1, 2. (a) Abaheereza ba Ruhanga baine ekihika ky’okutunga kihembo ki? (b) Niki ekirikutuhwera kuguma tutaire amaisho aha kihembo? (Reeba ekishushani aha kutandika.)

ABAKRISTAAYO abashukirweho amajuta baine amatsiko g’omuhendo. Baine ekihika ky’okutuura omu iguru. Entumwa Paulo akeeta amatsiko aga ‘ekihembo eky’okweta kwa Ruhanga okw’okuza omu iguru.’ (Abafilipi 3:14) Ku baraaze omu iguru nibaija kutegyeka na Yesu Kristo omu Bukama bwe, kandi bakore nawe kuhwera abantu kuba abahikiriire. (Okushuuruurwa 20:6) Aga ka n’amatsiko g’omuhendo! Ab’entaama ezindi baine ekihika ky’okutunga ekihembo ky’omutaano. Baine amatsiko g’okutuura omu Paradiso omu nsi ebiro byona, kandi amatsiko ago nigabareetera okushemererwa okwabuzima!​—2 Petero 3:13.

² Paulo akaba naayenda kuhwera Abakristaayo bagyenzi be abashukirweho amajuta kuguma bari abeesigwa reero bakasingura ekihembo. Akabagira ati: “Mute omutima aha by’omu iguru.” (Abakolosai 3:2) Bakaba baine kuta omutima aha  amatsiko gaabo g’omuhendo ag’okuza omu iguru. (Abakolosai 1:4, 5) Okuteekateeka aha migisha ya Yehova nikihwera abaheereza ba Ruhanga boona kuguma bahangire amaisho gaabo ekihembo. Eki nikikorwa boona yaaba baine amatsiko g’okuza omu iguru nari ag’okutuura omu nsi.​—1 Abakorinso 9:24.

3. Paulo akarabura Abakristaayo ahari ki?

³ Kandi Paulo akarabura Abakristaayo aha kabi akarikubaasa kubaremesa kutunga ekihembo. Nk’eky’okureeberaho, akahandiikira Abakolosai aha bikwatiraine n’Abakristaayo b’ebishuba abaabaire nibateeraho kushemeza Ruhanga, kwonka barikukuratira Ebiragiro bya Musa omu mwanya gw’okwikiririza omuri Kristo. (Abakolosai 2:16-18) Paulo akagamba n’aha buremeezi oburiho hati oburikubaasa kuturemesa kutunga ekihembo. Akashoboorora oku turikubaasa kwetantara ebyetengo bibi n’oku turikubaasa kushoboorora obutaikirizana omu maka gaitu, nari n’ab’eishe-emwe omu kibiina. Obuhabuzi bwa Paulo obw’omuhendo nibubaasa kutuhwera hati. Ka tushwijume okurabura okumwe oku turikushanga omu baruha ye ei yaahandiikiire Abakolosai.

4. Ahabw’enki ebyetengo bibi birikubaasa kuturemesa kutunga ekihembo?

⁴ Bwanyima ya Paulo kwijutsya ab’eishe-emwe bagyenzi be amatsiko g’omuhendo, akahandiika ati: “Mwite eby’ensi ebiri omu ngingo zaanyu, obushambani, ebihagaro, okurigira okubi, okwetenga okubi,” n’omururu. (Abakolosai 3:5) Ebyetengo bibi nibibaasa kuba eby’amaani kandi bitureetere kufeerwa omukago gwaitu na Yehova n’amatsiko gaitu g’ebiro by’omumaisho. Ow’eishe-emwe omwe owaakuratiire ebyetengo bye bibi, reero bwanyima akagaruka omu kibiina naagira ngu ebyetengo ebi bikaba eby’amaani kyamureetera “kuhitsya obu yaashangire ngu tikyakibaasika” kubyetantara.

