EBYAFAAYO
Okuba Omuteta Tikundemeise Kwegyesa Abandi
Nkabatizibwa omuri 1941, nyine emyaka 12. Kwonka nkaija kwetegyereza amazima ga Baibuli omuri 1946. Ahabw’enki kyabaire kityo? Ka mbagambire ebyafaayo byangye.
NK’OMU mwaka gwa 1910, abazaire bangye bakafuruka Tbilisi, omuri Georgia, baaza Canada. Bakaba nibatuura omu kaju kakye haihi na Pelly, omuri Saskatchewan, omu burengyerwa izooba bwa Canada. Nkazaarwa omuri 1928, kandi niinye naabaire ndi muto aha baana mukaaga. Tata akafa harikuburayo ameezi mukaaga nkazaarwa, kandi maawe akafa nkiri omwereere. Bwanyima y’obwire bukye, munyaanyazi Lucy, akafa aine emyaka 17. Nyowe na beene maawe tukatandika kureebererwa maarimi orikwetwa Nick.
Eizooba rimwe nkiri kwajura, ab’omu ka yaitu bakandeeba ninyurura omukira gw’emwe aha ndogoya zaitu. Bakatiina ngu endogoya egyo neebaasa kunteera omugyere, n’ahabw’ekyo bakaamuza ngu mbaase kurekyera aho. Kwonka nkaba mbataire omugongo, kandi tindabaasize kuhurira okwamuza kwabo. Ekirungi, endogoya teraanteire mugyere. Obwo ab’eka yangye nibwo baamanya ngu nfiire amatu tindikuhurira.
Munywani w’eka yaitu akagira ngu ni kirungi kuza omu ishomero ry’abateta. N’ahabw’ekyo maarimi Nick akanta omu ishomero ry’abateta erya Saskatoon, omuri Saskatchewan. Eishomero eri rikaba riri hare n’eka yaitu, kandi ahabw’okugira ngu nkaba nyine emyaka etaano yonka, nkatiina. Nkaba nimbaasa kutaayaayira eka yaitu omu bwire bw’ekihuumuro. Nkarugaho naayega orurimi rw’obumanyiso, reero naatandika kuzaana n’abaana abandi.
OKWEGA AMAZIMA GA BAIBULI
Omuri 1939, munyaanyazi omukuru Marion akashwerwa Bill Danylchuck, kandi bakatandika kundeeberera na munyaanyazi Frances. Omu ka yaitu nibo abu Abajurizi ba Yehova baabandize kwegyesa Baibuli. Ku naabaire mpuumura bakaba bateeraho nk’oku barikubaasa kungambira aha bi baabaire nibeega omu Baibuli. Kikaba kitoorobi kugaaniira nabo ahakuba bakaba batarikumanya orurimi rw’obumanyiso. Kwonka nabwo bakaba nibabaasa kureeba ngu ninkunda ebi naabaire niinyega ebirikukwata ahari Yehova. Nketegyereza ngu ebi baabaire nibakora bishemereire kuba nibikwata aha ki Baibuli erikwegyesa, n’ahabw’ekyo nkaba ngyenda nabo baaba nibaza kubuurira. Ahonaaho bwanyima y’ekyo nkaba niinyenda kubatizibwa, kandi omu Kwamwenda 5, 1941, Bill akambatiza omu kitanka ky’ekyoma kijwiiremu amaizi g’eiziba. Amaizi ago gakaba nigafuka munonga!
Ndi n’abateta abandi aha ruteerane oruhango Cleveland, omuri Ohio, omu gwa 1946
Omu 1946, ku naagarukire omu ka omu kihuumuro, tukaza aha ruteerane oruhango orw’ebiro bishatu Cleveland, Ohio, omuri U.S.A. Aha izooba ry’okubanza, banyaanyazi bakampandiikira kugira ngu nkuratire entebeekanisa y’oruteerane. Kwonka aha izooba rya kabiri, nkashemererwa kumanya ngu hakaba hariho guruupu y’abateta barikubavunuurira. Obwo oruteerane rukanshemeza munonga, kandi kikaba nikishemeza kwetegyereza gye eki Baibuli erikwegyesa!
