OMU miringo mingi, abarikukunda kucondooza aha Baibuli bari nk’abatiimbi b’ezaabu. Nibaba baine kukora munonga kandi bakaguma nibacondooza omu Byahandiikirwe kutunga obwengye bw’omuhendo. Nitubaasa kwega ki twashwijuma emiringo eshatu ei abantu barikusheruramu ezaabu?

Teera akashushani oriyo noogyenda aha rubaju rw’enyanja reero oreeba akabaare kakye karikwengyengyeta omu mushana. Oinama oshemereirwe ahabw’okubona akacweka k’ezaabu. Ni kakye munonga kukira akatwe k’akati k’ekibiriiti kandi tikakirikukira kureebeka nka daimandi ey’omuhendo mwingi. Ekyo nikikureetera kutandika kusherura omu mwanya ogwo kureeba yaaba noobaasa kubonaho obundi bucweka bw’ezaabu.

Nikyo kimwe, noobaasa kuba noijuka eizooba obu omwe aha Bajurizi ba Yehova yaakutaayaayira kugaaniira naiwe aha butumwa oburi omu Baibuli. Obundi noobaasa kuba waareebire ngu hati nibwo waabanza kutunga akacweka k’ezaabu ey’eby’omwoyo. Eki nikibaasa kuba kyabaireho obu waabanza kureeba eiziina rya Ruhanga Yehova omu Baibuli. (Zab. 83:18) Nari obundi okeega ngu noobaasa kuba munywani wa Yehova. (Yak. 2:23) Ahonaaho okamanya ngu waatunga ekintu kirungi kukira ezaabu! Kandi noobaasa kuba waagizire ekihika ky’okwenda kutunga eby’omwoyo ebindi eby’omuhendo.

Obucweka bukye bw’ezaabu nibukira kushangwa aha migyera nari aha nyanja. Egi neeyetwa ezaabu y’aha maizi. Omu kutiimba kumwe, abarikutimba ezaabu nibabaasa kutunga ezaabu nyingi erikubariirirwamu esente nyingi.

Obu omwe aha Bajurizi ba Yehova yaatandika kukwegyesa Baibuli noobaasa kuba waayehuriire nk’omutiimbi w’ezaabu yaaheza kubona omwanya oguriho ezaabu nyingi. Okuguma nooteekateeka aha mishororongo ya Baibuli nikibaasa kuba kyagumire nikyongyera aha kumanya kwawe, okoongyera kuba omutungi omu by’omwoyo. Ku waayeyongyeire kuteekateeka aha mazima ga Baibuli ag’omuhendo, nikwo waayeyongyeire kwirira haihi na Yehova okaguma omu kukunda kwe oine amatsiko g’okutunga amagara agatahwaho.—Yak. 4:8; Yud. 20, 21.

 Nk’omutiimbi w’ezaabu orikuteeraho kusherura ezaabu y’omuhendo, noobaasa kuba otwire ori omweziriki omu kusherura eby’obutungi eby’omwoyo. Bwanyima y’okwega amazima g’omu Baibuli ag’omuhendo, nikibaasa kuba kyakuhigire kucwamu kwehayo kandi okabatizibwa.—Mat. 28:19, 20.

Omutiimbi w’ezaabu naabaasa kushanga ezaabu nkye omunda y’enkiri z’amabaare. Nikibaasa kumwetengyesa kuhondahonda enkiri ezo kubaasa kwihamu ezaabu eri omunda yaazo. Omu kubanza, ezaabu neebaasa kuba etarikureebwa omu mabaare. Ahabw’enki? N’ahabw’okugira ngu enkiri z’amabaare niziba ziri nyingi munonga waazigyeragyeranisa n’ezaabu erikuba erimu! Kwonka aha mutiimbi w’ezaabu, naaba naareeba ngu ezaabu ei yaatunga neeshashura amaani agu ataire omu kutiimba.

Omuntu naaba aine kuteeraho munonga yaaheza kwega “eby’okubandizaho ebya Kristo.” (Heb. 6:1, 2) Oine kukora n’amaani kugira enshonga nsya ezi waayega waaba nooyeyegyesa Baibuli. Mbwenu shi, noobaasa kukora ki kuhamya ngu okushoma Baibuli kwawe kwaguma nikurugamu ebirungi n’obu waakuba otwire nooshwijuma Ebyahandiikirwe kumara emyaka mingi?

Guma oine ekihika ky’okwega. Taho omutima kumanya ebirikukiraho. Guma nootamu amaani, noija kubona Ebyahandiikirwe eby’omuhendo ebirikukwata aha bwengye bwa Ruhanga n’obuhabuzi bwe. (Rom. 11:33) Kubaasa kwongyera aha kumanya kwawe okw’Ebyahandiikirwe, koresa gye ebitabo ebiriho omu rurimi rwawe. Gumisiriza waaba noosherura obuhabuzi n’eby’okugarukamu by’ebibuuzo ebirikukwata aha Baibuli. Buuza abandi kukugambira ebyahandiikirwe n’ebicweka ebyabahwereire kandi bikabagumya. Gambiraho abandi enshonga ezi otungire omu kweshomesa Ekigambo kya Ruhanga.

Kwonka ekigyendererwa kyawe ti kumanya bintu bingi kwonka. Entumwa Paulo akarabura ati: “Obwengye bureeta okwetunguura.” (1 Kor. 8:1) N’ahabw’ekyo, teeraho kuguma ori omucureezi kandi ohami omu kwikiriza. Okugira okuramya kw’eka n’okushoma Baibuli otarikwosha nibibaasa kukuhwera kugyendera aha mitindo ya Yehova, kandi bikuhigye kuhwera abandi. Okukira munonga, noija kushemererwa ahabw’okugira ngu otungire ekintu ekirikukirira kimwe ezaabu.—Enf. 3:13, 14.