1, 2. (a) Nitumanya tuta ngu nikibaasika itwe kujwara omuntu omusya? (b) Ni mitwarize ki ey’omuntu omusya eri omu Abakolosai 3:10-14?

OMU New World Translation of the Holy Scriptures, nitushangamu ekigambo “omuntu omusya” emirundi ebiri. (Abaefeso 4:24; Abakolosai 3:10) Eki nikimanyisa emitwarize ‘eyahangirwe omu nshusha ya Ruhanga.’ Mbwenu shi nikibaasika kujwara omuntu ogu omusya? Eego. Yehova akahanga abantu omu nshusha ye, n’ahabw’ekyo nitubaasa kugira emitwarize mirungi nk’eye.—Okutandika 1:26, 27; Abaefeso 5:1.

² N’amazima tukahungura obutahikiirira, twena obumwe nitugira ebiteekateeko ebitahikire. Kandi nituhindurwa embeera ezitwetooroire. Kwonka ahabw’embabazi za Yehova n’obuhwezi bwe, nitubaasa kuhinduka tube abantu abu arikwenda ngu tube. Kubaasa kutuhwera kumariirira kukora eki, ka tugambe aha mitwarize mingi ey’omuntu omusya. (Shoma Abakolosai 3:10-14.) Bwanyima nitwija kureeba oku turikubaasa kworeka emitwarize egi omu kubuurira.

3. Ni mutwarize ki gumwe ogw’omuntu omusya?

³ Paulo akashoboorora ngu okutashoroora n’omutwarize mukuru ogw’omuntu omusya. Akagira ati: “Tihariho Mugriika n’obu yaakuba n’Omuyudaaya, oshazirwe n’otashazirwe, omunyamahanga, n’Omusikuusi, omuhuuku n’ow’obusingye.” * (Reeba obugambo obw’ahansi.) Omu kibiina, tihaine oine kuteekateeka ngu naakira abandi ahabw’erangi, oruganda, nari ahabw’obujunaanizibwa obu aine. Ahabw’enki? Ahakuba itwe abakuratsi ba Kristo, ‘twena turi bamwe.’—Abakolosai 3:11; Abagalatia 3:28.

4. (a) Abaheereza ba Yehova baine kutwariza bata abandi? (b) Ni mbeera ki erikubaasa kushiisha obumwe bw’Abakristaayo?

⁴ Ku turikujwara omuntu omusya, nitutwariza abandi omu muringo gw’embabazi, n’obu baakuba batarikushushanisa erangi n’ahu barikuruga. (Abarooma 2:11) Omu bicweka ebimwe eby’ensi, eki nikibaasa kuba kigumire. Nk’eky’okureeberaho, ira omuri South Africa, gavumenti ekaba etaho emyanya y’okutuuramu ey’abantu b’erangi zitarikushushana. Abantu baingi omu ihanga eryo, otwariiremu n’Abajurizi ba Yehova, nibakituura omu myanya egyo. Akakiiko Akareeberezi kakaba nikenda kuhwera ab’eishe-emwe ‘kushashaanuka.’ N’ahabw’ekyo omu Okwaikumi 2013, bakaikiriza ngu habeho entebeekanisa y’omutaano eyaabaire neija kuhwera ab’eishe-emwe abatarikushushanisa erangi kumanyana gye.—2 Abakorinso 6:13.

5, 6. (a) Ni ntebeekanisa ki eyaakozirwe omu ihanga rimwe kuhwera ab’eishe-emwe kweyongyera kugira obumwe? (Reeba ekishushani aha kutandika.) (b) Hakarugamu birungi ki?

⁵ Ab’eishe-emwe bakakora entebeekanisa kugira ngu omu wiikenda ezimwe, Abajurizi ba Yehova ab’ebibiina bibiri eby’endimi zitarikushushana nari erangi zitarikushushana babeho hamwe. Ab’eishe-emwe na banyaanyazi-itwe kuruga omu bibiina byombi bakaba babuurira hamwe, baza omu nteerane hamwe, kandi bataayaayirana omu maka gaabo. Ebibiina bingi bikeejumba omu ntebeekanisa egi, kandi ofiisi y’eitaagi ekatunga ripoota nungi ezaarugiremu. Nangwa kikashemeza na bamwe abaabaire batari Bajurizi ba Yehova. Nk’eky’okureeberaho, omwebembezi w’ediini omwe akagira ati: “Ti ndi Mujurizi wa Yehova, kwonka niinyenda kugira ngu mwine entebeekanisa nungi munonga y’omurimo gw’okubuurira, kandi mwine obumwe.” Ab’eishe-emwe na banyaanyazi-itwe bakeehurira bata ahabw’entebeekanisa egi?