OKWEGYESA AMAZIMA
Omu bwire obwo, Orutaro rw’Ensi Yoona orwa II rukaba ruherize kuhendera, kandi abantu bakaba nibenda kworeka ngu bahamiire aha ihanga ryabo. Kwonka ku naarugire omu ruteerane orwo nkagaruka aha ishomero, nkaba mmaririire kugumizamu ndi omwesigwa ahari Yehova. N’ahabw’ekyo nkarekyera aho kwejumba omu kuteerera ebendera entamaamu, kweshongora ekyeshongoro ky’eihanga, n’okukuza ebiro bikuru. Kandi nkarekyera aho n’okuza omu kanisa ndi hamwe n’abeegi bagyenzi bangye. Ekyo tikirashemeize abashomesa, kandi bakateeraho kundahura, baangambira n’ebishuba kundeetera kuhindura aha miteekateekyere yangye. Abu naabaire ninshoma nabo bakaba nibareeba ekirikubaho, kandi eki kikampa emigisha mingi y’okubabuurira. Kandi bamwe aha bu naabaire ninshoma nabo, nka Larry Androsoff, Norman Dittrick, na Emil Schneider, bakaikiriza amazima, kandi na hati nibakiheereza Yehova.
Ku naabaire nza omu ndembo ezindi, nkaba nteeraho munonga kubuurira abateta. Nk’eky’okureeberaho, omu rurembo Montreal nkaza omu mwanya ogwabaire niguteeraniramu abateta. Nkabuurirayo omutsigazi orikwetwa Eddie Tager, owaabaire ari omwe aha guruupu y’abashuma. Okuhitsya obu yaafiire omwaka oguhwaire, abaire ari omu kibiina ky’abateta ekiri Laval, omuri Quebec. Kandi nkabuganayo na Juan Ardanez. Okushushana na n’Abaaberoya aba ira, akaba naacondooza kuhamya ngu ebi yaabaire naayega nibyegamira aha Baibuli. (Ebyakozirwe 17:10, 11) Nawe akaija omu mazima, kandi akaheereza nk’omureeberezi omu kibiina kya Ottawa, omuri Ontario, kuhitsya obu yaafa.
Ndikubuurira aha nguuto omu myaka ya 1950
Omuri 1950, nkafuruka naaza omuri Vancouver. N’obu ndaabe ninkunda kubuurira abateta, tindikubaasa kwebwa eky’okureeberaho ky’omukazi orikwetwa Chris Spicer, ou naabuuriire aha ruguuto. Akaikiriza kuguma naatunga magaziini, kandi akaba naayenda ngu ntaayaayire iba, Gary. Nkaza owaabo, kandi tukagaaniira kumara obwire buraingwa obwo ndikuhandiika nabo bakahandiika. Tindagarukire
kubareeba kuhitsya obu naabareeba aha ruteerane oruhango orw’ebiro bishatu omuri Toronto, Ontario bwanyima y’emyaka mikye. Gary akaba ariyo naaza kubatizibwa aha izooba eryo. Eky’okureeberaho ekyo nikinyijutsya oku kiri kikuru kugumizamu nitubuurira, ahakuba titurikumanya yaaba omuntu ou twabuurira naija kwija omu mazima.Bwanyima, nkagaruka omuri Saskatoon. Nkabuganayo omukazi owaanshabire kwegyesa Baibuli abahara babiri abarongo abaabaire bari abateta, Jean na Joan Rothenberger. Bakaba nibashomera aha ishomero eri naashomeireho. Ahonaaho abaishiki aba bakatandika kugambira abeegi bagyenzi baabo aha bi baabaire nibeega. Bwanyima, bataano omu kibiina kyabo bakaba Abajurizi ba Yehova. Omwe aharibo akaba ari Eunice Colin. Nkabanza kureeba Eunice omu mwaka gwangye gw’aha muheru aha ishomero ry’abateta. Obwire obwo akampa switi reero yaanshaba ngu tube abanywani. Bwanyima akaija yaaba omuntu mukuru omu magara gangye. Akaba omukazi wangye!
Ndi na Eunice omu 1960 n’omu 1989
Nyina wa Eunice ku yaakimanyire ngu Eunice naayega Baibuli, akashaba mukuru w’eishomero ngu amubeihebeihe arekyere aho. N’obu mukuru w’eishomero araabe yaateireho kuremesa Eunice, kandi akatwara n’ebi yaabaire naakoresa omu kwega Baibuli, Eunice akaba amaririire kuguma ari omwesigwa ahari Yehova. Ku yaayenzire kubatizibwa, abazaire be bakamugira bati: “Ohindukye Omujurizi wa Yehova, kwonka oine kuruga omu ka yaitu okagyenda!” N’ahabw’ekyo Eunice ku yaahikize emyaka 17, akaruga owaabo yaatandika kutuura n’eka y’Abajurizi ba Yehova. Akagumizamu naayega Baibuli bwanyima yaabatizibwa. Ku naataahire nawe omu bushwere omuri 1960, abazaire be bakanga kwija aha bugyenyi bwaitu. Kwonka ku haahingwireho obwire, bakatandika kutuha ekitiinisa ahabw’enyikiriza zaitu n’oku twayoroire abaana baitu.
