1-3. Obutaikirizana bwa Eodia na Suntuke nibubaasa kuba bwabaireho buta, kandi oburemeezi nk’obwo nibubaasa kwetantarwa buta? (Reeba ekishushani aha kutandika.)

ABAHEEREZA ba Yehova nibasiimira kimwe Baibuli ekitabo kya Ruhanga ekirikwera. Obu twena turi abatahikiriire, obumwe nituheebwa obuhabuzi kuruga omu Baibuli. Mbwenu shi nitubutwara tuta? Teekateeka aha Bakristaayo b’omu kyasha ky’okubanza Eodia na Suntuke. Abakazi aba abashukirweho amajuta bakagira obutaikirizana. Butaikirizana ki? Baibuli terikubugamba. Kwonka kubaasa kwetegyereza enshonga, ka tweshushanirize ngu eki nikyo kyabaireho.

² Ka tugire ngu Eodia akaba ayetsire ab’eishe-emwe omu ka ye kurya nabo n’okubaho hamwe nabo. Kwonka Suntuke we tibaramwetsire, kandi akahurira okushemererwa oku baagizire. Suntuke naabaasa kuba yaateekateekire ati: ‘Tindikukiikiriza ngu Eodia tanyetsire! Mbaire ninteekateeka ngu turi abanywani ab’aha mara.’ Suntuke arikuhurira ari nk’ou bareebize, naabaasa kuba yaatandikire kubanganisa ahari Eodia. Reero na Suntuke nawe akatebeekanisa omukoro ogwe yaayeta ab’eishe-emwe abu Eodia yaabaire yaayetsire kwonka ti yaayeta Eodia! Oburemeezi obu Eodia yaabaire aine na Suntuke bushemereire  kuba bwasiisire obusingye bw’ekibiina kyona. Baibuli terikutugambira ekyarugiremu, kwonka abakazi Abakristaayo aba nibabaasa kuba baasiimire obuhabuzi obu entumwa Paulo yaabahaire.​—Fil. 4:2, 3.

³ Embeera nk’ezi obumwe nizireetaho oburemeezi omu kibiina ky’abaheereza ba Yehova ebiro ebi. Kwonka, oburemeezi nk’obu nibubaasa kushoboororwa nari kwetantarwa twagyendera aha buhabuzi oburi omu Kigambo kya Ruhanga Baibuli. Kandi buzima twaba nitusiimira kimwe Ekitabo kya Yehova, nitwija kukuratira obuhabuzi bwakyo.​—Zab. 27:11.

4, 5. Ekigambo kya Ruhanga nikiha buhabuzi ki aha kurinda enyehurira?

⁴ Ti kyorobi kurinda enyehurira zaitu twaba nituteekateeka ngu omuntu atutwariize kubi. Nikibaasa kutumaramu amaani omuntu yaatutwariza kubi ahabw’oruganda rwaitu, erangi yaitu, nari ahabw’obuhangwa bwaitu. Ka nikiba kiri eky’obusaasi munonga Omukristaayo mugyenzi waawe yaaba niwe yaakureetera kwehurira otyo! Mbwenu shi Ekigambo kya Ruhanga nikibaasa kutuhwera twaba turi omu mbeera nk’egi?

⁵ Yehova atwire naareeba oku abantu barikukoragana kwiha obu baabaho. Naareeba enyehurira zaitu n’ebikorwa byaitu. Twaba twine ekiniga nitubaasa kugamba ebigambo nari tukore ebintu ebi turaije kwefuuza bwanyima. Ka nikiba kiri eky’obwengye kugyendera aha buhabuzi bwa Baibuli obw’okurinda ekiniga n’okwetantara kurahuka kugira ekiniga! (Shoma Enfumu 16:32; Omubuurizi 7:9.) Hatariho kubanganisa twena twine kuteeraho kutarahuka kuguubwa kubi kandi turahukye kusaasira. Yehova na Yesu nibatwara okusaasira nka kikuru. (Mat. 6:14, 15) Mbwenu shi nikikwetengyesa kusaasira abandi nari kurinda enyehurira yaawe?

