Abantu abamwe nibeebuuza yaaba Ekigambo kya Ruhanga kikahindurwa. Nabi Isaaya akagira ngu ekigambo kya Ruhanga ‘nikigumaho ebiro byona.’ (Isaaya 40:8) Nitubaasa kuhamya tuta ngu ebi Ruhanga yaaraganiise birinzirwe gye?

Ruhanga aine amaani g’okurinda Ekigambo kye n’okuremesa abantu kukihindura. Omu bwire bwa ira, obu haabaire hariho ebihandiikisiibwe engaro, abakoporozi abeegyendesereza bakaba nibabara buri nyuguta y’ebihandiiko ebirikwera kuhamya ngu tihaine ekyayongyerwamu, ekyahindurwa, nari ekyaihwamu. Kwonka nabwo, abantu n’abatahikiriire, kandi abakoporozi abamwe bakakoramu enshobe nkye.

Hariho enkumi n’enkumi z’ebihandiiko ebya ira eby’Ebyahandiikirwe Ebirikwera. N’obu kimwe kyakuba kirimu entaaniso nkye, nikibaasa kugyeragyeranisibwa n’ekindi kumanya amazima.​—Kumanya ebirikukiraho, reeba ekicweka “Has the Bible Been Changed or Tampered With?” ekiri aha jw.org.

Nk’eky’okureeberaho teekateeka aha bihandiiko bya ira ebirikwetwa emizingo ya Dead Sea, bikajumburwa abariisa Abaharabu omu nyanga haihi na Dead Sea omuri 1947. Ebihandiiko bya ira ebi, birimu ebicweka by’Ebyahandiikirwe Ebirikwera eby’emyaka erengire enkumi ibiri enyima. Abahangu nibagyeragyeranisa ebihandiiko bya ira ebi n’Ebyahandiikirwe Ebirikwera ebi twine obunaku obu. Batungire buhame ki?

Abacondooza bashangire ngu ebiri omu Kigambo kya Ruhanga eki twine obunaku obu nibihikaana n’ebiri omu bihandiiko bya ira. * Waashwijuma gye ebihandiiko bya ira noohamya ngu ebi turikushoma omu Byahandiikirwe Ebirikwera nibihikaana n’obutumwa bwa Ruhanga obw’okubanza. Nitubaasa kuhamya ngu Ruhanga aturindiire gye Ebihandiikirwe bye Ebirikwera obunaku obu.

N’ahabw’ekyo nitubaasa kushoma Ekigambo kya Ruhanga twine obwesigye n’obuhame ngu kihikire. Twine ekyo omu biteekateeko, ka tureebe eki turikubaasa kwega ahari Ruhanga kurabira omuri baanabi be.