1, 2. (a) Ni buremeezi ki obu ab’eishe-emwe na banyaanyazi-itwe abamwe baine? (b) Ekyo nikireetaho bibuuzo ki?

OW’EISHE-EMWE Lije naagira ati: “Obu orutaro rw’enganda rwatandika omuri Burundi, eka yaitu ekaba eri aha ruteerane ruhango. Tukaba nitureeba abantu nibairuka, amasasi garikutyankana. Abazaire bangye naitwe abaana 11 tukairuka kukiza amagara gaitu n’ebijwaro ebi twabaire tuheekire aha mugongo. Bamwe aha b’omuka yaitu bakabaasa kuhungira omu nkambi y’empungi omuri Malawi, orugyendo rwa mahiro ezirikurenga 1,000. Abandi ahariitwe tukataataana.”

² Omu nsi yoona, harimu empungi abarikurenga obukaikuru 65 abagyemesereziibwe kutsigaho amaka gaabo ahabw’entaro nari okuhiiganisibwa. Ogwo n’omubaro ogurakizireyo omu byafaayo. * (Reeba obugambo obw’ahansi.) Bamwe aha mpungi aba n’Abajurizi ba Yehova. Baingi bafeereirwe abakundwa baabo, haihi na buri kintu kyona eki baabaire baine. Ni  buremeezi ki obundi obu empungi barikutunga? Nitubaasa kuhwera tuta ab’eishe-emwe na banyaanyazi-itwe kuheereza Yehova, kandi bakaguma baine okushemererwa baatunga oburemeezi nk’obwo? (Zaaburi 100:2) Kandi ni muringo ki omurungi ogw’okubuurira empungi abatakamanyire Yehova?

3. Yesu na baingi aha beegi be bakaba bata empungi?

³ Yesu n’abazaire be bakaba empungi omuri Misri bwanyima ya maraika wa Yehova kurabura Yosefu ngu Omugabe Heroode akaba naayenda kwita Yesu. Bakagumayo okuhitsya obu Heroode yaafa. (Matayo 2:13, 14, 19-21) Bwanyima y’emyaka mingi, abeegi ba Yesu ‘bakataataanira omu bicweka bya Buyudaaya na Samaria’ ahabw’okuhiiganisibwa. (Ebyakozirwe 8:1) Yesu akaba naamanya ngu baingi aha bakuratsi be bakaba nibaija kugyemeserezibwa kutsigaho amaka gaabo. Akagira ati: “Ku baribahiiga omuri tauni emwe, muhungire omu ndiijo.” (Matayo 10:23) Enshonga yoona erikukureetera kuhunga omu ka yaawe, ti kintu kyorobi.

4, 5. Empungi nibatunga buremeezi ki (a) baaba nibahunga? (b) baaba nibatuura omu nkambi?

⁴ Empungi baaba nibahunga kuruga omuka owaabo, nari barikutuura omu nkambi y’empungi, nibahikwaho oburemeezi bwingi. Murumuna wa Lije omuto orikwetwa Gad, akagira ati: “Tukagyenda kumara saabiiti nyingi, turikuraba aha bantu bafiire. Nkaba nyine emyaka 12. Ebigyere byangye bikazimba munonga, reero naagambira ab’eka yaitu ngu bagyende bonka nyowe ntsigare. Tata akaba atarikwenda kuntsiga omu mikono y’abaheekyera, akaampeka yaantwara. Tukaba tubara eizooba eryarenga, turikushaba Yehova kandi turikumwesiga, obumwe tukaba turya emiyembe yonka eyaabaire emezire aha rubaju rw’enguuto.”—Abafilipi 4:12, 13.

