1, 2. (a) Ebiri omuri Isaaya 60:22 bihiikirizibwe bita omu bwire obu bw’emperu? (b) Ebiro ebi hariho kyetengo ki omu kicweka eky’omu nsi eky’ekibiina kya Yehova?

“ORIKUKIRA boona obuto aryarugwamu oruganda, n’orikukira boona obukye arugyemu eihanga ry’amaani.” (Isa. 60:22) Obunabi obu buriyo nibuhikiirira omu biro ebi eby’emperu. Omu mwaka gw’obuheereza 2015, ababuurizi b’Obukama 8,220,105 omu nsi yoona nibo baayejumbire omu kubuurira! Ekicweka ekirikuhererukayo eky’obunabi obu kishemereire kukwata ahari buri Mukristaayo, ahabw’okuba Tataitwe ow’omu iguru naagira ati: ‘Niinye Yehova; kandi ndyakirahutsya omu bunaku bwakyo.’ Nk’abantu abari omu motoka eriyo neetandika kwiruka, nitureeba okweyongyera kw’omurimo gw’okuhindura abantu abeegi. Nitutwara tuta okweyongyera kw’omurimo ogu? Mbwenu shi nitukora kyona ekirikubaasika kuba ababuurizi b’Obukama abeeziriki? Ab’eishe-emwe na banyaanyazi-itwe baingi nibashaba kuba baapayoniya ab’obutwire nari abahwezi. Kandi nitushemererwa kureeba baingi nibaza kuheereza ahu ababuurizi b’Obukama barikwetengwa nari nibeejumba omu buheereza obundi.

 ² N’obu kiraabe kiri kityo, ab’okuheereza nibeetengwa munonga. Buri mwaka nihatandikaho ebibiina nka 2,000. Abareeberezi bataano ku baraabe nibo barikuheereza omu buri kibiina ekisya, abaheereza 10,000 nibaba baine kutunguuka kuba abareeberezi buri mwaka. Eki nikimanyisa ngu ab’eishe-emwe baingi baine kuhikiiriza ebirikwetengyesa kuba abaheereza omu kibiina. Kandi, yaaba turi Abakristaayo abashaija nari abakazi, twena twine kugira bingi by’okukora ‘omu murimo gwa Mukama.’—1 Kor. 15:58.

3, 4. Okutunguuka omu by’omwoyo ni kikuru kita ahariiwe?

³ Shoma 1 Timoseo 3:1. Entumwa Paulo akasiima ab’eishe-emwe abaabaire nibatunguuka kuhika aha kuba abareeberezi. Omuntu kubaasa kuhika aha kintu ekimuri hare, nikibaasa kumwetengyesa kuteeraho n’amaani obundi arikukununkirira kukikwata. Hati teekateeka aha w’eishe-emwe orikwenda kutunguuka kuba omuheereza. Naayetegyereza ngu aine kuteeraho kwongyera kugira emitwarize y’Ekikristaayo. Haahinguraho obwire, naba aine amatsiko g’okuheereza nk’omureeberezi. Omu buri mbeera yoona, naakora n’amaani kuhikiiriza ebirikwetengyesa kuhikiiriza obujunaanizibwa obumuhairwe omu kibiina.

⁴ Omu muringo nigwo gumwe, ab’eishe-emwe na banyaanyazi-itwe abarikwenda kuheereza nka baapayoniya, Ababeseeli, nari kuhwera omu kwombeka Ebyombeko by’Obukama, nibateeraho kukununkirira kuhika aha bigyendererwa byabo. Ka tureebe oku Ekigambo kya Ruhanga kirikutuhiga kutunguuka omu kuramya okw’amazima.

5. Eminyeeto nibabaasa kukoresa bata amaani gaabo omu buheereza bw’Obukama?

⁵ Eminyeeto baine amaani g’okukora bingi omu buheereza bwa Yehova. (Shoma Enfumu 20:29.) Eminyeeto abamwe abarikuheereza aha Beseeli nibeejumba omu kuteera za Baibuli n’ebitabo. Eminyeeto abandi nibeejumba omu murimo gw’okwombeka n’okuhunduuza Ebyombeko by’Obukama. Eminyeeto nibakwatanisa n’ab’eishe-emwe abakuru omu by’omwoyo kuhwera abahikirweho ebihikiirizi. Kandi baapayoniya baingi eminyeeto nibahwera kujanjaaza amakuru marungi omu mahanga gaabo n’omu mahanga agandi.

6-8. (a) Omunyeeto omwe akahindura ata aha miteekateekyere ei yaabaire aine aha kuheereza Ruhanga, kandi hakarugamu ki? (b) Nitubaasa ‘kuroza, tuta kureeba’ oku Yehova ari murungi?

