HARIHO emiteekateekyere mingi etarikushushana erikukwata aha magara n’okufa. Abamwe nibateekateeka ngu bwanyima y’omuntu kufa naagumizamu kubaho omu muringo ogundi nari omu mwanya ogundi. Abandi nibateekateeka ngu nibaija kugaruka kuzaarwa busya batuureho omu muringo ogundi. Kandi abandi nibateekateeka ngu okufa niyo muheru.

Noobaasa kuba oine enyikiriza eyaawe aha nshonga egi, kurugiirira oku waakuziibwe nari ei waakuriire. Mbwenu shi obu hariho emiteekateekyere etarikushushana aha kirikubaho aha kufa, hariho ahu turikubaasa kwiha eby’okugarukamu by’ekibuuzo eki ekigumire ebirikwesigwa kandi ebyabuzima?

Kumara ebyasha bingi, abeebembezi b’ediini batwire nibeegyesa ngu hariho omwoyo ogutarikufa. Abakuratsi b’ediini ezi zoona, abarikweyeta Abakristaayo, Abahindu, Abayudaaya, Abasiraamu, n’abandi, nibaikiriza ngu aha kufa nihafa omubiri reero omwoyo gurugamu guza kutuura omu butuuro by’emyoyo. Kwonka Abaabuda, bo nibaikiriza ngu kurabira omu kuzaarwa busya, amaani agari omu muntu nigabaasa kumuhitsya omu mbeera y’okushemererwa eki barikweta Nirvana.

Kurugiirira aha nyegyesa ezo, abantu baingi omu nsi batandikire kwikiriza ngu okufa nikwigura orwigi rw’okutunga amagara omu nsi endiijo. Baingi nibatwara okufa nk’eidaara rikuru omu magara g’omuntu, kandi nibateekateeka ngu okufa n’ekigyendererwa kya Ruhanga. Kwonka shi Baibuli neegamba ki aha nshonga egi? Nyabura ‘we shoma ekicweka ekirikukurataho. Eky’okugarukamu nikibaasa kukutangaaza.