⁵ Baingi aha b’eka ya Lije bakamara emyaka mingi omu nkambi z’empungi ezirikureebererwa United Nations. Kwonka nayo embeera zikaba zitari nungi. Lije, hati ori omureeberezi orikutaayaayira ebibiina, naashoboorora ati: “Abantu baingi bakaba bataine mirimo. Bakaba basiiba omu rugambo, nibasinda, nibateera zaara, nibaiba, kandi barikushambana.” Abajurizi ba Yehova bakaba baine kugira bingi by’okukora omu kibiina, kubaasa kwerinda obutashiishwa ab’emicwe mibi. (Abaheburaayo 6:11, 12; 10:24, 25) Bakakoresa gye obwire bwabo kugira ngu bagume bahami omu mazima, baingi bakatandika kuheereza nka baapayoniya. Bakaba nibeijutsya ngu obwire nibwija kuhika barugye omu nkambi y’empungi, nk’oku obwire bw’Abaisraeli omu ihamba bwahendeire. Eki kikabahwera kuguma baine emiteekateekyere mirungi.—2 Abakorinso 4:18.

6, 7. (a) ‘Okukunda Ruhanga’ nikutuhiga kutwariza tuta ab’eishe-emwe? (b) Ha eky’okureeberaho.

⁶ “Okukunda kwa Ruhanga” nikutuhiga kugirira rukundo ab’eishe-emwe bagyenzi baitu, okukira munonga baahikwaho oburemeezi. (Shoma 1 Yohaana 3:17, 18.) Nk’eky’okureeberaho, Abakristaayo b’omu kyasha ky’okubanza ab’omuri Buyudaaya bakaba nibeetenga eby’okurya ahabw’okuteerwa enjara, ekibiina kikatebeekanisa kubahwera. (Ebyakozirwe 11:28, 29) Kandi entumwa Paulo na Petero bakahiga  Abakristaayo kugirirana obufura. (Abarooma 12:13; 1 Petero 4:9) Obu Abakristaayo barikuhigwa kugirira embabazi ab’eishe-emwe kuruga omu myanya endiijo, twine kugirira embabazi ab’eishe-emwe abari omu kabi nari abarikuhiiganisibwa ahabw’okwikiriza kwabo! *—(Reeba obugambo obw’ahansi.)—Shoma Enfumu 3:27.

⁷ Enyimaho, Abajurizi ba Yehova baingi bakagyemeserezibwa kutsigaho amaka gaabo ahabw’orutaro n’okuhiiganisibwa ebyabaire omu burugwa-izooba bwa Ukraine. Eky’obusaasi, baingi aharibo bakaitwa. Kwonka ab’eishe-emwe baingi abaabaire nibahunga bakaakiirwa gye omu maka g’ab’eishe-emwe na banyaanyazi-itwe omu bicweka ebindi ebya Ukraine na Russia. Omu mahanga ago gombi, ab’eishe-emwe bakaguma bataine rubaju, ‘batari b’ensi,’ baaguma “nibabuurira ekigambo” baine omujinya.—Yohaana 15:19; Ebyakozirwe 8:4.

8, 9. (a) Ni buremeezi ki obu empungi barikubaasa kutunga omu ihanga risya? (b) Ahabw’enki twine kubahwera?

⁸ Empungi abamwe nibagyemeserezibwa kutuura omu bicweka ebindi by’omu ihanga ryabo. Kwonka, abandi baingi nibaba baine kuza omu ihanga risya eri batamanyiriire. N’amazima ngu gavumenti neebaasa kuha empungi eby’okurya, ebijwaro n’omwanya gw’okutuuramu, kwonka nihaba hakiriho oburemeezi. Nk’eky’okureeberaho, eby’okurya nibibaasa kuba nibitaanira kimwe n’ebi bamanyiriire. Empungi abamwe abarikuruga omu ihanga eririmu omushana nibabaasa kutamanya oku baine kujwara omu bufuki bwingi. Abandi nikibaasa kubeetengyesa kwega oku baine kukoresa ebyoma ebiri aha mureembe omurundi gwabo gw’okubanza.

