KUKABA kuri Okwaikumi-na-kumwe 1932 omu rurembo Mexico, orurikutuurwamu abantu baingi abarikurenga akakaikuru kamwe. Saabiiti emwe enyima, omu rurembo orwo nibwo baabaire baherize kutamu ebitaara by’okuhabura ebiiruka. Kwonka hati abantu bakaba bainiire ekindi kintu ekihika. Ab’amakuru bakaba bari aha gaari y’omwika bategyereize omugyenyi ow’omutaano kuhikaho. Akaba ari oha? Akaba ari Joseph F. Rutherford, owaabaire ari omwebembezi wa Watch Tower Society. Abajurizi ba Yehova omuri Mexico nabo bakaba bategyereize Ow’eishe-emwe Rutherford kumwakiira, owaabaire aizire aha ruteerane oruhango orw’ebiro bishatu.

Akatabo The Golden Age kakagira kati: “Hatariho kubangaanisa oruteerane oru nirwija kuza omu byafaayo nk’omukoro gw’omutaano” omu kuteeraho kujanjaaza amazima omuri Mexico. Kwonka oru rukaba ruri oruteerane rukye orwabaire niruza kubamu abantu 150. Mbwenu shi ahabw’enki rwabaire niruza kuba orw’omutaano?

Oruteerane orwo rutakabaireho, amazima gakaba gatakajaanjaire omuri Mexico. Kuruga 1919, hakaba nihabayo enteerane enkye, kwonka bwanyima y’omwaka ogwo ebibiina bikatuuba. Ku twatungire ofiisi y’eitaagi omu rurembo Mexico omuri 1929, okaba nooshusha ngu embeera neeza kuba nungi, kwonka nabwo hakaba hakiriho oburemeezi bw’okusingura. Ekibiina kikaba kigambiire baapayoniya kutajwanzya eby’obushuubuzi n’okubuurira. Omwe ahari baapayoniya aba, akagira ekiniga kingi yaaruga omu mazima yaatandikaho guruupu eye ey’okwega Baibuli. Kandi omu bwire obwo, owaabaire naayebembera ofiisi y’eitaagi ahabw’emitwarize ye mibi, omu mwanya gwe bakatamu ondiijo. Abajurizi ba Yehova abeesigwa omuri Mexico bakaba baine kugumibwa.

Obu Ow’eishe-emwe Rutherford yaabaire ataayaayire, akagumya munonga abeesigwa aba arikuha embazo ibiri aha ruteerane oruhango n’ezindi embazo itaano ezaahuriirwe aha radiyo. Ogu gukaba guri omurundi gw’okubanza ab’eishe-emwe kukoresa radiyo kujanjaaza amakuru marungi omuri Mexico. Bwanyima y’oruteerane oru oruhango, hakatooranwa orikureeberera ofiisi y’eitaagi omusya kutebeekanisa omurimo. Hati Abajurizi ba Yehova bakaba baine omujinya, kandi ahabwa Yehova kubasiima, bakagumizamu nibabuurira.

Omwaka ogwakuratsireho, 1933, hakabaho enteerane empango ez’ebiro bishatu ibiri omu ihanga eri, orumwe omuri Veracruz kandi orundi omu rurembo Mexico. Ab’eishe-emwe bakaba nibakora n’amaani omu kubuurira, kandi bakaba nibatunga ebirungi. Nk’eky’okureeberaho, omuri 1931 omuri Mexico hakaba hariyo ababuurizi 82. Kuza kuhika 1941, ababuurizi abo bakaba nibabazamu emirundi 10! Abantu nka 1,000 bakaija omu rurembo Mexico ahabw’oruteerane orwabaireho omuri 1941.

Omuri 1943 Abajurizi ba Yehova bakatandika kurangirira Oruteerane Oruhango “Amahanga Againe Obugabe,”  orwabaire niruza kuba omu ndembo 12 eza Mexico. * (Reeba obugambo obw’ahansi.) Bakakora eki barikujwara ebipande ebiine embaju ibiri. Bakaba bakwatanisa ebipande bibiri biriho ebigambo reero babijwara, ekimwe kiza omu maisho ekindi kiza omu mugongo. Abajurizi ba Yehova bakaba batwire nibakoresa ebipande nk’ebi kurangirira enteerane zaabo empango kuruga 1936.