⁶ Obundi, nookunda kuheereza Ruhanga n’omutima gwawe gwona. Kwonka shi ku waakuba nooyehurira nk’oku ow’eishe-emwe Aaron yaayehuriire? N’obu araabe yaakuriire omu ka y’Abajurizi ba Yehova, naagira ati: “Enteerane n’okubuurira bikaba nibiintama.” Akaba naayenda kuheereza Ruhanga ashemereirwe kwonka akaba atarikumanya ahabw’enki atashemereirwe. Akakora ki?

⁷ Aaron akataho entebeekanisa y’eby’omwoyo eyaabaire neetwariramu okushoma Baibuli, okutebeekanisiza enteerane n’okugarukamu omu nteerane. Okukira munonga akatandika kushaba butoosha. Ku yaayeyongyeire kukunda Yehova, akatandika kutunguuka omu by’omwoyo. Kuruga obwo, Aaron akaba payoniya, yaakora n’abandi omu kuhwera abahikirweho ebihikiirizi, kandi yaabuurira omu ihanga erindi. Aaron hati n’omureeberezi kandi naaheereza aha Beseeli. Mbwenu shi naayehurira ata ahabw’okucwamu atyo? Naagira ati: “Ndorize kandi naareeba ngu Yehova ni murungi. Ahabw’emigisha ei arikumpa, nimpurira nyine eibanja ahariwe kandi nikimpiga kukora bingi omu buheereza bwe, kandi eki nikirugamu emigisha mingi.”

⁸ Omuhandiiki wa zaaburi akeeshongora ngu abasherura Yehova “tibariburirwa kirungi kyona.” (Shoma Zaaburi 34:8-10.) Buzima,  Yehova tarikubaasa kureebya abo abarikumuheereza n’omujinya. Buri omwe ahariitwe naaroza kandi areeba Yehova ku ari murungi arikukora kyona ekirikubaasika kumuheereza. Kandi twaheereza Ruhanga n’omutima gwaitu gwona, nitutunga okushemererwa okurikukirayo.

9, 10. Ahabw’enki ni kikuru kugira omutwarize ‘gw’okutegyereza’?

⁹ Waaba nooteeraho kuhika aha kigyendererwa kyawe, gira omutwarize ‘gw’okutegyereza.’ (Mik. 7:7) Yehova naashagika abaheereza be abeesigwa, n’obu obumwe araabe naabareka bakategyereza kutunga obujunaanizibwa nari kutahindura embeera ezi barimu. Akaraganisa kuha Abrahamu omwana, kwonka Abrahamu akaba aine kugira okwikiriza n’okugumisiriza. (Heb. 6:12-15) N’obu Abrahamu araabe yaategyereize emyaka mingi Isaaka akabona kuzaarwa, tararuhire kutegyereza, kandi Yehova taramureebize.—Kut. 15:3, 4; 21:5.

¹⁰ Okutegyereza tikyorobi. (Enf. 13:12) Twaguma nituteekateeka ngu batureebize, nitubaasa kuhwamu amaani. Omu mwanya gw’ekyo, nikiba kiri eky’obwengye kukoresa obwire bwaitu kwongyera kuhikiiriza ebirikwetengyesa. Yetegyereze emiringo eshatu ei turikubaasa kukikoramu. 

11. Ni mitwarize ki y’Ekikristaayo ei twine kugira, kandi ahabw’enki ni mikuru?

¹¹ Gira emitwarize y’Ekikristaayo. Twashoma Ekigambo kya Ruhanga kandi tukakiteekateekaho, nitubaasa kugira obwengye, okwetegyereza, okumanya, okwega kucwamu gye, emiteekateekyere mirungi, n’okwerinda. Emitwarize egi ni mikuru ahari abo abarikwebembera omu kuramya kw’amazima. (Enf. 1:1-4; Tit. 1:7-9) Kandi  twashoma ebitabo byaitu, nitubaasa kumanya emiteekateekyere ya Ruhanga aha nshonga nyingi. Buri izooba, nitushanga twine kucwamu aha bikwatiraine n’eby’okweshemeza, enjwara n’endeebeka yaitu, eby’esente, n’okutuurana n’abandi. Twagyendera aha bi turikwega omu Baibuli, nitwija kucwamu ebirikushemeza Yehova.