⁶ Omu kubanza, munyaanyazi-itwe orikwetwa Noma owaabaire naagamba orurimi Orukhosa akaba atiinire munonga kutaayaayisa ab’eishe-emwe kuruga omu kibiina ky’Orungyereza omu ka ye nkye. Kwonka bwanyima y’okubuurira n’ab’eishe-emwe kuruga Buraaya kandi akabataayaayira omu  maka gaabo, akahurira yaikaikana. Akagira ati: “N’abantu ba butoosha nkaitwe!” N’ahabw’ekyo ab’eishe-emwe na banyaanyazi-itwe kuruga omu kibiina ky’Orungyereza ku baizire kubuurira n’ekibiina kya Khosa, Noma akeeta bamwe aharibo kwija owe kutunga eky’okurya. Akashemererwa kureeba omwe aha bagyenyi be, omureeberezi kuruga Buraaya, yaashitama ahansi aha kureeti. Nitusiima entebeekanisa egi, ahakuba ab’eishe-emwe na banyaanyazi-itwe baingi bakatunga abanywani baingi kandi baagumizamu kumanyana gye.

7. Ahabw’enki twine kuguma nitugirira abandi esaasi?

⁷ Ensi ya Sitaane yaaba etakacwekyereziibwe, abaheereza ba Yehova nibiija kuguma nibahikwaho oburemeezi. Okuburwa emirimo, endwara z’amaani, okuhiiganisibwa, ebihikiirizi, okufeerwa ebintu ahabw’okuhenda ebiragiro, nari embeera ezindi ezigumire twena nibibaasa kutuhikaho. Kubaasa kuhwera buri omwe omu bwire bw’oburemeezi, twine kugirirana esaasi. Esaasi niziija kutuhwera kutwariza abandi omu muringo gw’embabazi. (Abaefeso 4:32) Emitwarize egi n’emwe aha y’omuntu omusya. Neija kutuhwera kutooreza Ruhanga n’okuhuumuriza abandi.—2 Abakorinso 1:3, 4.

8. Ni bintu ki ebirungi ebirikubaasa kubaho twagirira ab’omu kibiina esaasi? Ha eky’okureeberaho.

⁸ Nitubaasa kugirira esaasi tuta ab’omu kibiina kyaitu abarikuruga omu mahanga agandi nari abaine oburemeezi? Nitwenda kubaakiira, kuba banywani baabo, kandi tubahwere kureeba ngu nibeetengwa omu kibiina. (1 Abakorinso 12:22, 25) Nk’eky’okureeberaho, Dannykarl akaza Japan arikuruga omuri Philippines. Ahabw’okugira ngu akaba naaruga omu ihanga erindi, akaba atarikutwarizibwa nk’abandi bakozi aha murimo. Bwanyima akaza omu nteerane z’Abajurizi ba Yehova. Dannykarl naagira ati: “Haihi boona abaabaire bariho bakaba bari Abajapani, kwonka bakanyakiira gye, orikushusha oti batwire barikumanya.” Ab’eishe-emwe ahabw’okugira embabazi bakaguma nibamuhwera kwirira haihi Yehova. Ku haahingwireho obwire, Dannykarl akabatizibwa, kandi hati n’omureeberezi omu kibiina. Abareeberezi bagyenzi be nibashemererwa ahabw’okureeba ngu we n’omukazi we Jennifer bari omu kibiina kyabo kandi nibagira bati: “Ni baapayoniya abarikumarwa na bikye kandi n’eky’okureeberaho kirungi eky’okubanza kusherura eby’Obukama.”—Luka 12:31.

9, 10. Ha eby’okureeberaho by’ebirungi ebirikuruga omu kugira esaasi omu kubuurira.

⁹ Twine omugisha gw’okukorera “gye abantu boona” twaba nitubuurira amakuru marungi g’Obukama. (Abagalatia 6:10) Abajurizi ba Yehova baingi nibagirira embabazi abafuruki kandi bateeraho kwega orurimi rwabo. (1  Abakorinso 9:23) Okuteeraho kwabo kurugiremu ebirungi bingi. Nk’eky’okureeberaho, munyaanyazi-itwe Tiffany ori payoniya omuri Australia akeega Oruswahili kugira ngu ahwere ekibiina ekirikukoresa Oruswahili omu rurembo Brisbane. N’obu okwega orurimi kyabaire kitoorobi, abaasize kugira ekigyendererwa n’okumarwa. Tiffany naagira ati: “Waaba nooyenda kutunga okushemererwa omu kubuurira, okuheereza omu kibiina  ekirikukoresa orurimi orundi ni kirungi ahariiwe. Ni nk’okugyenda orugyendo beitu otarikuruga omu rurembo rw’owaanyu. Noomanya obumwe obu twine omu nsi yoona kandi oreebe oku obumwe obwo burikukuhwera.”

