1, 2. (a) Obushwere bukatandika buta? (b) Omushaija n’omukazi ab’okubanza baine kuba baayetegyereize ki aha bushwere? (Reeba ekishushani aha kutandika.)

N’EKYA butoosha abantu kutaaha omu bushwere. Kwonka shi obushwere bukatandika buta, kandi ahabwa kigyendererwa ki? Okumanya ekyo nikiija kutuhwera kugira emiteekateekyere mirungi aha bushwere n’ebirungi ebirimu. Ruhanga bwanyima y’okuhanga omuntu w’okubanza Adamu, akamureetera enyamaishwa zoona ngu azeete amaziina. Kwonka “omuhwezi omushemereire akaba atakabonekire.” N’ahabw’ekyo, Ruhanga akagwejegyeza Adamu obutasisiimuka, yaamwihamu orubaju rumwe, yaaruhangamu omukazi yaamureetera Adamu. (Shoma Okutandika 2:20-24.) Ekirikumanyisa obushwere bukakomooka ahari Ruhanga.

² Yesu akooreka ngu ni Yehova owaagambire ati: “Omushaija nikyo atsigiraho ishe na nyina, akaguma n’omukazi we; nabo bombi bakahinduka omuntu omwe.” (Mat. 19:4, 5) Ahabw’okugira ngu Ruhanga akakoresa orubaju rwa Adamu kuhanga omukazi we Haawa,  bombi baine kuba baareebire ngu baine kuguma kumwe. Hakaba hatariho ntebeekanisa y’okugaitururwa nari ey’okugira abakazi abarengire ahari omwe.

3. Ekigyendererwa kikuru eky’obushwere kikaba kiri kiiha?

³ Adamu kikamushemeza munonga kureeba omukazi we, ou yaayetsire Haawa. Haawa akaba ‘ashemereire’ Adamu, akaba naija kuguma ‘naamuhwera’ obwo buri omwe arikushemeza mutaahi we buri izooba omu kuhikiiriza obujunaanizibwa bwabo nk’omushaija n’omukazi. (Kut. 2:18) Ekigyendererwa kikuru ky’obushwere kikaba kiri eky’okuzaara abaana kwijuza ensi. (Kut. 1:28) N’obu abaana baakubaire nibakunda abazaire baabo, bakaabatsigireho bataaha omu bushwere batandikaho amaka gaabo. Abantu bakaba nibaija kwijura ensi yoona bagihindure paradiso.

4. Niki ekyahikire aha bushwere bw’okubanza?

⁴ Obushwere bw’okubanza bukabamu oburemeezi ahabw’okuba bombi Adamu na Haawa bakakoresa kubi obugabe bwabo bw’okucwamu baagomera Yehova. “Ekijoka ekyo ekihango ekya ira,” Sitaane Omuregi, akabeiha Haawa ngu yaarya aha muti “ogw’okumanya oburungi n’obubi” naija kugira obwengye bw’omutaano obw’okwecweramu ekibi n’ekirungi. Haawa akanga kuha iba ekitiinisa nk’omutwe gwe arikumubuuza aha bikwatiraine n’enshonga egyo. Kandi omu mwanya gwa Adamu kworobera Ruhanga, akaikiriza yaarya aha kijuma eki Haawa yaamureeteire.—Kush. 12:9; Kut. 2:9, 16, 17; 3:1-6.

5. Nitwega ki aha ku Adamu na Haawa baagarukiremu Yehova?

⁵ Ruhanga ku yaababuurize, Adamu akeekwatsa omukazi we, arikugira ati: “Omukazi ou waampaire kuguma naanye, niwe yampa aha bijuma by’ogwo muti, naanye nkarya.” Haawa nawe akeekwatsa enjoka ngu niyo yaamubeihire. (Kut. 3:12, 13) Bakeekwatsakwatsa kweyihaho orubanja! Ahabw’okugira ngu abantu babiri b’okubanza bakagomera Yehova, bakacwerwa orubanja baahinduka abagomi. Ekyo ka n’eky’okureeberaho ekirikuturabura! Obushwere kubaasa kubamu obusinguzi, buri omwe aha bari omu bushwere aine kuhikiiriza obujunaanizibwa bwe kandi akoorobera Yehova.

