Okushemererwa Okurikuruga omu Kuba n’Ebintu Bikye
DANIEL NA MIRIAM bakaza hamwe omu bushwere Okwamwenda 2000, kandi bakaba bari omu mbeera nungi omuri Barcelona, Spain. Daniel naashoboorora ati: “Emirimo yaitu ekaba neetubaasisa kurya omu mahoteeri marungi, kuza aheeru y’eihanga, n’okujwara emyenda mirungi munonga. Kandi tukaba nitubaasa kwejumba omu kubuurira butoosha.” Kwonka bwanyima haine ekyabaireho.
Omu ruteerane oruhango orwa 2006, Daniel akahurira orubazo orwabaire rurimu ekibuuzo: “Nitukora kyona eki turikubaasa kuhwera ‘abarikutetema nibaza kwitwa’ kugira ngu baze omu ruguuto rw’amagara agatahwaho?” (Enfumu 24:11) Omu rubazo orwo bakashoboorora ngu twine obujunaanizibwa bw’okubuurira obutumwa bw’omu Baibuli ahakuba obutumwa obwo nibukwata aha magara g’abantu. (Ebyakozirwe 20:26, 27) Daniel naijuka ati: “Okaba nooshusha ngu Yehova naagamba naanye.” Kandi nabwo omu rubazo orwo bakagira ngu nitushemererwa twakora kihango omu kuheereza Yehova. Daniel akaba naamanya ngu eki kihikire ahakuba akaba naareeba Miriam owaabaire ari payoniya obwire obwo, ashemereirwe munonga.
Orubazo oru rukakwata munonga ahari Daniel yaacwamu ngu obwire bwe bukaba buhikire obw’okukora empindahinduka. Akatandika kukora eshaaha nkye, yaaba payoniya, kandi yaateekateeka oku Miriam yaabaire naija kushemererwa baaza kuheereza hamwe ahu ababuurizi b’Obukama barikwetengwa munonga.
OBUREMEEZI OMU KUBANZA KANDI BWANYIMA AMAKURU GARIKUSHEMEZA
Okwakataano 2007, Daniel na Miriam bakareka emirimo yaabo baaza Panama, eihanga eri baabaire baataayaayiremu enyima. Ekicweka eki baabaire nibabuuriramu kikaba kirimu ebirwa bingi omuri Bocas del Toro Archipelago omwanya oguri aha nyanja Caribbean. Abantu abaingi abarikutuurayo nibabeeta Abaaguayimi. Daniel na Miriam bakaba nibateekateeka ngu nibabaasa kutuura omuri Panama kumara ameezi munaana kurugiirira aha sente ezi baabaire baine.
Aha kirwa ekyo bakaba nibakoresa obwato n’egaari. Nibaijuka obu baavuga egaari zaabo mahiro nka 20 aha bushozi obwo omushana gurikwaka munonga. Daniel akaruha munonga yaayenda n’okugwa kihuumura. Kwonka, Abaaguaymi abu baabaire nibataayaayira bakaba bari efura, na munonga ku baaherize kwega bimwe aha bigambo by’orurimi rw’abantu abo. Bwanyima y’akaire kakye bakaba baine abeegi ba Baibuli 23.
Hakabaho ki esente ezi baabaire baine ku zaahwaireho? Daniel naagira ati: “Twine amarira aha maisho gaitu, tukatandika kuteekateeka kugaruka Spain. Tukaba twine enaku nyingi turikuza kutsigaho abeegi baitu ba Baibuli.” Kwonka bwanyima y’okwezi kumwe, bakatunga amakuru garikushemeza. Miriam naagira ati: “Tukashabwa kuheereza nka baapayoniya ab’omutaano. Ka kyabaire nikishemeza munonga kuguma omu buheereza bwaitu!”
OKUSHEMERERWA KWABO OKURIKUKIRAYO
Ahabw’empindahinduka ezaabaire omu kibiina, Daniel na Miriam bakarekyera aho kuheereza nka baapayoniya ab’omutaano omu 2015. Mbwenu shi hati bakaba nibaza kukora ki? Bakeesiga okuraganisa okuri omu Zaaburi 37:5, aharikugira hati: “Orugyendo rwawe orwegyekyerere” Yehova kandi “omwesigye; nawe aryaruhikiiriza.” Bakatunga omurimo kugira ngu babaase kwebaisaho barikuheereza nka baapayoniya ab’obutwire, kandi hati nibaheereza omu kibiina kya Veraguas, omuri Panama.
Daniel naagira ati: “Tutakarugire omuri Spain, tukaba tutarikuhamya yaaba nitubaasa kumarwa n’ebintu bikye. Hati tumazirwe nabyo, kandi tihaine eki tubuzirwe omu bintu ebikuru.” Niki ekirikukirayo kubareetera okushemererwa? Nibagira bati: “Okuhwera abacureezi kwega ahari Yehova n’okushemererwa okutarikubaasa kugyeragyeranisibwa!”