6. Ahabw’enki twine kwetantara ekiniga?

⁶ Abantu abatarikurinda nyehurira zaabo nibakira kuba enshaarizi. N’ekirikurugamu, abandi nibeetantara kuba haihi nabo. Omuntu oine ekiniga ekirengire naabaasa kushiisha ekibiina. Naabaasa kushereka ekiniga kye nari rwango, kwonka ebiteekateeko bibi ebiri omu mutima gwe nibiija kworekwa “butunu, ahu abantu bateeraniire.” (Enf. 26:24-26) Abareeberezi nibabaasa kuhwera abantu nk’abo kumanya ngu ekiniga, rwango, n’okubiika enziika tibiine mwanya omu kibiina kya Ruhanga. Ekitabo kya Yehova eky’omuhendo nikyoreka gye enshonga egi. (Lev. 19:17, 18; Rom. 3:11-18) Ekyo noikirizana nakyo?

7, 8. (a) Yehova naayebembera ata ab’ekicweka eky’omu nsi eky’ekibiina kye? (b) Ni by’okugyenderaho ki ebimwe ebiri omu Kigambo kya Ruhanga, kandi ahabw’enki twine kubyorobera?

⁷ Yehova naayebembera kandi ariisa ab’ekicweka eky’omu nsi eky’ekibiina kye arikukoresa ‘omwambari omwesigwa kandi ow’obwengye’ ahansi y’obureeberezi bwa Kristo, “omutwe” gw’ekibiina. (Mat. 24:45-47; Efe. 5:23) Nk’akakiiko akareeberezi ak’omu kyasha ky’okubanza, omwambari ogu naikiriza Ekigambo kya Ruhanga nari obutumwa bwe, kandi akitwara nk’eky’omuhendo munonga. (Shoma 1 Abatesalonika 2:13.) Ni by’okugyenderaho ki ebimwe ebiri omu Baibuli ahabw’oburungi bwaitu?

⁸ Baibuli neetuhabura kuza omu nteerane tutarikwosha. (Heb. 10:24, 25) Neetwehanangiriza kugira obumwe omu nyikiriza. (1 Kor. 1:10) Ekigambo kya Ruhanga nikituhiga kwebembeza okusherura Obukama. (Mat. 6:33) Kandi Ebyahandiikirwe nibyoreka ngu twine obujunaanizibwa bw’okubuurira enju aha nju, omu myanya erimu  abantu baingi, nari kitaraariire. (Mat. 28:19, 20; Byak. 5:42; 17:17; 20:20) Ekitabo kya Ruhanga ekirikwera nikihabura abareeberezi kurinda ekibiina kye kuguma kiri ekishemeire. (1 Kor. 5:1-5, 13; 1 Tim. 5:19-21) Kandi ekibiina kya Yehova nikyehanangiriza boona abari omu kibiina kye kuba abeecumi omu by’omwoyo n’omu by’omubiri.​—2 Kor. 7:1.

9. Ni muhanda ki gumwe ogurikukoresibwa kutuhwera kwetegyereza Ekigambo kya Ruhanga?

⁹ Abamwe nibateekateeka ngu nibabaasa kushoboorora Baibuli omu muringo ogwabo. Kwonka, Yesu atooraine ‘omwambari omwesigwa’ kuba niwe yaaguma naatebeekanisa eby’okurya eby’omwoyo. Kuruga 1919, Yesu Kristo omu kitiinisa kye atwire naakoresa omwambari ogwo kuhwera abakuratsi be kwetegyereza Ekigambo kya Ruhanga n’okugyendera aha birimu. Twayorobera obuhabuzi oburi omu Baibuli, nitureetaho obwecumi, obusingye, n’obumwe omu kibiina. Buri omwe ahariitwe ashemereire kwebuuza ati: ‘Mpamiire aha muhanda mukuru ogu Yesu arikukoresa obunaku obu?’

