1, 2. (a) Okugira ngu Ruhanga aine ekibiina abamwe nibakireeba bata? (b) Nituza kugamba ahari ki omu kicweka eki?

MBWENU shi Ruhanga aine ekibiina ekitebeekanisiibwe gye? Abamwe nibabaasa kugira bati: “Omuntu tarikwetenga ekibiina ekitebeekanisiibwe kutunga obuhabuzi, ekikuru n’okugira omukago murungi na Ruhanga.” Emiteekateekyere egyo ehikire? Amazima nigooreka ki?

² Omu kicweka eki, nituza kugamba aha buhame oburikworeka ngu Yehova, ni Ruhanga w’obuteeka kandi orikutebeekanisa abaheereza be. Nitwija n’okureeba oku tushemereire kugyendera aha buhabuzi obu turikutunga omu kibiina kya Yehova. (1 Kor. 14:33, 40) Omu kyasha ky’okubanza Y.A.K. n’omu bunaku obu, Ebyahandiikirwe bihwereire ekicweka eky’omu nsi eky’ekibiina kya Yehova kukora omurimo ogurikukirayo obukuru ogw’okubuurira amakuru marungi omu myanya mingi. Ahabw’okugira ngu nituhamira ahari Baibuli kandi tugyendera aha buhabuzi bw’ekibiina, nikituhwera kuguma turi abeecumi omu byʼomwoyo, turi abeesigwa, twine obusingye, n’obumwe omu kibiina.

3. Niki ekirikukuhamiza ngu Yehova ni Ruhanga w’obuteeka?

³ Ebihangirwe nibyoreka ngu Ruhanga n’ow’obuteeka. Baibuli neegira ngu Yehova “ahabw’obwengye bwe akahanga ensi, n’eiguru yaarihamya ahabw’okwetegyereza kwe.” (Enf. 3:19) Ebi turikumanya “n’otw’aha rubaju omu mitwarize ye, kandi n’ebi tumuhuriraho ni bikye munonga nk’okugambirana omu kutu.” (Yob. 26:14) Kakye aku turikumanya aha nsi, enyonyoozi, n’ebizinga nikatuhwera kureeba ngu bitebeekanisiibwe omu muringo murungi. (Zab. 8:3, 4) Ebizinga birimu obuhumbi bw’enyonyoozi, ezirikuba nizigyendera omu mwanya omu muringo ogutebeekanisiibwe gye. Ebizinga nibyetoorora omushana omu buteeka orikushusha ngu nibyorobera ebiragiro by’engyenda! Twateekateeka aha ku ‘yaahangire eiguru n’obwengye’ n’ensi, nitwenda kumuhimbisa, kumuramya, n’okumuhamiraho.​—Zab. 136:1, 5-9.

4. Ahabw’enki abaasayansi baremirwe kugarukamu ebibuuzo bingi?

⁴ Abanyasayansi bakoreise bingi ebi beegire ebirikukwata aha nsi, kutuhwera kugira amagara marungi. Kwonka hariho ebibuuzo bingi ebi sayansi etarikubaasa kugarukamu. Nk’eky’okureeberaho, abarikwega eby’omu mwanya tibarikubaasa kugamba oku ensi yaatandikire nari ahabw’enki turi omu nsi na byona ebirimu. Kandi n’abantu tibarikubaasa kushoboorora ahabw’enki baine ekyetengo ky’amaani ky’okutuuraho ebiro byona. (Mub. 3:11) Ahabw’enki hariho ebibuuzo bingi bikuru kwonka ebitaine by’okugarukamu? Enshonga emwe n’okugira ngu abanyasayansi baingi n’abandi nibagira ngu Ruhanga tariho kandi beegyesa ngu ebintu bikabaho birikuruga omu bindi. Kwonka, Yehova naatuha eby’okugarukamu by’ebibuuzo omu Kitabo kye.

