entumwa Paulo akagira ngu n’obu Abakristaayo abashukirweho amajuta baraabe baabaire baine “ebiconco by’emiringo mingi” kandi  barikwejumba omu ‘buheereza bw’emiringo mingi,’ boona bakaba bari ‘omubiri gumwe.’ (Shoma 1 Abakorinso 12:4-6, 12.) Kandi shi obunaku obu? Nitubaasa kuguma tuta twine obumwe omu kubuurira amakuru marungi? Nitubaasa kukwatanisa tuta omu kibiina n’omu ka?

3. Yohaana akoorekwa ki?

³ Ekyasha ky’okubanza kiri haihi kuhendera, entumwa Yohaana akoorekwa baamaraika mushanju, buri omwe akaba naateera enzamba. Maraika wa kataano ku yaataire enzamba ye, Yohaana akareeba “enyonyoozi” egwire ahansi okuruga omu iguru. “Enyonyoozi” egyo ekaba eine ekishumuuruzo omu ngaro eki yaakoreise kwigura ekiina ekitaine bugarukiro. Omwika mwingi gukashohora, gwarugamu ekibonaboneso ky’enzigye. Omu mwanya gw’okushiisha ebimera, enzigye ezi ez’akamanyiso zikataahirira “abantu bonka abataine kamanyiso ka Ruhanga aha buso bwabo.” (Kush. 9:1-4) Hatariho kubanganisa Yohaana akaba naamanya oku enzigye ziri ez’akabi munonga. Ahakuba enzigye zikaba zaataahiriire Misri omu bwire bwa Musa. (Kur. 10:12-15) Enzigye ez’akamanyiso ezi Yohaana yaareebire nizijwekyera Abakristaayo abashukirweho amajuta abatwire nibabuurira amakuru agarikukwata aha kucwekyerera kw’amadiini g’ebishuba. Nibashagikwa abantu nyamwingi abaine amatsiko g’okutuura omu nsi. Nibakwatanisa omu murimo gw’okubuurira kandi bahwereire baingi kuruga omu madiini g’ebishuba agari ahansi y’obushoboorozi bwa Sitaane.

4. Abaheereza ba Ruhanga baine kukora murimo ki, kandi niki ekirikubaasa kubahwera kugukora?

⁴ Abaheereza ba Yehova baine obujunaanizibwa bw’okubuurira “amakuru marungi” omu nsi yoona emperu etakahikire. (Mat. 24:14; 28:19, 20) Eki nikitwariramu okweta buri omwe “oine eiriho” kunywa “amaizi g’amagara.” (Kush. 22:17) Omu kukora eki nitubaasa kusingura tuta? Nitubaasa kukikora turikukwatanisa kandi twine obumwe.​—Efe. 4:16.

5, 6. Okubuurira amakuru marungi nikutuhwera kuta kugira obumwe?

⁵ Kubaasa kuhitsya amakuru marungi ag’Obukama aha bantu baingi, twine kubuurira omu muringo ogutebeekanisiibwe gye. Niyo nshonga ahabw’enki nitutunga obuhabuzi. Obuhabuzi oburikuheebwa omu bibiina omu nsi yoona nibutuhwera kukora gye omurimo ogu. Bwanyima y’oruteerane rw’okwetebeekanisiza okubuurira, nitugyenda n’omuhimbo kubuurira abantu amakuru g’Obukama. Turikukoresa akanwa n’ebitabo bingi ebirikushoboorora ahari Baibuli, nitubuurira abantu nyamwingi. Nooteeraho kukuratira obuhabuzi oburikutuhiga kwejumba omu kampeyini z’omutaano ez’okubuurira? Waaba nookora ekyo, nooba nookwatanisa n’abandi baingi abarikubuurira omu nsi yoona. Kandi nooba nookora na baamaraika abarikuhwera abaheereza ba Ruhanga kubuurira amakuru marungi.​—Okushuuruurwa 14:6.

