1. Okweshongora nikutubaasisa kukora ki?

OMUHANDIIKI w’ebyeshongoro rurangaanwa akagira ati: “Waahurira ebigambo nibikureetera kuteekateeka. Waahurira amaraka g’abarikweshongora nikikureetera kugira enyehurira. Kwonka waayeshongora nikikureetera kukwatwaho.” Twaba nitweshongora nituhimbisa Tataitwe ow’omu iguru Yehova, tworeka ngu nitumukunda. Kandi nikutwiriza haihi nawe. N’ahabw’ekyo, kyorobi kwetegyereza ahabw’enki okweshongora n’ekicweka kikuru munonga eky’okuramya kwaitu, yaaba turi twenka nari turi n’ab’eishe-emwe.

2, 3. (a) Abamwe nibeehurira bata aha bikwawtiraine n’okweshongora n’eiraka rihango omu kibiina? (b) Nituza kushwijuma bibuuzo ki omu kicweka eki?

² Kwonka shi, nootwara ota okweshongora n’eiraka rihango omu kibiina? Eki nikikutiinisa? Omu bicweka ebimwe, abashaija nibeetiina kweshongorera omu bantu. Eki nikibaasa kushiisha omuhimbo gw’ekibiina, na munonga abareeberezi baaba nibatiina kweshongora nari baaba nibakira kukora ebindi omu bwire bw’okweshongora.​—Zaaburi 30:12.

 ³ Okweshongora ni gumwe aha miringo ei turikuramyamu Yehova. N’ahabw’ekyo, titushemereire kushohora baaba nibeeshongora nari kufeerwa ekicweka eki eky’enteerane zaitu. Twena twine kwebuuza tuti: ‘Okweshongora omu nteerane niinkutwara nta? Nimbaasa kukora ki ku ndaabe ninyeziringa kweshongorera omu bandi? Kandi nimbaasa kweshongora ebyeshongoro ndikworeka enyehurira?’

4, 5. Abaisraeli bakaba baine ntebeekanisa ki ey’okweshongora omu hekalu?

⁴ Okuruga iranaira, abaheereza ba Yehova batwire nibamuhimbisa kurabira omu kweshongora. Kandi, obu Abaisraeli baabaire bari abeesigwa ahari Yehova, okweshongora kuba kuri ekicweka kikuru eky’okuramya kwabo. Nk’eky’okureeberaho, obu Daudi yaakora entebeekanisa z’okuramya omu hekalu, akatebeekanisa Abaleevi 4,000 ab’okuhimbisa Yehova barikukoresa eby’amaraka. Omuri aba, 288 bakaba ‘beegyesiibwe kweshongorera’ Yehova.​—1 Obusingye 23:5; 25:7.

⁵ Kandi eby’amaraka n’okweshongora bikatebeekanisibwa aha mukoro gw’okuhayo hekalu. Baibuli neegira eti: ‘Abakondere n’abeeshongozi ku baahuriirwe nibeeshongora n’eiraka rimwe, nibahimbisa’ Yehova kandi ‘nibamusiima, barikwimutsya ekyeshongoro nibateera amakondere n’ebitaasa n’ebindi bintu ebirikugamba,’ ekitiinisa kya Yehova ‘kikaijura enju ye.’ Omukoro ogu ka gushemereire kuba gwahamize okwikiriza kw’Abaisraeli!​—2 Obusingye 5:13, 14; 7:6.

6. Nehemia akakora ntebeekanisa ki z’okweshongora obu yaabaire ari omwebembezi omuri Yerusaalemu?

⁶ Nehemia, owaatebeekaniise Abaisraeli kugaruka kwombeka Yerusaalemu, nawe akatebeekanisa Abaleevi b’okweshongora n’okuteera eby’amaraka. Kandi okweshongora kwabo kukaboneza omukoro gw’okuhayo ebisiika ebyabaire byombekirwe. Nehemia akaba ataireho abeeshongozi b’emiringo ebiri ‘ab’okusiima.’ Abeeshongozi b’emiringo ebiri aba bakagyendera aha mutwe gw’ebisiika aha mbaju ibiri kuhitsya obu baabugaine haihi n’omwanya gwa hekalu. Amaraka gaabo gakaba nigahurirwa munonga kubaasa kuhurirwa n’abantu abari hare. (Nehemia 12:27, 28, 31, 38, 40, 43) Yehova aine kuba yaashemereirwe buzima kureeba abaheereza be nibeeshongora n’omuhimbo barikumuhimbisa.