5. Ni mu muringo ki ogu turikuhwerwamu ebiragiro by’obuhangwa?

⁵ Yehova akatuteeraho ebiragiro by’obuhangwa ebirikwesigwa kandi ebirikutuhwera kubaho. Abarikukora eby’amashanyarazi, eby’amaizi, abombeki, abavugi b’enyonyi, n’abashaho abarikushemeza abarwaire, boona nibagyendera aha biragiro ebi, omu kukora emirimo yaabo. Nk’eky’okureeberaho, omutima gw’omuntu nigushangwa omu mwanya gumwe ogw’omubiri, n’ahabw’ekyo abarikushemeza tikirikubeetengyesa kubanza baasherura ahu guri. Kandi twena nituha ekitiinisa ebiragiro by’obuhangwa. Twagaya amaani agarikukurura ebintu kubigarura ahansi nitubaasa kufa.

6. Nitumanya tuta ngu Yehova naayenda abantu kumuramya omu muringo ogutebeekanisiibwe gye?

⁶ Buzima omuringo ogu Yehova yaatebeekaniisemu eiguru n’ensi nigutangaaza. N’ahabw’ekyo, naayenda ngu abaheereza be bamuramye omu muringo ogutebeekanisiibwe gye. Yehova atuhaire Baibuli kutuhwera kukora ekyo. Twaba tutaine obuhwezi bw’ekibiina kya Yehova n’emitindo ye titurikubaasa kushemererwa.

7. Niki ekirikworeka ngu Baibuli n’ekitabo ekitebeekanisiibwe gye?

⁷ Baibuli buzima n’ekiconco ky’omutaano kuruga ahari Ruhanga. Abahangu abamwe nibagira ngu erimu ebitabo by’Abayudaaya n’eby’Abakristaayo. Kwonka Ruhanga niwe yaatooraine abaahandiikire ebitabo ebirimu, akabagambira obu baine kubihandiika, n’ebi baine kuhandiika. Niyo nshonga ahabw’enki ebitabo byona ebiri omu Baibuli nibituhwera kwetegyereza obutumwa bwa Ruhanga. Kuruga aha Okutandika kuhika aha Okushuuruurwa, Baibuli neeyoreka ngu hakaba nihaija kubaho “oruzaaro” orwabaire nirwija kuhindura ensi paradiso. Kandi twegire ngu “oruzaaro” oru ni Kristo Yesu kandi ngu Obukama bwe nibwija kworeka ngu Yehova niwe ahikire kutegyeka byona.​—Shoma Okutandika 3:15; Matayo 6:10; Okushuuruurwa 11:15.

8. Ahabw’enki turikugira ngu Abaisraeli bakaba batebeekanisiibwe gye?

 ⁸ Abantu b’omu Israeli bakaba nibakuratira ebiragiro ebi Ruhanga yaabahaire kandi bakaba batebeekanisiibwe gye. Nk’eky’okureeberaho, hakaba hariho abakazi abaabaire batebeekanisiibwe “kuheereza aha muryango gw’eihema ry’okubugaabuganiramu.” (Kur. 38:8) Okufurura enkambi y’Abaisraeli n’eihema ryabo bikaba bikorwa omu muringo ogutebeekanisiibwe gye. Bwanyima, Omugabe Daudi akatebeekanisa gye Abaleevi n’abanyamurwa. (1 Bus. 23:1-6; 24:1-3) Kandi Abaisraeli ku baayorobeire Yehova, baatunga emigisha baagira obuteeka, obusingye, n’obumwe.​—Bir. 11:26, 27; 28:1-14.

9. Niki ekirikworeka ngu ekibiina Ekikristaayo omu kyasha ky’okubanza kikaba kitebeekanisiibwe gye?

⁹ Ekibiina Ekikristaayo eky’omu kyasha ky’okubanza kikaba kiine obuteeka, kandi kikagasirwa omu buhabuzi kuruga aha kakiiko akareeberezi, akaabaire karimu entumwa. (Byak. 6:1-6) Bwanyima, ab’eishe-emwe abandi bakoongyerwa aha kakiiko ako akareeberezi. (Byak. 15:6) Yehova akahwera bamwe aha kakiiko akareeberezi n’abaabaire nibakora nako kuhandiikira ebibiina amabaruha agarimu obuhabuzi. (1 Tim. 3:1-13; Tit. 1:5-9) Ebibiina bikagasirwa bita omu buhabuzi bw’akakiiko akareeberezi?

