Oraagumiirweho kuhwera omuntu orikuganya ahabw’okufeerwa omukundwa? Obumwe nituba tutarikumanya eki tushemereire kugamba nari kukora, aha muheru tuhendera tutaine eki tugambire nari eki tukozire. Kwonka hariho ebi turikubaasa kukora eby’omugasho kandi ebirikuhwera.

Obwire obwingi ekirikuba nikyetengyesa n’okubaho kandi okagamba obugambo bukye nk’okugira ngu “naashaasha naiwe.” Omu nganda nyingi, okugwa omuntu omu kifuba nari okumusiitirira aha ibega n’omuringo murungi gw’okworeka ngu noomufaho. Omuntu owaafeerwa yaaba naayenda kugamba, omuhurikize omu muringo gw’embabazi. Ekirikukira oburungi, gira eki waakorera eka eyaafeerwa, nk’omurimo ogu omuntu ofeereirwe atarikubaasa kwekorera, nk’okuteeka, okureeberera abaana, nari okuhwera aha ntebeekanisa z’okuziika, ekyo yaaba naakyenda. Ebikorwa nk’ebyo nibibaasa kuhwera munonga okukira okukoresa ebigambo ebi turikuteekateeka ngu ni birungi.

Haahinguraho obwire, noobaasa kutandika kugamba ahari ogwo owaafiire, obundi orikugamba aha mitwarize ye mirungi nari ebirikushemeza ebi yaakozire. Okugaaniira nk’okwo nikubaasa kureetera ofeereirwe kumwenya. Nk’eky’okureeberaho, Pam owaafeereirwe iba orikwetwa Ian, emyaka mukaaga ehingwire, naagira ati: “Obumwe abantu nibangambira ebintu birungi ebi Ian yaabaire naakora ebi ntarikumanya, ekyo nikindeetera kwehurira gye.”

Abarikucondooza nibagira ngu abantu baingi abarikuba bafeereirwe omu kubanza nibatunga obuhwezi bwingi, kwonka abantu ku barikugaruka aha mirimo yaabo ya butoosha, abarikuba bafeereirwe ebyetengo byabo nibyeba. N’ahabw’ekyo, teeraho kuguma nootaayaayira munywani waawe bwanyima y’okufeerwa. * Baingi abarikuba nibaganya nibasiima omugisha ogu ogw’okubahwera ngu batamara obwire buraingwa barikuganya.

Teekateeka ahari Kaori, omwishiki muto kuruga Japan owaabaire aine obusaasi bwingi ahabw’okufeerwa nyina, kandi bwanyima y’ameezi 15 akafeerwa mukuru we. Ekirungi, banywani be abaabuzima bakaguma nibamushagika. Ritsuko orikumukira munonga omu myaka akeehayo kuba munywani we ow’aha mara. Kaori naagira ati: “Okuba ow’amazima, tikiraanshemeize. Nkaba ntarikwenda muntu weena kuza omu mwanya gwa maawe, kandi nkaba ntarikuteekateeka ngu haine orikubaasa kukikora. Kwonka, ahabw’okugira ngu Ritsuko akaantwariza omu muringo murungi nka maawe, nkehurira ndikwenda kwirira haihi nawe. Buri saabiiti, tukaba tuza hamwe omu kubuurira n’omu nteerane. Akaba anyeta kunywa ka chai nawe, andeetera eby’okurya, kandi emirundi mingi ampandiikira amabaruha. Emiteekateekyere mirungi ya Ritsuko, ekampwera munonga.”

Hahingwireho emyaka ikumi n’ebiri kuruga obu nyina Kaori afa, kandi hati Kaori n’omushaija we bari omu buheereza obw’obutwire. Kaori naagira ati: “Ritsuko na hati naanfaho. Ku ndikugaruka omuka, niimutaayaayira ngarukamu amaani ahabw’okuba hamwe nawe.”

Omuntu ondiijo owaagumire naagasirwa omu bushagiki bwa banywani be, ni Poli, omwe aha Bajurizi ba Yehova kuruga Cyprus. Iba orikwetwa Sozos, akaba aine embabazi, ari omureeberezi orikutwaza gye orikukira kweta efuuzi n’efaakazi kuba hamwe nabo n’okurya nabo. (Yakobo 1:27) Eky’obusaasi, Sozos akaitwa ekookoro y’obwongo aine emyaka 53. Poli naagira ati: “Nkafeerwa ibanyi omwesigwa ou naabaire mmazire nawe emyaka 33 omu bushwere.”

Bwanyima y’okuziika, Poli na Daniel omutabani omuto oine emyaka 15 bakaza Canada. Ku baahikireyo, bakatandika kuza omu kibiina ekindi eky’Abajurizi  ba Yehova. Poli naagira ati: “Abanywani abu twatungire omu kibiina ekisya bakaba batarikumanya ebyatuhikireho n’embeera zigumire ezi twarabiremu. Kwonka ekyo tikirabaremeise kutuhuumuriza barikukoresa ebigambo by’embabazi kandi bakatuhwera n’omu bi turikwetenga. Obuhwezi obwo ka bwabaire buri obw’omuhendo na munonga omu bwire obu mutabani wangye yaabaire naayetenga munonga ishe! Abareeberezi omu kibiina bakooreka ngu nibafayo ahari Daniel. Omwe aharibo ku yaabaire ayenda kweta abanywani nari ab’okuzaana nabo omupiira, akaba ahamya ngu yaayeta Daniel.” Hati Daniel na nyina bari gye, tibaine nshonga.

Buzima, hariho emiringo mingi ei turikubaasa kuhweramu abarikuganya n’okubahuumuriza. Baibuli nayo neetuhuumuriza n’amatsiko marungi ag’ebiro by’omumaisho.