⁹ Gavumenti ezimwe ziine entebeekanisa y’okuhwera empungi kubabaasisa kumanyiira embeera. Kwonka obutoosha empungi nibaba baine kwereeberera bwanyima y’ameezi makye. Eki nikibaasa kuguma munonga. Teekateeka aha bintu ebi barikuba baine kwega omurundi gumwe: orurimi rusya, emitwarize misya, n’ebiragiro bisya ebirikukwata aha kushashura emishoro, okushoma, n’okuhana abaana! Noobaasa kuhwera ab’eishe-emwe abaine oburemeezi nk’obu orikubagumisiriza kandi okabaha ekitiinisa?—Abafilipi 2:3, 4.

10. Nitubaasa kuhamya tuta okwikiriza kw’empungi ahonaaho baaheza kwija? (Reeba ekishushani aha kutandika)

¹⁰ Obumwe ab’obushoboorozi nibaremesa ab’eishe-emwe bagyenzi baitu abari empungi kuza omu nteerane. Ebigombe ebimwe ebya gavumenti nibitiinatiinisa ngu nibiza kurekyera aho kuhwera ab’eishe-emwe bagyenzi baitu. Nibabaasa kubagira ngu tibaraabaikirize kutuura omu ihanga eryo baaba bataikiriize omurimo ogurikubaremesa kuza omu nteerane. Ahabw’okugira ngu nibaba batiinire kandi barikumanya ngu tibarikubaasa kwehwera, abamwe baikiriize emirimo egyo. N’ahabw’ekyo n’eky’oburyo kuza kureeba ab’eishe-emwe empungi ahonaaho. Baine kumanya ngu nitubafaho. Okubafaho omu muringo nk’ogwo nikubaasa kuhamya okwikiriza kwabo.—Enfumu 12:25; 17:17.

11. (a) Omu kubanza empungi nibaba nibenda ki? (b) Empungi nibabaasa kworeka bata ngu nibasiima?

¹¹ Omu kubanza, nitubaasa kuha ab’eishe-emwe eby’okurya, ebijwaro, nari ebindi bintu ebikuru. * (Reeba obugambo obw’ahansi.) N’ebiconco ebikye, nk’okuha ow’eishe-emwe etaayi, nikibaasa kuhwera munonga. N’amazima, empungi nibaba bataine kuguma nibashaba ebintu, kwonka nibaba baine kworeka ngu nibasiima ebi abandi barikukora. Eki nikireetera okushemererwa ab’eishe-emwe abarikuhayo ebintu byabo kubahwera. Kwonka, ni kikuru empungi kuteeraho kwereeberera. Baakora ekyo nibaba nibeeha ekitiinisa kandi nibagira omukago murungi n’ab’eishe-emwe bagyenzi baabo. (2 Abatesalonika 3:7-10) Kwonka nabwo, empungi twine kubahwera.

12, 13. (a) Nitubaasa kuhwera tuta empungi? (b) Ha eky’okureeberaho.

¹² Tikirikutwetengyesa kugira sente nyingi kubaasa kuhwera empungi. Eki barikwenda munonga ni rukundo n’obwire bwaitu. Nk’eky’okureeberaho, noobaasa kubahwera kumanya eby’engyenda omu kicweka eki barimu, nari ah’okugura eby’okurya birungi kwonka by’esente nkye. Noobaasa kubooreka oku barikubaasa kutunga ebintu, nk’ekiharaani nari akooma k’okushuusha ebinyaatsi kugira ngu babikorese kutunga entaasya. Ekikuru munonga, noobaasa kubahwera  kwejumbira kimwe omu kibiina ekisya. Kyaba nikibaasika, noobaasa kubahwera kuza omu nteerane. Noobaasa n’okubashoboororera omu omuringo murungi gw’okubuuriramu omu kicweka kyanyu, kandi noobaasa n’okubuurira nabo.