5. Nitubaasa kwerinda tuta embeera z’akabi?

⁵ Twine kuba abeegyendesereza na munonga twaba turi omu mbeera erikubaasa kutureetera kuhenda emitindo ya Yehova erikukwata aha micwe. Nk’eky’okureeberaho, kuruga aha kutandika nikiba kiri eky’obwengye omwojo n’omwishiki abarikweriima kutaho obugarukiro aha bintu nk’okukwatana, okunywegyera, n’okwehereera bonka. (Enfumu 22:3) Kandi nihabaasa kubaho embeera ezindi ez’akabi ow’eishe-emwe nari munyaanyazi-itwe yaaba ari aha rugyendo rw’omurimo nari yaaba naakora n’ou atarikushushanisa nawe obuhangwa. (Enfumu 2:10-12, 16) Noobaasa kukora ki kwerinda? Manyisa abandi ngu ori Omujurizi wa Yehova. Guma nootwaza gye, kandi otakaayebwa ngu okuzaanazaana n’ou otarikushushanisa nawe obuhangwa nikirugamu akabi. Kandi oine n’okwegyendesereza waaba ogwirwe kubi nari oine eihamba. Nitubaasa kwenda ngu omuntu atureetere kwehurira ngu nitukundwa. Nitubaasa kwehwa amatsiko munonga, twikirize buri omwe kutufaho. Eki n’eky’akabi. Ku oraabe orayehuriireho otyo, otakora ekintu kyona ekirikubaasa kukuremesa kutunga ekihembo. Sherura obuhwezi ahari Yehova n’ab’eishe-emwe.​—Shoma Zaaburi 34:18; Enfumu 13:20.

6. Tushemereire kwijuka ki twaba nitutoorana eby’okweshemeza?

⁶ Kubaasa kwita ebyetengo bibi, nituba twine kwetantara eby’okweshemeza ebibi. Ebiro ebi, eby’okweshemeza ebingi nibitwijutsya oku embeera zaabaire ziri omu Sodoma  na Gomora. (Yuda 7) Abarikushohoza eby’okweshemeza nibareebekyesa okuteerana okugwire nk’ekya butoosha nari nk’okutari kw’akabi. N’ahabw’ekyo twine kwegyendesereza butoosha. Titushemereire kwikiriza buri by’okweshemeza ebiri omu nsi egi. Omu mwanya gw’ekyo, twine kutoorana eby’okweshemeza ebitarikuturemesa kutunga ekihembo ky’amagara.​—Enfumu 4:23.

7. Ni buremeezi ki oburikubaasa kuba omu kibiina Ekikristaayo?

⁷ Nitushemererwa kuba omu kibiina Ekikristaayo. Omu nteerane nitwega Ekigambo kya Ruhanga, kandi nitusiima n’oku turikuhwerahwerana. Eki nikituhwera kuguma tutaire amaisho aha kihembo. Kwonka obumwe nihabaho obutaikirizana oburikureeta oburemeezi ahagati y’ab’eishe-emwe. Twaba tutashobooroire oburemeezi obu, nibubaasa kurugamu okugirirana enziika.​—Shoma 1 Petero 3:8, 9.

8, 9. (a) Ni mitwarize ki erikutuhwera kwija kutunga ekihembo? (b) Niki ekirikubaasa kutuhwera kurinda obusingye Omukristaayo mugyenzi waitu yaatugwisa kubi?

⁸ Titurikwenda kwikiriza enziika kuturemesa kutunga ekihembo. Paulo akashoboorora eki Abakristaayo baine kukora ati: “Nk’oku muri abaatoorainwe Ruhanga, abarikwera kandi abarikukundwa, mujware omutima gw’esaasi, embabazi, okutwaza gye, obucureezi n’okugumisiriza, nimugumisiririzana; kandi ku haraabe hariho oine eki arikufa na mugyenzi we, musaasirane; nk’oku” Yehova “yaabasaasiire, mube nikwo mwatwaza. Kandi okwongyera ahari ebyo byona, mujware okukunda, nikwo kukomerana byona bikakwatanisibwa kimwe.”​—Abakolosai 3:12-14.

⁹ Rukundo n’embabazi nibibaasa kutuhwera kusaasira abandi. Omuntu yaaba atukozire kubi ahabw’ebi agambire nari akozire, nitubaasa kwijuka ngu naitwe haine obu twagamba nari tukakora ekintu kikagwisa kubi abandi kandi bakatusaasira. Ka twasiimire rukundo yaabo n’embabazi! (Shoma Omubuurizi 7:21, 22.) Nitushemererwa kureeba ngu Kristo naagirira embabazi abaheereza ba Ruhanga abagaita hamwe. (Abakolosai 3:15) Twena nitukunda Ruhanga omwe, nitubuurira obutumwa bumwe, kandi twine oburemeezi bwingi oburikushushana. Twaba twine embabazi na rukundo kandi turikusaasira abandi, ekibiina nikigira obumwe, kandi nikiija kukuguma kitaire omutima aha kihembo.

