1, 2. (a) Niki ekirikubaasa kureetera omuntu kwebuuza ngu “ndyahitsya hi?” (b) Eby’okureeberaho by’abaheereza ba Yehova abeesigwa nibituhiga kukora ki hati?

“BIRYAHITSYA ryari?” Nari shi “ndyahitsya ryari?” Ebi n’ebibuuzo ebi baanabi abeesigwa Isaaya na Habakuuki baabuurize. (Isaaya 6:11; Habakuuki 1:2) Obu Omugabe Daudi yaahandiika Zaaburi eya 13, akabuuza ekibuuzo nk’ekyabo emirundi ena. (Zaaburi 13:1, 2) Kandi obu abantu abataine kwikiriza baayetoorora Yesu, akababuuza ati: “Ndyahitsya hi?” (Matayo 17:17) Naitwe obunaku obu nitubaasa kweshanga turikubuuza ekibuuzo nk’ekyo.

² Niki ekirikubaasa kureetera omuntu kwebuuza ngu “ndyahitsya hi?” Naabaasa kubuuza ekibuuzo nk’eki obundi yaahikwaho obutari buringaaniza. Nari shi yaaba arwaire nari akuzire munonga. Nitubaasa kuba twine amaganya ahabw’okugira ngu turi omu ‘biro by’akabi kaingi’ ebigumire kwemera. (2 Timoseo 3:1) Nari ahabw’okugira ngu emiteekateekyere mibi y’abantu abari omu nsi neetureetera kuruha n’okwetamwa. Yaaba  twebuuza ekibuuzo eki ahabwa nshonga ki, nikigaruramu amaani kumanya ngu Yehova taragiriire kiniga abaheereza be aba ira ku baabuurize ekibuuzo eki.

3. Niki ekirikubaasa kutuhwera twaba turi omu mbeera egumire?

³ Niki ekirikubaasa kutuhwera twaba turi omu mbeera egumire? Yakobo murumuna wa Yesu akahwerwa Ruhanga kuhandiika ati: “B’eishe-emwe, mugumisirize okuhitsya ahu Mukama waitu ariizira.” (Yakobo 5:7) N’ahabw’ekyo twena twine kugumisiriza. Kwonka shi okugumisiriza niki, kandi nitubaasa kworeka tuta omutwarize murungi ogu?

4, 5. (a) Okugumisiriza niki, kandi nitubaasa kuba tuta abagumisiriza? (b) Yakobo naashoboorora ata okugumisiriza? (Reeba ekishushani aha kutandika.)

⁴ Baibuli neegira ngu okugumisiriza n’omutwarize gw’omwoyo gwa Ruhanga ogurikwera. Twaba tutaine obuhwezi bwa Ruhanga, itwe abantu abatahikiriire nikibaasa kutugumira kugumisiriza omu mbeera egumire. Okugumisiriza n’ekiconco kuruga ahari Ruhanga, kandi nituhamya ngu nitukunda Yehova n’abandi twagumisiriza. Twaba tutari bagumisiriza, rukundo ei twiniire abandi neehwa amaani. (1 Abakristaayo 13:4; Abagalatia 5:22) Okugumisiriza nikutwariramu ki? Nikutwariramu okwemera embeera egumire oine emiteekateekyere mirungi. (Abakolosai 1:11; Yakobo 1:3, 4) Kandi okugumisiriza nikutuhwera kuguma turi abeesigwa ahari Yehova n’obu twakuba twine buremeezi ki. Okugumisiriza nikutuhwera kuteeshashuza twabonabonesibwa. Baibuli neegira ngu twine kuba tweteekateekire kutegyereza. Eri n’eishomo rikuru eri turikwega omuri Yakobo 5:7, 8. (Kishome.)

⁵ Ahabw’enki tushemereire kuba tweteekateekire kutegyereza Yehova kugira eki yaakora? Omwegi Yakobo naagyeragyeranisa embeera yaitu aha y’omuhingi. N’obu omuhingi arikukora n’amaani kubyara ekihingwa, tarikubaasa kutegyeka embeera y’obwire nari kurahutsya okukura kw’ekihingwa. Naaba aine kugumisiriza akategyereza ‘ebi yaahingire eby’obuguzi bwingi.’ Omu muringo nigwo gumwe, hariho ebindi bingi ebi tutarikubaasa kutegyeka twaba tutegyereize ebi Yehova yaaraganiise kuhikiirira. (Mako 13:32, 33; Ebyakozirwe 1:7) Okushushana n’omuhingi, twine kutegyereza tugumisiriize.

6. Nitubaasa kwegyera ki ahari nabi Miika?

⁶ Nabi Miika akagumisiririza embeera egumire, nk’oku naitwe turikukora ebiro ebi. Akabaho omu bunaku obu Omugabe Ahazi yaabaire naategyeka. Ahazi akaba ari omugabe mubi munonga. N’ekyarugiremu, eihanga ryona rikaba ririmu obushomankuzi. Embeera ekaba eri mbi munonga Baibuli yaahika n’aha kugira ngu abantu ‘ekibi bakaba nibakikoresa obweziriki’ nari bakaba bari abahangu omu kukora ekibi. (Shoma Miika 7:1-3.) Miika akaba naamanya ngu tarikubaasa kuhindura embeera egyo. Mbwenu shi, akaba aine kukora ki? Naatugambira ati: “Nyowe amaisho gangye ndyagata ahari” Yehova, “ntegyereze Ruhanga w’okujunwa kwangye. Ruhanga wangye aryampurira.” (Miika 7:7) Naitwe nka Miika, twine kwega kutegyereza.

