1. Baingi aha baheereza ba Ruhanga abeesigwa nibeehurira bata ahabw’ekibi?

PAULO akahandiika ati: “Ai bambe, ka ndi omuntu enshoberwa!” (Abarooma 7:24) Obunaku obu abaheereza ba Ruhanga baingi abeesigwa nibahurira batamirwe kandi baine enaku nk’oku Paulo yaabaire ari. Ahabw’enki? Ahakuba n’obu turaabe nitwenda kushemeza Yehova, tukahungura ekibi kandi turi abatahikiriire. N’ahabw’ekyo nitubaasa kwehurira kubi twaremwa kumushemeza. Abakristaayo abamwe abaakozire ebibi by’amaani nibeehurira ngu Yehova tarikubaasa kubasaasira.

2. (a) Ebiri omu Zaaburi 34:22 nibyoreka bita ngu abaheereza ba Ruhanga tibaine kuhwamu amaani ahabw’orubanja? (b) Nituza kwega ki omu kicweka eki? (Reeba akabokisi “ N’amashomo Nari n’Amakuru g’Akamanyiso?”)

² Ebyahandiikirwe nibituhamiza ngu twahindura Yehova obuhungiro bwaitu, titurikwija kuhwamu amaani ahabw’orubanja. (Shoma Zaaburi 34:22.) Kwonka shi nikimanyisa ki okuhindura Yehova obuhungiro bwaitu? Twine kukora ki twaba nitwenda ngu Yehova atugirire embabazi kandi atusaasire? Nitubaasa kutunga eby’okugarukamu by’ebibuuzo ebi turikwega aha ntebeekanisa  y’endembo z’okuhinguramu omuri Israeli eya ira. Entebeekanisa egi ekaba neekora obu haabaireho hariho endagaano y’Ebiragiro, kandi omu mwanya gwayo hakateebwamu ensya aha Pentekoote omu gwa 33. Kwonka Ebiragiro bikaba nibiruga ahari Yehova. N’ahabw’ekyo, entebeekanisa y’endembo z’okuhungiramu neetwegyesa oku Yehova arikutwara ekibi, abasiisi, n’abarikweteisa. Okubanza, ka tureebe ahabw’enki Abaisraeli baabaire baine endembo z’okuhungiramu n’oku zaabaire nizikora.

3. Abaisraeli bakaba baine kukorera ki omwitsi?

³ Yehova akaba naakwatwaho haagira omuntu owaitwa. Omwisraeli ku yaabaire aita omuntu, omushaija omunyabuzaare w’ogwo oitsirwe, owaabaire naayetwa ‘orikuhoorera enzigu nyakufa’ akaba aine kwita omwitsi. (Okubara 35:19) Omu muringo ogwo, omwitsi akaba ashashura amagara ge omu mwanya gw’omuntu otaine rubanja ou aitsire. Omwitsi ku yaabaire aba ataitsirwe ahonaaho, Ensi Eyaaraganisiibwe ekaba esiisikara nari eba etarikwera. Yehova akaragiira ati: ‘Mutarishiisha ensi ei murituuramu’ ahabw’okusheesha eshagama, ekirikumanyisa okwita omuntu.​—Okubara 35:33, 34.

4. Niki ekyabaire kibaho Omwisraeli yaita omuntu atakigyendereire?

⁴ Kwonka shi niki ekyabaire kibaho Omwisraeli ku yaabaire aita omuntu atakigyendereire? N’obu araabe yaabaire amwita atakigyendereire, akaba agiibwaho orubanja rw’okwita omuntu otaine kyakozire. (Okutandika 9:5) Kwonka, Yehova akagira ngu omuntu nk’ogwo naabaasa kugirirwa embabazi. Ogwo oitsire omuntu atakigyendereire akaba naabaasa kuhunga orikuhoorera enzigu nyakufa, aze omuri rumwe aha ndembo mukaaga ez’okuhungiramu. Ku yaabaire aikirizibwa kutuura omu rurembo orwo, akaba arindwa. Kwonka akaba aine kuguma omu rurembo orwo kuhitsya omunyamurwa omukuru yaafa.​—Okubara 35:15, 28.

5. Ahabw’enki entebeekanisa y’endembo z’okuhungiramu erikutuhwera kwetegyereza gye Yehova?

⁵ Entebeekanisa y’endembo z’okuhungiramu ekaba atateirweho bantu. Yehova niwe yaagitaireho. Akaragiira Yoshua ati: “Gambira Abaisraeli oti: Mwetooranire endembo z’okuhungiramu.”  Endembo ezi zikaba zeeziibwe. (Yoshua 20:1, 2, 7, 8) Yehova akacwamu ngu endembo ezi zitooranwe zitaanisibwe aha zindi. N’ahabw’ekyo entebeekanisa egi, neetwegyesa bingi ahari Yehova. Eky’okubanza, neetuhwera kwetegyereza embabazi za Yehova. Kandi neetwegyesa oku turikubaasa kuhindura Yehova obuhungiro bwaitu obunaku obu.

