1, 2. Petero bwanyima y’okumara ekiro kyona naajuba, akeega eishomo ki?

MUSHANJU aha beegi ba Yesu bakaba bamazire ekiro kyona nibajuba aha Nyanja ya Galilaaya. Kwonka ekiro kyona tibarakwatsire eky’enyanja na kimwe. Omu kasheeshe, Yesu owaabaire aherize kuzooka, akeemerera aha nkungu y’enyanja arikubareeba. Reero yaabagira ati: “Mutegye akatimba aha rubaju rwa buryo rw’obwato; nimwija kubikwata. Batyo baakatega, tibaabaasa kukaiha mu maizi ahabw’eby’enyanja kuba bingi.”—Yohaana 21:1-6.

² Yesu akagaburira abeegi be eby’enyanja n’emigaati ahari kyantsya. Bwanyima akahindukira Simooni Petero yaamubuuza ati: “Simooni mwene Yohaana, onkunda okukira” ebi? Yesu akaba naamanya ngu Petero naakunda okujuba. Naabaasa kuba yaabaire naabuuza Petero kureeba ku araabe yaabaire naakunda Yesu n’ebi yaayegyeise okukira omurimo gw’okujuba eby’enyanja. Petero akagarukamu Yesu ati: “Mukama wangye; noomanya ku nkukunda.” (Yohaana 21:15) Kuruga aha izooba eryo, Petero akooreka ngu akaba naamanyisa ebi arikugamba. Akooreka ngu naakunda Kristo arikwejumbira kimwe omu murimo gw’okubuurira, kandi akaba omuntu w’omugasho omu kibiina Ekikristaayo.

3. Niki eki Abakristaayo baine kumanya?

 ³ Nitubaasa kwega ki omu bigambo ebi Yesu yaagambiire Petero? Twine kwegyendesereza kutareka rukundo ei twiniire Kristo kutuuba. Yesu akaba naamanya ngu nitwija kutunga amaganya, oburemeezi, n’ebirikutwerarikiriza omu nsi egi. Omu ky’okureeberaho ky’omubibi, Yesu akagira ngu abantu abamwe bakaba nibaija kuhurira “ekigambo ky’obukama” kandi omu kubanza bagire omujinya. Kwonka bwanyima, “amaganya g’ensi, n’okubeihwabeihwa kw’obutungi bwayo,” bikaba nibibaasa ‘kunyuruza ekigambo,’ oshangye batakiine mujinya. (Matayo 13:19-22; Mako 4:19) Twaba tutegyendesereize, okwerarikirira aha bya buri izooba nikubaasa kututeganisa omu ku turikuheereza Yehova. N’ahabw’ekyo Yesu akarabura abeegi be ati: “Mwerinde emitima yaanyu etakaaremesibwa omururu n’obusinzi n’amaganya g’amagara aga.”—Luka 21:34.

4. Niki ekiraatuhwere kumanya yaaba nitukunda munonga Kristo? (Reeba ekishushani aha kutandika.)

⁴ Nka Petero, nitubaasa kworeka ngu nitukunda Kristo turikwebembeza omurimo gw’okubuurira. Nitubaasa kuhamya tuta ngu twagumizamu nitumukunda? Nitubaasa kwebuuza tuti: ‘Niki eki ndikukira kukunda? Okushemererwa kwangye nikuruga omu kuheereza Yehova nari omu bintu ebindi?’ Kutuhwera kugarukamu ebibuuzo ebi, ka tushwijume ebintu bishatu ebirikubaasa kutuubya rukundo ei twiniire Kristo. Omurimo gw’okwebaisaho, eby’okweshemeza, n’okukunda ebintu.

