Ruhanga akagambira Adamu ati: ‘Eizooba eri [oraarye aha muti ogwo], buzimazima noija kufa.’ (Okutandika 2:17) Ekiragiro ekyo kikaba kitarikwija kukora makuru ku ogire ngu Adamu akaba ahangirwe kukura reero bwanyima akafa. Adamu akaba naamanya ngu yaaba atariire aha muti ogwo taraafe.

Adamu na Haawa kikaba kitarikubeetengyesa kurya aha muti ogwo kubaasa kugumaho, ahakuba omusiri gukaba gwijwiremu emiti mingi y’ebijuma. (Okutandika 2:9) Ku ogire ngu tibarariire aha muti ogwo, bakaayorekire ngu niboorobera Ogwo owaabahaire amagara. Kandi bakaba nibaija kworeka ngu nibamanya ngu Ruhanga niwe ahikire kubagambira eky’okukora.

Kubaasa kwetegyereza ekyareeteire Adamu na Haawa kufa, twine kushwijuma ekigaaniiro ekyakwatsire aha bantu boona. Sitaane Omuregi akakoresa enjoka kugamba ekishuba. Ekyahandiikirwe nikigira kiti: “Kandi enjoka ekaba eri enyabwengye okukira emyamaishwa zoona ezi [Yehova] Ruhanga yaahangire. Yaabuuza omukazi eti: N’eky’amazima, Ruhanga akagira ngu mutarirya aha muti gwona ogw’omuri eki kibanja?”​—Okutandika 3:1.

Haawa akagarukamu ati: “Nitwikirizibwa kurya ebijuma by’emiti y’omu kibanja. Kureka ebijuma by’omuti oguri ahagati y’ekibanja; nibyo Ruhanga yaagizire ati: Mutaribirya, n’obu kwakuba okubikoraho, mutakaafa.” Enjoka akagaruka yaamugira eti: ‘Okufa kwo, buzima timurikwija kufa; ahabw’okuba Ruhanga naamanya ngu eizooba eri muraaguryeho, amaisho gaanyu nigaija kwiguka, naimwe mube nka Ruhanga, mumanye oburungi n’obubi.’ Omu muringo ogwo Sitaane akagira ngu Yehova n’omubeihi owaabaire naima ekintu kirungi abazaire baitu ab’okubanza.​—Okutandika 3:2-5.

Haawa akaikiriza ebi yaahuriire. Akareeba omuti, gwareebeka kurungi munonga, kandi ogurikwetengwa munonga! Akakunuunkirira, yaacwa bimwe aha bijuma byagwo, yaatandika kubirya. Kandi Baibuli neegira ngu bwanyima Haawa ‘akahaho na iba nawe yaarya.’​—Okutandika 3:6.

Ka kishemereire kuba kyagwisize kubi Ruhanga ku yaareebire abaana be abakundwa nibamugomera beekundiire! Akakora ki? Akagambira Adamu ati: ‘Noija kugaruka omu itaka; ahakuba nimwo waihirwe; ahabw’okuba ori omucuucu, n’omu mucuucu nimwo orikwija kugaruka.’  (Okutandika 3:17-19) Kandi ahabw’enshonga egi, “emyaka yoona ei Adamu yaamazire ekahika magana mwenda na makumi ashatu; yaafa.” (Okutandika 5:5) Adamu taragiire omu iguru nari omu butuuro bw’emyoyo. Akaba atariho obu Yehova yaabaire atakamuhangire kuruga omu mucuucu. N’ahabw’ekyo ku yaafiire, akaba ekintu ekitaine magara nk’omucuucu ogu yaahangirwemu. Akarekyera aho kubaho. Ako ka n’akagwe!

Ahabw’okugira ngu Adamu na Haawa bakagoma beekundiire, bakafeerwa okuhikiirira kwabo n’amatsiko g’okutuuraho ebiro byona. Bakahinduka omu mubiri, baaba abatahikiriire kandi abasiisi. Kwonka ekibi ky’obugomi bwabo tikirabakwatsireho bonka. Bakakituriza n’oruzaaro rwabo. Abarooma 5:12 nihagira hati: ‘Ekibi kikaija omu nsi ahabw’okushiisha kw’omuntu omwe [Adamu], kandi kikarugamu okufa, n’okufa kukabuga omu bantu boona, ahakuba boona bakashiisha.’

Baibuli neegamba aha kibi n’okufa nk’ekintu “ekirikushweka ekishwekire enganda zoona, n’eky’okwetwekyerera ekisangiire amahanga goona.” (Isaaya 25:7) Ekishwekire enganda zoona kiri nk’oruho rw’obutwa oru omuntu atarikubaasa kuhunga. Buzima, twena ‘nitufa kurabira omuri Adamu.’ (1 Abakorinso 15:22) Eki nikireetaho ekibuuzo, nk’eki entumwa Paulo yaabuurize obu yaagira ati: “N’oha orinjuna omubiri ogu ogw’okufa?” Haine owaabaire naabaasa kukikora?​—Abarooma 7:24.