1, 2. (a) Yesu akaba naatwara ata Ebiragiro bya Ruhanga? (b) Abahandiiki n’Abafarisaayo bakakoresa bata Ebiragiro omu muringo ogugwire?

YESU akaba naakunda Ebiragiro bya Musa. Ekyo tikirikututangaaza ahakuba Ebiragiro ebyo bikaruga ahari Ishe, Yehova, ou yaabaire naatwara nka mukuru. Zaaburi 40:8, nihooreka oku Yesu yaabaire naakunda ebiragiro bya Ruhanga hati: “Ninshemerererwa okukora ebi okunda, ai Ruhanga wangye; ebiragiro byawe biri omu mutima gwangye.” Kurugiirira aha bi Yesu yaagambire n’ebi yaakozire akahamya ngu Ebiragiro bya Ruhanga bihikiriire, n’eby’omugasho, kandi ngu buzima nibiija kuhikiirira.​—Matayo 5:17-19.

² Yesu ashemereire kuba yaayehuriire kubi ku yaareebire Abahandiiki n’Abafarisaayo nibakoresa Ebiragiro bya Ishe omu muringo gugwire. Akabagira ati: “Muganura kimwe kya ikumi ky’eshogi, na anisi, na kumino,” ekirikumanyisa ngu bakaba nibegyendesereza kworobera obushonshorekye bukye omu Biragiro. Mbwenu shi oburemeezi bukaba buri nkahi? Yesu akashoboorora ati: ‘Kwonka mutsigaho ebigambo bikuru eby’omu biragiro, nk’okucwa emanja ez’amazima, n’embabazi,’ n’obwesigwa.  (Matayo 23:23) Abafarisaayo tibarareebire amakuru g’Ebiragiro, kandi bakaba nibateekateeka ngu nibakira abandi. Kwonka Yesu we akeetegyereza ekigyendererwa ky’Ebiragiro n’oku buri kiragiro kyabaire nikyoreka emitwarize ya Yehova.

3. Nituza kugaaniira ahari ki omu kicweka eki?

³ Abakristaayo titurikutegyekwa Ebiragiro bya Musa. (Abarooma 7:6) Mbwenu shi ahabw’enki Yehova yaataire Ebiragiro omu Kigambo kye Baibuli? Naayenda ngu twetegyereze ebiragiro, reero tugyendere aha ‘nshonga nkuru,’ ekirikumanyisa emisingye eri omu Biragiro bye. Nk’eky’okureeberaho, ni misingye ki ei turikwega omu ntebeekanisa y’endembo z’okuhungiramu? Omu kicweka ekihwaire, twegire eki omuntu ohungire yaabaire aine kukora. Omu kicweka eki, nituza kwega eki endembo z’okuhungiramu zirikutwegyesa ahari Yehova n’oku turikubaasa kutooreza emitwarize ye. Nituza kugarukamu ebibuuzo bishatu: Endembo z’okuhungiramu nizooreka zita ngu Yehova aine embabazi? Nizitwegyesa ki aha ku Yehova arikutwara amagara? Kandi nizooreka zita oburingaaniza bwe obuhikiriire? Twaba nitugarukamu ebibuuzo ebi, teeraho kureeba oku orikubaasa kutooreza Sho ow’omu iguru.​—Shoma Abaefeso 5:1.

4, 5. (a) Hakateebwaho ntebeekanisa ki kuhwera orikuhunga kurahuka kuhika omu rurembo rw’okuhungiramu, kandi ahabw’enki? (b) Eki nikitwegyesa ki ahari Yehova?

⁴ Endembo mukaaga ez’okuhungiramu zikaba ziri omu myanya eyorobi kuhikamu. Yehova akagambira Abaisraeli kutoorana endembo ishatu ahari buri rubaju rw’Omugyera Yorudaani. Ahabw’enki? Kugira ngu orikuhunga kimworobere kuhika omuri rumwe aha ndembo ezi ahonaaho. (Okubara 35:11-14) Enguuto z’okurabamu kuza omu ndembo ezi zikaba nizireebererwa gye. (Eky’Ebiragiro 19:3) Kurugiirira aha mugyenzo gw’Ekiyudaaya, enguuto ezi zikaba ziriho ebyapa kuhwera orikuhunga kuzibona. Ahabw’okugira ngu hakaba hariho endembo z’okuhungiramu omuri Israeli, Omwisraeli ku yaabaire aita omuntu atakigyendereire kikaba kitamwetengyesa kuhungira omu ihanga erindi, obundi akoohibwa kuramya baaruhanga ab’ebishuba.