10, 11. (a) Ahabw’enki eihari riri ery’akabi? (b) Nitubaasa kuhamya tuta ngu eihari tiryaturemesa kwija kutunga ekihembo?

¹⁰ Eihari niribaasa kuturemesa kutunga ekihembo. Eby’okureeberaho ebiri omu Baibuli nibyoreka oku eihari riri ery’akabi. Nk’eky’okureeberaho, Kaini akagirira Abeeli eihari yaamwita. Kora, Dasani, na Abiraamu bakagirira Musa eihari kandi baamugomera. Omugabe Saulo akagirira Daudi eihari kandi yaateeraho kumwita. Eki Ekigambo kya Ruhanga kirikugamba buzima kihikire: “Ahu eihari n’okweyendeza biri, niho haba okurabanamu n’okukora kubi kwona.”​—Yakobo 3:16.

¹¹ Twateeraho kugira rukundo n’embabazi, titurikwija kurahuka kugira eihari. Ekigambo kya Ruhanga nikigira kiti: “Okukunda kugumisiriza, kugira embabazi; okukunda tikugira eihari.” (1 Abakorinso 13:4) Kubaasa kuhamya ngu titwagira eihari, twine kuteeraho kureeba ebintu nk’oku Yehova arikubireeba. Twine kureeba ab’eishe-emwe nk’ebicweka by’omubiri gumwe, nikyo kibiina.  Baibuli neegira eti: “Orugingo rumwe ku ruheebwa ekitiinisa, engingo zoona zishemerererwa hamwe.” (1 Abakorinso 12:16-18, 26) Ow’eishe-emwe yaatunga ekintu kirungi, nitushemererwa nawe omu mwanya gw’okugira eihari. Teekateeka aha ky’okureeberaho kirungi kya mutabani wa Saulo orikwetwa Yonasaani. Taragizire eihari obu Daudi yaatooranwa kuba omugabe omu mwanya gwe. Nangwa akagumya Daudi kandi yaamushagika. (1 Samueli 23:16-18) Mbwenu shi nitubaasa kugira embabazi na rukundo nka Yonasaani?

12. Ni buhabuzi ki oburi omu Baibuli oburikubaasa kuhwera eka yaanyu kutunga ekihembo?

¹² Buri omwe omu ka yaagyendera aha misingye ya Baibuli, eka neebamu obusingye n’okushemererwa kandi neija kutunga ekihembo. Paulo akaha amaka obuhabuzi bw’obwengye obu: “Imwe abakazi, mworobere baabaroimwe nk’oku kishemereire omuri Mukama. Imwe abashaija, mukunde abakazi baanyu, murekye kubaitsa omwaga. Imwe abaana, mworobere abazaire baanyu omuri byona; ahakuba ekyo nikyo kishemeza Mukama. Imwe baishebo, mutagwisa kubi abaana baanyu, barekye kuhahaara emitima.” (Abakolosai 3:18-21) Nooreeba oku obuhabuzi obu burikubaasa kuhwera eka yaanyu?

13. Omukazi Omukristaayo naabaasa kuhwera ata iba otari Mukristaayo kwenda kuheereza Yehova?

¹³ Obundi noobaasa kuba ori munyaanyazi-itwe oine baro otarikuheereza Yehova. Noija kukora ki waaba nooteekateeka ngu tarikukutwariza gye? Noobaasa kugira ekiniga kandi otongane nawe. Kwonka shi ekyo nikiteereza embeera? Nangwa n’obu yaakusingura entongane ezo, mbwenu shi nooba waamureetera kwenda kuheereza Yehova? Obundi ngaaha. Kwonka waamuha ekitiinisa  ahabw’omwanya gwe nk’omutwe gw’eka, noobaasa kuhwera eka yaawe kwongyera kugira obusingye, kandi ekyo nikihaisa Yehova ekitiinisa. Eky’okureeberaho kyawe kirungi nikibaasa kureetera baro kwenda kuheereza Yehova, reero mwembi musingure ekihembo.​—Shoma 1 Petero 3:1, 2.

