1, 2. Ebigambo bya Yesu ebiri omu Matayo 24:14 nibibaasa kureetaho bibuuzo ki?

YAABA abantu baikirizana naitwe nari batuhakanisa, Abajurizi ba Yehova nitumanywa ahabw’omurimo gwaitu gw’okubuurira. Omu kubuurira, abantu nibabaasa kuba batarikwikiriza enyikiriza zaitu, kwonka barikutuha ekitiinisa ahabw’omurimo gwaitu gw’okubuurira. Nk’oku turikumanya, Yesu akagira ngu amakuru marungi g’Obukama gakaba nigaija kubuurirwa omu nsi yoona. (Mat. 24:14) Kwonka shi nitumanya tuta ngu buzima omurimo ogu turikukora niguhikiiriza obunabi bwa Yesu? Mbwenu shi niguba guri omweragiiro kuteekateeka ngu niitwe turikukora omurimo ogu?

² Amadiini maingi nigateekateeka ngu nigabuurira Engiri, nari amakuru marungi. Kwonka bo, nibagira ngu nibabuurira baaba nibaha obujurizi, baaba bari omu nteerane omu makanisa gaabo, nari barikukoresa eby’empurizana nka tiivi, radiyo, na Intaneeti. Abandi nibata omutima aha mirimo y’okuhwera abantu nari omu by’obujanjabi n’eby’obwegyese. Mbwenu shi ebi byona bihikire waabigyeragyeranisa n’eki Yesu yaaragiire abeegi be kukora?

3. Kurugiirira ahari Matayo 28:19, 20, ni bintu ki bina ebi abakuratsi ba Yesu baine kukora?

 ³ Mbwenu shi abeegi ba Yesu bakaba bashutama hamwe, bategyereza abantu ngu babashangyeho? Ngaaha buzima! Yesu ku yaherize kuzooka, akagambira abeegi be ati: ‘Mugyende omu mahanga goona, muhindure abantu abeegi nimubabatiza, nimubeegyesa kworobera byona ebi naabaragiire.’ (Mat. 28:19, 20) N’ahabw’ekyo okuhikiiriza ekiragiro eki nikyetengyesa ebintu bina. Twine kuhindura abantu abeegi, tubeegyese, kandi tubabatize. Kwonka shi niki eki twine kubanza kukora? Yesu akagira ati: “Mugyende”! Omushaija omwe orikucondooza aha Baibuli arikugamba aha kiragiro eki akagira ati: “Okugyenda n’obujunaanizibwa bwa buri omwe orikwikiriza, yaaba kugyenda kuza obuseeri bw’enguuto nari obuseeri bw’enyanja.”—Mat. 10:7; Luk. 10:3.

4. Okuba “abajubi b’abantu” nikitwariramu ki?

⁴ Mbwenu shi Yesu akaba naamanyisa ngu buri omwe aha beegi be aine kugyenda wenka ahabwe, nari bakaba baine kugyenda nk’abantu baingi abatebeekanisiibwe gye kubuurira amakuru marungi? Ahabw’okugira ngu omuntu omwe tarikubaasa kugyenda omu “mahanga goona,” omurimo ogu nigwetengyesa abantu baingi abatebeekanisiibwe gye. Ekyo nikyo Yesu yaabaire naamanyisa obu yaayeta abeegi kuba “abajubi b’abantu.” (Shoma Matayo 4:18-22.) Yesu akaba atarikumanyisa omujubi omwe orikukoresa eirobo kutega eby’enyanja, obwo birikumushanga omu mwanya gumwe. Kureka, kiri nk’oku omujubi yaakuba naakoresa akatimba, omuringo gw’okujuba ogurikwetengyesa okuza omu myanya eteri emwe n’emwe, okukoresa amaani, n’okukwatanisa kw’abantu baingi.—Luk. 5:1-11.

5. Ni bibuuzo ki bina ebiine kugarukwamu, kandi n’ahabw’enki?

⁵ Kubaasa kumanya abarikubuurira amakuru marungi obunaku obu kuhikiiriza obunabi bwa Yesu, twine kugarukamu ebibuuzo ebi bina:

• Ni butumwa ki obu tushemereire kubuurira?

• Tushemereire kuba twine kigyendererwa ki twaba nitukora omurimo ogu?

• Ni miringo ki ei twine kukoresa?

• Amakuru marungi nigaija kujanjaara kwingana ki, kandi kumara obwire burikwingana ki?

Eby’okugarukamu by’ebibuuzo ebi nibiija kutuhwera kumanya abarikukora omurimo ogu, kandi kituhwere n’okumariirira kuguma nitugukora omu bwesigwa.—1 Tim. 4:16.