7. Yesu akooreka ata ngu Abakristaayo baine kutwara okweshongora nk’ekintu kikuru omu kuramya?

⁷ Obu Yesu yaabaire ari omu nsi, okweshongora kukagumizamu kuri ekicweka kikuru eky’okuramya okw’amazima. Teekateeka aha kyabaire aha mukoro mukuru omu byafaayo by’abantu. Yesu ku yaaherize kutandikaho Omukoro gw’Ekiijutsyo ari n’abeegi be, bakeeshongora ebyeshongoro by’okuhimbisa Yehova.​—Shoma Matayo 26:30.

8. Abakristaayo b’okubanza bakatuteeraho ky’okureeberaho ki eky’okuhimbisa Ruhanga barikweshongora?

⁸ Abakristaayo b’okubanza bakatuteeraho eky’okureeberaho kirungi ky’okuhimbisa Ruhanga kurabira omu kweshongora. Okutashushana n’Abaisraeli abaabaire baza omu hekalu kuramya Yehova, bo bakaba nibateeranira omu maka g’ab’eishe-emwe. N’obu amaka ago garaabe gaabaire gatari marungi munonga nka hekalu, nabwo ab’eishe-emwe bakaba beeshongora n’omuhimbo. Nangwa na Paulo akagambira Abakristaayo bagyenzi be ati: ‘Mwegyesane, muhanane omu bwengye burungi bwona nimweshongorera Ruhanga zaaburi n’ebyeshongoro n’ebyevugo by’omwoyo, nimumuhimbisa omu mitima yaanyu.’ (Abakolosai  3:16) Ebyeshongoro ebiri omu kitabo kyaitu ky’ebyeshongoro twine kubyeshongora turikuhimbisa nari turikusiima. Ni bimwe aha by’okurya by’omwoyo ebi ‘omwambari omwesigwa kandi ow’obwengye’ arikutuha “omu bunaku obuhikire.”​—Matayo 24:45.

9. (a) Ahabw’enki abamwe nibeeziringa kweshongora n’omuhimbo baaba bari omu nteerane z’ekibiina nari empango? (b) Twine kweshongorera Yehova tuta, kandi ni baahi abaine kwebembera omu nshonga egi? (Reeba ekishushani aha kutandika.)

⁹ Ni nshonga ki ezirikukureetera kweziringa kweshongora? Obundi ekicweka kyanyu nari eka yaawe tibarikukira kweshongora. Nari nookira kuhurikiza abeeshongozi barungi aha radiyo nari aha TV, kandi ku orikwegyeragyeranisa nabo, oreeba ngu ori omweshongozi mubi. Kwonka, ekyo tikishemereire kukuremesa obujunaanizibwa bwawe obw’okuhimbisa Yehova kurabira omu kweshongora. Omu mwanya gw’ekyo, kwatira ekitabo kyawe ky’ebyeshongoro omu mwanya, oimutsye omutwe gwawe, reero oyeshongore n’omuhimbo! (Ezera 3:11; shoma Zaaburi 147:1.) Omu Byombeko by’Obukama ebingi, ebigambo by’ebyeshongoro nibyorekwa aha kyoma, kandi eki nikituhwera omu kweshongora. Nikishemeza n’okumanya ngu hati n’omu Ishomero ry’Obuheereza bw’Obukama ery’abareeberezi nibeeshongora. Eki nikyoreka ngu ni kikuru abareeberezi kwebembera omu kweshongora omu nteerane z’ekibiina.

10. Tushemereire kwijuka ki twaba nitutiina kweshongora n’eiraka rihango?

¹⁰ Baingi nibatiina kweshongora n’eiraka rihango ahakuba nibateekateeka ngu eiraka ryabo niriija kukira ag’abandi nari ngu ti rirungi. Kwonka, teekateeka ahari eki. ‘Twena nitushobya omuri bingi’ twaba nitugamba, kwonka eki tikirikutuzibira kugamba. (Yakobo 3:2) N’ahabw’ekyo titushemereire  kwikiriza amaraka gaitu agatahikiriire kuturemesa kuhimbisa Yehova.

