Noobaasa kuteebereza oku embeera zaakubaire ziri omu nsi ku ogire ngu tihariho eizooba? Eizooba nirihwera emiti kugira amaani g’okutooka amababi, ebimuri, ebijuma, n’embibo. Kandi nirihwera emiti kunyuunyuuta amaizi kuruga omu itaka kurabira omu mizi kuhika omu mababi reero gashohora nk’orwoya.

Enjura n’ekiconco kuruga ahari Ruhanga erikubaasisa ensi kumeza eby’okurya ebi turikurya. Ruhanga naatuha enjura kuruga omu iguru habaho omweru, tutunga eby’okurya birikumara, reero tushemererwa.

Abazaire baingi ab’abantu nibeerarikirira aha bikwatiraine n’okutungira ab’omu maka gaabo eby’okurya birikumara n’ebijwaro. Yetegyereze eki Ebyahandiikirwe birikugamba: “Mwetegyereze enyonyi z’omu mwanya; tizibiba, tizigyesha, n’obu kwakuba okuhunika omu bitara; kwonka Shoimwe ow’omu iguru aziriisa. Mbwenu imwe timurikuzikira?”​—Matayo 6:25, 26.

‘Mwetegyereze ebirabyo by’omu ishwa oku bimera; beitu nimbagambira nti: [N’omugabe] Sulemaani omu kitiinisa kye kyona taraizihiirwe bijwaro nka kimwe aharibyo. Mbwenu Ruhanga ku araabe naajweka obunyaatsi bw’omu kishaka, tarikwija kukizaho kubajweka imwe?’​—Matayo 6:28-30.

Obu Ruhanga arikubaasa kutuha eby’okurya n’ebijwaro, buzima naabaasa n’okutuhwera kutunga ebindi ebirikwetengyesa aha magara g’omuntu. Twakora ebi Ruhanga arikukunda, naabaasa kutuha omugisha twateeraho kuhinga eby’okurya nari naabaasa kutuhwera kutunga omurimo kugira ngu tugure ebirikwetengyesa.​—Matayo 6:32, 33.

Buzima, twine enshonga zihikire ezirikutureetera kukunda Ruhanga twateekateeka aha izooba, enjura, ebinyonyi, n’ebimuri. Omu kicweka ekirikukurataho nituza kureeba oku Omuhangi waitu atwire naahurizana n’abantu.