10. Niki ekyarugiremu ebibiina bya ira ku byayorobeire ebyatairweho akakiiko akareeberezi? (Reeba ekishushani aha kutandika.)

¹⁰ Shoma Ebyakozirwe 16:4, 5. Ab’eishe-emwe abarikutaayaayira ebibiina barikujwekyera akakiiko akareeberezi bakaba bagambira abantu “ebyatairweho entumwa n’abakuru abaabaire bateeraniire Yerusaalemu.” Ebibiina ku byayorobeire ebyatairweho, ‘bikagumibwa omu kwikiriza, abantu baayeyongyera kukanya obutoosha.’ Mbwenu shi Ekyahandiikirwe eki kirimu obuhabuzi obu turikubaasa kugyenderaho omu kibiina kya Yehova obunaku obu?

11. Abatoorainwe kutwebembera bashemereire kutwara bata obuhabuzi oburikutuheebwa ekibiina kya Yehova?

¹¹ Abari aha Bukiiko bw’Eitaagi nari bw’Eihanga, abareeberezi abarikutaayaayira ebibiina, n’abareeberezi b’ebibiina baine kukora ki ekibiina kya Yehova kyabaha obuhabuzi obunaku obu? Ekitabo kya Yehova Baibuli nikituhabura twena kuba abarikworoba kandi abarikuhurikiza. (Bir. 30:16; Heb. 13:7, 17) Obubi nari obugomi tibwine mwanya omu kibiina kya Ruhanga, ebintu nk’ebyo nibibaasa kutumaraho rukundo, obusingye, n’obumwe omu kibiina. Buzima, tihariho Mukristaayo orikwenda kugira omuze gw’okutaha bandi ekitiinisa nari gw’okutaba mwesigwa nka Diotorefe. (Shoma 3 Yohaana 9, 10.) Nitubaasa kwebuuza tuti: ‘Nimpwera abandi omu by’omwoyo? Nindahuka kwikiriza n’okushagika obuhabuzi bw’abareeberezi b’ekibiina?’

12. Hakabaho mpindahinduka ki aha ku abareeberezi n’abaheereza bashemereire kutooranwa?

¹² Yetegyereze eki Akakiiko Akareeberezi kaacwiremu obwire bukye enyima. Ekicweka “Ebibuuzo Kuruga omu Bashomi” omu Omunaara gw’Omurinzi ogwa Novemba 15, 2014, kikagamba aha mpindahinduka oku abareeberezi n’abaheereza bashemereire kutooranwa. Ekicweka ekyo kikashoboorora ngu akakiiko akareeberezi k’omu kyasha ky’okubanza kakaikiriza abareeberezi abarikutaayaayira ebibiina kuba nibo baatoorana abareeberezi n’abaheereza b’ebibiina. Okuhikaana n’ekyo, kuruga omu Seputemba 1, 2014, abareeberezi abarikutaayaayira ebibiina batwire nibatoorana abareeberezi n’abaheereza omu bibiina. Omureeberezi orikutaayaayira ebibiina naateeraho kumanya ab’eishe-emwe abu abareeberezi bamugambiire ngu bahikire kutooranwa, kandi kyaba nikibaasika naateeraho kubuurira nabo. Naateeraho kwetegyereza eka y’ow’eishe-emwe orikuza kutooranwa. (1 Tim. 3:4, 5) Akakiiko k’abareeberezi na n’omureeberezi  orikutaayaayira ebibiina n’obwegyendesereza nibashwijuma Ebyahandiikirwe ebirikworeka ebi ow’eishe-emwe aine kuhikiiriza kuba omuheereza nari omureeberezi.​—1 Tim. 3:1-10, 12, 13; 1 Pet. 5:1-3.