¹³ Empungi bana abato ku baahikire omu kibiina kimwe, abareeberezi batari bamwe na bamwe bakabahwera. Bakabeegyesa kuvuga emotoka, okuhandiika ebaruha, n’oku baine kushaba omurimo. Bakabeegyesa n’oku baine kukoresa gye obwire bwabo kugira ngu beebeembeze okuheereza Yehova. (Abagalatia 6:10) Bwanyima y’obwire bukye, boona bana bakaba baapayoniya. Ahabw’okugira ngu abareeberezi bakabahwera kandi nabo baataho ebigyendererwa omu kuheereza Yehova, bakatunguuka omu by’omwoyo baayetantara kuba ekicweka ky’ensi ya Sitaane.

14. (a) Ni kwohibwa ki oku empungi baine kwangira? (b) Ha eky’okureeberaho.

¹⁴ Empungi kushushana n’Abakristaayo abandi, baine kwetantara okwohibwa n’okugyemeserezibwa kuta eby’obutungi omu mwanya gw’omukago gwabo na Yehova. * (Reeba obugambo obw’ahansi.) Lije, owaaba yaagambirweho, barumuna be na banyaanya nibaijuka ishe arikubeegyesa obukuru bw’okugira okwikiriza obu baabaire nibahunga. Nibagira bati: “Akagyenda naanaga kimwe-kimwe aha bintu ebitari bikuru ebi twabaire twine. Bwanyima, akakwata enshaho erimu busha arikumwenya reero yaagira ati: ‘Nimureeba? Eki nikyo murikwetenga!’”—Shoma 1 Timoseo 6:8.

15, 16. (a) Nitubaasa kugumya tuta okwikiriza kw’ab’eishe-emwe bagyenzi baitu? (b) Nitubaasa kubahwera tuta omu nyehurira?

¹⁵ Empungi baine kutunga ekirikukira aha by’okurya n’ebijwaro. Baine kuhwerwa omu nyehurira n’okuhuumurizibwa kuruga omu Baibuli. (Matayo 4:4) Abareeberezi nibabaasa kubahwera barikutunga ebitabo omu rurimi oru empungi barikwetegyereza, kandi babahwere n’okuhikiirira Ab’eishe-emwe abarikugamba orurimi rwabo. Eki ni kikuru ahabw’okugira ngu empungi nyingi bagyemesereziibwe kutsigaho buri kintu kyona eki baabaire bamanyiriire. Nibaba bainiire orushusho amaka gaabo, ekicweka kyabo, n’ekibiina. Baine kureeba ngu Abakristaayo bagyenzi baabo baine rukundo n’embabazi nka Yehova. Empungi baaba batorekirwe rukundo, nibabaasa kusherura obuhwezi kuruga aha bandi abarikuruga omu ihanga ryabo kwonka abatarikuheereza Yehova. (1 Abakorinso 15:33) Ku turikubahwera kwehurira baikaikaine omu kibiina, nituba nitukora na Yehova kurinda “abashuhuuki.”—Zaaburi 146:9.

¹⁶ Ab’eka ya Yesu bakaba batarikubaasa kugaruka owaabo obwo abo abaabaire nibabahiganisa bakiriho. Empungi ab’obunaku obu, nibabaasa kutagaruka owaabo ahabw’enshonga ezirikushusha zityo. Kwonka, abandi nibabaasa kuba batarikwenda kugaruka owaabo. Lije naagira ngu abazaire baingi abaareebire ab’omu maka gaabo nibahambwa, kandi barikwitwa omu mahanga gaabo, tibarikwenda kugarurayo abaana baabo. Kubaasa kuhwera ab’eishe-emwe bagyenzi baitu, twine ‘kukundana nk’eishe-emwe, kugirirana embabazi n’omutima  omucureezi.’ (1 Petero 3:8) Okuhiiganisibwa kureetaire empungi abamwe kwetantara kuba n’abandi, kandi nibabaasa n’okukwatwa enshoni kugamba aha kubonabona kwabo, na munonga abaana baabo baaba bariho. Yebuuze oti: ‘Ku naakuhikwaho obusaasi nk’obwo, nkaayenzire kutwarizibwa nta?’—Matayo 7:12.