11, 12. Nitubaasa kuboneza tuta omuringo ogu turikweshongoramu?

¹¹ Obundi nitutiina kweshongora ahabw’okuba titurikumanya oku twine kweshongora. Kwonka hariho ebintu byorobi ebi turikubaasa kukora kutuhwera kuboneza omuringo ogu turikweshongoramu. *​—Reeba obugambo obw’ahansi.

¹² Noobaasa kweshongora n’eiraka rihango kandi rirungi waayega kwitsya gye. Nk’oku amashanyarazi garikuha etaara amaani ekaaka gye, nikwo n’omwitsyo gwawe gurikuhwera eiraka ryawe waaba nooyeshongora. Oshemereire kweshongora n’eiraka rihango nk’oku orikuba noogamba nari n’okukiraho. (Reeba obuhabuzi omu kitabo Benefit From Theocratic Ministry School Education, orupapura 181 kuhika 184, ahansi y’omutwe ‘Koresa Gye Omwoya ogu Orikutaatsya Omunda.’) Kandi Baibuli obumwe neegambira abaheereza ba Yehova kweshongora n’eiraka rihango ‘ery’okushemererwa.’​—Zaaburi 33:1-3.

13. Shoboorora oku orikubaasa kweshongora oine obumanzi.

¹³ Omu kuramya kw’eka nari waaba ori wenka teeraho kukora ebi: Toorana kimwe aha byeshongoro ebirikukushemeza omu kitabo kyaitu ky’ebyeshongoro. Shoma ebigambo byakyo n’eiraka rihango, ery’amaani. Reero orikukoresa eiraka eryo, gamba ebigambo birikukuratana ebiine amakuru otahindwirwe omwitsyo. Bwanyima, yeshongore ebigambo ebyo omu eiraka rihango. (Isaaya 24:14) Eki nikiija kureetera eiraka ryawe kweyongyera kuba ery’amaani, kandi eki ni kirungi. Eki tikishemereire kukutiinisa nari kukumaramu amaani!

14. (a) Omu kweshongora okwashamya munonga akanwa nikibaasa kuhwera kita? (Reeba akabokisi “ Boneza oku Orikweshongora.”) (b) Waaba otaine eiraka rirungi, ni buhabuzi ki obu oshangire burikuhwera?

¹⁴ Kubaasa kweshongora n’eiraka rihango, oine kwashamya munonga akanwa kaawe. N’ahabw’ekyo waaba nooyeshongora, yaashamya akanwa kaawe kukira oku orikukaashamya waaba noogamba. Kwonka shi noobaasa kukora ki waaba oine akaraka kakye nari waaba oine akaraka k’ahaiguru? Noija kureeba obuhabuzi burungi omu kabokisi ‘Okusingura Oburemeezi Obumwe,’ omu kitabo Benefit From Theocratic Ministry School Education, orupapura 184.

15. (a) Omu 2016 aha ruteerane orwa buri mwaka orw’Abajurizi ba Yehova bakaranga ki? (b) Ni nshonga ki ezaareeteire kuhinduramu omu kitabo kyaitu ky’ebyeshongoro?

¹⁵ Buri omwe owaabaire ari aha ruteerane rwa buri mwaka orw’Abajurizi ba Yehova omu 2016 akashemererwa obu Ow’eishe-emwe Stephen Lett ow’Akakiiko Akareeberezi yaaranga ekitabo kisya eky’ebyeshongoro “Sing Out Joyfully” to Jehovah. Nk’oku ow’eishe-emwe Lett yaashobooroire, enshonga emwe eyaareeteire twatunga ekitabo kisya n’ahabw’empindahinduka ezaakozirwe omu Baibuli eya New World Translation of the Holy Scriptures. Ebigambo ebimwe bikahindurwa kuhikaana na New World Translation ehindwirwemu. Ekindi, ebyeshongoro ebisya ebirikukwata aha kubuurira n’ekitambo bikongyerwamu. Okwongyera ahari ekyo, ahabw’okugira ngu okweshongora n’ekicweka kikuru eky’okuramya kwaitu, Akakiiko Akareeberezi kakaba nikeenda ngu tugire ekitabo ky’ebyeshongoro ekiri aha mutindo. N’ahabw’ekyo ekipampagare ekya New World Translation n’eky’ekitabo ky’ebyeshongoro nibishushanisa.