6. Ahabw’enki orikubaasa kuhamya ngu Abajurizi ba Yehova nibabuurira obutumwa obuhikire?

⁶ Shoma Luka 4:43. Yesu akabuurira ‘ebigambo birungi by’Obukama,’ kandi naayenda ngu abeegi be bakore nkawe. Ni baahi abarikubuurira amakuru ago “omu mahanga goona”? Eky’okugarukamu nikireebwa butunu ngu n’Abajurizi ba Yehova bonka. Nangwa n’abarikuhakanisa, ekyo nibakimanya. Nk’eky’okureeberaho, omwebembezi w’ediini akagambira Omujurizi wa Yehova ngu akaba yaatwireho omu mahanga maingi, kandi ngu akaba abuuza Abajurizi ba Yehova amakuru agu barikubuurira. Bakaba bamugarukamu bata? Naagira ati: “Boona bakaba bari abashema ahabw’okugira ngu bakaba bagarukamu bati: ‘N’amakuru marungi g’Obukama.’” Kwonka eky’okugarukamu ekyo kikaba kitari ky’obushema, kureka Abajurizi ba Yehova abo bakaba bagarukamu ebirikushushana ahabw’okugira ngu Abakristaayo ab’amazima nikyo baine kukora. (1 Kor. 1:10) Kandi ebigambo byabo bikaba nibihikaana n’obutumwa oburi omu Munaara gw’Omurinzi Ogurikuranga Obukama bwa Yehova. Magaziini egi neeshohozibwa  omu ndimi 254, kandi buri kuteera nihashohozibwa magaziini nk’obukaikuru 59, ekirikugireetera kuba niyo magaziini erikukirayo kujanjaara omu nsi yoona.

7. Nitumanya tuta ngu abeebembezi b’amadiini agarikweyeta Amakristaayo tibarikubuurira amakuru agahikire?

⁷ Abeebembezi b’amadiini agarikweyeta Amakristaayo tibarikubuurira aha Bukama bwa Ruhanga. Ku barikugamba aha Bukama, baingi nibagira ngu buri omu mutima gw’Omukristaayo. (Luk. 17:21) Tibarikuhwera abantu kwetegyereza ngu Obukama bwa Ruhanga ni gavumenti ey’omu iguru, kandi ngu Yesu Kristo niwe mutegyeki waayo, ngu niyo eraamareho oburemeezi bw’abantu bwona, kandi ngu juba niyo eraamareho obubi bwona omu nsi. (Kush. 19:11-21) Omu mwanya gw’ekyo, nibakunda kwijuka Yesu aha Noiri na Paasika. Tibarikumanya eki Yesu Omutegyeki musya ow’ensi araije kukora. Ahabw’okugira ngu tibarikumanya obutumwa obu bashemereire kubuurira, tikirikutangaaza kureeba ngu tibarikumanya ekigyendererwa ky’okukora omurimo ogu.

8. Amadiini agarikweyeta Amakristaayo nigabuurira gaine kigyendererwa ki ekibi?

⁸ Tushemereire kuba na kigyendererwa ki twaba nitukora omurimo ogu? Tikishemereire kuba eky’okurundaana sente nari kwombeka ebyombeko bihango. Yesu akagira abeegi be ati: “Mukaheerwa busha, naimwe muheere busha.” (Mat. 10:8) Omurimo gw’okubuurira tigushemereire kubamu eby’obushuubuzi. (2 Kor. 2:17) Abo abarikubuurira amakuru marungi tibaine kusherura amagoba ahabw’omurimo ogu barikukora. (Shoma Ebyakozirwe 20:33-35.) N’obu obuhabuzi obu buraabe nibwetegyerezibwa gye, amakanisa maingi gahugiire aha kushorooza sente nari kuteeraho kusherura sente z’okubaisaho amakanisa gaabo. Baine kushashura abeebembezi b’amadiini n’abakozi abandi baingi. Abeebembezi b’amadiini agarikweyeta Amakristaayo babaasize kuba abagaiga.—Kush. 17:4, 5.

9. Abajurizi ba Yehova boorekire bata ngu nibeejumba omu murimo gw’okubuurira baine ekigyendererwa kirungi?

⁹ Mbwenu shi Abajurizi ba Yehova batwire nibashorooza sente aha Byombeko by’Obukama nari aha nteerane empango? Ngaaha! Omurimo gwabo nigushagikwa abantu abarikuhayo beekundiire. (2 Kor. 9:7) Kwonka, omwaka oguhweire, Abajurizi ba Yehova bakamara eshaaha haihi nk’obuhumbi bubiri omu kubuurira amakuru marungi, kandi bakeegyesa Baibuli abantu abarengire obukaikuru mwenda buri kwezi. Ekirikutangaaza, n’obu baraabe batarikushashurwa ahabw’omurimo gw’okubuurira, beitu nibakoresa esente zaabo kugushagika. Omucondooza omwe, akagamba aha murimo gw’Abajurizi ba Yehova ati: “Ekigyendererwa kyabo ekikuru n’okubuurira n’okwegyesa.” Akongyeraho yaagira ngu Abajurizi ba Yehova tibaine nshohoza mpango ahabw’okugira ngu tibaine beebembezi b’ediini. Mbwenu shi, nituba twine kigyendererwa ki twaba nitukora omurimo ogu? Nitukora omurimo ogu twekundiire ahabw’okugira ngu nitukunda Yehova n’abataahi. Okwehayo beekundiire nikuhikiiriza obunabi oburi omu Zaaburi 110:3. (Kishome.)