13. Nitubaasa kworeka tuta ngu nitushagika obuhabuzi obu abareeberezi barikutuha?

¹³ Twine kugyendera aha buhabuzi oburi omu Baibuli obu abareeberezi barikutuha. Abariisa aba abeesigwa abari omu kibiina kya Ruhanga nibeebemberwa “ebigambo by’amazima” ebiri omu Kitabo kya Ruhanga Baibuli. (1 Tim. 6:3) Ijuka obuhabuzi bwa Paulo oburikukwata aha bantu abajagaraire omu kibiina. Abantu abamwe bakaba bari ‘abeeremwa batarikukora na kakye kandi barikwetaasya omu by’abandi.’ Buzima abareeberezi bakaba nibabahabura kwonka baguma nibeehuzya obuhabuzi. Ekibiina kikaba kiine kutwariza kita abantu nk’abo? Paulo akoongyeraho ati: “mumumanye, mutakwatanisa nawe.” Obuhabuzi obwo bukaba burimu oburingaaniza ahabw’okugira ngu bukaba nibworeka ngu titwine kubatwariza nk’abazigu baitu. (2 Tes. 3:11-15) Obunaku obu, abareeberezi nibabaasa kuha orubazo orurimu okurabura okurikukwata aha muntu ogumire naakora ebintu ebirikubaasa kushiisha ekibiina, nk’okuriima omuntu otari Mujurizi wa Yehova. (1 Kor. 7:39) Noija kutwaza ota abareeberezi baareeba ngu nikyetengyesa kuha orubazo nk’orwo? Waaba noomanya omuntu ou orubazo orwo rurikukwataho, noija kwegyendesereza kukwatanisa nawe? Waaba nookunda omuntu ogwo kandi orikwenda kuhamira kihikire noobaasa kuhiga omuntu ogwo kureka omuhanda gwe mubi. ^[1]

14. Nitubaasa kuhwera tuta omu kurinda obwecumi bw’ekibiina?

¹⁴ Nitubaasa kurinda obwecumi bw’ekibiina obw’eby’omwoyo turikugyendera aha buhabuzi oburi omu Kigambo kya Ruhanga. Teekateeka aha ky’okureeberaho ky’omuri Korinso eya ira. Paulo akaba ayehaireyo kubuurira omu rurembo orwo, kandi akaba naakunda bagyenzi be “abarikwera.” (1 Kor. 1:1, 2) Ka nikibaasa kuba kyabaire kimugumiire kugamba aha muze gw’obushambani ogwabaire guri omu kibiina ekyo! Paulo akagambira abareeberezi omuntu nk’ogwo kumuhayo ahari Sitaane, ekirikumanyisa, kumubinga omu kibiina. Kubaasa kurinda obwecumi bw’ekibiina, abareeberezi baine kwihamu “akatumbisa.” (1 Kor. 5:1, 5-7, 12) Twashagika okucwamu kw’abareeberezi okurikukwata aha kubinga otarikweteisa, nituba nituhwera omu kurinda obwecumi bw’ekibiina kandi nikibaasa kuhiga omuntu ogwo kweteisa, Yehova akamusaasira.

15. Nitubaasa kurinda tuta obusingye omu kibiina?

¹⁵ Hakaba hariho oburemeezi obundi omuri Korinso. Ab’eishe-emwe abamwe bakaba nibatabaariza bagyenzi baabo omu macwero g’emanja ag’ensi. Paulo akababuuza ekibuuzo eki: “Ahabw’enki mutarikufa kwemera okukorwa kubi?” (1 Kor. 6:1-8) N’obunaku obu nihabaho oburemeezi nk’obu. Obumwe, obusingye omu kibiina nibusiisikara bamwe abarimu baakora endagano z’eby’obushuubuzi kwonka bakafeerwa sente nari bakeetomboita ngu hariho obaryangataniise. Abamwe bacwiremu kutabaariza ab’eishe-emwe bagyenzi baabo, kwonka Ekigambo kya Ruhanga nikituhabura ngu ni kirungi okufeerwa omu mwanya gw’okujumisa eiziina rya Ruhanga nari okushiisha obusingye bw’ekibiina. ^[2] Kubaasa kumaraho oburemeezi n’obutaikirizana, buzima twine kugyendera aha buhabuzi bwa Yesu. (Shoma Matayo 5:23, 24; 18:15-17.) Twakora ekyo, niturinda obumwe oburi omu ka ya Yehova ey’abaheereza be.

