AHA myaka 12, nibwo naabanza kumanya ngu nyine ekintu ky’omuhendo eky’okuha abandi. Omu ruteerane oruhango, ow’eishe-emwe akambuuza ku ndaabe niinyenda kubuurira. Nkagarukamu ngu “eego,” n’obu ndaabe naabaire ntakabuurirahoga. Tukaza omu kicweka ky’okubuuriramu, reero yaampa obutabo oburikushoboorora aha Bukama bwa Ruhanga. Akangira ati: “Gyenda obuurire abari aha rubaju rw’enguuto orwo, naanye ninza kubuurira abari aha rubaju oru.” Nyine obwoba, nkatandika kugyenda enju aha nju, kandi kikantangaaza ku naagabire obutabo bwona bukahwaho. Abantu baingi bakaba nibenda eki naabaire nyine.

Nkazaarwa omu mwaka gwa 1923 omuri Chatham, Kent, England, kandi nkakurira omu kicweka ekirimu abantu abeehwaire amatsiko. Abaarwaine Orutaro rw’Ensi Yoona 1 bakaremwa kuhikiiriza eki baaragaaniise eky’okuhindura ensi omwanya murungi. N’abazaire bangye bakaba batakiine matsiko omu beebembezi b’ediini ya Baptist abaabaire nibafayo aha kutunguuka kwabo kwonka. Ku naabaire nyine emyaka nka mwenda, maawe akatandika kuza aha kyombeko, ahu Abajurizi ba Yehova baabaire nibagirira enteerane zaabo. Itwe abaana munyaanyazi-itwe omwe akatwegyesa kandi yaatuha n’ekitabo The Harp of God. Nkakunda ebi yaabaire naayegyesa.

Omu bunyeeto nkaba ninkunda kuha abantu amatsiko agari omu Kigambo kya Ruhanga. N’obu obumwe naabaire ngyenda enju aha nju nyenka, nabwo nkeega kubuurira abandi. Nk’eky’okureeberaho, izooba rimwe nkaba nyine ow’eishe-emwe mukuru turikuvuga obugaari turikuza kubuurira, twaraba aha mwebembezi w’ediini reero naagira nti: “Reeba embuzi egyo.” Ow’eishe-emwe akeemereza egaari ye reero yaashaba ngu tushutame aha mpimbi. Akagira ati: “N’oha owaakuhaire obushoboorozi bw’okucwamu ori embuzi? Itwe ka tushemererwe kuha abantu amakuru marungi, reero okucwa emanja tukurekyere Yehova.” Omu buto nkeega bingi aha bikwatiraine n’okushemererwa okurikuruga omu kuha abandi.—Mat. 25:31-33; Byak. 20:35.

Ow’eishe-emwe ondiijo omukuru akanyegyesa ngu kubaasa kutunga okushemererwa okurikuruga omu kuha abandi, obumwe twine kugumisiriza. Omukazi we akaba atarikukunda Abajurizi ba Yehova. Eizooba rimwe akanyeta omu ka ye kweshemeza. Omukazi we akaba aine ekiniga kingi ahabw’okugira ngu tukaba nituruga omu kubuurira, yaatandika kututambikira amagyani. Ow’eishe-emwe omu mwanya gw’okumugambira kubi, akakwata amagyani yaagagarura omu mwanya gwago. Bwanyima y’emyaka, okugumisiriza  kwe kukarugamu ebirungi obu omukazi we yaabatizibwa akaba omwe aha Bajurizi ba Yehova.

Ekyetengo kyangye eky’okwenda kugambira abandi aha matsiko g’ebiro by’omumaisho kikaguma nikyeyongyera, kandi nyowe na maawe tukabatizibwa omuri Dover omu Kwakashatu 1940. Britain ekatenga orutaro ahari Germany omu Kwamwenda 1939, obu naabaire nyine emyaka 16. Omu Kwamukaaga 1940, nkareeba enkumi n’enkumi z’abaserukare abaine obuhuta barikuhingura bari aha bimotoka. Bakaba bahonokire aha rutaro orwabaire Dunkirk. Aha maisho gaabo hakaba nihooreka ngu tibaine matsiko goona, kandi nkaba nyine ekihika ky’okubagambira aha Bukama bwa Ruhanga. Bwanyima omu mwaka ogwo, bomu zikatandika kuteerwa omuri Britain. Buri kiro, nkaba nindeeba enyonyi endwani zirikuraba omu mwanya ogu twabaire turimu. Bomu zikaba zibaruka, kandi tukaba tuzihurira zirikugwa, kyongyera aha kutiina kwaitu. Ku bwabaire busheesha, tukaba tushanga enju nyingi zicwekyereziibwe. Nkeyongyera kwetegyereza ngu Obukama nibwo burikwija kumaraho oburemeezi omu biro by’omumaisho.

