Tukahangwa Kugumaho Ebiro Byona
N’OHA ahariitwe otarikwenda kuhangaara kandi, akaguma ashemereirwe? Teekateeka oku kyakubaire nikishemeza kutuuraho ebiro byona, twine amagara marungi kandi tushemereirwe! Tukaamazire obwire bwingi turi n’abakundwa baitu twine okumarwa, turikurambura ensi, turikwega emyoga misya, turikutunguuka omu bwengye, kandi turikwega gye kyona eki turikwenda.
Mbwenu shi ekyetengo nk’eki n’ekirooto? Ngaaha buzima! Ebyahandiikirwe nibyoreka ngu Ruhanga akata ekyetengo eki omuriitwe. (Omubuurizi 3:11) Kandi nibigira ngu ‘Ruhanga ni rukundo.’ (1 Yohaana 4:8) Mbwenu shi nikikora amakuru Ruhanga kututamu ekyetengo ky’okutuuraho ebiro byona, reero akataho amaremesa g’okukihikiiriza?
Buzima, rufu ti munywani waitu. Nangwa Baibuli neeyeta rufu “omuzigu.” (1 Abakorinso 15:26) Abamwe nibarahuka kufa, kwonka abandi bo nibaija bafa bwanyima. Kwonka omuntu naarugaho afa. Eki nikiteganisa baingi, kandi baakiteekateekaho nikibatiinisa. Mbwenu shi omuzigu ogu naija kurugaho naasingurwa? Eki buzima nikibaasika?
EKIRIKUTUREETERA KUGIRA AMATSIKO
Mbwenu shi nikikutangaaza kumanya ngu Ruhanga tarahangire abantu ngu bafe? Ekitabo kya Baibuli eky’Okutandika nikyoreka obuhame ngu Ruhanga akaba naayenda ngu abantu batuure omu nsi ebiro byona. Yehova Ruhanga akatebeekanisa gye ensi n’obwegyendesereza kutuurwamu abantu. Ku yaaherize, akahanga omuntu w’okubanza Adamu, yaamuta omu musiri Edeni ogwabaire guri paradiso. Bwanyima y’ekyo, ‘Ruhanga akareeba byona ebi ahangire; kandi reeba, bikaba biri birungi munonga.’—Okutandika 1:26, 31.
Adamu akahangwa omu kishushani kya Ruhanga kandi akaba ahikiriire. (Eky’Ebiragiro 32:4) Na Haawa muka Adamu akaba ataine kamogo koona, kandi akaba ahikiriire omu biteekateeko n’omu mubiri. Yehova akabagira ati: “Muzaare, mukanye, mwijure ensi, ebe eyaanyu; mutegyekye eby’omu nyanja, n’ebirikuguruka omu mwanya, na byona ebiine amagara ebirikwegyendesa ahansi.”—Okutandika 1:28.
Kikaba nikiija kutwara obwire Adamu na Haawa kuzaara abaana bakaijuza ensi. Haawa akaba aine kuzaara abaana, n’abaana nabo bakazaara abandi, kuhitsya ensi yoona yaijura nk’oku Ruhanga yaabaire agyendereire. (Isaaya 45:18) Mbwenu shi kikaabaire nikikora amakuru Yehova kuha Adamu na Haawa amatsiko ago ku baraabe baabaire batarikwija kuhangaara bakareeba abaana baabo obundi na baijukuru baabo, batarikumanya n’ebiraarugyemu?
Teekateeka n’aha bujunaanizibwa obu Yehova yaabahaire obw’okutegyeka enyamaishwa. Adamu akagambirwa kuha enyamaishwa amaziina, kandi kikaba nikiija kutwara obwire. (Okutandika 2:19) Kwonka kubaasa kuzitegyeka kikaba nikimanyisa ngu aine kubanza yaayega ebirikuzikwataho, akamanya n’oku araazireeberere. Eki kyo kikaba nikiija kutwara obwire bwingi munonga.
N’ahabw’ekyo ebi Ruhanga yaagambiire abantu b’okubanza ebikwatiraine n’okwijuza ensi n’okutegyeka enyamaishwa, nibyoreka ngu bakaba bahangirwe kutuuraho obwire buraingwa. Kandi kwo buzima Adamu akatuuraho obwire buraingwa munonga.
RUHANGA NAAYENDA NGU ABANTU BATUURE OMU NSI EBIRO BYONA
BAKAHANGAARA MUNONGA
Adamu, emyaka 930
Mesuseela, emyaka 969
Noa, emyaka 950
Hati, emyaka 70-80
Baibuli neeyoreka ngu ira abantu bakaba nibahangaara kukira obunaku obu. Neegira eti: “Emyaka yoona ei Adamu yaamazire yaahika magana mwenda na makumi ashatu.” Kandi Baibuli neegamba n’aha bandi bashaija mukaaga abaahangaire emyaka erikurenga omuri 900! Abashaija abo ni Seezi, Enosi, Kenani, Yaredi, Mesuseela, na Noa. Abashaija aba boona bakabaho Omwegyemure gw’omu bwire bwa Noa gutakabaireho, kandi Noa akaba aine emyaka 600 Omwegyemure gutakabaireho. (Okutandika 5:5-27; 7:6; 9:29) Niki ekyabaasiise abantu abo kuhangaara?
Abashaija abo boona bakabaho ira, omu bwire butari bwa hare n’abantu babiri abaabaire bahikiriire. Obundi egi niyo nshonga nkuru eyaabareeteire kuhangaara. Mbwenu shi okuhikiirira kwine kakwate ki n’okuhangaara? Kandi shi rufu neija kusingurwa eta? Kubaasa kugarukamu ebibuuzo ebyo, nituza kubanza kumanya ahabw’enki nitukura kandi tukafa.