1, 2. (a) Omu kubanza ebigambo bya Yesu ebiri omuri Matayo 24:12 bikaba nibikwata ahari baahi? (b) Ekitabo ky’Ebyakozirwe nikyoreka kita ngu Abakristaayo baingi ira bakaguma baine rukundo ehami? (Reeba ekishushani aha kutandika.)

OBU Yesu yaabaire ari omu nsi, akooreka oku abantu baabaire nibaija kumanya ngu “ensi egi” embi eri haihi kuhendera. Kimwe aha bi yaagambireho, n’okugira ngu “okukunda kw’abaingi” kukaba nikwija kuhora. (Matayo 24:3, 12) Abayudaaya omu kyasha ky’okubanza bakaba nibeetwara kuba abantu ba Ruhanga, kwonka rukundo ei baabaire bainiire Ruhanga ekaba ehozire.

² Kwonka, Abakristaayo baingi obunaku obwo bakaba baine emiteekateekyere y’omutaano. Bakaba nibabuurira n’omujinya amakuru marungi agarikukwata ahari Kristo, kandi barikukunda Ruhanga n’abu baabaire nibaheereza nabo, nangwa n’abo abaabaire batakamanyire mazima. Abakristaayo bakaguma nibahamya rukundo ei baabaire bainiire Ruhanga. (Ebyakozirwe 2:44-47; 5:42) Kwonka eky’obusaasi, Abakristaayo abamwe bakareka rukundo yaabo yaahora. Eki nitukimanya tuta?

3. Niki ekirikubaasa kuba kyareeteire rukundo y’Abakristaayo abamwe kuhora?

³ Yesu akagambira Abakristaayo abaabaire nibatuura omuri  Efeso ati: ‘Mukareka okukunda kwanyu okw’okubanza.’ (Okushuuruurwa 2:4) Noobaasa kushanga ngu Abakristaayo ba Efeso bakaba nibakuratira emitwarize y’abantu abaabaire nibakunda okweshemeza kyonka. (Abaefeso 2:2, 3) Efeso rukaba ruri orurembo orugaiga ei abantu baabaire nibakunda okuba gye n’okweshemeza okukira ekintu ekindi kyona. Kandi baingi omuri Efeso bakaba nibeejumba omu by’obushambani, batarikuha n’ebiragiro bya Ruhanga ekitiinisa. Bakaba nibafayo aha kweshemeza omu mwanya gw’okugirira Ruhanga n’abandi rukundo ey’okwefeerereza.

4. (a) Rukundo y’abantu ehozire eta ebiro ebi? (b) Ni rukundo ki ey’emiringo eshatu ei twine kurinda ekaguma ehami?

⁴ Ebigambo bya Yesu ebirikukwata aha kuhora kwa rukundo naitwe nibitukwataho ebiro ebi. Abantu ebiro ebi bainiire Ruhanga rukundo nkye munonga. Obukaikuru bw’abantu omu mwanya gw’okuta amatsiko omuri Ruhanga ngu niwe araiheho oburemeezi oburi omu nsi, nibeesiga ebigombe by’abantu. Rukundo yaabo neegumizamu kuhora. Nangwa na rukundo y’abaheereza ba Yehova neebaasa kuhora, nk’oku kyabaire omu kibiina kya Efeso. Hati ka tugambe aha rukundo y’emiringo eshatu ei twine kurinda ekaguma ehami: (1) rukundo ei twiniire Yehova, (2) rukundo ei twiniire amazima ga Baibuli, na (3) rukundo ei twiniire ab’eishe-emwe.

5. Ahabw’enki twine kukunda Ruhanga?

⁵ N’oha ou twine kugirira rukundo erikukirayo? Yesu akagira ati: “Kunda Mukama Ruhanga waawe n’omutima gwawe gwona, n’amagara gaawe goona, n’obwengye bwawe bwona. Eki nikyo kiragiro kikuru kandi eky’okubanza.” (Matayo 22:37, 38) Rukundo ei twiniire Ruhanga neetuhiga kworobera ebiragiro bye, kugumisiriza, n’okwanga ekibi. (Shoma Zaaburi 97:10.) Kwonka Sitaane n’ensi ye nibiteeraho kutumaramu amaani n’okucwekyereza rukundo ei twiniire Ruhanga.