Omuri 1941 nibwo naagaruka aha kwejumba omu buheereza obwandeeteire kushemererwa. Nkaba ninkora aha Royal Dockyard omu Chatham ndikwega kukanika emeeri, omurimo ogwabaire nigumbaasisa kutunga sente. Abaheereza ba Yehova kuruga kare bakaba nibamanya ngu Abakristaayo tibaine kwejumba omu kurwana kw’amahanga. Omwaka 1941 gurikuza kuhika, tukamanya ngu titushemereire kukora omu ikorero ry’eby’okurwanisa. (Yoh. 18:36) Obu ikorero ryaitu ryabaire nirikora amaato g’okurwanisa, nkacwamu kureka omurimo gwangye reero naaza omu buheereza obw’obutwire. Nkabanza kuheereza omuri Cirencester, orurembo rurungi oruri omu bibungo.

Ku naahikize emyaka 18, nkateebwa omu kihome kumara ameezi mwenda ahabw’okwanga kukora omurimo gw’ekinyamahe. Nkatiina munonga ku baakingire orwigi rw’ekihome nkatsigara nyenka. Kwonka bwanyima, abarinzi n’abandi abaabaire bari omu kihome bakatandika kumbuuza ahabw’enki naabaire nkomirwe, kandi nkashemererwa kubagambira aha kwikiriza kwangye.

Ku naarugire omu kihome, nkashabwa kushanga Leonard Smith * tukaza kubuurira omu ishaza rya Kent owaitu. Kutandika na 1944, enkumi n’enkumi z’enyonyi endwani zitarimu bantu kureka bomu zonka, zikatandika kugwa omuri Kent. Tukaba turiyo nituza kurugayo ahakuba Abanazi bakaba baijwiire omuri London na Buraaya yoona. Bomu ezo ez’omu mwanya zikaba nizitiinisa munonga, ahakuba ku waabaire ohurira  ekyagamba, omanya ngu omu busekenda bukye enyonyi neeza kugwa ebaruke. Tukaba nitwegyesa Baibuli abantu bataano b’eka emwe. Obumwe tukaba tushutama ahansi y’emeeza y’ekyoma ei baabaire bakozire kubarinda ngu enju etabagwera. Eka egyo yoona ekaija yaabatizibwa.

Bwanyima y’orutaro, nkaheereza nka payoniya kumara emyaka ebiri omu bukiizi-bwa-buryo obwa Ireland. Tukaba tutarikumanya oku Ireland yaabaire neetaana ahari England. Tukaba tuza enju aha nju turikushaba oburaaro, turikugira ngu turi abamiisani, kandi tukaba nitugaba magaziini zaitu aha nguuto. Okukora ekyo omu ihanga ry’Abanyakaturiki ka kyabaire kiri “eky’obushema”! Omushaija omwe ku yaatutiinatiiniise omu muringo gw’obushaarizi, nkatabaaza aha muporiisi, reero yaangira ati: “Ekyo tikyo waaba oshemereire kutunga?” Tukaba tutarikumanya ngu abeebembezi b’ediini baine amaani. Bakaba babingisa abantu aha mirimo yaabo abaabaire baikiriza ebitabo byaitu, kandi bakaba batubingisa ahu turikuraara.

Tukaija twakimanya ngu twahika omu kicweka kisya, nikiba kiri eky’obwengye kuvuga tukaza hare n’ahu turikuraara, tukabuurira abantu abaine omwebembezi w’ediini otarikutumanya. Reero aha muheru, nibwo twabaire tutaayaayira abantu abari haihi. Omuri Kilkenny, tukabaasa kwegyesa omutsigazi Baibuli emirundi eshatu buri saabiiti n’obu haraabe haabaire hariho obweshaaringo. Nkaba ninkunda munonga kwegyesa abantu amazima g’omu Baibuli kyandeetera kushaba kuza kutendekwa omu Ishomero rya Gilead kuba omumiisani.