⁶ Buzima nikitushemeza munonga okushoma omu Yearbook ebirugire omu murimo gwaitu gw’okubuurira omu nsi yoona. Teekateeka n’aha bumwe obu turikuba twine twaba nitugaba obupapura bw’okweta abantu aha nteerane empango. Aha nteerane ezi, nituhurikiza embazo nungi kuruga omu Byahandiikirwe kandi tureeba emizaano n’eby’okureeberaho. Ebi byona nibyoreka ngu Ruhanga naatuhiga na rukundo kugumizamu nitumuheereza n’omutima gwaitu gwona. Okuba aha omukoro gw’okwijuka okufa kwa Yesu nakyo nikitubaasisa  kugira obumwe. Ahabw’okusiima embabazi za Ruhanga n’okworobera obuhabuzi bwa Yesu, nitwija aha Kiijutsyo eizooba ryaheza kurenga ahari Nisani 14. (1 Kor. 11:23-26) Kandi Abajurizi ba Yehova tibo bonka abarikwija aha Kiijutsyo eki. Harikuburayo saabiiti nkye Ekiijutsyo kikabaho, nitubuurira omu myanya mingi etwetoroire, kweta abantu kwija kuba naitwe aha mukoro mukuru ogu.

7. Okukorera hamwe nikutubaasisa kukora ki?

⁷ Enzigye emwe terikubaasa kushiisha bingi. Nikyo kimwe, omuntu omwe tarikubaasa kubuurira abantu boona. Kwonka twaba nitukorera hamwe, nituhwera abantu baingi kwija ahari Yehova oshemereire kuhimbisibwa. Kwonka, eki tikyo kyonka ekirikureetera abaheereza ba Ruhanga kugira obumwe.

8, 9. (a) Paulo akakoresa ky’okureeberaho ki kwegyesa Abakristaayo kuguma baine obumwe? (b) Nitubaasa kukwatanisa tuta omu kibiina?

⁸ Omu baruha ei Paulo yaahandiikiire Abaefeso, akagamba aha bumwe bw’ekibiina n’oku kiine ‘kukura omuri byona.’ (Shoma Abaefeso 4:15, 16.) Niki ekiraahwere buri omwe ahariitwe kwongyera kureetaho obumwe omu kibiina? Paulo arikukoresa eky’okureeberaho ky’omubiri, akagamba aha bumwe bw’omu kibiina ekirikwebemberwa Yesu Kristo. Paulo akagamba aha ‘kuhamibwa hamwe emitsi y’engingo zoona, nk’oku zihwerana.’ Buri omwe ahariitwe yaaba muto nari mukuru, oine amaani nari otagaine, naabaasa kuhwera ata omu kureetaho obumwe omu kibiina?

⁹ Ekikuru n’okworobera abareeberezi abu Yesu ahaire obujunaanizibwa bw’okureeberera ekibiina. (Heb. 13:7, 17) Nikibaasa kutooroba butoosha. Kwonka, nitubaasa kushaba Yehova kutuhwera. Omwoyo gwe gurikwera nigubaasa kutuhwera kushagikira kimwe entebeekanisa z’ekibiina. N’ahabw’ekyo, obumwe twahurira tutarikwenda kugyendera aha buhabuzi, tushemereire kuteekateeka aha ku okubugyenderaho kirikuhwera omu kureetaho obumwe omu kibiina. Kandi okukwatanisa omu muringo ogu nikituhwera twena kwongyera kukundana.