⁵ Teekateeka ahari eki: Yehova akaba aragiire ngu oraite omuntu nawe aitwe. Kwonka akataho entebeekanisa ngu omuntu yaita mugyenzi we atakigyendereire agirirwe embabazi, asaasirwe, kandi atungye n’oburinzi.  Omwe orikushoboorora aha Baibuli akagira ati: “Buri kimwe kikahandiikwa butunu, kandi kikaba kyorobi munonga nk’oku kirikubaasika.” Yehova ti muramuzi w’omwaga orikusherura emiringo y’okubonerezamu abaheereza be. Omu mwanya gw’ekyo, ‘n’omutungi omu kugira embabazi.’​—Abaefeso 2:4.

6. Abafarisaayo bakaba baine miteekateekyere ki erikutaana n’eya Ruhanga?

⁶ Kwonka Abafarisaayo bakaba batarikwenda kugirira abandi embabazi. Nk’eky’okureeberaho, kurugiirira aha ntwaza y’Abayudaaya, Abafarisaayo bakaba batarikusaasira omuntu yaakora enshobe niyo emwe emirundi eshatu. Yesu kubaasa kworeka oku emiteekateekyere yaabo egwire, akakoresa eky’okureeberaho ky’Omufarisaayo arikushaba ari haihi n’omuhooza. Omufarisaayo akagira ati: “Ruhanga, ninkusiima, ahakuba tindi nk’abantu abandi, abanyagi, abatahikiriire, abashambani, nari nk’omuhooza oriya.” Akaba naamanyisa ki? Abafarisaayo bakaba nibatwara abandi nk’abataine mugasho, kandi bakaba batarikuteekateeka ngu baine kugirirwa embabazi.​—Luka 18:9-14.

7, 8. (a) Nitubaasa kworeka tuta embabazi nk’eza Yehova? (b) Ahabw’enki twine kuba abacureezi kubaasa kusaasira abandi?

⁷ Tooreza Yehova, beitu batari Abafarisaayo. Girira abandi embabazi n’esaasi. (Shoma Abakolosai 3:13.) Yorobeza abandi kukushaba okusaasirwa. (Luka 17:3, 4) Yebuuze oti: ‘Nindahuka kusaasira abandi, n’obu baakunkora kubi emirundi mingi? Nimba nyeteekateekire kugaruraho obusingye n’omuntu onkozire kubi?’

⁸ Kubaasa kusaasira abandi, twine kuba turi abacureezi. Abafarisaayo bakaba nibateekateeka ngu nibakira abandi boona, n’ahabw’ekyo bakaba batarikwenda kusaasira. Kwonka itwe Abakristaayo nitwecureeza tutwara abandi ngu nibatukira, kandi tubasaasira tutataireho obushonshorekye. (Abafilipi 2:3) Nitubaasa kwebuuza tuti: ‘Nintooreza Yehova nyoreka obucureezi?’ Twaba turi abacureezi, nikiija kworobera abandi kutushaba okusaasirwa kandi naitwe kitworobere kubasaasira. Rahuka kugirira abandi embabazi kandi otarahuka kuguubwa kubi.​—Omubuurizi 7:8, 9.