Bwanyima y’okwega kumara ameezi ataano omuri New York, bana ahariitwe bakatushaba kuza kubuurira aha birwa bikye ebiri aha nyanja ya Caribbean. Omu Kwaikumi-na-kumwe 1948, tukaruga omu rurembo New York twagyendera aha meeri nkye erikwetwa Sibia. Nkaba ntakagyenderaga aha amaizi, n’ahabw’ekyo nkaba nyine ekihika. Omwe ahariitwe, Gust Maki, akaba ari omuvugi murungi w’emeeri. Akatwegyesaho ebintu bikye ebirikukwata aha kuvuga emeeri, nk’oku orikubaasa kugarura ahaiguru nari ahansi emirunga nari eitanga ry’emeeri, oku orikubaasa kuguma noomanya ahu orikuza, n’oku orikubaasa kwetantara omuyaga. Gust omu bwegyendesereza akatuvuga kumara ebiro 30 omu nyanja y’akabi kuhitsya obu twahika Bahamas.

Bwanyima y’okumara ameezi makye turikubuurira omu birwa bikye ebya Bahamas, tugakumizamu twaza aha birwa ebya Leeward na Windward, ebiri omu mahiro nka 500 kuruga aha birwa bya Virgin haihi na Puerto Rico haihi na Trinidad. Kumara emyaka etaano, tukaba nitukira kubuurira aha birwa ebyehereire, ahaabaire hatari Bajurizi ba Yehova. Obumwe tukaba tugyenda kumara esaabiiti tutohoreize butumwa nari kubutunga. Kwonka ka twabaire twine okushemererwa kuranga ekigambo kya Yehova omu birwa!—Yer. 31:10.

Ku twabaire twemerera, ekyo kikaba kireetaho akajagararo omu bantu b’ebyaro beerundaana kwija kureeba abaija ni baahi. Abamwe bakaba batakareebahoga emeeri nk’eyaitu nari omuntu orikwera. Abantu b’aha birwa ebyo bakaba nibakunda abantu, bari abanyadiini abaabaire nibamanya gye Baibuli. Obwire obwingi, bakaba batuuha eby’enyanja bibisi, vakedo, n’ebinyobwa. Emeeri yaitu ekaba eri nkye y’okuraaramu, kuteekyeramu, nari kwogyezamu emyenda, kwonka ebyo byona tukabaasa kubikora.

Ku twabaire tuhika aha nkungu tukaba tutaayaayira abantu eizooba ryona. Tukaba tubagambira ngu nihaija kubaho orubazo orurikwegamira aha Baibuli. Ku  twabaire tuhikaho, tukaba tuteera ekide ky’emeeri. Kikaba nikishemeza kureeba abatuuzi barikwija. Etaara zaabo zikaba nizaaka nk’enyonyoozi obwo barikushuuma aha bushozi. Obumwe hakaba haija abantu igana, kandi bakaba bagumaho kuhitsya nyekiro barikubuuza ebibuuzo. Bakaba nibakunda kweshongora, n’ahabw’ekyo tukaba tuhandiika bimwe aha byeshongoro kandi tubibaha. Itwe bana tukaba tuteeraho kweshongora nk’oku turikubaasa, reero abantu batwegaitaho amaraka gakwatana gye. Obwire obwo ka bwabaire nibushemeza!

Abeegi ba Baibuli abamwe ku twabaire tuheza kubeegyesa Baibuli, bakaba batushendekyereza kuza aha ka endiijo ei turikuza kwega nayo reero bagaruka beega n’eka egyo. N’obu turaabe twabaire tumara esaabiiti nkye omu kicweka, tukaba tushaba abantu abarikukunda munonga amazima kugumizamu nibeegyesa abandi kuhitsya twagaruka. Kikaba nikishemeza kureeba oku bamwe barikutwara obujunaanizibwa obwo nka bukuru.

