Bebe akaba ari munywani w’eishe ow’aha mara. Omukazi munywani w’eka yaabo niwe yaamugambiire ebigambo ebyo, kwonka bikoongyerera Bebe obusaasi omu mwanya gw’okumuhuumuriza. “Okufa kwe ti kirungi” nikwo Bebe yaagumire naagamba. Bwanyima y’emyaka mingi, Bebe ku yaashomire ekitabo ekirikugamba aha kufa, kikeeyoreka gye ngu akaba akiine amaganya.

Bebe akeetegyereza ngu nikibaasa kutwara obwire buraingwa kusingura amaganya na munonga owaafiire yaaba yaabaire ari munywani waawe. Baibuli neegira ngu rufu, niwe ‘muzigu orihererukayo.’ (1 Abakorinso 15:26) Okufa nikututeganisa kandi tihariho orikubaasa kukuzibira, nikukira kubaho kitaraariire, kandi kutwara abantu abu turikukunda munonga. Tihariho n’omwe ahariitwe orikubaasa kwetantara obusaasi oburikuruga omu kufa. Buzima tikirikutangaaza twagumirwa kwemera obusaasi bwanyima y’okufeerwa.

Noobaasa kuba oreebuurizeho oti: ‘Nikitwara bwire ki kusingura obusaasi bw’okufeerwa? Omuntu naabaasa kwemera ata obusaasi obu? Nimbaasa kuhuumuriza nta abandi abafeereirwe? Abakundwa baitu abaafiire nibaija kuzooka?’