5. Emitwe y’amaka baine bujunaanizibwa ki?

⁵ Petero akaba atarikukunda bukunda okujuba, kureka gukaba guri omurimo ogu yaabaire naakora kubaisaho eka ye. Na hati, Yehova ahaire emitwe y’amaka obujunaanizibwa bw’okureeberera amaka gaabo. (1 Timoseo 5:8) Baine kukora n’amaani kubaasa kuhikiiriza obujunaanizibwa obu. Kwonka omu biro ebi eby’emperu, emirimo y’okwebaisaho neebaasa kureeta okwerarikirira.

6. Ahabw’enki emirimo y’okwebaisaho erikubaasa kureeta okwerarikirira?

⁶ Abantu abarikuba nibenda emirimo ni baingi kandi emirimo ni mikye. N’ahabw’ekyo, abantu nibaba nibahayahayanira omurimo gumwe. Abandi nibareeba ngu baine kwongyera aha shaaha ezi barikukora, n’obu baakuba nibaheebwa esente nkye. Amakorero nigateeraho kushohoza ebintu bingi garikukoresa abakozi bakye kukira oku kyabaire kiri enyima. N’ahabw’ekyo, abakozi nibabaasa kugira amaganya, baruhe, kandi n’abandi nibarwara. Abaingi nibatiina ngu nibaija kufeerwa emirimo yaabo, baaba batakozire eki bakama baabo barikwenda.

7, 8. (a) N’oha ou twine kuhamiraho kukira ebindi byona? (b) Ow’eishe-emwe kuruga Thailand akeega eishomo ki aha murimo gwe?

⁷ Abakristaayo nituhamira ahari Yehova okukira ekintu ekindi kyona nari omuntu otwariiremu n’abakama baitu aha mirimo. (Luka 10:27) Emirimo y’okwebaisaho eshemereire kutuhwera kutunga ebirikwetengyesa n’okutushagika omu kubuurira. Kwonka  twaba tutegyendesereize, emirimo y’okwebaisaho neebaasa kuteganisa okuramya kwaitu. Nitubaasa kugira eki twayegyera aha w’eishe-emwe kuruga Thailand. Akagira ati: “Omurimo gwangye gw’okukanika kompyuta gukaba nigushemeza, kwonka gukaba nigwetengyesa okukora eshaaha nyingi. Ekyarugiremu, nkaba ntarikubaasa kutunga obwire burikumara obw’okukora ebintu by’omwoyo. Bwanyima nketegyereza ngu kubaasa kwebembeza eby’Obukama, nkaba nyine kuhindura omurimo.” Ow’eishe-emwe ogu akakora ki?

⁸ Naashoboorora ati: “Bwanyima y’okutebeekanisa kumara nk’omwaka gwona, nkacwamu kutandika kuguza ayisi kuriimu aha nguuto. Omu kubanza nkateganisibwa omu by’esente kandi nkatamwa. Ku naabaire mbugana abu naabaire ninkora nabo, bakaba banshekyerera, kandi baambuuza ahabw’enki naateekateekire ngu okuguza ayisi kuriimu nikuhita okukora ebya kompyuta omu mwanya murungi gurimu ebyoma ebirikureeta amabeho. Nkaba nshaba Yehova kumpwera kugumisiriza kubaasa kuhikiiriza ekigyendererwa kyangye eky’okutunga obwire bwingi bw’okukora eby’omwoyo. Bwanyima y’obwire bukye, ebintu bikatandika kutereera. Nkatandika kumanya eki abaguzi bangye barikukunda, kandi naaba omuhangu omu kukora ayisi kuriimu. Ayisi kuriimu ei naabaire ninkora nkatandika kugiguza omu izooba rimwe. Nangwa nkaba ndi gye omu by’esente kukira obu naabaire ninkora ebya kompyuta. Omurimo ogu gundeeteire okushemererwa ahakuba tinkiine kwerarikirira n’okutiina ebi naabaire nyine aha murimo ogw’okubanza. Kandi ekirikukira obukuru, hati nimpurira ndi haihi na Yehova.”—Shoma Matayo 5:3, 6.