6. Niki ekirikubaho abantu ku barikurekyera aho kukunda Ruhanga?

⁶ Ensi eine emiteekateekyere egwire ahari rukundo. Abantu baingi omu mwanya gw’okukunda Ruhanga, ‘nibekunda.’ (2 Timoseo 3:2) Nibata omutima aha ‘bi omubiri gwetenga, n’ebi amaisho geetenga, n’okwehimbisa ahabw’eby’amagara aga.’ (1 Yohaana 2:16) Entumwa Paulo akarabura ekirikubaasa kubaho twata okwekunda omu mwanya gw’okubanza. Akagira ati: “Okuta omutima aha by’omubiri n’okufa.” Ahabw’enki? Ahabw’okuba abo abarikukora eki, nibaba abazigu ba Ruhanga. (Abarooma 8:6, 7) Abantu abarikumarira amagara gaabo goona aha kusherura esente nari kwigutsya ekyetengo kyabo eky’okuteerana, nibahendera batamirwe.—1 Abakorinso 6:18; 1 Timoseo 6:9, 10.

7. Ni miteekateekyere ki ey’akabi erikubaasa kushiisha Abakristaayo obunaku obu?

⁷ Baingi abatarikwikiriza ngu hariho Ruhanga, n’abatarikuhamya ngu Ruhanga ariho, nari abarikwikiriza ngu ebintu bikabaho birikuruga omu bindi, nibateeraho kubeihabeiha abandi ngu batakunda Ruhanga nari ngu bataikiriza ngu ariho. Nibateeraho kureetera abantu kuteekateeka ngu omuntu omushema nari otashomire niwe arikwikiriza ngu hariho Omuhangi. Okwongyerera ahari ekyo, abantu baingi nibaha ekitiinisa abanyasayansi okukira Omuhangi. (Abarooma 1:25) Nangwa n’Omukristaayo naabaasa kubeihwabeihwa emiteekateekyere egi. Omukago gwaitu na Yehova nigubaasa kutuuba, reero  rukundo ei tumwiniire ehore.—Abaheburaayo 3:12.

8. (a) Ni bintu ki ebirikubaasa kumaramu amaani abaheereza ba Yehova? (b) Zaaburi 136 neebaasa kutuhuumuriza eta?

⁸ Obu turi omu nsi mbi eri ahansi y’obushoboorozi bwa Sitaane, hariho enshonga nyingi ezirikutureetera kugira amaganya obumwe. (1 Yohaana 5:19) Kwonka twaikiriza amaganya gakaturenga, okwikiriza kwaitu nikubaasa kuhwamu amaani na rukundo ei twiniire Ruhanga ehore. Nk’eky’okureeberaho, nitubaasa kutunga oburemeezi ahabwa bukuru, amagara mabi, nari oburemeezi bw’eby’entaasya. Nari nitubaasa kwehurira kubi ahabw’okugira ngu titurikubaasa kukora gye ebintu ebimwe nk’oku twakwenzire kubikora. Nitubaasa kutamwa ahabw’okugira ngu ebintu ebimwe tibibaire nk’oku tubaire nituteekateeka. Kwonka n’obu twakuhikwaho buremeezi ki, titushemereire kwehurira ngu Yehova atutsigireho. Teekateeka aha bigambo birikuhuumuriza ebiri omu Zaaburi 136:23, ebirikugira biti: ‘Akatwijuka turi habi munonga, ahakuba embabazi ze n’ez’ebiro byona.’ Nitubaasa kuhamya ngu Yehova naahurira “n’okweshengyereza” kwaitu, kandi naija kutugarukamu.—Zaaburi 116:1; 136:24-26.

⁹ Entumwa Paulo akaba ari omuheereza wa Yehova owaateekateekire munonga aha ku Yehova yaamushagikire, kandi eki kikamuhwera kuguma ahami. Akahandiika arikugira ngu Yehova “niwe muhwezi wangye, tinditiina; omuntu naabaasa kungira ata?” (Abaheburaayo 13:6) Paulo okuta obwesigye omuri Yehova kikamuhwera kwemera oburemeezi obu yaabaire aine. Ku yaabaire aba ari omu mbeera egumire, akaba ataiha obwesigye bwe omuri Yehova. Nangwa n’obu yaabaire ari omu kihome, akahwera Abakristaayo bagyenzi be arikuhandiikira ebibiina ebaruha ezirikuhuumuriza. (Abaefeso 4:1; Abafilipi 1:7; Filemooni 1) Paulo n’obu yaatungire oburemeezi burikwingana ki, akaguma ainiire Yehova rukundo mpango. Akeesiga “Ruhanga ow’okuhuumuza kwona, otuhuumuza omu busaasi bwaitu bwona.” (2 Abakorinso 1:3, 4) Nitubaasa kutooreza tuta Paulo?