10. Ni miringo ki ei Yesu n’abeegi be baakoreise omu kubuurira?

¹⁰ Ni miringo ki ei Yesu n’abeegi be baakoreise kubuurira amakuru marungi? Bakaba bagyenda ahu abantu bari omu myanya erimu abantu baingi, n’omu maka g’abantu. Omurimo gwabo gw’okubuurira gukaba nigutwariramu n’okusherura abashemeire baaba nibabuurira enju aha nju. (Mat. 10:11;  Luk. 8:1; Byak. 5:42; 20:20) Omuringo ogu ogutebeekanisiibwe gye gukaba nigworeka obutashoroora omu bantu.

11, 12. Noobaasa kugyeragyeranisa ota okubuurira kw’amadiini agarikweyeta Amakristaayo n’okw’Abajurizi ba Yehova?

¹¹ Mbwenu shi amadiini agarikweyeta Amakristaayo nigabuurira amakuru marungi nk’oku Yesu yaakozire? Obwire obwingi, amakanisa omurimo gw’okubuurira nibagurekyera abeebembezi baabo abarikushashurwa. Abeebembezi b’amadiini omu mwanya gw’okuba “abajubi b’abantu,” nibafayo munonga kureeba ngu abantu abu baine tibaabarugaho. Obumwe abeebembezi b’amadiini nibateeraho kuhiga abantu baabo kubuurira. Nk’eky’okureeberaho, omu mwaka 2001, Paapa John Paul II omu baruha ei yaahandiikire akagira ngu abantu bashemereire kubuurira Engiri kandi bagire omujinya nk’ogu entumwa Paulo yaabaire aine, owaagizire ati: “Ku naakuba ntabuuriire Engiri, nkaareeba enaku.” Paapa akongyera yaagira ngu omurimo ogu tigushemereire kukorwa abantu bakye abatendekirwe beitu n’obujunaanizibwa bw’abantu boona ab’omu kanisa. Kwonka ni bangahi abagyendeire aha okwehanangiriza oku?

¹² Kandi shi bo Abajurizi ba Yehova? Nibo bonka abarikubuurira ngu Yesu atwire naategyeka nk’Omugabe kuruga 1914. Nk’oku Yesu yaayegyeise, nibeebembeza omurimo gw’okubuurira. (Mak. 13:10) Akatabo Pillars of Faith—American Congregations and Their Partners nikagira kati: “Abajurizi ba Yehova, nibatwara omurimo gw’okubuurira nka mukuru.” Omuhandiiki w’ekitabo eki arikugamba aha byagambirwe Omujurizi wa Yehova, akongyeraho ati: “Ku barikubugana abantu abaine enjara, eihamba, n’abarwaire, nibateeraho kubahwera, . . . kwonka tibarikwebwa ngu omurimo gwabo omukuru n’okubuurira obutumwa oburikukwata aha mperu y’ensi egi n’ekyetengo ky’okujunwa.” Abajurizi ba Yehova nibagumizamu kubuurira amakuru ago, barikukoresa emiringo ei Yesu n’abeegi be baakoreise.

13. Omurimo gw’okubuurira gwine kwingana ki obuhango?

¹³ Yesu akashoboorora aha kujanjaara kw’amakuru marungi arikugira ngu nigaija kubuurirwa omu “nsi” yoona. (Mat. 24:14) Abantu baine kuhindurwa abeegi ba Yesu omu “mahanga goona.” (Mat. 28:19, 20) Ekirikumanyisa ngu omurimo gw’okubuurira gwine kukorwa omu nsi yoona.

14, 15. Ni buhame ki oburikworeka ngu Abajurizi ba Yehova bahikiriize obunabi bwa Yesu obw’okujanjaaza amakuru marungi? (Reeba ebishushani aha kutandika.)

