Egi n’emwe aha nshonga nyingi ezi abazigu ba Yesu baabaire nibeekwatsakwatsa kuta orubanja ahari Yesu n’abeegi be. Ebiragiro bya Musa bikaba birimu ebikorwa bingi ebirikukwata aha bwecumi, nk’omuntu yaarugwamu amahira, yaaba arwaire ebibembe, nari yaakwata aha mutumbi gw’omuntu nari aha gw’enyamaishwa. Bikaba nibyoreka n’oku omuntu arikubaasa kuba oshemeire. Akaba naabaasa kuhayo ekitambo, kunaaba, nari kumisiirwaho eshagama.—Lev., eshu. 11-15; Kub., eshu. 19.

Abeegyesa b’Abayudaaya bakaba nibarondereza buri kashonshorekye k’ebiragiro ebi. Okucondooza kumwe nikworeka ngu buri kimwe ekyabaire nikireeta oburofa kikaba “kibuuzibwaho aha bikwatiraine n’embeera ei omuntu yaatungamu oburofa, oku burikubaasa kujanjaara aha bandi, ebikoreso ebirikubaasa kurofahara nari kutarofahara, kandi n’ekyabaire nikibaasa kukorwa, omuntu kuba oshemeire.”

Abazigu ba Yesu bakamubuuza bati: “Ahabw’enki abeegi baawe batakurata migyenzo ya baishenkurubo, bafa okuriisa engaro zisiisikaire?” (Mak. 7:5) Abazigu be aba abanyadiini bakaba batarikumanyisa ngu omuntu naabaasa kurwara yaarya atanaabire ngaro. Abeegyesa b’ediini bakaba baine omugyenzo ngu omuntu aine kushukwa amaizi aha ngaro ze arikuza kurya eby’okurya. Okucondooza okuri aha ruguru nikwongyeraho kuti: “Kandi hakaba hariho okuhajaana aha bikwatiraine n’ebikoreso ebyabaire biine kukoresibwa kushuka amaizi aha ngaro z’abantu, amaizi agahikire kukoresibwa, n’ekicweka ky’engaro ahu baine kugarukira omu kushuka amaizi.”

Kwonka omuringo ogu Yesu yaakwatsiremu ebiragiro by’abantu ebi gukaba gworobi. Akagambira abeebembezi b’ediini Abayudaaya ati: “Isaaya akabaraguraho kurungi nk’oku kyahandiikirwe ngu: Ab’eihanga eri nibampaisa ekitiinisa eminwa yaabo kwonka emitima yaabo endi hare [Yehova]. Bandamiza busha, ahakuba enyegyesa ey’ebi beegyesa okuba obuhamizo bw’ediini n’ebiragiro by’abantu. Nimureka ekiragiro kya Ruhanga, ngu mugumye emigyenzo y’abantu.”—Mak. 7:6-8.