10. Ekicweka eky’omu iguru eky’ekibiina kya Yehova nikishoboororwaho kita omu kitabo kya Ezekieli?

¹⁰ Ekigambo kya Yehova nikituhwera kwetegyereza ekicweka eky’omu nsi eky’ekibiina kye. Nk’eky’okureeberaho, nabi Ezekieli akatunga okworekwa ahu yaareebiire ekicweka eky’omu iguru eky’ekibiina kya Ruhanga ekirikujwekyerwa ekigaari. (Ezk. 1:4-28) Yehova niwe arikuvuga ekigaari eki, kandi naakoresa omwoyo gwe gurikwera kukyoreka ahu kishemereire kutoora. Kandi, ekicweka eky’omu iguru eky’ekibiina kya Yehova nikikwatanisa n’ekicweka eky’omu nsi. Ekigaari eki kitwire nikigyenda omu maisho! Teekateeka aha mpindahinduka omu ntebeekanisa z’ekibiina ezikozirwe omu myaka ey’enyima, kandi oyijukye ngu Yehova niwe ari enyima y’empindahinduka ezi. Obu Yesu na baamaraika bari haihi kucwekyereza ensi egi embi, ekigaari kya Yehova nikigyenda ahonaaho kworeka ngu niwe ahikire kutegyeka n’okweza eiziina rye eririkwera!

11, 12. Ekibiina kya Yehova kibaasize kukora bintu ki?

¹¹ Teekateeka aha bitwire nibikorwa omu kicweka eky’omu nsi eky’ekibiina kya Yehova omu biro ebi eby’emperu. Okwombeka. Abakozi baingi beejumbiire kimwe omu kwombeka ofiisi enkuru ey’Abajurizi ba Yehova omuri Warwick, New York, U.S.A. Abakozi abarikwehayo kuhwera beekundiire nibagyendera aha buhabuzi bw’ekitongore ky’okwombeka, kwombeka Ebyombeko by’Obukama n’okwongyera kuhangutsya ofiisi z’amataagi. Nitusiima munonga ab’eishe-emwe aba abarikwehayo beekundiire kukora n’amaani omu kwombeka oku! Ijuka ngu Yehova naaha omugisha ababuurizi omu nsi yoona abarikuhayo sente kushagika okwombeka oku.​—Luk. 21:1-4.

 ¹² Okwegyesibwa. Teekateeka aha mashomero maingi agarikushagika obwegyese oburikwera. (Isa. 2:2, 3) Twine Eishomero rya Baapayoniya, Eishomero ry’Ababuurizi b’Obukama, Eishomero rya Gileadi, Eishomero ry’Ababeseeli Abasya, Eishomero ry’Abareeberezi Abarikutaayaayira Ebibiina n’Abakazi Baabo, Eishomero ry’Abareeberezi b’Ebibiina, Eishomero ry’Obuheereza bw’Obukama, n’Eishomero ry’Okutendeka ab’Akakiiko k’Eitaagi n’Abakazi Baabo. Yehova ka naakunda kwegyesa abaheereza be! Okwegyesibwa ebirikukwata aha Baibuli nikushangwa n’aha mukura gwaitu, jw.org, ahu twine ebitabo omu ndimi nyingi. Omukura ogu guriho ekicweka ky’omutaano eky’abaana n’amaka n’ekicweka ekirikuba kiriho amakuru. Waatandikire kukoresa jw.org omu kubuurira, n’omu kuramya kwawe kw’eka?