9. Nitubaasa kuguma tuta twine emiteekateekyere etagwereire rubaju aha mirimo y’okwebaisaho?

⁹ Yehova naatusiima twakora n’amaani. Okukora n’amaani nikurugamu ebirungi. (Enfumu 12:14) Kwonka twine kuhamya ngu omurimo gw’okwebaisaho tigwaba mukuru munonga kukira okuheereza Yehova. Yesu arikugamba aha bintu ebirikwetengyesa, akagira ati: “Mubanze musherure obukama bwe n’okuhikiirira kwe; n’ebyo byona muryabyongyerwaho.” (Matayo 6:33) Kwonka nitubaasa kumanya tuta yaaba twine emiteekateekyere etagwereire rubaju aha murimo gw’okwebaisaho? Nitubaasa kwebuuza tuti: ‘Nindeeba ngu omurimo gwangye nigushemeza, kwonka nintwara okuheereza Ruhanga nk’ekintu kityo-kityo nari ekirikutama?’ Okuteekateeka aha kibuuzo eki nikiija kutuhwera kureeba eki buzima turikukunda.

10. Yesu akeegyesa eishomo ki erikuru?

¹⁰ Yesu akatwegyesa eki twine kwebembeza. Eizooba rimwe, Yesu akataayaayira enyineemwe, Mariamu na Mariza. Ahonaaho, Mariza akatandika kumutebeekanisiza eby’okurya, kwonka Mariamu we akashutama aha rubaju rwa Yesu yaaguma naahurikiza ebi arikwegyesa. Mariza akeetomboita ngu Mariamu akaba atarikumuhwera. Yesu akagira Mariza ati: “Mariamu we atooraine omugabo murungi ogutarimwakwa.” (Luka 10:38-42)  Omu kukora eki, Yesu akeegyesa eishomo rikuru. Kubaasa kwetantara kuhugibwa ebyetengo byaitu kandi tukooreka ngu nitukunda Kristo, twine kutoorana “omugabo murungi.” Eki nikimanyisa ngu omukago gwaitu na Yehova butoosha nigwo gwine kuba mukuru ahariitwe.

11. Baibuli neegamba ki aha kuhuumuraho?

¹¹ Nitukora emirimo mingi, n’ahabw’ekyo obumwe nituba twine kuhuumuraho. Nitushoma omu Baibuli tuti: “Tihariho kigasira omuntu ekikira okurya n’okunywa n’okutunga okushemererwa omu bi afeereire kubi.” (Omubuurizi 2:24) Yesu akaba naamanya ngu ni kikuru abeegi be kuhuumuraho. Nk’eky’okureeberaho, bwanyima y’okubuurira munonga, Yesu akabagira ati: “Mwije aheekiikire twehereere muhuumureho.”—Mako 6:31, 32.

12. Ahabw’enki twine kwegyendesereza aha bikwatiraine n’eby’okweshemeza n’okuhuumuraho? Ha eky’okureeberaho.

¹² Eby’okweshemeza nibibaasa kutuhwera kuhuumuraho. Kwonka tushemereire kwegyendesereza kureeba ngu okweshemeza tikyo kyaba kikuru ahariitwe. Omu kyasha ky’okubanza, baingi bakaba baine emiteekateekyere egi: “Reka tweriire, twenywere, ahakuba nyencakare turi ab’okufa.” (1 Abakorinso 15:32) Emiteekateekyere nk’egi ni mingi obunaku obu. Nk’eky’okureeberaho, omutsigazi omu burugwa izooba bwa Europe akatandika kuza omu nteerane z’Abajurizi ba Yehova. Kwonka akaba naakunda eby’okweshemeza munonga, n’ahabw’ekyo akarekyera aho kuza omu nteerane. Kwonka bwanyima, akamanya ngu okuta omutima aha by’okweshemeza kikamureetera oburemeezi bwingi. Akagaruka yaatandika kwega Baibuli, kandi bwanyima akabaasa kutandika kubuurira amakuru marungi. Ku yaaherize kubatizibwa, akagira ati: “Ekintu kimwe eki ndikwefuuza n’okugira ngu nkashiisha obwire bwingi ntakamanyire ngu okuheereza Yehova nikureeta okushemererwa kwingi okukira okuza omu by’okweshemeza by’ensi egi.”