12. Buri omwe omu kibiina naabaasa kworeka ata ngu n’omwesigwa?

¹² Yoreka ngu nooyesigwa. Yaaba turi Abakristaayo abashaija nari abakazi, twine kukora kyona ekirikubaasika kuhikiiriza obujunaanizibwa obu turikuheebwa. Obu abaheereza ba Ruhanga baabaire nibombeka hekalu, Nehemia akaba naayenda kutoorana abashaija abaraahikiirize obujunaanizibwa butari bumwe na bumwe. Akatoorana baahi? Akatoorana abaabaire nibatiina Ruhanga, barikwesigwa, kandi barikubaasa kuhikiiriza obujunaanizibwa bwabo. (Neh. 7:2; 13:12, 13) N’obunaku obu, ‘ekirikwetengwa aha babiiki n’okuba abeesigwa.’ (1 Kor. 4:2) Ebikorwa birungi buzima nibireebwa.—Shoma 1 Timoseo 5:25.

13. Noobaasa kutooreza ota Yosefu abandi baakutwariza kubi?

¹³ Yesigye Yehova kukureetera kuba oshemeire. Abandi baakutwariza kubi noobaasa kukora ki? Obundi noobaasa kubagambira oku orikwehurira ahonaaho. Kwonka waaguma nooyehozaho kandi orikwangisiriza ngu ohikire, noobaasa kwongyera kureetaho oburemeezi. Beene ishe Yosefu bakamutwariza kubi, kwonka we tarabiikire nziika. Bwanyima, Yosefu akabeehererwa kandi yaatebwa omu kihome. Kwonka, akeesiga Yehova kumwebembera omu bwire bw’oburemeezi. Hakarugamu ki? “Ekigambo kya Mukama kikaguma” nikimureetera kuba oshemeire. (Zab. 105:19) Bwanyima y’okushemezibwa oku, Yosefu akaba aine ebirikwetengyesa kutunga obujunaanizibwa bw’omutaano. (Kut. 41:37-44; 45:4-8) Waaba oine oburemeezi bw’amaani, shaba obwengye, gira eki waakora kandi ogambe n’embabazi, kandi shaba Yehova kukuha amaani. Naija kukuhwera.—Shoma 1 Petero 5:10.

14, 15. (a) Ahabw’enki twine kuguma nitushwijuma emiringo ei turikubuuriramu? (b) Noobaasa kukora mpindahinduka ki kuhikaana n’embeera eziriho? (Reeba ekishushani aha kutandika n’akabokisi “ Oyeteekateekire Kukoresa Omuringo Ogundi?”)

¹⁴ Paulo akahabura Timoseo ati: “Oyezirikye kushomera abantu Ebyahandiikirwe, n’okubuurira, n’okwegyesa. Oyerinde iwe wenka kandi n’omu bi orikwegyesa.” (1 Tim. 4:13, 16) Timoseo akaba ari omubuurizi w’Obukama murungi. Kwonka, akaba naija kwongyera kukora gye omu buheereza bwe yaaguma naata omutima aha bi arikwegyesa. Akaba ataine kuteekateeka ngu abantu nibaija kuguma nibasiima omuringo ogu arikwegyesamu yaaba atahindwiremu. Kubaasa kubahika aha mitima, akaba aine kuhindura aha miringo ei arikwegyesamu kuhikaana n’ebyetengo by’abantu. Naitwe ababuurizi b’Obukama, twine kukora nikyo kimwe.

¹⁵ Twaba nitubuurira enju aha nju obumwe nitukira kushanga abantu batari omu ka. Omu bicweka ebimwe, titurikubaasa kutaaha omu nju zimwe n’ebyombeko ebiriho engo. Kyaba nikwo kiri omu kicweka kyanyu, noobaasa kwejumba omu miringo endiijo ey’okubuurira amakuru marungi.

16. Okubuurira omu myanya erimu abantu baingi nikubaasa kuba kuta kurungi?

¹⁶ Okubuurira omu myanya erimu abantu baingi orikukoresa akagaari nari akameeza n’omuringo murungi gw’okujanjaaza amakuru marungi. Abajurizi ba Yehova baingi batungire ebirungi omu kukoresa omuringo ogu. Nibagira obwire bw’okugaaniira n’abantu omu myanya mingi nk’ah’okukwatira ebiiruka, omu butare, omu myanya y’okuhuumuriramu, n’ahandi ahari abantu baingi. Omujurizi wa Yehova naabaasa kucwamu kutandika kugaaniira n’omuntu arikugamba aha biri omu makuru, arikugamba gye  aha baana be, nari arikubuuza aha bikwatiraine n’omurimo gwe. Omuntu yaakunda kugumizamu naagaaniira, omubuurizi naagamba enshonga eri omu Kyahandiikirwe reero ategyereza kureeba oku omuntu araagarukyemu. Kurugiirira aha ku omuntu arikugarukamu, nibabaasa kweyongyera kugaaniira ahari Baibuli.