9. Yehova akahwera ata Abaisraeli kwetegyereza ngu amagara n’agarikwera?

⁹ Enshonga emwe y’okutaho endembo z’okuhungiramu n’okurinda Abaisraeli kutagiibwaho orubanja rw’okusheesha eshagama y’omuntu otaine mushango. (Eky’Ebiragiro 19:10) Yehova naakunda amagara, kandi naayanga okwita. (Enfumu 6:16, 17) Ahabw’okugira ngu Yehova ni Ruhanga orikwera kandi oine oburingaaniza, akaba atarikubaasa kwehuzya enshonga y’okwita omuntu otakigyendereire. N’eky’amazima ngu owaabaire aita omuntu atakigyendereire akaba agirirwa embabazi. Kwonka akaba abanza  yaashoboororera abareeberezi embeera ye. Abareeberezi ku baabaire bacwamu ngu akaita mugyenzi we atakigyendereire, akaba aguma omu rurembo rw’okuhungiramu kuhitsya omunyamurwa omukuru yaafa. Ekyo kikaba nikibaasa kumanyisa ngu ohungire naabaasa kuguma omu rurembo orwo ebiro byona eby’amagara ge. Entebeekanisa egi ekaba ehamiza Abaisraeli ngu amagara n’agarikwera. Kubaasa kuha ekitiinisa Obukomooko bw’amagara, bakaba baine kukora kyona ekirikubaasika kwetantara kuta amagara g’ondiijo omu kabi.

10. Kurugiirira ahari Yesu, Abahandiiki n’Abafarisaayo bakooreka bata ngu tibarikufayo aha magara g’abandi?

¹⁰ Abafarisaayo n’Abahandiiki okutashushana na Yehova bo bakooreka ngu bakaba batarikutwara amagara g’abandi nka kikuru. Yesu akabagira ati: “Mukaihaho ekishumuruzo ky’obwengye; imwe ahabwanyu timwataahamu; kandi n’abo abaabaire nibataahamu, mwabazibira!” (Luka 11:52) Yesu akaba naamanyisa ki? Abahandiiki n’Abafarisaayo bakaba bashemereire kushoboororera abandi Ekigambo kya Ruhanga, kandi bakabahwera kutunga amagara agatahwaho. Omu mwanya gw’ekyo, bakateeraho kuzibira abantu kukuratira Yesu, omujwekyerwa Omukuru ‘ow’amagara.’ (Ebyakozirwe 3:15) Omu muringo ogu, bakaba nibeebembera abantu kubahitsya omu kucwekyerera. Abahandiiki n’Abafarisaayo bakaba baine omwetunguuro n’okweyendeza, kandi bakaba batarikufayo aha mbeera z’abantu. Ka baabaire baine omwaga kandi bataine rukundo!

11. (a) Entumwa Paulo akooreka ata ngu naatwara amagara nk’oku Yehova arikugatwara? (b) Niki ekirikwija kutuhwera kugira omujinya nk’ogwa Paulo omu kubuurira?

¹¹ Nitubaasa kutooreza tuta Yehova kandi tukeetantara kuba nk’Abahandiiki n’Abafarisaayo? Nitukora eki twaha amagara ekitiinisa kandi tukagatwara nk’ag’omuhendo. Entumwa Paulo akakora eki arikubuurira abantu baingi amakuru marungi g’Obukama nk’oku arikubaasa. Niyo nshonga ahabw’enki yaabaasize kugira ati: “Ndi mwere ahabw’eshagama y’abantu boona.” (Shoma Ebyakozirwe 20:26, 27.) Mbwenu shi Paulo akabuurira ahabw’okugira ngu akaba atarikwenda kugiibwaho orubanja rw’eshagama y’abantu, nari ahabw’okugira ngu Yehova akamugira ngu aine kukikora? Ngaaha. Akaba naakunda abantu. Akaba naareeba amagara gaabo nk’ag’omuhendo, kandi akaba naayenda ngu batungye amagara agatahwaho. (1 Abakorinso 9:19-23) Naitwe twine kureeba amagara nk’oku Yehova arikugareeba. Naayenda ngu abantu boona beeteise bagumeho. (2 Petero 3:9) Kubaasa kutooreza Yehova, twine kukunda abantu. Twaba twine emiteekateekyere mirungi nitubuurira twine omujinya, kandi nitwija kuba tushemereirwe.