14. Omushaija Omukristaayo aine kukora ki omukazi owe otari Mukristaayo yaaba atarikumuha ekitiinisa?

¹⁴ Nari obundi ori ow’eishe-emwe kandi omukazi waawe tarikuheereza Yehova. Noobaasa kukora ki waaba nooteekateeka ngu omukazi waawe tarikukuha ekitiinisa? Mbwenu shi ku oraabe noomworeka ngu niiwe mukuru orikumugambira kubi, noogira ngu naija kukuha ekitiinisa? Ngaaha buzima! Ruhanga naayenda ngu obe omushaija oine rukundo, kandi orikutooreza Yesu. (Abaefeso 5:23) Yesu, omutwe gw’ekibiina, butoosha naagumisiriza kandi aine rukundo. (Luka 9:46-48) Waatooreza Yesu, omu bwire butari bwa hare omukazi waawe nawe naabaasa kwenda kuheereza Yehova.

15. Omushaija Omukristaayo naayoreka ata ngu naakunda omukazi we?

¹⁵ Yehova naaragiira abashaija ati: “Mukunde abakazi baanyu, murekye kubaitsa omwaga.” (Abakolosai 3:19) Omushaija oine rukundo naaha omukazi we ekitiinisa. Mu muringo ki? Naahurikiza ebiteekateeko by’omukazi we, kandi amuhamiza ngu ebi arikugamba n’eby’omugasho. (1 Petero 3:7) N’obu omushaija araabe atarikukora buri kimwe eki omukazi arikumushaba, yaahurikiza ebi omukazi we arikugamba nibibaasa kumuhwera kucwamu gye. (Enfumu 15:22) Omushaija oine rukundo tarikugambira omukazi we ngu amuhe ekitiinisa. Omu mwanya gw’ekyo, naakora ebirikureetera omukazi kumuha ekitiinisa. Omushaija yaakunda omukazi we n’abaana, nibabaasa kushemererwa hamwe barikuheereza  Yehova, kandi boona hamwe nibabaasa kwija kutunga ekihembo ky’amagara agatahwaho.

16, 17. Waaba ori omunyeeto noobaasa kwetantara ota kugirira abazaire baawe ekiniga?

¹⁶ Obundi shana ori omunyeeto orikuteekateeka ngu abazaire baawe tibarikukwetegyereza nari ngu nibataho amaremesa. Eki nikibaasa kukugwisa kubi munonga, kikureetere kwebuuza yaaba nooyenda kuheereza Yehova. Kwonka waaruga ahari Yehova, nibwo orikwija kumanya ngu omu nsi tiharimu n’omwe orikukunda nk’oku abazaire baawe Abakristaayo n’abandi omu kibiina barikukukunda.

¹⁷ Teekateeka ahari eki: Ku ogire ngu abazaire baawe tibarikukuhabura, okaamanyire ota yaaba nibakufaho? (Abaheburaayo 12:8) N’amazima tibahikiriire, n’ahabw’ekyo omuringo ogu barikukuhanamu nigubaasa kukugwisa kubi. Kwonka otata omutima ahari ekyo. Omu mwanya gw’ekyo, teeraho kwetegyereza ahabw’enki nibatwaza batyo. Guma oikaikaine, kandi teeraho kwetantara kurahuka kugira ekiniga. Ekigambo kya Ruhanga nikigira kiti: “Oyetwara omu kugamba aba ow’obwengye, kandi ow’omutima gutuurize aba omuntu orikwetegyereza.” (Enfumu 17:27) Taho ekigyendererwa ky’okuba omuntu mukuru orikwikiriza kuhaburwa, kandi ogire eki waayega n’obu waakuhaburwa mu muringo ki. (Enfumu 1:8) Toshemereire kwebwa ngu okugira abazaire abarikukunda Yehova n’ekiconco ky’omuhendo. Nibaba nibenda kukuhwera kugumaho ebiro byona.

18. Ahabw’enki omaririire kuguma otaire amaisho gaawe aha kihembo?

¹⁸ Yaaba twine amatsiko g’okutunga amagara agatahwaho omu iguru nari omu nsi, buri omwe ahariitwe naabaasa kugirira ekihika ebiro birungi eby’omumaisho. Amatsiko gaitu n’agaabuzima. Nigeegamira aha ki Omuhangi yaagambire aha nsi ngu okumanya Yehova ‘nikwija kubuga ensi yoona.’ (Isaaya 11:9) Omu bwire butari bwahare, buri omwe omu nsi naija kwegyesibwa Yehova. Eki n’ekihembo eki tuhikire kukoreerera. N’ahabw’ekyo, guma noijuka ekiraganiso kya Yehova, kandi otaikiriza ekintu kyona kukuremesa kutunga ekihembo ekyo!