16, 17. Ni mpindahinduka ki ezindi eziri omu kitabo kyaitu ky’ebyeshongoro ekisya?

¹⁶ Ebyeshongoro ebirikukwata aha nshonga emwe nibikuratana kubaasisa ekitabo kyaitu kworoba kukoresa. Nk’eky’okureeberaho, ebyeshongoro 12 ebirikubanza nibikwata ahari Yehova, ebirikukurataho 8 nibikwata ahari Yesu n’ekitambo, n’ebindi bityo.  Emitwe y’ebyeshongoro n’oku erikukuratana biri aha kutandika omu kitabo kyaitu ky’ebyeshongoro. Eki nikibaasa kuhwera na munonga ow’eishe-emwe yaaba naayenda kutoorana ekyeshongoro ky’orubazo rwe.

¹⁷ Kubaasa kuhwera buri omwe kweshongora ayihire aha mutima, ebigambo ebimwe bikahindurwa kubaasa kushoronzya gye obutumwa bw’ebyeshongoro. Ebigambo ebitarikukira kukoresibwa nk’ekigambo “barya” kikahiinganisibwa na nibaija. Nikyo kimwe, n’ekyeshongoro ekiine omutwe “okugumira okubonabona” kikahindurwa kyaba “Gira Okugumisiriza,” kandi n’ebigambo byakyo bikahindurwamu. Kandi kikaba nikyetengyesa kuhindura omutwe gw’ekyeshongoro “Rinda Omutima Gwawe” ekyabaire kiri nk’ekiragiro. Kikahindurwa kyaba “Niturinda Emitima Yaitu.” Ahabw’enki? Enyima, omuntu ku abaire naaba naayeshongora ebigambo by’ekyeshongoro eki oshusha ngu naagambira ondiijo eky’okukora. Eki nikibaasa kureetera abasya, abato, n’abanyaanyazi-itwe abari omu nteerane z’ekibiina, n’empango kwehurira kubi. N’ahabw’ekyo omutwe gwakyo n’ebigambo byakyo bikahindurwa.

18. Ahabw’enki twine kwega ebyeshongoro ebiri omu kitabo kyaitu ekisya? (Reeba obugambo obw’ahansi.)

¹⁸ Ebyeshongoro bingi ebiri omu “Sing Out Joyfully” to Jehovah biri omu muringo gw’okushaba. Ebyeshongoro ebi nibibaasa kukuhwera kugambira Yehova oku orikwehurira. Ebyeshongoro byaitu ebindi nibituhwera “kukundana n’okukora ebirungi.” (Abaheburaayo 10:24) Tushemerere kuteeraho kumanya amaraka g’ebyeshongoro byaitu, ebigambo byabyo, n’oku birikusheneneka. Omuringo gumwe ogu orikubaasa kukoramu eki, n’okuhurikiza amaraka g’ab’eishe-emwe na banyaanyazi-itwe agakwatsirwe. Amaraka aga gari aha jw.org. Waayegyeza omu byeshongoro okiri omuka, noija kwega kubyeshongora oine obumanzi kandi orikworeka enyehurira. *​—Reeba obugambo obw’ahansi.

19. Twena omu kibiina nitubaasa kwejumba tuta kuramya Yehova?

¹⁹ Ijuka ngu okweshongora n’ekicweka kikuru eky’okuramya kwaitu. N’omuringo gumwe mukuru ogu turikworekamu ngu nitukunda Yehova, kandi ngu nitusiima byona ebi atukoreire. (Shoma Isaaya 12:5.) Ku orikweshongora n’omuhimbo, noohiga abandi kukora nikyo kimwe. Boona omu kibiina, abakuru, abato nari abasya, nibabaasa kuramya Yehova omu muringo ogu. N’ahabw’ekyo oteeziringa kweshongora oyihire aha mutima. Yorobera obuhabuzi bw’omuhandiiki wa zaaburi obu: “Mweshongorere” Yehova! Buzima, yeshongore oshemereirwe!​—Zaaburi 96:1.