12. Ahabw’enki obwerinzi buri bukuru aha bantu ba Ruhanga?

¹² Kubaasa kureeba amagara nk’oku Yehova arikugareeba, twine kugira emiteekateekyere mirungi aha bwerinzi. Omu kukora n’okuvuga ebiiruka twine kuba abeegyendesereza, nangwa n’obu twakuba nitwombeka nari nituboneza emyanya yaitu y’okuramizamu nari turikuvuga kuzayo. Abantu, obwerinzi, n’amagara butoosha ni bikuru kukira esente nari obwire. Ruhanga waitu butoosha naakora ekihikire, kandi nitwenda kuba nkawe. Na munonga abareeberezi baine kuteekateeka aha burinzi bwabo n’obw’abandi. (Enfumu 22:3) Omureeberezi yaakwijutsya omutindo gw’okwerinda kutahutaara, nyabura ’we muhurikize. (Abagalatia 6:1) Twara amagara nk’oku Yehova arikugatwara, obwo torikwija ‘kugiibwaho orubanja’ rw’eshagama.

13, 14. Abareeberezi ba Israeli bakaba baine kworeka bata oburingaaniza nka Yehova?

¹³ Yehova akaragiira abareeberezi b’Abaisraeli kumutooreza omu kugira oburingaaniza. Eky’okubanza, abareeberezi bakaba baine kutunga obuhame bwona. Bwanyima bakaba baine kumanya ekigyendererwa ky’ogwo oitsire omuntu, emiteekateekyere ye, n’ebikorwa bye eby’enyima kubaasa kucwamu yaaba baraamugirire embabazi. Abareeberezi bakaba baine kumanya yaaba ohungire abaire naayanga ou aitsire, reero akakigyenderera kumwita. (Shoma Okubara 35:20-24.) Haaba hariho abajurizi, kikaba nikyetengyesa ngu haakiri babe bari babiri, baaza kumusingisa orubanja.​—Okubara 35:30.

¹⁴ Abareeberezi bwanyima y’okumanya kyenyine ekibaireho, bakaba baine kuta omutima aha muntu ogwo, beitu kitari eki akozire kyonka. Bakaba baine kukoresa okwetegyereza kureeba ekirikukira aha kirikureebwa butunu, kandi bakareeba n’enshonga ahabw’enki kibaireho. Ekikuru munonga, bakaba baine kuhwerwa omwoyo gurikwera kubaasa kutooreza Yehova omu kugira okwetegyereza, embabazi, n’oburingaaniza.​—Okuruga 34:6, 7.

15. Oku Yesu yaabaire naatwara abasiisi nikutaana kuta n’okw’Abafarisaayo?

¹⁵ Abafarisaayo bakaba batarikucwa emanja z’embabazi. Bakaba nibata omutima aha ki omusiisi akozire omu mwanya gw’okufayo kureeba ni muntu wa muringo ki. Abafarisaayo ku baareebire Yesu naarya eby’okurya omu ka ya Matayo, bakabuuza abeegi be bati: “Ahabw’enki omwegyesa waanyu naarya, kandi naanywa n’abahooza n’abasiisi?” Yesu akagarukamu ati: ‘Abahuriire tibetenga mushaho, kureka abarwaire. Mbwenu mugyende mwegye amakuru g’ekigambo eki ngu, eki ndikwenda n’embabazi, ti bitambo; ahabw’okuba tindaizire kweta bahikiriire, kureka abasiisi.’ (Matayo 9:9-13) Mbwenu shi Yesu akaba naakwatsiza abasiisi? Ngaaha buzima. Akaba naayenda ngu beeteise. Egi ekaba eri enshonga nkuru omu butumwa obu yaabaire naabuurira. (Matayo 4:17) Yesu akeetegyereza ngu bamwe aha ‘bahooza n’abasiisi’ bakaba nibenda kuhinduka. Bakaba batari omu ka ya Matayo ahabw’eby’okurya byonka. Bakaba bariyo ahabw’okugira ngu bakaba bakuratiire Yesu. (Mako 2:15) Eky’obusaasi, Abafarisaayo baingi tibarareebire abantu abo nk’oku Yesu yaabareebire. Bakaba batarikwikiriza ngu nibabaasa kuhinduka, kandi bakaba nibabareeba nk’abasiisi abataine amatsiko goona. Ka baabaire nibataanira kimwe na Yehova oine oburingaaniza n’embabazi!