17. Okubuurira nikuhwera kuta empungi kutunga oburuhuuko?

¹⁷ Empungi abaingi obunaku obu nibaruga omu mahanga ahu ababuurizi batarikwikirizibwa kubuurira. Nitusiima Abajurizi ba Yehova ahabw’okubuurira n’omujinya, baingi aha mpungi nibahurira “ekigambo ky’Obukama” omurundi gw’okubanza. (Matayo 13:19, 23) Baingi ‘abaremereirwe’ nibatunga okuhuumurizibwa n’oburuhuuko baija omu nteerane zaitu reero bagira bati: “Buzima kwo Ruhanga ari omuriimwe.”—Matayo 11:28-30; 1 Abakorinso 14:25.

18, 19. Nitubaasa kuba abanyabwengye tuta twaba nitubuurira empungi?

¹⁸ Twine kugira “obwengye” twaba nitubuurira empungi. (Matayo 10:16; Enfumu 22:3) Twine kugumisiriza twaba tuhurikiize empungi barikugamba, kwonka titwine kugamba aha by’obutegyeki. Twine kukuratira obuhabuzi obu turikutunga kuruga aha ofiisi y’eitaagi n’ab’obushoboorozi kugira ngu tutata amagara gaitu omu kabi nari ag’abandi. Ahabw’okugira ngu empungi nibaruga omu diini n’enganda zitarikushushana, twine kwega kuha ekitiinisa enyehurira zaabo n’ebiteekateeko byabo. Nk’eky’okureeberaho, abantu kuruga omu mahanga agamwe nibafayo munonga aha njwara y’abakazi. N’ahabw’ekyo twaba nitubabuurira, ni kirungi kujwara omu muringo ogutaraabareetere kwehurira kubi.

¹⁹ Nitwenda kuhwera abantu abarikubonabona, nangwa nabo abatarikuheereza Yehova. Twakora tutyo, nitutooreza Omusamaria omu ky’okureeberaho kya Yesu. (Luka 10:33-37) Omuringo murungi gw’okuhweramu abantu n’okubeegyesa amakuru marungi. Omureeberezi omwe ohwereire empungi nyingi akagira ngu ni kikuru kubagambira ahonaaho ngu turi Abajurizi ba Yehova. Tushemereire kubamanyisa ngu ekikuru nitwenda kubahwera kwetegyereza amatsiko marungi agari omu Baibuli omu mwanya gw’okubaha ebintu.

20, 21. (a) Ni birungi ki ebirikuruga omu kugirira empungi rukundo eyaabuzima? (b) Nituza kwega ki omu kicweka ekirikukurataho?

²⁰ Twagirira “abashuhuuki” rukundo eyaabuzima, nikirugamu ebirungi. Munyaanyazi-itwe Alganesh iba ku yaafiire, akahunga kuruga Eritrea n’abaana be bato mukaga ahabw’okuhiiganisibwa. Bakagyenda kumara ebiro munaana barikuraba omu ihamba. Bwanyima y’orugyendo orwo ryona orurikurutsya, bakahika omuri Sudan. Nagira ati: “Ab’eishe-emwe baakatutwariza nk’abanyabuzaare baitu, barikutuha eby’okurya, ebijwaro, oburaaro, n’eby’engyenda. Ni baahi abandi abarikubaasa kwakiira abu batarikumanya, omu maka gaabo ahabw’okugira ngu nibaramya Ruhanga omwe? Ni Abajurizi ba Yehova bonka!”—Shoma Yohaana 13:35.

²¹ Kandi shi abaana baingi abarikwija n’abazaire baabo? Omu kicweka ekirikukurataho, nitwija kwega oku twena turikubaasa kuhwera amaka aga kuheereza Yehova bashemereirwe.