17, 18. (a) Noobaasa kwongyera kugira ota obumanzi bw’okubuurira omu myanya erimu abantu baingi? (b) Ahabw’enki ebi Daudi yaagambire birikubaasa kukuhwera waaba nooyejumba omu kubuurira?

¹⁷ Waaba noogumirwa kubuurira omu myanya erimu abantu baingi, otakaahwa amaani. Eddie, payoniya omu rurembo New York, akaba naatiina kubuurira omu myanya erimu abantu baingi. Kwonka, ku haahingwireho obwire, yaagira obumanzi. Niki ekyamuhwereire? Naagira ati: “Omu kuramya kwaitu kw’eka, nyowe n’omukazi wangye nitucondooza kumanya oku turaagarukyemu abarikukira kuhakanisa, n’abo abarikugamba ebitahikire. Nitushaba n’ab’eishe-emwe obuhabuzi.” Hati Eddie naaba aine ekihika ky’okubuurira omu myanya erimu abantu baingi.

¹⁸ Waayega gye obukoryo n’obumanzi bw’okubuurira amakuru marungi, okutunguuka kwawe omu by’omwoyo nikwija kureebwa. (Shoma 1 Timoseo 4:15.) Kandi, hatariho kubanganisa noija kugamba ahari Tataitwe ow’omu iguru nka Daudi owaayeshongoire ngu ndyahimbisa Yehova “ebiro byona; okusingizibwa kwe kuryaguma omu kanwa kangye. Amagara gangye garyayeraatira omuri” Yehova abacureezi bakihurire, beesiime. (Zab. 34:1, 2) Kandi ahabw’okugira ngu nooyejumba omu kubuurira, abacureezi nibaija kushemererwa kukwegaitaho omu kuramya okw’amazima.

19. Ahabw’enki omuheereza wa Yehova omwesigwa aine kushemererwa, n’obu yaakuba ari omu mbeera zigumire? 

¹⁹ Daudi akeeshongora ngu Ai Yehova “ebi waahangire byona biryakuhimbisa, n’abarikwera baawe baryakusingiza. Baryagamba aha kitiinisa ky’obukama bwawe, bagambe aha by’Obushoboorozi bwawe, okumanyisa abantu eby’amaani ebi okora, n’ekitiinisa ky’obukuru bw’Obukama bwawe.” (Zab. 145:10-12) Ebigambo ebyo byona buzima nibyoreka enyehurira z’Abajurizi ba Yehova abeesigwa. Kwonka shi endwara nari bukuru ku byakukuremesa kwejumba gye omu kubuurira? Butoosha guma noijuka ngu waaba noobuurira abarikukureeberera n’abandi, obuheereza bwawe oburikwera nibuba nibuhimbisa Ruhanga waitu. Waaba ori omu kihome ahabw’okwikiriza kwawe, noobaasa kugamba aha amazima nk’oku embeera zirikukubaasisa, kandi ekyo nikishemeza Yehova. (Enf. 27:11) Nikyo kimwe n’abo abari omu ka etari y’Abajurizi ba Yehova, kwonka abarikuhamira aha ntebeekanisa yaabo ey’eby’omwoyo. (1 Pet. 3:1-4) Nangwa n’omu mbeera ezigumire, noobaasa kuhimbisa Yehova kandi otunguukye omu by’omwoyo.

20, 21. Waaba oine obujunaanizibwa bwingi omu kibiina kya Yehova, noobaasa kugasira ota abandi?

²⁰ Yehova naija kukuha emigisha waagumizamu nootunguuka omu by’omwoyo. Obundi waakora empindahinduka nkye omu ntebeekanisa yaawe nari emitwarize yaawe, noobaasa kutunga emigisha mingi y’okuhwera abantu kwega aha biraganiso bya Ruhanga eby’omuhendo. N’ekindi, okutunguuka kwawe omu by’omwoyo n’okwefeerereza kwawe nibibaasa kurugiramu ab’eishe-emwe bagyenzi baawe emigisha mingi. Kandi waaba omucureezi okakora n’obweziriki, abandi omu kibiina nibaija kukukunda, kukusiima, kandi bakushagike.

²¹ Yaaba tumazire emyaka mingi nari ameezi makye turikuheereza Yehova, twena nitubaasa kutunguuka omu kumuramya. Kwonka shi Abakristaayo abakuzire omu by’omwoyo nibabaasa kuhwera bata abasya kutunguuka omu by’omwoyo? Nituza kushwijuma enshonga egyo omu kwega okuraakurateho.