TEERA akashushani oriyo nooreeba vidiyo erikukwata aha muntu rurangaanwa, obundi nk’omweshongozi ou orikukunda. Vidiyo egyo etandika n’ebi yaarabiremu obu yaabaire akiri muto, oku yaayegyesiibwe okweshongora, n’oku yaabaire naayegyezamu emirundi mingi. Bwanyima omureeba ari omu biivuro, arikuza omu myanya etari emwe n’emwe, kandi arikumanywa munonga omu nsi yoona. Bwanyima y’obwire, akaikura reero vidiyo eheendera omweshongozi ogwo afiire.

Vidiyo egi neekwata aha byafaayo by’omuntu owaabuzima kwonka owaafiire. Yaaba n’omweshongozi, omunyasaayansi, omuzaani w’emizaano, nari ondiijo muntu orikumanywa gye, ebyafaayo byabo byona nibishushana. Omuntu naabaasa kuba akozire bingi, kwonka teekateeka aha bintu bingi munonga ebi yaakubaasize kukora ku ogire ngu tarikukura kandi akafa.

N’obu kiraabe kiri eky’obusaasi, eki nikyo kirikubaasa kuhika ahari twena. (Omubuurizi 9:5) N’obu twakuteeraho tuta, nabwo nitukura kandi tufa. Kandi nabwo butandu nari endwara neebaasa kucwa bugufu amagara gaitu. Nk’oku kirikworekwa omu Baibuli, turi nk’oruho rw’omu kasheeshe ‘orurikureebwa akaanya kakye, bwanyima rukaamuuka.’​—Yakobo 4:14.

Ahabw’okugira ngu nitubaasa kufa kitaraariire, abantu abamwe nibagira ngu “reka tweriire, twenywere, ahakuba nyencakare turi ab’okufa.” (1 Abakorinso 15:32) Kwonka shi torikwikiriza ngu abantu okutwaza omu muringo nk’ogu n’ahabw’okumanya amazima g’obusaasi ngu nibabaasa kufa eshaaha yoona? Na munonga waaba oine obusaasi bw’amaani noobaasa kwebuuza oti: ‘Aga nigo magara gonka?’ Noobaasa kwiha nkahi eky’okugarukamu?

Abantu baingi obunaku obu nibeesiga saayansi. Okutunguuka omu saayansi n’okukora emibazi kyongyeire aha buhangaazi bwaitu. Kandi abanyasaayansi nibakora munonga kwongyera aha buhangaazi bw’abantu. Yaaba abanyasaayansi basingura nari baremwa, ekibuuzo kikuru kiri ngu: Ahabw’enki nitukura kandi tukafa? Hariho amatsiko goona ngu omuzigu waitu rufu naija kusingurwa? Ebicweka ebirikukurataho nibiija kushoboorora enshonga ezi, kandi bigarukyemu n’ekibuuzo eki: Aga nigo magara gonka?