6, 7. (a) Shoboorora obujunaanizibwa bw’abareeberezi omu kucwera orubanja ogwo aitsire omuntu atakigyendereire. (Reeba ekishushani aha kutandika.) (b) Ahabw’enki kyabaire kiri eky’obwengye oitsire omuntu kugambira abareeberezi?

⁶ Omwisraeli ku yaabaire aita omuntu atakigyendereire, akaba airuka aza omu rurembo rw’okuhungiramu agambira abareeberezi b’aha irembo eki akozire. Abareeberezi aba bakaba bamwakiira bamutaatsya omu rurembo. (Yoshua 20:4) Bwanyima y’obwire, bakaba bamwohereza agaruka omu rurembo oru yaitiiremu omuntu kugira ngu abareeberezi baayo bamucwere orubanja. (Shoma Okubara 35:24, 25.) Abareeberezi ku baabaire bacwamu ngu akamwita atakigyendereire, bakaba bamwohereza agarukayo omu rurembo rw’okuhungiramu.

⁷ Ahabw’enki ogwo ohungire yaabaire aine kugambira abareeberezi b’orurembo? Abareeberezi bakaba baine kuhamya ngu ekibiina ky’Abaisraeli kyaguma kishemeire, kandi bakaba bahwera ogwo oitsire omuntu atakigyendereire kugasirwa omu mbabazi za Yehova. Omucondooza omwe wa Baibuli akahandiika ngu omwitsi ohungire ku yaabaire aba atagiire kureeba abareeberezi, akaba naabaasa kwitwa. Akoongyeraho ngu akaba aba yaareetera kufa ahabw’okugira ngu yaayanga kukora eki Ruhanga yaabaire aragiire. Ogwo oyitsire omuntu atakigyendereire akaba aba aine kushaba obuhwezi, kandi akabwikiriza kubaasa kuguma ahuriire. Ku yaabaire ayanga kuza omu rumwe aha ndembo ezo, omunyabuzaare w’ogwo oitsirwe akaba aine obugabe bw’okumwita.

8, 9. Ahabw’enki Omukristaayo okozire ekibi ky’amaani aine kugambira abareeberezi?

⁸ Obunaku obu, Omukristaayo orikuba akozire ekibi kubaasa kugaruka kugira omukago murungi na Yehova, naaba aine kukigambira abareeberezi b’ekibiina kugira ngu bamuhwere. Ahabw’enki eki ni kikuru? Eky’okubanza, Yehova niwe yaataireho entebeekanisa ngu abareeberezi bacwe emanja ezirikukwata aha bibi by’amaani. (Yakobo 5:14-16) Ekya kabiri, abareeberezi nibahwera abasiisi abarikweteisa kugaruka kusiimwa Yehova n’okwetantara kugaruka kukora ekibi. (Abagalatia 6:1; Abaheburaayo 12:11) Ekya kashatu, abareeberezi bahairwe obushoboorozi kandi batendekirwe kuhuumuriza abasiisi abeeteisize n’okubaruhuura kuruga omu busaasi n’okweshinja. Yehova, abareeberezi naabeeta ‘obwegamo’ nari obuhungiro bw’eihunga. (Isaaya 32:1, 2) Entebeekanisa egi ni gumwe aha miringo ei Ruhanga arikutworeka embabazi ze.

⁹ Abaheereza ba Yehova baingi batungire oburuhuuko ahabw’okugambira abareeberezi reero bakabahwera. Nk’eky’okureeberaho, ow’eishe-emwe Daniel akakora ekibi ky’amaani, kwonka akamara ameezi maingi atagambiire abareeberezi. Akagira ati: “Bwanyima y’okuhinguraho obwire bwingi, nkateekateeka ngu tihariho ki abareeberezi barikubaasa kukora kyona kumpwera.” Kwonka nabwo, akaba naatiina ngu nihaija kurugaho omuntu naamanya ekibi kye, kandi buri kuza kushaba akaba aine kutandika arikushaba Yehova okusaasirwa. Akahitsya obunaku yaashaba abareeberezi obuhwezi. Ku arikureeba enyima,  naagira ati: “Buzima, nkaba ntiinire kubagambira. Kwonka ku naaherize kubagambira, okaba nooshusha ngu omuntu yaiha ekintu kiremeire munonga aha mabega gangye.” Daniel akagaruka yaatandika kugamba na Yehova atarikutiina. Hati aine omutima ogutarikweshinja, kandi aherize kuba omuheereza omu kibiina.