13. Itwe abaheereza ba Yehova abamuhamiireho twine bujunaanizibwa ki?

¹³ Ka n’omugisha gw’amaani kuba omu kibiina kya Yehova! Twamanya ebi Yehova arikwenda ngu tukore n’emitindo ye nikituha obujunaanizibwa bw’okukora ekihikire n’okumanya ngu niwe ahikire kutegyeka. Obu ensi egi erikweyongyera kusiisikara, twine ‘kwanga obubi,’ nk’oku Yehova arikubwanga. (Zab. 97:10) Nitwanga kwejumba omu bi Ruhanga arikwanga turikwanga kugira ngu ‘ekibi ni kirungi, n’ekirungi ngu ni kibi.’ (Isa. 5:20) Ahabw’okugira ngu nitwenda kushemeza Ruhanga, nituteeraho kuguma turi abeecumi omu by’omubiri, emicwe, n’omu by’omwoyo. (1 Kor. 6:9-11) Nitukunda Yehova tumwesiga, kandi nitucwamu kumuhamiraho turikugyendera aha mitindo ye eri omu Kitabo kye eky’omuhendo. Kandi nituteeraho kukora ebirikuhikaana n’emitindo egyo twaba turi omu ka, omu kibiina, aha murimo, aha ishomero, n’ahandi hoona. (Enf. 15:3) Yetegyereze emiringo emwe ei turikubaasa kworekamu ngu tuhamiire ahari Ruhanga.

14. Abazaire Abakristaayo nibabaasa kworeka bata ngu nibahamira ahari Ruhanga?

¹⁴ Okworora abaana. Abazaire Abakristaayo nibooreka ngu bahamiire ahari Yehova barikutendeka abaana baabo nk’oku Ekigambo kye kirikworeka. Abazaire Abakristaayo tibarikugyendera aha migyenzo y’ekicweka omu kworora abaana baabo. Omwoyo gw’ensi tigurikwikirizibwa omu ka y’Abakristaayo. (Efe. 2:2) Omushaija Omukristaayo tarikwija kuteekateeka ati: ‘Omu ihanga ryaitu abakazi nibo barikwegyesa abaana.’ Baibuli neeshoboorora gye enshonga egi ku erikugira ngu “baishebo, . . . mugumizemu nimurera [abaana baanyu] omu kuhana kwa” Yehova. (Efe. 6:4) Abazaire Abakristaayo bombi nibaba nibenda abaana baabo kuba nka Samueli, ahakuba Yehova akaba ari nawe obu yaabaire naakura.​—1 Sam. 3:19.

15. Nitubaasa kworeka tuta ngu nituhamira ahari Yehova twaba nitucwamu aha nshonga nkuru?

¹⁵ Okucwamu. Twaba nitucwamu aha nshonga ezigumire, nitworeka ngu nituhamira ahari Ruhanga twasherura obuhabuzi omu Kigambo kye n’ekibiina kye. Kubaasa kworeka obukuru bw’okukora ekyo, teekateeka aha nshonga erikwetengyesa obwegyendesereza erikukwata aha bazaire baingi. Omu bicweka ebimwe abafuruki ku barikuheza kuzaara abaana, nibaboherereza abanyabuzaare baabo reero bo baguma aha mirimo yaabo omu ihanga erindi nibakora sente. Buzima, eki n’ekya buri omwe kwecweramu, kwonka tushemereire kuguma nitwijuka ngu nitujunaanizibwa omu maisho ga Ruhanga ahabw’ebi turikucwamu. (Shoma Abarooma 14:12.) Mbwenu shi nikiba kiri eky’obwengye  kucwamu ebirikukwata aha maka gaitu n’oku turaabeho tutabandize kushwijuma Baibuli? Ngaaha buzima! Nitwetenga obuhwezi bwa Tataitwe ow’omu iguru ahakuba titurikubaasa kuhabura entambwe zaitu.​—Yer. 10:23.