10. Nitubaasa kurinda tuta rukundo ei twiniire Yehova kuguma ehami?

 ¹⁰ Paulo akooreka omuringo gumwe ogu turikubaasa kurinda rukundo ei twiniire Ruhanga ekaguma ehami, obu yaahandiika ati: “Mushabe obutoosha.” Kandi bwanyima akahandiika ati: “Mugumizemu kushaba muhamire.” (1 Abatesalonika 5:17; Abarooma 12:12) Ahabw’enki okushaba nikubaasa kutwiriza haihi na Ruhanga? Twaba nitushaba, nituba nitugaaniira na Yehova. Eki nikitubaasisa kugira omukago murungi nawe. (Zaaburi 86:3) Twagambira Tataitwe ow’omu iguru ebiteekateeko byaitu eby’omunda n’enyehurira zaitu, nitumwirira haihi. (Zaaburi 65:2) Kandi rukundo ei twiniire Yehova, neekura twaguma nitureeba oku arikugarukamu okushaba kwaitu. Twine obuhame ngu Yehova “ari haihi na boona abamutakira.” (Zaaburi 145:18) Okugira obuhame ngu Yehova naatukunda, kandi ngu naatushagika, nikiija kutuhwera kwemera oburemeezi bwona obu turikubaasa kutunga hati nari omu biro by’omumaisho.

11, 12. Nitubaasa kwongyera tuta ahari rukundo ei twiniire amazima ga Baibuli?

¹¹ Abakristaayo ab’amazima nibakunda amazima. Omu Kigambo kya Ruhanga nimwo turikushanga amazima. Yesu akagambira eishe ati: “Ekigambo kyawe nigo mazima.” (Yohaana 17:17) Kubaasa kukunda amazima ga Baibuli, twine kumanya ebiri omu Baibuli. (Abakolosai 1:10) Kwonka hariho ebindi ebi oine kukora. Yetegyereze oku omuhandiiki wa Zaaburi 119 arikutuhwera kumanya eki twine kukora. (Shoma Zaaburi 119:97-100.) Omu izooba ryona twine kuteekateeka munonga aha bi turikushoma omu Baibuli. Twateekateeka aha ku turikugasirwa twagyendera aha mazima g’omu Baibuli, nitwija kuguma nitweyongyera kukunda amazima ago.

¹² Omuhandiiki wa Zaaburi akagira ati: “Ebigambo byawe ka nibinnurira, nibinnurira munonga okukira obwoki!” (Zaaburi 119:103) Ebitabo ebirikwegamira aha Baibuli ebi ekibiina kya Ruhanga kirikutebeekanisa biri nk’eby’okurya binuzire. Twaba niturya eby’okurya ebi turikukunda, nitutwara obwire bwaitu turikurya mporampora ahabw’okugira ngu nitunurirwa. Omu muringo nigwo gumwe, twine kumara obwire omu kweyegyesa. Twakora tutyo nitwija kukunda “ebigambo ebirikushemeza” eby’amazima, kandi nikiija kuba kyorobi kwijuka ebi twashoma, reero tubikorese kuhwera abandi.—Omubuurizi 12:10.

13. Niki ekyahwereire Yeremia kukunda ebigambo bya Ruhanga, kandi ekyo kikamureetera kukora ki?

¹³ Nabi Yeremia akaba naakunda ebigambo bya Ruhanga. Akagira ati: “Ebigambo byawe bikaboneka, naabirya, byambeera okushemererwa, n’okunanuka kw’omu mutima; ahabw’okuba niinyetererwa eiziina ryawe,” Yehova Ruhanga ow’amahe. (Yeremia 15:16) Yeremia akateekateeka munonga aha bigambo bya Ruhanga eby’omuhendo, kandi akaba naabikunda. Kikamushemeza kujwekyera Yehova omu kugambira abantu obutumwa bwe. Twaba nitukunda amazima ga Baibuli, nitwija kumanya omugisha gw’omutaano ogu twine ogw’okuba Abajurizi ba Yehova, kandi tukabuurira aha Bukama omu biro ebi eby’emperu.