10. Oitsire omuntu atakigyendereire akaba aine kukora ki kubaasa kusaasirwa?

¹⁰ Ogwo oitsire omuntu atakigyendereire kubaasa kusaasirwa, akaba aine kuhungira omu rurembo rw’okuhungiramu oruri haihi. (Shoma Yoshua 20:4.) Kubaasa kuguma ahuriire akaba aine kuza omu rurembo orwo, kandi akagumayo kuhitsya omunyamurwa omukuru yaafa. Ogwo ohungire akaba aine kugira ebi yaayefeerereza. Akaba aine kutsigaho omurimo gwe, ebintu by’omu ka ye, n’obugabe bwe bw’okugyenda ahu arikwenda. * (Reeba obugambo obw’ahansi.) (Okubara 35:25) Kwonka amagara ge gakaba nigakira okwefeerereza kwe. Ku yaabaire aruga omu rurembo rw’okuhungiramu, akaba ayoreka ngu tarikufayo ahabw’okwita omuntu, kandi akaba ata amagara ge omu kabi.

11. Omukristaayo oyeteisize naabaasa kworeka ata ngu naasiimira kimwe embabazi za Ruhanga?

¹¹ N’omusiisi ow’obunaku obu aine kugira ebintu ebi yaakora kubaasa kusaasirwa Ruhanga. Aine kurekyera aho kugumizamu naakora ebibi. Eki nikitwariramu okwetantara ekintu kyona ekirikubaasa kurugamu ebibi by’amaani. Entumwa Paulo akashoboorora eki Omukristaayo owaayeteisize omuri Korinso yaakozire. Akahandiika ati: ‘Okwefuuza oku okw’omu buryo bwa Ruhanga kukabareetera kutaho munonga omutima, okwetonganira, n’okutamwa, n’obwoba, n’okwetenga, n’obweziriki’ bw’okutereeza ekishobire. (2 Abakorinso 7:10, 11) N’ahabw’ekyo twakora kyona ekirikubaasa kurekyera aho kushiisha, nitworeka Yehova ngu nitufayo aha mbeera yaitu, kandi ngu titurikuteekateeka ngu naatusaasira tutaine eki tukozire.

12. Omukristaayo nikimwetengyesa kureka ki yaaba naayenda ngu Yehova amugirire embabazi?

¹² Yehova kubaasa kugirira Omukristaayo embabazi nikimwetengyesa kureka ki? Ashemereire kuba ayeteekateekire kureka ebintu ebi arikukunda byaba nibibaasa kumureetera kukora ekibi. (Matayo 18:8, 9) Nk’eky’okureeberaho, banywani baawe baaba nibakugyemesereza kukora ebintu ebitarikushemeza Yehova, noija kurekyera aho kukwatanisa nabo? Kyaba nikikugumira kwerinda kunywa amaarwa maingi, noija kwetantara embeera zoona ezirikubaasa kukureetera kwohibwa kuganywa? Kyaba nikikugumira kwerinda ebyetengo bibi by’okuteerana, noija kwetantara vidiyo, emikura, nari ebikorwa ebirikubaasa kukureetera kugira ebiteekateeko bibi? Ijuka, buri kwefeerereza kwona oku turikukora kworobera ebiragiro bya Yehova, ti kwa busha. Yehova yaakurugaho nikishaasha munonga kukira ebindi byona. Kandi tihariho ekirikukira oburungi nk’okwehurira ngu Yehova akwiniire “rukundo etahwaho.”​—Isaaya 54:7, 8.

13. Ahabw’enki ohungire yaabaire naabaasa kugira oburinzi n’okushemererwa omu rurembo rw’okuhungiramu?

¹³ Ogwo ohungire ku yaabaire aguma omu rurembo rw’okuhungiramu, akaba atunga oburinzi. Yehova akaba agambire aha ndembo  ezo ati: “Ziryaba obuhungiro bwanyu.” (Yoshua 20:2, 3) Yehova akaba atarikuragiira ngu ogwo oitsire omuntu acwerwe orubanja emirundi ebiri ahabw’omushango nigwo gumwe. Kandi ogwo owaabaire naahorera nyakufa enzigu akaba ataine kutaaha omu rurembo rw’okuhungiramu kwita ohungire. Ohungire ku yaabaire aba ari omu rurembo, akaba aba ari buhooro arinzirwe Yehova. Akaba aba atari mu kihome. Akaba naabaasa kukora, kuhwera abandi, n’okuheereza Yehova omu busingye. Buzima, akaba naabaasa kugira okushemererwa n’okumarwa!

