KU ORAABE oraafeereirweho omukundwa, noobaasa kuba waagizire enyehurira zitari zimwe na zimwe, amaganya, eihamba, n’okutamanya eky’okukora. Shana obundi naiwe okagira ekiniga, okweshinja, n’obwoba. Noobaasa kuba waayebuurize yaaba n’eky’obwengye kuguma ohuriire.

Gira obuhame ngu okuganya ti bweremwa. Nikiba nikyoreka ngu okaba nookunda munonga ogwo owaafiire. Kwonka shi nikibaasika kutuubya aha busaasi obwo akatunga oburuhuuko?

N’obu obusaasi bwawe buraabe nibureebeka nk’obutarikubaasa kurugaho, obuhabuzi obu oburi ahaifo nibubaasa kukuhuumuriza:

GIRA OBWIRE BW’OKUGANYA

Abantu nibaganya omu miringo etarikushushana, kandi nibamara n’obwire butarikwingana barikuganya. Kwonka, okurira nikubaasa kukuhwera kutuubya aha busaasi bwawe. Vanessa owaaba yaagambirweho, naagira ati: “Nkaba ndirira ahu naayendera kubaasa kweyihaho obusaasi.” Sofía owaafeereirwe omurumuna kitaraariire, naagira ati: “Okuteekateeka aha kyabaireho nikindeetera obusaasi bwingi, kiri nk’okuboneza ekironda kitanire. Obusaasi bw’ekironda nk’ekyo buzima bugumire kwemera, kwonka okukiboneza nikukihwera kurahuka kukira.”

GAMBA OKU ORIKWEHURIRA N’EBITEEKATEEKO BYAWE

Nikyetegyerezibwa, obumwe waacwamu kuba wenka. Kwonka okwemera obusaasi wenka kiri nk’okwekorera  ekintu kiremeire wenka. Jared ow’emyaka 17 owaafeereirwe ishe, naagira ati: “Nkaba ngambira abandi enyehurira zangye. Nkaba mbangaanisa yaaba naakora eky’obwengye, kwonka kikaba kiri kirungi kugambira abandi oku ndikwehurira.” Janice, orikugambwaho omu kicweka eky’okubanza, naagamba omugasho ogundi ati: “Okugambira abandi kikaba nikimpumuriza munonga. Nkaba ninkireeba ngu baanyetegyereza, kandi ngu tinyine kwemera embeera egi nyenka.”

IKIRIZA OBUHWEZI

Omushaho omwe naagira ati: “Abaine amaganya abarikwikiriza abanywani n’abanyabuzaare kubahwera ahonaaho baaheza kugwerwa akagwe, nikiboorobera kuraba omu bwire bw’okuganya bwona.” Manyisa banywani baawe eki barikubaasa kukora kukuhwera, obundi nibenda kuhwera kwonka tibarikumanya oku baraakikore.​—Enfumu 17:17.

YIRIRA HAIHI NA RUHANGA

Tina naagira ati: “Ibanyi ku yaitsirwe ekookoro kitaraariire, nkaba ntakibaasa kumugambira obusaasi bwangye, n’ahabw’ekyo nkaba ningambira Ruhanga buri kimwe! Buri izooba nkaba nditandika ndikumushaba kumpwera kuraba omu izooba eryo. Ruhanga akampwera omu miringo mingi kukira ei ndikubaasa kugamba.” Tarsha owaabaire oine emyaka 22 obu nyina yaafa, naagira ati: “Okushoma Baibuli buri izooba kikangumya munonga. Eki kikaba kimpwera kutunga eky’okuteekateekaho ekirikuhuumuriza.”

TEEKATEEKA AHA KUZOOKA

Tina naagumizamu ati: “Omu kubanza, amatsiko g’okuzooka tigarabaasize kumpuumuriza ahakuba nkaba niinyenda ibanyi, kandi batabani bangye bakaba nibenda ishebo obwire obwo. Kwonka hati, bwanyima y’emyaka ena, nimpamira aha matsiko aga. Nigampwera kuteekateeka aha by’omumaisho. Ninteera akashushani ndikugaruka kumureeba, reero nkatunga obusingye n’okushemererwa!”

Obundi okuganya kwawe nikubaasa kutarugaho ahonaaho. Kwonka, ebi Vanessa yaarabiremu nibibaasa kukuha amatsiko. Naagira ati: “Nooba nooteekateeka ngu torikubaasa kwikaikana, kwonka mporampora embeera nizirugaho zitereeramu.”

Ijuka ngu ihamba ryawe niribaasa kutahwaho, kwonka nabwo n’eky’oburyo kugumaho ohuriire. Ahabw’obuhwezi bwa Yehova, nabwo noobaasa kugira emikago kandi otuureho oine ekigyendererwa. Kandi juba Ruhanga naija kuzoora abafu. Naayenda ngu abakundwa baawe ogarukye obagwe omu kifuba. Omu bwire obwo obusaasi oburi omu mutima gwawe nibwija kuhweraho kimwe!