¹⁰ Eka omuri Japan ekakora nikyo kimwe. Muhara waabo Sakiko, naagira ati: “Butoosha tukaba tubugana abafuruki kuruga Brazil obwo turi omu kubuurira. Ku twabaire tubooreka ebyahandiikirwe kuruga omu Baibuli yaabo ey’Orupotuguezi, nk’Okushuuruurwa 21:3, 4 nari Zaaburi 37:10, 11, 29, bakaba bahurikiza gye kandi obumwe barira.” Eka egi ekagirira esaasi abafuruki abo kandi yaayenda n’okubahwera kwega amazima, bakatandika kwega Orupotuguezi. Bwanyima, eka egyo ekahwera kutandikaho ekibiina ky’Orupotuguezi. Kumara emyaka mingi, bahwereire abafuruki baingi kuba abaheereza ba Yehova. Sakiko naagira ati: “Gukaba guri omurimo gw’amaani kwega Orupotuguezi, kwonka emigisha erugiremu neekira ebi twayefeerereize. Nitusiimira kimwe Yehova.”—Shoma Ebyakozirwe 10:34, 35.

11, 12. (a) Ahabw’enki twine kugira ekigyendererwa kirungi ky’okujwara omuntu omusya? (b) Niki ekiraatuhwere kuguma turi abacureezi?

¹¹ Ekigyendererwa kyaitu ky’okujwara omuntu omusya kiine kuba eky’okuhaisa Yehova ekitiinisa, beitu kutari kuba naitwe twahimbisibwa. Ijuka ngu na maraika ohikiriire akagira omwetunguuro kandi yaashiisha. (Gyeragyeranisa Ezekieli 28:17.) Tituhikiriire, n’ahabw’ekyo nikibaasa kutugumira kwetantara amaryo. Kwonka nabwo, nitubaasa kujwara obucureezi. Niki ekiraatuhwere kukora eki?

¹² Ekintu kimwe ekiraatuhwere kuba abacureezi n’okushoma Ekigambo kya Ruhanga buri izooba kandi tukateekateeka aha bi turikushoma. (Eky’Ebiragiro 17:18-20) Okukira munonga twine kuteekateeka aha bi Yesu yaatwegyeise n’aha ky’okureeberaho kye ky’omutaano eky’obucureezi. (Matayo 20:28) Yesu akaba ari omucureezi kyamureetera kunaabisa abeegi be ebigyere. (Yohaana 13:12-17) Ekindi eki turikubaasa kukora n’okushaba Yehova akatuha omwoyo gwe ogurikwera. Omwoyo gwe nigubaasa kutuhwera kurwanisa omuze gwona ogw’okuteekateeka ngu nitukira abandi.—Abagalatia 6:3, 4; Abafilipi 2:3.

13. Ni migisha ki erikuruga omu kuba abacureezi?

 ¹³ Shoma Enfumu 22:4. Yehova naayenda ngu tube abacureezi. Obucureezi nibureeta emigisha mingi. Twaba turi abacureezi, ekibiina nikiija kugira obusingye n’obumwe. Ekindi, Yehova naija kutugirira embabazi ze ezitatushemereire. Entumwa Petero akagira ati: “Mwena mwezirikye obucureezi, mubone kuheerezana; ahakuba Ruhanga arwanisa ab’amaryo, kwonka abacureezi abaha omugisha.”—1 Petero 5:5.

14. N’oha orikukirayo kuba eky’okureeberaho kirungi eky’okutwaza gye n’okugumisiriza?

¹⁴ Omu nsi obunaku obu, omuntu yaaba naatwaza gye kandi arikugumisiriza, abandi nibakira kuteekateeka ngu n’ekinyabwoba. Kwonka ekyo tikihikire. Emitwarize mirungi egi neeruga ahari Yehova, orikukirayo omu nsi n’omu iguru. N’eky’okureeberaho ekirikukirayo oburungi omu kutwaza gye n’okugumisiriza. (2 Petero 3:9) Nk’eky’okureeberaho, teekateeka aha ku Yehova yaagumisiriize obu yaagarukamu Abrahamu na Looti arikukoresa baamaraika be. (Okutandika 18:22-33; 19:18-21) Kandi teekateeka aha ku Yehova yaagumisiririize eihanga rya Israeli erigomi kumara emyaka erikurenga 1,500.—Ezekieli 33:11.

15. Yesu akataho ky’okureeberaho ki eky’okutwaza gye n’okugumisiriza?

¹⁵ Yesu akaba ‘naatwaza gye.’ (Matayo 11:29) Akaba agumisiriza enshobi z’abeegi be. Obu yaabaire naaheereza omu nsi, bakaba bakira kumutwariza kubi kandi bamugambaho ebitahikire. Kwonka akaba atwaza gye kandi akagumisiriza okuhitsya aha kufa. Obu Yesu yaabaire ari omu busaasi bwingi aha muti, akashaba Ishe ngu asaasire abashaija abaamwitsire. Akagira ati: “Tibarikumanya ki barikukora.” (Luka 23:34) Nangwa n’obu Yesu yaabaire aine okwerarikirira n’obusaasi bwingi, akaguma naatwaza gye kandi arikugumisiriza.—Shoma 1 Petero 2:21-23.