16. Abarikuba bari aha kakiiko k’emanja z’ekibiina baine kwetegyereza ki?

¹⁶ Obunaku obu, abareeberezi baine kutooreza Yehova orikukunda “eby’oburyo.” (Zaaburi 37:28) Eky’okubanza, baine ‘kukuratiririza enshonga bakagicondoozaho’ kuhamya yaaba omuntu akozire ekibi. Baahamya ngu akikozire, nibakuratira obuhabuzi bwa Baibuli kucwamu eky’okukora. (Eky’Ebiragiro 13:12-14) Abareeberezi abarikuba bari aha kakiiko k’orubanja rw’ogwo okozire ekibi ky’amaani, baine kwegyendesereza kumanya yaaba ayeteisize nari ngaaha. Eki butoosha ti kyorobi kumanya. Okweteisa nikitwariramu oku omusiisi arikureeba eki akozire n’ekiri omu mutima gwe. (Okushuuruurwa 3:3) Omusiisi aine kuba ayeteisize kubaasa kugirirwa embabazi. *​—Reeba obugambo obw’ahansi.

17, 18. Abareeberezi nibabaasa kumanya bata yaaba omuntu ayeteisize? (Reeba ekishushani aha kutandika.)

 ¹⁷ Yehova na Yesu nibaba nibamanya eki omuntu arikuteekateeka kyenyine n’oku arikwehurira ahabw’okugira ngu nibareeba ebiri omu mutima. Kwonka abareeberezi tibarikubaasa kumanya ebiri omu mutima. N’ahabw’ekyo ku oraabe ori omureeberezi, noobaasa kumanya ota yaaba omuntu buzima ayeteisize? Okubanza, shaba Yehova kukuha obwengye n’okwetegyereza. (1 Abagabe 3:9) Ekya kabiri, koresa Ekigambo kya Ruhanga n’ebitabo ebi omwambari omwesigwa kandi ow’obwengye arikutuha, kukuhwera kureeba entaaniso eri ahagati ‘y’okwefuuza okw’ensi’ hamwe “n’okwefuuza okw’omu buryo bwa Ruhanga,” ekirikumanyisa okweteisa okuhikire. (2 Abakorinso 7:10, 11) Teeraho kureeba oku Baibuli erikugamba ahari abo abaabaire beeteisize n’abo abaayangire kweteisa, kandi oyetegyereze oku baabaire nibeehurira, nibateekateeka, n’oku baatwarize.

¹⁸ Ekya kashatu, teekateeka aha muntu, beitu kitari eki akozire kyonka. Ahabw’enki ari ati? Ahabw’enki yaacwiremu atyo? Aine buremeezi ki na bweremwa ki? Baibuli neeyoreka ngu Yesu omutwe gw’ekibiina, “taricwa rubanja rw’amaisho, n’obu rwakuba orw’okugambirwa. Aryacwera abooro emanja omu kuhikiirira n’abacureezi b’omu nsi aryabashoboorora omu bwinganisa.” (Isaaya 11:3, 4) Imwe abareeberezi, Yesu abatooraine kureeberera ekibiina kye, kandi naija kubahwera kucwa emanja omu buringaaniza n’embabazi. (Matayo 18:18-20) Ka twine okushemererwa kwingi ahabw’okugira ngu twine abareeberezi abarikutufaho! Kandi nibatuhwera kugirirana embabazi n’oburingaaniza.

19. Waayega eishomo ki aha bikwatiraine n’endembo z’okuhungiramu eri orikwenda kugyenderaho?

¹⁹ Ebiragiro bya Musa harimu “ebirikumanyisa obwengye n’amazima.” Nibitwegyesa ahari Yehova n’emisingye ye. (Abarooma 2:20) Nk’eky’okureeberaho, endembo z’okuhungiramu ezaabaire nizigambwaho omu biragiro nizeegyesa abareeberezi oku baine kucwa “emanja” z’oburingaaniza, kandi twena nizitwegyesa kugirirana rukundo ‘n’embabazi.’ (Zekaria 7:9) N’obu kiraabe kitarikutwengyesa kukuratira Ebiragiro, Yehova tahindukire. Oburingaaniza n’embabazi na hati bikiri bikuru ahariwe. N’omugisha gw’amaani kuramya Ruhanga oine emitwarize egi. Ka tuteereho kutooreza emitwarize ye mirungi, kandi tumuhindure obuhungiro bwaitu!