10. Abaheereza omu kibiina nibahwera bata ekibiina kugira obumwe? (Reeba ekishushani aha kutandika.)

¹⁰ Abaheereza omu kibiina nibakora kihango kureetaho obumwe omu kibiina. Ab’eishe-emwe aba, yaaba bato nari bakuru, nibakora bingi ebirikugasira boona. Nk’eky’okureeberaho, nibahwera abareeberezi omu kushaba ebitabo ebi turikukoresa omu kubuurira. Okwongyera ahari ekyo, nibakira kureeberera omurimo gw’okuboneza n’okuhunduuza Ekyombeko ky’Obukama, kandi nibaakiira abantu abarikwija omu nteerane zaitu. Twakwatanisa n’ab’eishe-emwe aba, nikyongyera aha bumwe bw’ekibiina.​—Gyeragyeranisa Ebyakozirwe 6:3-6.

11. Ab’eishe-emwe abakiri bato nibabaasa kuhwera bata ekibiina kugira obumwe?

¹¹ Ab’eishe-emwe baingi batwire baine obujunaanizibwa omu kibiina kumara emyaka mingi. Kwonka ahabwa bukuru nibabaasa kutakora bingi omu kibiina, n’ahabw’ekyo empindahinduka nizibaasa kwetengyesa. Ab’eishe-emwe abakiri bato nibabaasa kuhwera kihango. N’obu baakuba batakamanyire kukora gye emirimo y’ekibiina, baatendekwa gye nibabaasa kuheebwa obujunaanizibwa obundi. Buzima nikishemeza munonga abaheereza omu kibiina baatunguuka bakaba abareeberezi. (1 Tim. 3:1, 10) Abareeberezi abamwe abakiri bato babaasize kuba abareeberezi abarikutaayaayira ebibiina, kuheereza  ab’eishe-emwe omu bibiina bingi. Buzima nitusiima munonga ab’eishe-emwe aba abato abarikwehayo beekundiire kuheereza abandi omu kibiina.​—Shoma Zaaburi 110:3; Omubuurizi 12:1.

12, 13. Niki ekirikubaasa kuhwera ab’omu ka kukwatanisa gye?

¹² Nitubaasa kuhwera tuta ab’omu ka yaitu kukwatanisa? Baingi bashangire ngu okugira okuramya kw’eka buri saabiiti, nikihwera ab’omu ka abato n’abakuru kugira omukago guhami. Omu bwire obwo, nituba nitushwijuma Ebyahandiikirwe, kandi eki nikireetaho obumwe omu ka. Okwegyeza omu nyanjura z’okukoresa omu kubuurira nikihwera eka kuba eyetebeekaniise gye kubuurira. Kandi ab’eka baayegyera hamwe Ekigambo kya Ruhanga nibagira omukago guhami, kandi kibahwera kukunda Yehova n’okukunda kukora ebi arikukunda.

¹³ Niki eki omushaija n’omukazi we barikubaasa kukora kukwatanisa omu kuhimbisa Yehova? Omushaija n’omukazi we bombi baaba bari abaheereza ba Yehova abeesigwa, nibagira okushemererwa n’obumwe omu bushwere. Abrahamu na Saara, Isaaka na Rebeka, Elukaana na Hanna, bakaba nibakunda abu bari nabo omu bushwere. Naitwe nikyo twine kukora. (Kut. 26:8; 1 Sam. 1:5, 8; 1 Pet. 3:5, 6) Eki nikiija kutuhwera kugira obumwe omu bushwere bwaitu kandi tugire omukago guhami na Yehova Tataitwe w’omu iguru.​—Shoma Omubuurizi 4:12.