13. (a) Gamba eky’okureeberaho ekirikworeka ahabw’enki okweshemeza n’okuhuumuraho ekirenga kitari kirungi. (b) Niki ekirikubaasa kutuhwera kugira emiteekateekyere eringaniire aha by’okweshemeza n’okuhuumuraho?

¹³ Okuhuumuraho kushemereire kutuhwera kugarukamu amaani. Mbwenu shi tushemereire kumara bwire ki omu by’okweshemeza? Kubaasa kugarukamu ekibuuzo ekyo, ka tukiteekateekyeho omu muringo ogu. Abantu baingi nibakunda kurya keeki n’ebindi ebirimu shukaari. Kwonka nitumanya ngu twaguma niturya ebintu ebi munonga, nibishiisha amagara gaitu. Twaba nitwenda kugira amagara marungi, twine kurya eby’okurya ebiri birungi aha magara gaitu. Omu muringo nigwo gumwe, twamara obwire bwingi omu by’okweshemeza n’okuhuumuraho, nikiija kushiisha omukago gwaitu na Yehova. Niki ekirikubaasa kutuhwera kumanya yaaba twine emiteekateekyere etagwereire rubaju aha by’okweshemeza? Eki turikubaasa kukora n’okucwamu saabiiti emwe tukahandiika eshaaha ezi tumazire omu bintu ebiine akakwate n’okuheereza Yehova, nk’enteerane z’ekibiina, okubuurira, n’okweyegyesa Baibuli. Reero omu saabiiti niyo emwe nitubaasa kuhandiika eshaaha ezi tumazire omu bintu ebiine akakwate n’okweshemeza, nk’eby’emizaano, okureeba TV, nari emizaano y’aha kompyuta. Ku turikugyeragyeranisa ebi byombi,  nitwega ki? Nitureeba ngu twine kukora empindahinduka?—Shoma Abaefeso 5:15, 16.

14. Niki ekirikubaasa kutuhwera kutoorana eby’okweshemeza ebirungi?

¹⁴ Yehova naatureka kwetooranira eby’okweshemeza, kandi n’emitwe y’amaka nibabaasa kutooranira amaka gaabo. Omu Baibuli, Yehova naatuha emisingye erikworeka emiteekateekyere ye. Emisingye egi neetuhwera kucwamu gye. * (Reeba obugambo obw’ahansi.) Eby’okweshemeza ebirungi ‘n’ekiconco kya Ruhanga.’ (Omubuurizi 3:12, 13) N’amazima ngu abantu batarikushushana nibakunda eby’okweshemeza bitarikushushana. (Abagalatia 6:4, 5) Kwonka buri by’okweshemeza byona ebi turikutoorana, nabwo nituba twine kwegyendesereza. Yesu akagira ati: “Ahu eitungo ryawe riri, n’omutima gwawe niho guba.” (Matayo 6:21) Rukundo ei twiniire Omugabe waitu Yesu neetuhiga kuteekateeka, kugamba, n’okutwaza omu muringo ogurikworeka ngu eby’Obukama ni bikuru munonga ahariitwe okukira ekindi kintu kyona.—Abafilipi 1:9, 10.

15, 16. (a) Okukunda ebintu nikubaasa kuba kuta omutego ahariitwe? (b) Yesu akaha buhabuzi ki aha bikwatiraine n’okukunda ebintu?