Obunaku obu, bingi aha birwa ebyo biriho hoteeri nyingi z’abarambuzi, kwonka ira bikaba biijwireho amabaare, omusheenyi, n’emikindo. Obumwe tukaba turuga aha kirwa tuza aha kindi nyekiro. Eby’enyanja bikaba biba nibizaanira haihi n’emeeri yaitu, kandi tukaba tuhurira okuhoorera kw’emeeri yaitu erikuraba omu maizi. Okwezi kurikwaka aha nyanja kukaba kukora amaranzi marungi turikureeba ebiri hare omu maisho gaitu.

Bwanyima y’okumara emyaka etaano turikubuurira aha birwa, tukaza Puerto Rico kuhaanisa emeeri yaitu bakatuhamu obwato bwa ingini. Ku twahikireyo, nkareeba munyaanyazi-itwe orikwetwa Maxine Boyd owaabaire ari omumiisani, naamukunda. Kuruga omu buto akaba atwire ari omubuurizi omweziriki. Bwanyima akaija yaaba omumiisani omu Dominican Republic okuhitsya obu gavumenti y’Abanyakaturiki yaamubingayo omuri 1950. Nk’omwe aha baabaire nibagyendera aha meeri, nkaba nyine ekipapura ekirikunyikiriza kutuura omuri Puerto Rico kumara okwezi kumwe. Nkaba ninza kugaruka aha birwa mmareyo emyaka mikye endiijo. N’ahabw’ekyo nkeegira nti: ‘Ronald, ku oraabe nooyenda omwishiki ogu, oine kugira eki waakoraho ahonaaho.’ Bwanyima ya saabiiti ishatu nkamugambira kumushwera, kandi bwanyima ya saabiiti mukaaga naamushwera. Nyowe na Maxine bakatwoheereza Puerto Rico kuheerezayo nk’abamiisani, n’ahabw’ekyo tindabaasize kugyendera aha bwato busya. 

Omuri 1956 tukatandika kutaayaayira ebibiina. Ab’eishe-emwe baingi bakaba bari abooro, kwonka tukaba nitukunda kubataayaayira. Nk’eky’okureeberaho, omu kyaro kya Potala Pastillo, hakaba hariyo amaka abiri ag’Abajurizi ba Yehova agaabaire garimu abaana baingi, kandi nkaba nkira kubateerera omukuri. Eizooba rimwe nkabuuza omwishiki omuto, Hilda, ku araabe yaabaire naayenda kugyenda naitwe kubuurira. Akagira ati: “Niinyenda, kwonka tindikubaasa. Ahakuba tinyine nkaito.” Tukamugurira enkaito, reero yaagyenda naitwe kubuurira. Bwanyima y’emyaka, omuri 1972, nyowe na Maxine tukaba tutaayaayire Brooklyn aha Beseeli, munyaanyazi-itwe owaabaire yaaheza kumariiriza eishomero rya Gilead yaija ahu turi. Akaba ariyo naaza kuheereza omuri Ecuador, reero yaagira ati: “Nimunyijuka? Niinye ou mwaguriire nkaito omuri Pastillo obu naabaire ndi muto.” Akaba ari Hilda! Tukashemererwa munonga twahika n’aha kurira!

Omuri 1960 tukashabwa kuheereza aha ofiisi y’eitaagi eya Puerto Rico, eyaabaire eri omuri Santurce, San Juan omu kyombeko kya kaanyinaibiri. Omu kubanza, nyowe na Lennart Johnson niitwe twabaire nitukora emirimo emingi. We n’omukazi we nibo baabandize kuba Abajurizi ba Yehova omuri Dominican Republic, kandi bakahika omuri Puerto Rico 1957. Bwanyima Maxine akatandika kutebeekanisa okushaba kw’abantu abarikurenga rukumi buri saabiiti abaabaire nibenda kutunga magaziini. Akaba naakunda kukora omurimo ogu, ahakuba akaba naateekateeka aha bantu abo boona abarikutunga eby’okurya by’omwoyo.