YEHOVA ANDEEBEREIRE
Mutabani wangye Nicholas n’omukazi we, Deborah, aha Beseeli London
Ahabw’okugira ngu tukaba turi abazaire abateta, kikaba kigumire kworora aboojo mushanju abarikuhurira. Kwonka tukahamya ngu baayega orurimi rw’abateta orw’obumanyiso kugira ngu tugaaniire gye nabo, kandi tubeegyese amazima. Ab’eishe-emwe na banyaanyazi-itwe bakatuhwera munonga. Nk’eky’okureeberaho, omuzaire akatuhandiikira akabaruha ngu omwe aha boojo baitu akaba naagamba ebigambo bibi omu Kyombeko ky’Obukama. Tukabaasa kushoboorora enshonga egyo ahonaaho. Bana ahari batabani bangye, James, Jerry, Nicholas, na Steven, n’abareeberezi, kandi nibaheereza Yehova omu bwesigwa n’abakazi baabo n’ab’omu maka gaabo. Kandi, Nicholas n’omukazi we, Deborah, nibahwera omu kuvunuura orurimi rw’abateta aha ofiisi y’eitaagi omuri Britain, kandi Steven n’omukazi we Shannan, bari aha tiimu y’okuvunuura orurimi rw’abateta aha itaagi erya United States.
Batabani bangye James, Jerry, na Steven n’abakazi baabo nibashagika okubuurira abateta omu miringo mingi
Eky’obusaasi, harikuburayo okwezi kumwe tukaijuka okugaitwa kwaitu omurundi ogwa 40, Eunice akaitwa ekookoro. Omu bwire obwo obugumire obu yaabaire arwaire, okwikiririza omu kuzooka kukamuhwera kuguma ahami. Nyine ekihika
ky’okugaruka kumureeba ku araazookye.Faye na James, Jerry na Evelyn, Shannan na Steven
Omu Kwakabiri 2012, nkagwa naahendeka einyaanya. Nketegyereza ngu ninyetenga obuhwezi, n’ahabw’ekyo nkaza kutuura n’omwe ahari batabani bangye n’omukazi we. Hati turi omu kibiina kya Calgary eky’orurimi rw’abateta, ahu ndikuheereza nk’omureeberezi. Ogu nigwo murundi gwangye gw’okubanza kuba omu kibiina ky’orurimi orw’abateta! Mbwenu shi nkabaasa kuhamya nta omukago gwangye na Yehova obwire obwo bwona obu naabaire ndi omu kibiina ky’Orungyereza? Yehova akampwera. Akahikiiriza okuraganisa kwe okw’okureeberera efuuzi. (Zaaburi 10:14) Ninsiima munonga abo boona abaabaire nibampandiikire omu nteerane, abaayegire orurimi rw’abateta, n’abaampwereire kunvunuurira nk’oku baabaire nibabaasa.
Obu naaza omu ishomero rya baapayoniya ery’abateta nyine emyaka 79
Hariho obu naabaire ntetegyereza ekirikugambwa nari obumwe nkaba nteekateeka ngu tihariho n’omwe orikumanya oku aine kuhwera omuteta. Omu bwire nk’obwo ku naabaire ntamwa nkenda kubirugaho, nkaba nteekateeka aha bigambo ebi Petero yaagambiire Yesu: “Mukama waitu, nituza ahari oha? Ka niiwe oine ebigambo by’amagara agatahwaho.” (Yohaana 6:66-68) Nk’ab’eishe-emwe na banyaanyazi-itwe abandi abateta abamazire obwire buraingwa omu mazima, nyegire okuba omugumisiriza. Nyegire okwesiga Yehova n’entebeekanisa ye, kandi eki kirugiremu emigasho mingi. Hati hariho ebitabo bingi omu rurimi rwangye, kandi ninshemererwa okureeba ngu nimbaasa kuza omu nteerane enkye n’empango ez’orurimi rw’abateta orwa America. Buzima, mbaasize kutunga okushemererwa n’okumarwa omu kuheereza Yehova Ruhanga waitu orikukirayo.