14. Omukristaayo oyeteisize naabaasa kugira buhame ki?

¹⁴ Abaheereza ba Ruhanga abamwe nibaguma nibeeshinja na bwanyima y’okweteisa. Abamwe nibateekateeka ngu Yehova tarikubaasa kwebwa eki baakozire. Ku oraabe nooyehurira otyo, gira obuhame ngu Yehova ku arikukusaasira naakusaasirira kimwe. Nooba otaine kuguma nooyeshinja. Eki nikyo kyahikire ahari Daniel, ou twaba twagambireho. Bwanyima y’abareeberezi kumuhana, kandi bakamuhwera kugaruka kugira omutima ogutarikweshinja, akatunga oburuhuuko. Naagira ati: “Nkaba ntaine kugaruka kweshinja obundi. Ekibi kyarugaho nikiba kyarugaho. Nk’oku Yehova yaagizire, naihaho oburemeezi bwawe kandi abuta hare munonga naiwe. Nooba otarigaruka kubureeba.” Bwanyima y’ohungire kutaaha omu rurembo rw’okuhungiramu, kikaba kitarikumwetengyesa kutiina ngu orikuhoorera enzigu nyakufa naija kumwita. Nikyo kimwe, Yehova ku arikutusaasira, nituba tutaine kutiina ngu naija kwijuka ekibi kyaitu nari atufubire ahabw’ekibi ekyo.​—Shoma Zaaburi 103:8-12.

15, 16. Obu Yesu ari Omunyamurwa Omukuru kandi akaba ekitambo nikikureetera kita kwesiga Yehova?

 ¹⁵ Itwe twine enshonga nyingi ezishemereire kutureetere kwesiga Yehova ahabw’embabazi ze kukira Abaisraeli. Paulo bwanyima y’okugira ngu akaba ari “enshoberwa” ahabw’okuremwa kworobera Yehova omu muringo oguhikiriire, akagira ati: “Ruhanga asiimwe, ahabwa Yesu Kristo Mukama waitu!” (Abarooma 7:25) Akaba naamanyisa ki? N’obu Paulo araabe yaabaire naarwanisa ebyetengo bitahikire, kandi enyima akaba asiisire, kwonka akaba ayeteisize. N’ahabw’ekyo akaba naayesiga Yehova ngu naija kumusaasira arikwihirira aha kitambo kya Yesu. Ahabw’okugira ngu Yesu akashashura omuhendo gw’ekitambo, nitubaasa kugira omutima ogutarikweshinja n’obugwagye. (Abaheburaayo 9:13, 14) Yesu Omunyamurwa Omukuru “naabaasa kujunira kimwe abairirira Ruhanga nibaraba omuriwe, ahakuba” butoosha ahuriire kubaasa kubeeshengyerereza. (Abaheburaayo 7:24, 25) Ira, omunyamurwa omukuru akaba ahawera Abaisraeli kuhamya ngu Yehova naija kubasaasira ebibi byabo. Obu Yesu ari Omunyamurwa waitu Omukuru, twine enshonga nyingi ezishemereire kutureetera kuhamya ngu nitwija “kuheebwa okusaasirwa, n’okugirirwa embabazi z’okutuhwera ahu turaazeetengyere hoona.”​—Abaheburaayo 4:15, 16.

¹⁶ N’ahabw’ekyo kubaasa kuhindura Yehova obuhungiro bwaitu, twine kwikiririza omu kitambo kya Yesu. Otakaateekateeka ngu ekitambo nikigasira abantu boona okutwarira hamwe. Omu mwanya gw’ekyo, ikiririza omu kitambo kugira ngu kibaase kukugasira. (Abagalatia 2:20, 21) Gira okwikiriza ngu ahabw’ekitambo, Yehova naakusaasira ebibi byawe. Gira okwikiriza ngu ekitambo nikikuha amatsiko g’okwija kutuuraho ebiro byona. Ekitambo kya Yesu n’ekiconco eki Yehova akuhaire!

17. Ahabw’enki nooyenda kuhindura Yehova obuhungiro bwawe?

¹⁷ Endembo z’okuhungiramu nizituhwera kwetegyereza embabazi za Yehova. Entebeekanisa ya Ruhanga egi neetwegyesa ngu amagara n’agarikwera. Kandi neetworeka oku abareeberezi barikubaasa kutuhwera, eki kirikumanyisa okweteisiza kimwe, n’ahabw’enki turikubaasa kuhamya ngu Yehova naatusaasirira kimwe. Noohindura Yehova obuhungiro bwawe? Tihariho omwanya ogurikubaasa kutuha oburinzi kukira Yehova! (Zaaburi 91:1, 2) Omu kicweka ekirikukurataho, nituza kureeba oku endembo z’okuhungiramu zirikubaasa kutuhwera kutooreza Yehova, orikukirayo kworeka oburingaaniza n’embabazi.