Nyentsya Yaawe Buzima Neihirira Ahari Ki?
Abantu baingi nibaikiriza ngu hariho amaani agatarikureebwa agu ebiro by’omumaisho biraarugiirireho. N’ahabw’ekyo, nibakora ebi bainemu amatsiko.
EKI BAINGI BARIKWIKIRIZA
OKURAGUZA ENYONYOOZI: Abamwe nibaikiriza ngu tibarikubaasa kuhindura nyentsya yaabo, ahakuba neeyegamira aha ku enyonyoozi zaabaire nizireebeka obu baazaarwa. Nibeebuuza aha barikuraguza enyonyoozi kumanya oku ebiro byabo by’omumaisho biraabe.
ABARANGI: Hariho abarikugira ngu baabuuza abarangi nibamanya ahabw’enki ebintu biri nk’oku biri. Kandi ngu baaheza kumanya enshonga, nibeetantara akabi akarikubaasa kubahikaho, nibashoboorora oburemeezi bwabo, kandi nibaba abasinguzi.
OKURAMYA ABAAFIIRE: Kandi abandi nibaba baine kushemeza baishenkurubo abaafiire nari abarikutwarwa nka baaruhanga kutunga oburinzi n’emigisha. Van, orikutuura omuri Vietnam, naagira ati: “Nkaba niinyikiriza ngu naaguma niinteeraho kushemeza baatatenkuru abaafiire ira, nimba gye hati, kandi ninyija kugira nyentsya nungi n’abaana bangye.”
OKUHINDUKA KW’ABAFU: Baingi nibagira ngu omuntu yaafa naahindukamu ekindi kintu, kandi ngu naaguma naahinduka mpaka. Nibaikiriza ngu ebirungi nari ebibi ebirikubahikaho nibirugiirira aha ku baabaire nibatwaza omu kubaho okw’okubanza.
Kwonka baingi nibareeba enyikiriza ezi nk’emigyenzo. Beitu nabwo, nibaraguza aha bafumu, abarikuraguza enyonyoozi, abarangi, abacwezi, ab’emandwa, n’ebindi nk’ebyo. Nibateekateeka ngu ebintu nk’ebi nibibaasa kubahwera kumanya ebiro byabo by’omumaisho.
EBI BYONA BIRUGIREMU KI?
Mbwenu shi abarikwiririza omu bintu ebi bari gye hati, kandi nibaija kugira nyentsya nungi?
Teekateeka ahari Hào, orikutuura omuri Vietnam. Akaba naaraguza enyonyoozi, arikwebuuza n’aha bafu kumanya nyentsya ye. Mbwenu shi akaba omusinguzi? Hào naagira ati: “Nkafeerwa esente nyingi, naagira amabanja, naagira obutaikirizana n’ab’eka yangye, kandi nkaba ninyehurira kubi munonga.”
Qiuming, kuruga Taiwan, nawe akaba naaraguza enyonyoozi, arikwikiriza ngu abafu nibahindukamu ekindi kintu, arikuramya na baishenkuru abaafiire. Bwanyima y’okushwijuma enyikiriza ezi, akagira ati: “Nketegyereza ngu enyegyesa ezi n’emigyenzo nibyehakanisa kandi nibibuzabuza. Nkamanya ngu okuraguza enyonyoozi nikukira kuhabisa. Kandi eky’okuhinduka kw’abafu, ku oraabe otarikubaasa kwijuka ebyakubaireho omu kubaho okw’okubanza, noobaasa kukora ota empinduka kuba gye omu kubaho okwa kabiri?”
“Nketegyereza ngu enyegyesa ezi n’emigyenzo nibyehakanisa kandi nibibuzabuza.”—QIUMING, TAIWAN
Qiuming, kushushana na Hào n’abandi baingi, beetegyereize ngu nyentsya yaitu teratebeekanisiibwe kare, terikwegamira aha nyonyoozi, abafu, nari okuzaarwa nk’ekindi kintu. Eki shi nikimanyisa ngu tihaine eki turikubaasa kukora aha bikwatiraine na nyentsya yaitu?
Baingi nibateekateeka ngu kubaasa kutunga ebiro birungi by’omumaisho baine kutunga obwegyese bw’ahaiguru n’obugaiga. Niki ekirugiremu baingi ku bacwiremu batyo?
^ kacw. 16 Ebigambo ebi nibishangwa omu Baibuli Erikwera omu Abagalatia 6:7. Omu mahanga ga Asia nibakira kubigamba omu nfumu egi: “Waahinga ebyozi noija kushaaruura ebyozi, waahinga ebihimba noija kushaaruura ebihimba.”
Noobaasa Kukunda n'Ebi
OMUNAARA GW'OMURINZI
Okuraguza Enyonyoozi n’Okubuuza Abarangi—Nibitumanyisa eby’Omumaisho?
Mbwenu shi noobaasa kwesiga okuteebereza oku?
OMUNAARA GW'OMURINZI
Eki Baibuli Erikugamba aha Magara n’Okufa
Hariho ekicweka ky’omuntu ekirikuguma kihuriire bwanyima y’okufa? Mbwenu shi twine amagara agatarikufa? Abafu bari nkahi?