6. Noobaasa kushoboorora ota ebiri omu Okutandika 3:15?

⁶ N’obu Sitaane araabe yaareetsireho obugomi omuri Edeni, Yehova akata obunabi omu Baibuli oburikuha abantu amatsiko. (Shoma Okutandika 3:15.) ‘Oruzaaro rw’omukazi’ rukaba nirwija kucwekyereza ekihangirwe ky’omwoyo ekyagomire. N’ahabw’ekyo Yehova akabaasisa abantu kumanya omukago murungi ogu aine n’ebihangirwe bingi eby’omwoyo ebirikumuheereza omu iguru. Bwanyima Ebyahandiikirwe bikooreka ngu Yehova akaba naija kukoresa omwe aha bari omu kicweka kyʼekibiina kye ekiri nk’omukazi we, kucwekyereza Omuregi. Kandi oruzaaro orwo rukaba nirwija n’okubaasisa abantu kutunga omugisha ogu Adamu na Haawa baafeereirwe, ogw’okutuura omu nsi ebiro byona nk’oku Yehova yaabaire agyendereire.—Yoh. 3:16.

7. (a) Niki ekitwire nikihika aha bushwere kuruga obu Adamu na Haawa baagoma? (b) Kurugiirira aha Baibuli omushaija n’omukazi we baine kukora ki?

⁷ Obugomi bwa Adamu na Haawa bukakwata munonga aha bushwere bwabo n’obw’abandi boona abaakuratsireho. Nk’eky’okureeberaho, Haawa n’abaijukuru be boona abakazi, bakaba nibaija kugira obusaasi bwingi baaba baine enda n’aha kuzaara. Abakazi bakaba nibaija kwetenga abashaija baabo, kwonka baibabo bakaba nibaija kubategyeka, nangwa bahika n’aha kubatwariza kubi, nk’oku turikureeba obushwere bwingi ebiro ebi. (Kut. 3:16) Baibuli  neegira ngu abashaija baine kutwariza abakazi baabo omu muringo gwa rukundo. Kandi, ngu n’abakazi nabo baine kworobera baibabo. (Efe. 5:33) Omushaija n’omukazi we baayorobera Ruhanga kandi bakakwatanisa, oburemeezi omu ka nibutuuba nari nibuhweraho kimwe.

8. Obushwere bukaba bwine byafaayo ki kuruga ahari Adamu kuhika aha mwegyemure gw’omu bwire bwa Noa?

⁸ Adamu na Haawa batakafiire ahabw’ekibi n’okutahikiirira kwabo, bakazaara aboojo n’abaishiki. (Kut. 5:4) Omujigaijo gwabo Kaini, akashwera omwishiki omwe aha banyabuzaare be. Mwijukuru wa Kaini Lameka niwe mushaija owaabandize kugira abakazi babiri. (Kut. 4:17, 19) Kuruga omu bwire bwa Adamu kuhika aha mwegyemure gw’omu bwire bwa Noa, abaheereza ba Yehova bakaba bari bakye munonga. Omuri abo hakaba harimu Abeeli, Enoka, Noa n’ab’omu ka ye. Baibuli neegira ngu omu bwire bwa Noa, ‘abaana ba Ruhanga bakareeba abaishiki b’abantu bari barungi, baashweramu abakazi boona abu baakunzire.’ Ahabw’okugira ngu baamaraika bakateerana n’abakazi ekintu ekitari ky’obuhangwa, bakazaara abaana ebikaaka, abaabaire nibeetwa Abanefuri. Buzima, ‘obubi bw’abantu bukaba buri bwingi omu nsi, na buri kiteekateeko ky’omu mitima yaabo kiri kibi obutoosha.’—Kut. 6:1-5.

