Rosie naagira ati: “Nkaba ninkira kwerarikirira aha bintu reero biba eby’akabi munonga omu kuteebereza kwangye okukira oku buzima biri.” Ni kyahandiikirwe ki ekyamuhwereire? Kimwe aharibyo ni Matayo 6:34, aharikugira hati: “Mutaryemereza emitima aha bya nyencakare; ahakuba ebya nyencakare biryayemererezibwa omutima okwabyo. Reka buri kiro kihwe n’amaganya gaakyo.” Rosie hati naagira ngu ebigambo bya Yesu ebyo bikamuhwera kurekyeraho kwerarikirira aha biraabeho nyenkyakare. Naayongyeraho ati: “Nkaba nyine oburemeezi bwingi, nkaba ntaine kwongyera kwerarikirira aha mbeera etakabaireho, kandi obundi etarikubaasa kubaho.”

Yasmine nawe akahurira ngu okwerarikirira kumurengire. “Ebiro ebimwe omu saabiiti nkaba, ndemwa kubyama nyekiro. Nkaba ninyehurira nk’ori haihi kwitwa emiteekateekyere egwire.” Ni kyahandiikirwe ki ekyamuhwereire? Naagira ngu ni 1 Petero 5:7, aharikugira hati: “Mumwegyekyerere okushoberwa kwanyu kwona, ahabw’okuba naabataho omutima.” Yasmine naagira ati: “Obwire ku bwagumire nibuhinguraho, nkaguma ninshaba Yehova, kandi akagarukamu okushaba kwangye. Nkehurira nk’ou baihaho ekintu kiremeire aha ibega ryangye. Obumwe n’obumwe ninkira kugira emiteekateekyere mibi, kwonka hati nimmanya oku ndikubaasa kugisingura.”

Omwishiki orikwetwa Isabella naagira ati: “Ningira ngu okweziringa n’akarondo ahakuba na tata naayeziringa. Ninyeziringa kukora ebintu ebikuru ndikwenda kukora busha nk’okuhuumuraho nari okureeba TV. Ogu n’omuze mubi ahakuba nigureeta amaganya, kandi nigureetera omuntu kutakora gye omu bi arikukora.” Omusingye ogwamuhwereire n’oguri omu 2 Timoseo 2:15, ogurikugira guti: “Oyezirikye kweyoreka ahari Ruhanga nk’orikusiimwa, omukozi otashemereire kukwatwa nshoni.” Isabella naagira ati: “Nkaba ntarikwenda ngu Yehova ayangye kusiima omurimo gwangye ahabw’okweziringa.” Akakora empindahinduka.

Nikyo kimwe na, Kelsey naagira ati: “Nkaba mba nyine ekintu ky’okukora ntegyereza obwire buhwayo. Nkaba ndira, mburwa oturo, kandi nyerarikirira. Eki kikaba kitari kirungi ahariinye.” Kelsey akatunga obuhwezi omu Enfumu 13:16, aharikugira hati: “Orikwerinda weena akoresa okumanya, kwonka omushema ayoreka obushema bwe butunu.” Naashoboorora ngu okuteekateeka aha kyahandiikirwe eki kikamwegyesa ngu “n’eky’obwengye kuta omu nkora kandi okatebeekanisa kare. Hati aha meeza yangye nyineho akatabo aku ndikuhandiikamu ebi ndikwenda kukora, kandi eki nikimpwera kwetebeekanisa, ntarikubiika eby’okukora kuhitsya aha shaaha y’aha muheru.”

Kirsten naagira ati: “Ibanyi akantsigaho, yaantsigira abaana bana.” Ni musingye ki ogw’omu Baibuli ogwamuhwereire? Enfumu 17:17, nihagira hati: “Munywani w’omuntu amukunda ebiro byona, kandi ow’eishe-emwe azaarirwa okuhwera abantu omu bihikiirizi.” Kirsten akashaba obuhwezi bagyenzi be abarikuheereza Yehova. Akeetegyereza ki? “Banywani bangye bakampwera omu miringo mingi! Abamwe bakaba bandeetera eby’okurya n’ebimuri babitsiga aha rwigi rwangye. Emirundi eshatu guruupu y’abantu bakampwera kufuruka kuruga omu nju emwe kuza omu ndiijo. Omwe akampwera kutunga omurimo. Banywani bangye butoosha bakaba baampwera.”

Delphine, owaaba yaagambirweho, nawe akaba naateganisibwa eihamba. Bwanyima y’oburemeezi obwo bwona naagira ati: “Nkaba nindeeba abantu abandi barikutuura hamwe bari gye, kwonka nyowe nkaba nyine eihamba kandi ntashemereirwe.” Ekyahandiikirwe kimwe ekyamuhwereire ni Zaaburi 68:6, aharikugira hati: “Ruhanga aha amaka abataine ifo na ruguru.” Delphine naashoboorora ati: “Nkaba nimmanya ngu omushororongo ogu tigurikumanyisa eka y’okutuuramu hati. Kureka, nkamanya ngu Ruhanga naatuha eka y’eby’omwoyo, omwanya gw’oburinzi obwabuzima ogurikutuhikaanisa n’abandi abarikukunda Yehova. Kwonka nkaba nimmanya ngu tindikubaasa kuhika haihi n’abandi kureka naabanza naahika haihi na Yehova. N’ahabw’ekyo Zaaburi 37:4, ekamuhwera kukora ekyo. Nihagira hati: ‘Oshemerererwe omuri Mukama, nawe aryakuha ebi omutima gwawe gurikwetenga.’”

Naahendera ati: “Nketegyereza ngu nyine kweyongyera kwirira haihi na Yehova. Ahakuba niwe arikukirirayo kimwe. Bwanyima nkahandiika ebintu ebi ndikukunda kukora hamwe n’abandi, kugira ngu mbaase kunywana abantu abarikukunda Yehova nkaanye. Nkeega kureeba ebirungi omu bandi n’okwehuzya enshobe zaabo.”

Amazima gari ngu, abanywani abarikuheereza Ruhanga tibahikiriire. Abajurizi ba Yehova nibateganisibwa oburemeezi nk’abandi bantu. Kwonka okutendekwa kurabira omu Baibuli nikubahiga kuhwera abandi kyaba nikibaasika. N’eky’obwengye kugira abanywani nk’abo. Kwonka shi emisingye ya Baibuli neebaasa n’okutuhwera omu buremeezi obutarikubaasa kusingurwa obunaku obu, nk’endwara ezitarikukira nari obusaasi bw’okufeerwa?