16. Omukazi omwe ku yaazaire omwana, akacwamu ata kandi niki ekyamuhwereire kucwamu gye?

¹⁶ Omukazi owaabaire naatuura omu ihanga erindi akazaara omwana w’omwojo kandi akaba ariyo naaza kumwohereza omu ihanga ry’owaabo kureebererwa abazaire ba iba. Arikuza kuzaara, omwe aha Bajurizi ba Yehova akaba naamwegyesa Baibuli. Akakora empindahinduka ahonaaho kandi yaayetegyereza ngu n’obujunaanizibwa bwe kworora omwana we kuramya Yehova. (Zab. 127:3; Enf. 22:6) Omukazi ogwo akashaba Yehova, nk’oku Ebyahandiikirwe birikutuhiga kukora. (Zab. 62:7, 8) Kandi akaigura omutima gwe yaagambira orikumwegyesa Baibuli n’abandi omu kibiina. N’obu abanyabuzaare na banywani be baabaire nibamugyemesereza kwohereza omwana we omu bazaire ba iba, akareeba ngu kikaba kitahikire kukikora. Iba ku yaarebire ngu ekibiina n’obuhungiro bw’omukazi we n’omwana we, akaikiriza kwega Baibuli yaatandika kwija omu nteerane n’omukazi n’omwana waabo. Noogira ngu omukazi ogu akateekateeka ngu Yehova akagarukamu okushaba kwe? Hatariho kubanganisa, akeehurira atyo.

17. Tuhairwe buhabuzi ki oburikukwata aha beegi ba Baibuli?

¹⁷ Kuratira obuhabuzi. Omuringo mukuru ogw’okworeka ngu tuhamiire ahari Ruhanga n’okukuratira obuhabuzi obu turikuheebwa omu kibiina kye. Nk’eky’okureeberaho, teekateeka aha buhabuzi oburikukwata aha beegi baitu ba Baibuli obu tutwire nituheebwa. Bakatuhiga ngu twaheza kutandika kwegyesa omuntu Baibuli omu katabo Niki Eki Turikwega omu Baibuli? bwanyima ya burikwega tugume tukoresa obudakiika bukye kumuhwera kumanya ekibiina kyaitu. Eki nitubaasa kukikora turikukoresa vidiyo Niki Ekirikukorerwa aha Kyombeko ky’Obukama? n’akatabo Ni Baahi Abarikukora Ebi Yehova Akunda Obunaku Obu? Tukaheebwa obuhabuzi ngu twaheza kwega akatabo Eki Turikwega omu Baibuli n’omwegi wa Baibuli orikutunguuka, twegye nawe “Mwerindire omu Kukunda kwa Ruhanga” n’obu yaakuba yaaherize kubatizibwa. Ekibiina kituhaire obuhabuzi obu kugira ngu abeegi abasya ‘bahamibwe omu kwikiriza.’ (Kol. 2:7) Mbwenu shi nookuratira obuhabuzi obwo obu turikuheebwa omu kibiina kya Yehova?

18, 19. Ni nshonga ki ezimwe ezishemereire kutureetera kusiima Yehova?

¹⁸ Hariho enshonga nyingi ezishemereire kutureetera kwebaza Yehova! Niwe yaatuhaire amagara, twaba tutamwine titurikubaasa kugyenda nari kubaho. (Byak. 17:27, 28) Atuhaire ekiconco ky’omuhendo, nikyo kitabo kye Baibuli. Nitusiima kukiikiriza nk’obutumwa bwa Ruhanga, nk’oku Abakristaayo b’omuri Tesalonika baakyakiire kandi bakakiikiriza.​—1 Tes. 2:13.

¹⁹ Ahabw’okugira ngu twine Ekigambo kya Ruhanga omu ngaro zaitu, tubaasize kumwirira haihi, nawe yaatwirira haihi. (Yak. 4:8) Tataitwe ow’omu iguru atwikiriize kutunga omugisha gw’okuba omu kibiina kye. Ka nitusiima omugisha ogwo! Omuhandiiki wa Zaaburi akagamba gye aha nshonga egi obu yaayeshongora ngu Musiime Yehova, “ahakuba ni murungi, kandi embabazi ze n’ez’ebiro byona.” (Zab. 136:1) Ebigambo “embabazi ze n’ez’ebiro byona” nari rukundo ye egumaho ebiro byona omu Zaaburi 136, nibishangwamu emirundi 26. Twahamira ahari Yehova n’ekibiina kye, nitwija kureeba okuhikiirira kw’ebigambo ebyo ebirikugaruramu amaani ahakuba nitwija kutuuraho ebiro byona!