9. Yehova akakorera ki obubi omu bunaku bwa Noa, kandi ekyo tushemereire kukyegyeraho ki?

⁹ Omu bunaku bwa Noa, Yehova akareetaho omwegyemure kucwekyereza ababi. Obwire obwo, abantu bakaba nibakora emirimo ya butoosha, otwariiremu obushwere, kyabareetera kutafayo aha bi “Noa omurangi w’okuhikiirira,” yaabaire naagamba aha kucwekyerezibwa. (2 Pet. 2:5) Yesu akagyeragyeranisa embeera y’obwire obwo n’embeera y’obunaku obu. (Shoma Matayo 24:37-39.) Obunaku obu, abantu baingi nibanga kuhurikiza amakuru marungi ag’Obukama bwa Ruhanga agarikubuurirwa omu nsi yoona okuba eky’okuhamya aha mahanga goona emperu y’ensi egi mbi etakahikire. Twine kwijuka ngu enshonga z’amaka, nk’obushwere n’okworora abaana, tizishemereire kuturemesa kumanya ngu ekiro kya Yehova kiri haihi kuhika.

10. (a) Enganda nyingi zikaba nizitwara zita ebikorwa by’obushambani? (b) Abrahamu na Saara bakataho ky’okureeberaho ki ekirungi omu bushwere bwabo?

¹⁰ Noa na batabani be bashatu buri omwe aharibo akaba aine omukazi omwe. Kwonka bwanyima y’Omwegyemure, abashaija baingi bakagira abakazi baingi. Omu nganda ezimwe, abantu bakatandika kukora ebikorwa by’obushambani barikubikora nk’emigyenzo y’ediini. Abrahamu na Saara ku baagiire Kanaani, bakashangayo abantu b’emicwe mibi abaabaire batarikuha obushwere ekitiinisa. N’ahabw’ekyo Yehova akacwamu ngu endembo ibiri orwa Sodoma na Gomora zicwekyerezibwe ahabw’okubamu ebikorwa by’obushambani. Abrahamu akaba ari ow’omutaano aha bantu abo abashambani. Akaba naayebembera gye eka ye, kandi na Saara akataho eky’okureeberaho kirungi eky’okworobera iba. (Shoma 1 Petero 3:3-6.) Abrahamu akahamya ngu omutabani Isaaka yaashwera omukazi owaabaire naaramya Yehova. Kandi Isaaka nawe akahamya ngu omutabani Yakobo owaarugiremu enganda 12 za Israeli yaakora nikyo kimwe.

11. Ebiragiro bya Musa bikarinda bita Abaisraeli?

¹¹ Bwanyima Yehova akakora endagano na baijukuru ba Yakobo niryo ihanga rya Israeli. Ebiragiro bya Musa ebi Abaisraeli baahairwe bikatuubya aha bikorwa ebyabaire biriho otwariiremu eky’okugira abakazi baingi. Bikahwera omu kurinda Abaisraeli omu by’omwoyo birikubazibira  kushwera abakaafiire. (Shoma Eky’Ebiragiro 7:3, 4.) Abakuru b’Abaisraeli nibo baabaire bahwera abantu ku baabaire bagira oburemeezi omu bushwere. Bakaba babaasa kushoboorora gye oburemeezi nk’obutari bwesigwa, eihari, n’okwekyengyera. Okushenda nari okugaitururwa kukaba nikwikirizibwa, kwonka nakwo kukaba kutarikukira kubaho. Omushaija akaba naabaasa kushenda omukazi we yaaba “aine emicwe mibi.” (Bir. 24:1) Baibuli terikushoboorora ekyabaire nikitwarirwa omu ‘micwe mibi,’ kwonka omushaija akaba atarikubaasa kushenda omukazi we ahabw’enshonga nkye.—Lev. 19:18.

12, 13. (a) Abashaija abamwe bakaba nibatwariza bata abakazi baabo omu bunaku bwa Malaki? (b) Obunaku obu Omukristaayo obatiziibwe yaatwara omukazi nari omushaija w’abandi, niharugamu ki?

¹² Omu bunaku bwa nabi Malaki, Abashaija Abayudaaya bakaba bareebya abakazi baabo babashenda barikwekwatsakwatsa obushonga bukye. Abashaija abo bakaba bashenda abakazi b’omu butsigazi bwabo, obundi barikwenda kutaatsya abakiri bato nari abakaafiire. Obu Yesu yaabaire ari omu nsi, abashaija Abayudaaya bakaba bareebya abakazi baabo barikubashenda baaba ‘baine eki barikubatura kyona.’ (Mat. 19:3) Yehova Ruhanga akaba naayanga okugaitururwa nk’okwo.—Shoma Malaki 2:13-16.