16. Ahabw’enki abaheereza ba Yehova baine kugira obumwe?

¹⁶ Ekitabo kya Yehova nikyoreka ahabw’enki abaheereza be baine kugira obumwe. Omuhandiiki wa zaaburi akeeshongora ati: “Reeba, ku kiri kirungi kandi ekirikushemeza,  ab’eishe-emwe kutuura hamwe nibakwatanisa!” (Zab. 133:1) Abaisraeli ku baabaire boorobera Yehova, bakaba bagira obuteeka n’obumwe. Ruhanga arikugamba aha biro by’omumaisho eby’abantu be, akagira ati: “Ndyabateeranira hamwe nk’entaama eziri omu kibuga kyazo.” (Mik. 2:12) Omurundi ogundi, Yehova akahwera nabi Zefania kuhandiika ngu “ndyahindura engambo y’amahanga ebe engambo nungi, ab’omuri ago mahanga boona babone kutakira eiziina rya Mukama n’okumuheereza n’omutima gumwe” nari kumuramya omu bumwe. (Zef. 3:9) Ka twine omugisha gw’amaani ogw’okuramya Yehova omu bumwe!

17. Abareeberezi bashemereire kutwaza bata omwe omu kibiina yaakora ekibi ky’amaani?

¹⁷ Omuntu yaakora ekibi ky’amaani ekirikubaasa kumaraho obumwe n’obwecumi omu kibiina, abareeberezi baine kumuhwera ahonaaho omu muringo gwa rukundo. Paulo akaba naamanya ngu rukundo ya Ruhanga terikwegamira aha nyehurira z’abantu, kandi ngu tarikubaasa kwehuzya ekibi ekirikukorwa. (Enf. 15:3) N’ahabw’ekyo, akahandiikira Abakorinso ebaruha y’amaani kandi erikworeka rukundo. Ebaruha ya kabiri ey’Abakorinso eyahandiikirwe bwanyima y’ameezi makye, neeyoreka ngu ekibiina kikakura ahakuba abareeberezi bakakuratira obuhabuzi bw’entumwa. Omukristaayo yaatoora omuhanda gugwire we atakakimanyire, abaine obujunaanizibwa bashemereire kumuteereza omu muringo gw’obucureezi.​—Gal. 6:1.

18. (a) Obuhabuzi oburi omu Kigambo kya Ruhanga bukahwera buta ebibiina omu kyasha ky’okubanza? (b) Omu kicweka ekirikukurataho nitwija kugamba ahari ki?

¹⁸ Nikyeyoreka gye ngu obuhabuzi obu Ruhanga yaataire omu Kitabo kye bukahwera Abakristaayo omu kyasha ky’okubanza omuri Korinso n’ahandi kurinda obwecumi, obusingye, n’obumwe. (1 Kor. 1:10; Efe. 4:11-13; 1 Pet. 3:8) N’ekyarugiremu, ab’eishe-emwe b’obwire obwo bakabaasa kuhikiiriza omurimo gwabo ogw’okubuurira. Buzima, Paulo akabaasa kugira ngu amakuru marungi ‘gakagambwa omu byahangirwe byona eby’ahansi y’eiguru.’ (Kol. 1:23) Obunaku obu, okumanya okurikukwata aha bigyendererwa bya Ruhanga kuriyo nikujanjaara omu nsi yoona ahabw’okuteeraho kw’ekibiina ekiine obumwe. Ekicweka ekirikukurataho nikiija kwongyera kutuha obuhame oburikworeka ngu abantu aba nibaha ekitiinisa Baibuli kandi bamariirira kuha ekitiinisa ow’Obushoboorozi Bwona Yehova.​—Zab. 71:15, 16.