14. Niki ekindi eki turikubaasa kukora kwongyera kukunda amazima ga Baibuli?

¹⁴ Niki ekindi ekirikwija kutuhwera kwongyera kukunda amazima ga Baibuli? Twine kuguma nitwija omu nteerane, ahu Yehova  arikutwegyeseza tutarikwosha. Okwega Baibuli buri saabiiti turikukoresa Omunaara gw’Omurinzi ni gumwe aha miringo mikuru ei turikwegyesibwamu. Twaba nitwenda kugasirwa omu bwijwire omu ruteerane, twine kutebeekanisa kare tutakarwiziremu. Nk’eky’okureeberaho, nitubaasa kushoma buri kyahandiikirwe ekyorekirwe. Obunaku obu, abantu baingi nibabaasa kushomera aha mukura Omunaara gw’Omurinzi nari kugwihaho, ahakuba guri aha jw.org omu ndimi nyingi n’aha nkora ya JW Library. Enkora ezimwe ez’aha mukura nizitubaasisa kurahuka kutunga ebyahandiikirwe. Kwonka twayega buri kicweka, tukashwijuma gye ebyahandiikirwe kandi tukabiteekateekaho, rukundo ei twiniire amazima ga Baibuli neeyeyongyera.—Shom Zaaburi 1:2.

15, 16. (a) Kurugiirira ahari Yohaana 13:34, 35, ni kiragiro ki eki Yesu yaatuhaire? (b) Rukundo ei twiniire Ruhanga na Baibuli eine kakwate ki n’okukunda ab’eishe-emwe?

¹⁵ Aha kiro ky’aha muheru Yesu ari omu nsi, akagambira abeegi be ati: “Nimbaha ekiragiro kisya nti: Mukundane; nk’oku naabakunzire, naimwe mube nikwo mwakundana. Ku muriguma nimukundana, nibwo abantu boona baribamanya ku muri abeegi bangye.”—Yohaana 13:34, 35.

¹⁶ Okukunda ab’eishe-emwe bagyenzi baitu kiine akakwate n’okukunda Yehova. Twaba tutarikukunda Ruhanga, titurikubaasa kukunda ab’eishe-emwe. Kandi twaba tutarikukunda ab’eishe-emwe bagyenzi baitu, titurikubaasa kukunda Ruhanga. Entumwa Yohaana akahandiika ati: “Otakunda mugyenzi we ou arareebire, tabaasa kukunda Ruhanga ou atakareebaga.” (1 Yohaana 4:20) Kandi okukunda Yehova n’ab’eishe-emwe kiine akakwate n’okukunda Baibuli. Ahabw’enki? Ahakuba twaba nitukunda ebi turikwega omu Baibuli, nitwija kwenda kworobera ebiragiro ebi turikushangamu nk’okukunda Ruhanga n’ab’eishe-emwe.—1 Petero 1:22; 1 Yohaana 4:21.

17. Nitubaasa kworeka tuta ngu nitukunda ab’eishe-emwe bagyenzi baitu?

¹⁷ Shoma 1 Abatesalonika 4:9, 10. Mbwenu shi nitubaasa kworeka tuta ngu nitukunda  ab’eishe-emwe omu kibiina kyaitu omu miringo erikureebwa? Ow’eishe-emwe omugurusi nari omukaikuru naabaasa kuba naayenda obuhwezi kuza omu nteerane n’okurugayo. Omufaakazi naabaasa kuba naayenda obuhwezi kugira ekintu eki yaahunduuza omu nju ye. (Yakobo 1:27) Ab’eishe-emwe na banyaanyazi-itwe abahweiremu amaani, abaine amaganya, nari abaine obundi buremeezi twine kubafaho, tukabahiga, kandi tukabahuumuriza. (Enfumu 12:25; Abakolosai 4:11) Nitworeka ngu nitukunda “abari omu nju y’okwikiriza” kurugiirira aha bi turikugamba nari ebi turikukora.—Abagalatia 6:10.

18. Niki ekirikwija kutuhwera kushoboorora obutaikirizana obu turikugira n’ab’eishe-emwe?

¹⁸ Baibuli ekagira ngu omu “biro by’aha mperu” eby’obusingye obu, abantu baingi bakaba nibaija kuba abarikweyendeza, kandi abaine omururu gw’ebintu. (2 Timoseo 3:1, 2) Abakristaayo twine kukora n’amaani kureeba ngu rukundo ei twiniire Yehova, Ekigambo kye, n’abandi, yaayeyongyera. Obu tutahikiriire, obumwe nitubaasa kugira obutaikirizana n’ab’eishe-emwe. Kwonka ahabw’okugira ngu nitukundana, nitwija kuteeraho kushoboorora obutaikirizana omu muringo gw’embabazi, kandi ahonaaho nk’oku kirikubaasika. (Abaefeso 4:32; Abakolosai 3:14) Ka tuteereho kutaikiriza rukundo yaitu kuhora! Omu mwanya gw’ekyo, ka tugumizemu kukundira kimwe Yehova, Ekigambo kye, n’ab’eishe-emwe bagyenzi baitu.