¹³ Obunaku obu, okureebya ou ori nawe omu bushwere Yehova tarikukisiima. Kwonka shi Omukristaayo ku yaakutwara omukazi nari omushaija w’abandi, reero akagaitururwa n’owe ngu ataahe n’ou agyenzire nawe omu bushwere? Yaaba ateeteisize, naaba aine kubingwa omu kibiina kubaasa kurinda ekibiina kikaguma kiri ekirikwera omu by’omwoyo. (1 Kor. 5:11-13) Naaba aine kworeka “ebyana ebishemereire abeeteisize” atakaikiriziibwe kugaruka omu kibiina. (Luk. 3:8; 2 Kor. 2:5-10) N’obu haraabe hatatairweho obwire obushemereire kuhinguraho omuntu nk’ogwo kugarurwa omu kibiina, okureebya nk’oku okutarikukira kubaho omu baheereza ba Ruhanga tikushemereire kureebwa nk’enshonga nkye. Nikibaasa kutwara omwaka nari n’okurengamu omuntu kubaasa kworeka ngu ayeteisiize kimwe. N’obu omuntu nk’ogwo yaakugarurwa omu kibiina, naaba aine kweshoboororaho “omu maisho g’ekitebe ky’eiramuriro ekya Ruhanga” yaaba buzima ayeteisize gye nari ngaaha.—Rom. 14:10-12 Reeba Watchtower, ey’Okwaikumi-na-kumwe 15, 1979, rup. 31-32.

14. Ebiragiro bikaba biriho ahabwa kigyendererwa ki?

¹⁴ Abaisraeli bakaba nibeebemberwa Ebiragiro bya Musa kumara emyaka erikurenga 1,500. Bikabahwera kuguma nibaijuka emisingye erikwera omu kushoboorora enshonga z’amaka n’ebindi ebirikwerarikiriza, kandi bikakora nk’omurezi w’okubahitsya ahari Mesia. (Gal. 3:23, 24) Kwonka bwanyima ya Yesu kufa ebiragiro bikashazibwamu, Ruhanga akatandikaho entebeekanisa nsya. (Heb. 8:6) Ebintu ebimwe ebyabaire nibaikirizibwa omu Biragiro bya Musa bikaba bitakiikirizibwa omu Bakristaayo.

15. (a) Ekibiina Ekikristaayo kikaba nikiija kukuratira musingye ki ogw’obushwere? (b) Omukristaayo aine kuteekateeka aha nshonga ki yaaba naayenda kugaitururwa?

¹⁵ Yesu arikugarukamu ekibuuzo eki Abafarisaayo baamubuurize, akagira ngu ebiragiro bya Musa bikaba nibiikiriza omushaija kushenda omukazi we kwonka ngu “bwa mbere na mbere kikaba kitari kityo.” (Mat. 19:6-8) N’ahabw’ekyo, Yesu akooreka ngu omutindo gurikwera ogurikukwata aha bushwere ogwatairweho omuri Edeni, nigwo gwabaire nigwija kukora omu kibiina Ekikristaayo. (1 Tim. 3:2, 12) Omushaija n’omukazi we okuba “omwe,” nikimanyisa ngu nibaba baine kuguma  kumwe reero baikirize rukundo ei bainiire Ruhanga n’oku barikukunda kuhamya omukago gwabo. Omuntu ori omu bushwere yaagaitururwa hatabaireho bushambani naaba ataine bugabe bw’okugaruka kushwera nari kushwerwa. (Mat. 19:9) Kwonka omuntu naabaasa kucwamu kusaasira mugyenzi we oyeteisize, nk’oku nabi Hosea yaasaasiire Gomeri omukazi we enshambani. Nikyo kimwe, Yehova akasaasira Abaisraeli abaabaire beeteisize bwanyima y’okuraaya omu by’omwoyo. (Hos. 3:1-5) Kandi twine kwijuka ngu omuntu yaamanya ngu omukundwa we ashambaine, reero akateerana nawe, ekikorwa ekyo nikyoreka ngu amusaasiire. Nihaba hatakiriho enshonga y’omu Byahandiikirwe erikumureetera kugaitururwa.