14. Baro nari omukazi waawe yaaba atarikuheereza Yehova, noobaasa kukora ki kuhamya obushwere bwanyu?

¹⁴ Abakristaayo baine kwerinda kukwatanisa n’abatarikwikiriza. (2 Kor. 6:14) Kandi shi ab’eishe-emwe na banyaanyazi-itwe abari omu maka agarimu abatarikuheereza Yehova? Bamwe bakaija omu mazima baaherize kutaaha omu bushwere, kandi baibabo nari abakazi baabo tibari Bajurizi ba Yehova. Kwonka nabwo, okugyendera aha misingye ya Baibuli nikibaasa kureetaho obumwe n’okukwatanisa omu ka. Ekyo nikitwariramu okukwatanisa omu bintu bingi kwonka otarikuhenda misingye ya Baibuli. Nikibaasa obutakworobera, kwonka teekateeka aha birungi ebirikubaasa kurugamu. Okugyendera aha misingye ya Baibuli obumwe nikibaasa kutooroba, baro nari omukazi waawe yaaruga omu kibiina. Eki nikyo kyahikire ahari munyaanyazi-itwe Mary. Bombi we na iba, David, bakaba nibaheereza Yehova hamwe, kwonka bwanyima y’emyaka 25, iba akarekyera aho kwija omu nteerane. Mary akaguma naaza omu nteerane kandi n’omuka yaaguma naateeraho kugyendera aha misingye ya Baibuli arikwegyesa Baibuli abaana baabo mukaaga. Abaana ku baakuzire bakaruga omuka, Mary akagira ihamba. David akatandika kushoma zaamagaziini ezi yaabaire amutsigira omuka. Bwanyima, David akatandika kuza omu nteerane, kandi omwijukuru oine emyaka mukaaga akaba amukwatira ah’okushutama. David ku yaabaire abura kwija, omwijukuru akaba amugira ati: “Shwenkuru, eri izooba naakutegyereza waabura.” Hati, David naaheereza Yehova kandi Mary ashemereirwe munonga ahabw’okugira ngu nibaheereza hamwe.

15. Abamazire emyaka omu bushwere nibabaasa kuhwera bata abasya omu bushwere?

¹⁵ Ahabw’okugira ngu Sitaane naataahirira amaka obunaku obu, ni kikuru abaheereza ba Yehova abari omu bushwere kuguma nibakwatanisa gye. Yaaba omazire obwire bwingi nari bukye omu bushwere, teeraho kuguma nooteekateeka eki orikubaasa kugamba  nari kukora kuhamya obushwere bwanyu. Abakuzire omu myaka nibabaasa kuhwera abakiri bato omu bushwere kuhamya obushwere bwabo. Obumwe noobaasa kweta abakiri basya omu bushwere omu kuramya kwanyu okw’eka. Baaba bari hamwe naimwe, nibabaasa kureeba ngu n’obu omuntu yaakuba amazire emyaka mingi nari mikye omu bushwere, okukundana n’obumwe ni bikuru.​—Tit. 2:3-7.

16, 17. Niki eki abaheereza ba Ruhanga bainiire ekihika?

¹⁶ Teekateeka aha Baisraeli omu bwire bw’obugyenyi bw’okuhingurwaho barikuhimbisa Yehova omu hekalu omuri Yerusaalemu. Bakaba baine kwetebeekanisiza orugyendo, bakahwerahwerana omu rugyendo, kandi bakaba nibakwatanisa hamwe omu kuramya aha hekalu. Ebi byona bikaba nibyetengyesa okukwatanisa. (Luk. 2:41-44) Naitwe twine kugumizamu nitukwatanisa omu rugyendo rwaitu orw’okuza omu nsi ensya. Eki nikyetengyesa okuteeraho munonga. Noobaasa kuteekateeka aha ku orikubaasa kwongyera kukikora?

¹⁷ Teekateeka aha migisha ei turikwija kutunga. Nitusiima Yehova ahabw’okutuhwera kugira obusingye n’okwetegyereza amazima. Hati nitureeba obunabi bwa Isaaya na Miika nibuhikiirira, ahakuba abaheereza ba Ruhanga baine obumwe nibainamuka aha ‘rushozi rwa’ Yehova. (Isa. 2:2-4; shoma Miika 4:2-4.) Buzima okuramya okw’amazima kutunguukire “omu biro” by’emperu ebi. Buzima nitwija kushemererwa munonga obu abantu boona baraabe baine obumwe kandi barikukwatanisa.