¹⁵ Abantu obunaku obu nibateekateeka ngu baine kugira emyenda n’esimu eby’ebeeyi, kompyuta eri aha murembe, n’ebindi ebiri aha murembe. Ekirikureeta ekyo n’okugira omuze gw’okukunda ebintu n’esente okukira ekintu ekindi kyona. Niki ekiri kikuru  munonga aha Mukristaayo? Yebuuze oti: ‘Niimara obwire bwingi ndikuteekateeka aha motoka z’omurembe nari emishono misya okukira okutebeekanisiza enteerane z’ekibiina? Niimara obwire bwingi buri izooba ndikukora emirimo, reero nshanga nyine obwire bukye bw’okushaba nari kushoma Baibuli?’ Twaba tutegyendesereize, okukunda ebintu nikubaasa kuba kukuru munonga ahariitwe okukira okukunda Kristo. Twine kuteekateeka aha bigambo bya Yesu ebi: “Mwerinde okwetenga kwona.” ( Luka 12:15) Ahabw’enki yaagizire atyo?

¹⁶ Yesu akagira ngu “tihariho omuntu orikubaasa kuheereza abakama babiri.” Akoongyeraho ati: “Timurikubaasa kuheereza Ruhanga na Mamona,” nari eby’obugaiga. Tikirikubaasika kuha Yehova ekirikukirayo oburungi, kandi tukagaruka tukata omutima aha kusherura ebintu. Yesu akashoboorora ngu nitwija ‘kwangaho omwe tukunde ondi; nari tugumire kyarimwe ahari omwe, tugaye ondiijo.’ (Matayo 6:24) Ahabw’okugira ngu tituhikiriire, twine kugumizamu niturwanisa “okurigira okubi kw’emibiri yaitu,” otwariiremu n’okukunda ebintu.—Abaefeso 2:3.

17. (a) Ahabw’enki abamwe nikibagumira kugira emiteekateekyere eringaniire aha bintu? (b) Niki ekirikutuhwera kurwanisa ekyetengo ky’okukunda ebintu?

¹⁷ Abantu baingi nibata omutima aha byetengo byabo n’okweshemeza, ekyo kibareetera kugumirwa kugira emiteekateekyere eringaniire aha kusherura ebintu. (Shoma 1 Abakorinso 2:14.) Ahabw’okugira ngu nibaba batarikuteekateeka gye, nikibaasa kubagumira kumanya entaaniso eri ahagati y’ekirungi n’ekibi. (Abaheburaayo 5:11-14) Ekyetengo kyabo ky’okwenda ebintu nikibaasa kuguma nikyongyera kuba eky’amaani. Oku barikweyongyera kutunga ebintu, nikwo barikweyongyera kubikunda. (Omubuurizi 5:10) Kwonka hariho eki turikubaasa kukora kweihamu emiteekateekyere egi. Okushoma Baibuli buri izooba nikiija kutuhamya, reero twangire ekyetengo ky’okukunda ebintu. (1 Petero 2:2) Yesu akateekateeka aha bwengye bwa Yehova, kandi ekyo kikamuhwera kwanga kwohibwa Omuregi. (Matayo 4:8-10) Naitwe obunaku obu, twaba nitwenda kwangira omuze gw’okukunda ebintu, twine kugyendera aha bwengye bwa Yehova. Twakora tutyo nitworeka ngu nitukunda Yesu okukira ebintu.

18. Omariirire kukora ki?

¹⁸ Yesu akaba naayegyesa Petero ngu okuheereza Yehova nikyo aine kwebembeza, obu yaamubuuza ngu noonkunda okukira ebi? Nikishemeza kureeba ngu eiziina rya Petero nirimanyisa “Ekicweka ky’orukiri.” Emitwarize mirungi ya Petero neebaasa kugyeragyeranisibwa n’orukiri. (Ebyakozirwe 4:5-20) Naitwe obunaku obu, nitwenda ngu rukundo ei twiniire Kristo ehame nk’orukiri. N’ahabw’ekyo nituhamya kureeba ngu emirimo y’okwebaisaho, eby’okweshemeza, n’ebintu twabita omu mwanya gwabyo. Obwo nitwija kubaasa kugamba nka Petero tuti: “Mukama wangye; noomanya ku nkukunda.”