16. Yesu akagamba ki aha kutaza mu bushwere?

¹⁶ Yesu bwanyima y’okworeka ngu tihariho ekindi ekishemereire kureetera Abakristaayo kugaitururwa okwihaho obushambani, akagamba aha ‘baahairwe’ ekiconco ky’okugumira aho batagiire mu bushwere. Akoongyeraho ati: “Orikubaasa kwemera ekyo, akyemere.” (Mat. 19:10-12) Baingi bacwiremu kugumira aho batagiire mu bushwere kubaasa kuheereza Yehova bataine kirikubateganisa. Abarikukora ekyo n’ab’okusiimwa munonga.

17. Niki ekirikubaasa kuhwera Omukristaayo kureeba yaaba ahikire kutaaha omu bushwere?

¹⁷ Okugumira aho otagiire mu bushwere nari okuza omu bushwere, ekyo n’ekya buri omwe kwecweramu. N’obu entumwa Paulo araabe yaagizire ngu okutaza mu bushwere ni kirungi, kwonka akagira ati: “Ahabw’okwerinda obushambani, omushaija weena agire omukazi we; kandi omukazi weena agire omushaija we.” Paulo akoongyeraho ati: “Ku baraabe batarikubaasa kwezibira, bashwere nari bashwerwe; ahakuba haakiri okushwera nari okushwerwa okukira okubuguma.” Omuntu yaataaha omu bushwere, nikibaasa kumuhwera kutaikiriza ekyetengo ky’amaani eky’okwenda kuteerana kumureetera kugira omuze gw’okwemarisa, nari kushambana. Ekindi, abatakagiire omu bushwere baine n’okuteekateeka aha myaka yaabo kureeba yaaba bakuzire ekirikumara kubaasa kuza omu bushwere. Ahakuba Paulo akagumizamu yaagira ngu ‘omuntu weena ku araateekateekye ngu tarikutwaza gye ahabw’okutaza omu bushwere, kandi akuzire ekirikumara, akore eki arikusiima, ataahe omu bushwere; naaba atasiisire.’ (1 Kor. 7:2, 9, 36; 1 Tim. 4:1-3) Kwonka, omuntu tashemereire kutaaha omu bushwere ahabw’okugira ngu aine ekyetengo ky’amaani ky’obunyeeto eky’okwenda kuteerana. Naabaasa kuba atakuzire ekirikumara kuhikiiriza obujunaanizibwa bw’obushwere.

18, 19. (a) Obushwere bw’Ekikristaayo bushemereire kutandika buta? (b) Nituza kushwijuma ki omu kicweka ekirikukurataho?

¹⁸ Obushwere bw’Ekikristaayo nibutandikwa omushaija n’omukazi abeehaireyo ahari Yehova, kandi abarikumuheereza n’omutima gwabo gwona. Bashemereire kuba nibakundana munonga barikwenda kuguma kumwe ebiro by’amagara gaabo byona. Kandi nibaheebwa omugisha ahabw’okukuratira obuhabuzi obw’okushwera “omuri Mukama” honka. (1 Kor. 7:39) Ku barikuheza kutaaha omu bushwere, baine kuhamiza kimwe ngu Baibuli neeha obuhabuzi burungi oburikureetera obushwere bwabo kubamu obusinguzi.

¹⁹ Ekicweka ekirikukurataho nikyoreka enshonga kuruga omu Byahandiikirwe ezirikubaasa kuhwera Abakristaayo abari omu bushwere kusingura embeera zigumire ‘ez’ebiro by’emperu,’ obu baingi bataine mitwarize erikwetengyesa omu bushwere burungi. (2 Tim. 3:1-5) Yehova kurabira omu Kigambo kye eky’omuhendo, atuhaire buri kimwe kubaasa kugira obushwere oburimu okushemererwa n’obusinguzi, obwo turikugumizamu nitugyenda n’abaheereza be omu muhanda ogurikuhitsya omu magara agatahwaho.—Mat. 7:13, 14.