Nkaba ninkunda okuheereza aha Beseeli, ahakuba hariyo okuheereza abandi. Kwonka tikirikumanyisa ngu hakaba hatariyo embeera zigumire. Nk’eky’okureeberaho, oruteerane oruhango orw’okubanza kuba Puerto Rico omuri 1967 orwabaire rurimu n’abarikuruga omu mahanga agandi, nkahurira naaruha ahabw’okugira obujunaanizibwa bwingi. Nathan Knorr, owaabaire naayebembera Abajurizi ba Yehova, akaija omuri Puerto Rico. Atakimanyire akateekateeka ngu nkaba ntatebeekaniise engyenda y’abamiisani abaabaire barugire omu mahanga agandi, kandi obwo nkaba ngitebeekaniise. Bwanyima akampana aha nshonga y’okutakora ebintu omu buteeka, kandi yaangira ngu mmureebize. Nkaba ntarikwenda kutongana nawe, kwonka nkeehurira ngu yaacwera orubanja rutahikire  kandi naagira ekiniga kumara obwire. Kwonka, nyowe na Maxine ku twagarukire kureeba Ow’eishe-emwe Knorr, akatweta omu kishengye kye yaatuteekyera eby’okurya.

Emirundi mingi tukaba turuga Puerto Rico, kuza kutaayaaya owaitu omuri England. Nyowe na maawe tukaba turi omu mazima kwonka tata atagarimu. Kwonka abarikuha embazo ku baabaire bataayaaya kuruga aha Beseeli, maawe akaba abareeta baraara omu ka. Tata akaba areeba oku Ababeseeli abo bari abacureezi barikutaanira kimwe n’abeebembezi b’ediini abaabaire baamutamire emyaka mingi enyima. N’ekyarugiremu, omuri 1962 akabatizibwa yaaba omwe aha Bajurizi ba Yehova.

Omukazi wangye omukundwa, Maxine, akafa 2011. Buzima nyine ekihika ky’okugaruka kumureeba ku araazookye. Ka ninyija kushemererwa! Emyaka 58 ei twamazire hamwe, nyowe na Maxine tukareeba abaheereza ba Yehova omuri Puerto Rico nibeeyongyera kuruga ahari 650 kuhika 26,000! Omu 2013 ofiisi y’eitaagi eya Puerto Rico ekagaitwa hamwe n’eya United States, kandi nkashabwa kuheereza ahari Wallkill, omuri New York. Bwanyima y’emyaka 60 ei naamazire aha birwa, nkeehurira ndi nk’enzaarwa ya Puerto Rico nka coquí, ekikyere kikye eky’omuri Puerto Rico ekirikugamba nyekiro ngu ko-kee, ko-kee. Kwonka nkaba nyine kugumizamu.

Na hati ninkunda kuheereza Ruhanga aha Beseeli. Hati nyine emyaka erikurenga omuri 90, kandi obujunaanizibwa bwangye n’okugaruramu Ababeseeli amaani nk’omuriisa omu by’omwoyo. Nibangira ngu naaherize kutaayaayira Ababeseeli abarikurenga 600 kwiha naija Wallkill. Baingi abarikwija kundeeba nibaba baine enshonga ezirikubakwataho nari ezirikukwata aha maka gaabo. Abamwe nibaba nibashaba obuhwezi oku barikubaasa kuba abasinguzi omu kuheereza aha Beseeli. Kandi abandi abarikuba baherize kutaaha omu bushwere, nibaba nibashaba obuhwezi aha nshonga z’obushwere. Abamwe nibaba bashabirwe kugaruka omu kubuurira. Nimpurikiza boona abarikugamba naanye, kandi kyaba nikibaasika ninkira kubagira nti: “‘Ruhanga naakunda efura.’ N’ahabw’ekyo shemererwa aha murimo gwawe. Nookorera Yehova.”—2 Kor. 9:7.

Ebirikuremesa omuntu kutunga okushemererwa aha Beseeli biri n’ahandi hoona: Oine kuta omutima aha ki orikukora ahabw’enki kiri kikuru. Kyona eki turikukora aha Beseeli n’obuheereza oburikwera. Nikiba nikihwera ‘omwambari omwesigwa kandi ow’obwengye’ kuha eby’okurya eby’omwoyo ab’eishe-emwe omu nsi yoona. (Mat. 24:45) Buri murundi ogu turikuheereza Yehova, nituba twayongyera aha migisha y’okumuhimbisa. Ka tukunde kukora ebi arikutushaba, ahakuba “Ruhanga akunda efura.”