Okurangirira barikukoresa ebipande kikakora gye omu rurembo Mexico reero akatabo La Nación kaahandiika aha ruteerane oruhango orw’Abajurizi ba Yehova kati: “Eizooba ry’okubanza, bakashabwa kweta abantu baingi. Eizooba rya kabiri, abantu bakaba nibakira omwanya gw’oruteerane.” Ekelezia y’Abakaturiki terashemereirwe ahabw’obusinguzi obu, n’ahabw’ekyo bakahakanisa Abajurizi ba Yehova. Kwonka ab’eishe-emwe na banyaanyazi-itwe bakaba batatiinire. Bakagumizamu nibarangirira oruteerane. Ekicweka ekindi omu katabo La Nación kikagira kiti: “Orurembo rwona rukabareeba.” Kakagira ngu ab’eishe-emwe na banyaanyazi-itwe bakaba “bakahindwirwa ebipande b’embaju ibiri eby’okurangirira.” Kandi ekicweka eki kikooreka n’ekishushani ky’ab’eishe-emwe bari aha nguuto z’orurembo Mexico. Ahansi aha kishushani hakaba hariho ebigambo: “Okutaahirira Enguuto.”

Omu myaka egyo, Abajurizi ba Yehova abaingi bakaba beefeerereza munonga kuza omu nteerane empango omuri Mexico. Ab’eishe-emwe na banyaanyazi-itwe abaingi bakaba nibaruga omu byaro bya hare n’oruguuto rw’egaari y’omwika nari oruguuto rwona. Ekibiina kimwe kikahandiika kiti: “Ekintu kyonka ekirikuraba haihi n’omwanya ogu n’ebikondo by’esimu.” N’ahabw’ekyo abarikuza aha ruteerane bakaba baine kuvuga endogoya zaabo nari bakagyendesa ebigyere kumara ebiro bingi kubaasa kuhika aha gaari y’omwika kubatwara omu rurembo orurimu oruteerane oruhango.

Abajurizi ba Yehova abaingi bakaba bari abooro, bakaba bazayo aha nteerane ezi ahari bugyengye. Ku baabaire bahikayo, baingi bakaba baraara n’ab’eishe-emwe abari omu rurembo orwo, abaabaire babakorera obufura kandi bakabooreka rukundo. Abandi bakaba baraara omu Byombeko by’Obukama. Omurundi gumwe, ab’eishe-emwe nka 90 bakaraara aha ofiisi y’eitaagi, reero baabyama aha bibokisi by’ebitabo. Yearbook ekagira ngu ab’eishe-emwe bakasiima munonga ahabw’okugira ngu ebibokisi “byorobi kandi birikutagata kukira ahansi aha siminti.”

Ab’eishe-emwe abo bakaba nibareeba ngu okuteeranira hamwe na bagyenzi baabo kikaba nikikira ebi baayefeereize byona. Hati, omuri Mexico hariyo Abajurizi ba Yehova abarikurenga 850,000, kandi bakiine omutima gw’okusiima nk’ogwo. * (Reeba obugambo obw’ahansi.) Ripoota eyaabaire eri omu Yearbook eya 1949 ekagira ngu okwefeerereza oku ab’eishe-emwe baakozire, tikuratuubize aha mujinya ogu baine omu kuramya Yehova. Ku baabaire bagira oruteerane oruhango “bwanyima nikyo baabaire baguma nibagambaho omu kugaaniira kwabo kumara obwire buraingwa.” Ekibuuzo eki ab’eishe-emwe baabaire baguma nibeebuuza buri kaanya n’eki: “Nituza kutunga ryari oruteerane orundi oruhango?”—Kuruga omu Bi Twabiikire omu America eya Rwagati.