16. Nitubaasa kworeka tuta ngu nitutwaza gye kandi ngu nitugumisiririza abandi?

¹⁶ Paulo akagamba aha muringo gumwe ogu turikubaasa kutwazamu gye kandi tukaba abacureezi obu yaahandiika ati: “Nimugumisiririzana; kandi ku haraabe hariho oine eki arikufa na mugyenzi we, musaasirane; nk’oku Mukama yaabasaasiire, mube nikwo mwatwaza.” (Abakolosai 3:13) Kubaasa kusaasira abandi, twine kuba nitutwaza gye kandi twine okugumisiriza. Eki nikiija kureetaho obumwe omu kibiina kandi bugumemu.

17. Ahabw’enki okutwaza gye n’okugumisiriza biri bikuru?

¹⁷ Yehova naayenda ngu tutwarize gye abandi kandi tubagumisirize. Emitwarize egi ni mikuru twaba nitwenda kutuura omu nsi ensya. (Matayo 5:5; Yakobo 1:21) Twaba nitutwaza gye kandi turikugumisiriza, nituha Yehova ekitiinisa kandi tuhwera n’abandi kukora nikyo kimwe.—Abagalatia 6:1; 2 Timoseo 2:24, 25.

18. Rukundo n’okutashoroora biine kakwate ki?

¹⁸ Emitwarize yoona ei twagambaho eine akakwate na rukundo. Nk’eky’okureeberaho, entumwa Yakobo akaba aine kuha obuhabuzi ab’eishe-emwe ahakuba bakaba nibatwariza gye abagaiga okukira abooro. Akashoboorora ngu ekyo kikaba nikihakanisa ekiragiro kya Ruhanga ekirikugira ngu “okunde mutaahi waawe nk’oku oyekunda.” Reero yaayongyeraho ati: “Ku murikushoroora omu bantu, nimuba musiisire.” (Yakobo 2:8, 9) Twaba nitukunda abantu, titurikwija kushoroora omuntu weena ahabw’obwegyese bwe, erangi ye, nari omwanya ogu aine. Titurikubaasa kweshushaniriza nk’abatarikushoroora. Okutashoroora kwine kuba okwabuzima ahariitwe.

19. Ahabw’enki ni kikuru ngu tujware rukundo?

¹⁹ Okukunda “kugumisiriza, kugira embabazi” kandi “tikwetunguura.” (1 Abakorinso 13:4) Twine kuba abagumisiriza, abanyambabazi, kandi abacureezi kubaasa kugumizamu nitubuurira abataahi amakuru marungi. (Matayo 28:19) Emitwarize egi neetuhwera kukwatanisa gye n’ab’eishe-emwe na banyaanyazi-itwe boona omu kibiina. Twena twagira rukundo nk’egyo, ebibiina byaitu nibiija kugira obumwe, kandi nitwija kuhaisa Yehova ekitiinisa. Abandi nibaija kureeba obumwe bwaitu kandi nibaija kwija omu mazima. N’ahabw’ekyo Baibuli neehendera erikushoboorora aha muntu omusya eti: “Okwongyera ahari ebyo byona, mujware okukunda, nikwo kukomerana byona bikakwatanisibwa kimwe.”—Abakolosai 3:14.

20. (a) Twine kwebuuza bibuuzo ki, kandi ahabw’enki? (b) Niki eki twiniire ekihika omu biro by’omumaisho?

²⁰ Twena twine kwebuuza tuti: ‘Ni mpindahinduka ki ezi nkiine kukora kubaasa kujuura omuntu owa ira okutagarukaho?’ Twine kushaba Yehova kandi tukamweshengyereza kutuhwera. Twine kuteeraho munonga kuhindura emiteekateekyere yaitu egwire nari ebikorwa byaitu kugira ngu tubaase ‘kuhungura Obukama bwa Ruhanga.’ (Abagalatia 5:19-21) Kandi nabwo twine kwebuuza tuti: ‘Ningumizamu kuhindura omu miteekateekyere yangye kugira ngu mbaase kushemeza Yehova?’ (Abaefeso 4:23, 24) Twena tituhikirire, n’ahabw’ekyo twine kukora n’amaani kujwara omuntu omusya kandi tukaguma tumwine. Eki n’ekintu ekirikugumizamu. Ka nigaija kuba gari amagara marungi buri omwe ku araajware omuntu omusya kandi akatooreza gye emitwarize mirungi ya Yehova!