¹⁴ Kubaasa kwetegyereza oku Abajurizi ba Yehova babaasize kuhikiiriza obunabi bwa Yesu oburikukwata aha kujanjaara kw’amakuru marungi, ka tureebe bumwe aha buhame. Omuri United States harimu abeebembezi nka 600,000 ab’amadiini gatarikushushana, kandi Abajurizi ba Yehova bo ninka 1,200,000. Omu nsi yoona, harimu abeebembezi b’ediini y’Abakaturiki nka 400,000. Hati teekateeka aha mubaro gw’Abajurizi ba Yehova abarikwejumba omu murimo  gw’okubuurira omu nsi yoona. Omu nsi yoona, ababuurizi b’Obukama nk’obukaikuru munaana nibeehayo beekundiire kubuurira abantu omu mahanga 240. Buzima ka nikishemeza kumanya obuhango bw’omurimo ogurikukorwa, ekirikureetera Yehova kuhimbisibwa n’okuheebwa ekitiinisa!—Zab. 34:1; 51:15.

¹⁵ Abajurizi ba Yehova, twine ekihika ky’okugambira abantu nyamwingi amakuru marungi emperu etakahikire. Ahabw’enshonga egi, nitutaana n’abandi ahabw’omurimo ogu turikukora ogw’okuvunuura ebitabo n’okubishohoza. Tubaasize kugaba ebitabo bingi, magaziini, turakiti, n’obupapura bw’okweta abantu aha nteerane empango n’aha Kiijutsyo. Tushohoize ebitabo bitarikushushana omu ndimi ezirikurenga 700. Tubaasize kushohoza Baibuli ezirikurenga obukaikuru 200 ez’envunuura eya New World Translation of the Holy Scriptures omu ndimi ezirikurenga 130. Omwaka oguhweire, tukashohoza ebitabo ebirikugamba ahari Baibuli nk’obuhumbi buna n’ekicweka. Twine n’omukura oguriho eby’okushoma omu ndimi ezirikurenga 750. Mbwenu shi hariho ediini endiijo erikukora omurimo nk’ogu?

16. Nitumanya tuta ngu Abajurizi ba Yehova baine omwoyo gurikwera?

¹⁶ Omurimo gw’okubuurira nigwija kugumizamu kuhitsya ryari? Yesu akagira ngu omurimo ogu gukaba nigwija kugumizamu kuhika omu biro by’emperu reero, ‘emperu ehike.’ Mbwenu shi hariho ediini endiijo ebaasize kugumizamu neebuurira amakuru marungi omu biro by’emperu ebi? Twaba nitubuurira, abo abu turikubuurira nibabaasa kugira bati: “Twine omwoyo gurikwera, kwonka niimwe murikukora omurimo gw’okubuurira.” Mbwenu shi okugumizamu nitukora omurimo ogu t’obuhame ngu niitwe twine omwoyo gurikwera? (Byak. 1:8; 1 Pet. 4:14) Obumwe n’obumwe, ab’amadiini agandi nibateeraho kukora omurimo nk’ogw’Abajurizi ba Yehova, kwonka baremwa. Abamwe nibateeraho kuheereza nk’abamiisani kumara akaire kakye, kwonka bwanyima bagaruka aha mirimo yaabo. Kandi abandi nibateeraho kubuurira enju aha nju, kwonka shi nibabuurira ahari ki? Eky’okugarukamu ky’ekibuuzo ekyo nikyoreka butunu ngu tibarikukora omurimo ogu Yesu Kristo yaatandikire.

17, 18. (a) Ahabw’enki nitubaasa kuhamya ngu Abajurizi ba Yehova nibo barikubuurira amakuru marungi g’Obukama hati? (b) Niki ekirikutubaasisa kugumizamu nitukora omurimo gw’okubuurira?

¹⁷ Mbwenu shi ni baahi buzima abarikubuurira amakuru marungi g’Obukama hati? Tutaine kubanganisa nitubaasa kugira ngu ni: “Abajurizi ba Yehova!” Ahabw’enki twine obuhame obwo? N’ahabw’okugira ngu nitubuurira obutumwa obuhikire, nigo makuru marungi g’Obukama. Twaba nitubuurira abantu, nitukoresa emiringo ehikire. Nitwejumba omu murimo gw’okubuurira twine ekigyendererwa kihikire, eky’okugirira abantu rukundo beitu kutari kutunga amagoba g’esente. Amakuru marungi gajanjaire munonga, gaahika aha bantu omu mahanga maingi kurabira omu murimo gwaitu gw’okubuurira. Kandi nituza kugumizamu nitukora omurimo ogu tutarikureka, kuhitsya obu emperu eraije.

¹⁸ Buzima nikitangaaza kureeba omurimo ogu abaheereza ba Ruhanga barikukora omu biro ebi eby’emperu. Kwonka shi eki nikibaasika kita? Omu baruha ei entumwa Paulo yaahandiikiire Abafilipi akagira ati: “Ruhanga niwe akorera omuriimwe, akabaha okukunda ebi asiima n’okubikora.” (Fil. 2:13) Twena ka tugumizemu nitushaba Yehova kutuha amaani g’okukora n’obweziriki kuhikiiriza obuheereza bwaitu.—2 Tim. 4:5.