7. Ahabw’enki tushemereire kukora ekirikukira aha kutegyereza Yehova kuhikiiriza ebi yaaraganiise?

⁷ Twaba twine okwikiriza nk’okwa Miika, nitwija kuba tweteekateekire kutegyereza Yehova. Embeera yaitu teri nk’ey’omuntu orikuba ari omu kihome ategyereize eizooba  obu baraamwite. Naaba naagyemwa kutegyereza, naaba ataine kihika ky’okureeba izooba eryo nirihika. Embeera yaitu neetaana n’egyo! Tweteekateekire kutegyereza Yehova ahabw’okuba nitumanya ngu omu bwire bwenyine obuhikire, naija kuhikiiriza eki yaaturaganiise eky’okutuha amagara agatahwaho! N’ahabw’ekyo twine ‘kugumisiriza omuri byona n’okutaruha, twine okushemererwa.’ (Abakolosai 1:11, 12) Twaba tutegyereize, nitwegyendesereza kuteetomboita ngu Yehova tarikurahuka kugira eki yaakora. Twayetomboita, Yehova tarikwija kushemererwa.—Abakolosai 3:12.

8. Nitwegyera ki aha bashaija n’abakazi abeesigwa abaabaire bariho ira?

⁸ Niki ekirikwija kutuhwera kuba tweteekateekire kutegyereza? Nitubaasa kuteekateeka aha bashaija n’abakazi aba ira abaagumisiriize bategyereize Yehova kuhikiiriza ebi yaabaire abaraganiise. (Abarooma 15:4) Twaba nituteekateeka aha by’okureeberaho byabo, ni kirungi kwijuka obwire obu baamazire bategyereize, ahabw’enki baabaire beteekateekire kutegyereza, n’oku Yehova yaabahaire emigisha ahabw’okugumisiriza kwabo.

9, 10. Abrahamu na Saara bakategyereza Yehova kuhitsya ryari?

⁹ Teekateeka ahari Abrahamu na Saara. “Ahabw’okwikiriza n’okugumisiriza,” bakahungura “ebyaraganisiibwe.” Baibuli neegira ngu Abrahamu “ku yaaherize kugumisiriza,” Yehova akamuraganisa ngu naija kumuha omugisha amuhindure ishe w’eihanga rihango. (Abaheburaayo 6:12, 15)  Ahabw’enki Abrahamu yaabaire aine kugumisiriza? N’ahabw’okuba hakaba nihaza kuhinguraho obwire bwingi ekiraganiso ekyo kuhikiirira. Aha Nisani 14 omuri 1943 Yesu atakazairwe, Abrahamu na Saara na boona abaabaire bari omu ka yaabo bakambuka Omugyera Furaati baataaha omu Nsi Eyaaraganisiibwe. Kwonka bwanyima y’ekyo Abrahamu akaba aine kutegyereza emyaka 25 akabona kuzaara omutabani Isaaka, kandi akagaruka yaategyereza emyaka 60 endiijo abaijukuru Esau na Yakobo baabona kuzaarwa.—Abaheburaayo 11:9.

¹⁰ Mbwenu shi buzima Abrahamu akahungura Ensi Eyaaraganisiibwe? Baibuli neegira ngu Yehova “taragimuhairemu butaka, nangwa n’obu haakuba ah’okuta ekigyere; kureka akaraganisa kugimuha okuba obutaka bwe n’obw’abaana be bwanyima ye, n’obu araabe yaabaire ataine mwana.” (Ebyakozirwe 7:5) Bwanyima y’emyaka 430 Abrahamu aherize kwambuka Omugyera Furaati, baijukuru be nibwo baaba eihanga eryabaire niriija kutuura omu nsi egyo.—Okuruga 12:40-42; Abagalatia 3:17.

11. Ahabw’enki Abrahamu yaabaire ayeteekateekire kutegyereza, kandi naija kutunga migisha ki ahabw’okugumisiriza kwe?

¹¹ Abrahamu akaba ayeteekateekire kutegyereza ahakuba akaba naahamya ngu Yehova naija kuhamira aha ki araganiise. Akaba naikiririza omuri Yehova. (Shoma Abaheburaayo 11:8-12.) Abrahamu akashemererwa kutegyereza n’obu araabe atarareebire ebiraganiso bya Ruhanga byona nibihikiirira atakafiire. Kwonka teebereza oku Abrahamu araashemererwe ku araazookye kutuura omu paradiso ey’omu nsi. Naija kutangaara ku araashome ebirikumukwataho n’eka ye omu bitabo bingi bya Baibuli. * (Reeba obugambo obw’ahansi.) Teekateeka oku araashemererwe kumanya omwanya gwe mukuru omu kuhikiiriza ekigyendererwa kya Yehova aha bikwatiraine na Mesia owaabaire araganisiibwe! Nitubaasa kuhamya ngu naija kureeba ngu emigisha egyo ekaba eshemereire kutegyerezibwa.

12, 13. Ahabw’enki Yosefu yaabaire aine kugumisiriza, kandi akaba aine miteekateekyere ki emirungi?

¹² Yosefu mwijukuruza wa Abrahamu nawe akaba ayeteekateekire kandi akagumisiriza. Akahikwaho ebikorwa bibi by’obutari buringaaniza. Eky’okubanza, beene ishe bakamuguza nk’omuhuuku obu yaabaire aine emyaka nka 17. Bwanyima bakamubeiherera ngu akaba naateeraho kuhamba muka mukama we baahendera bamutaire omu kihome. (Okutandika 39:11-20; Zaaburi 105:17, 18) N’obu kiraabe kiri kityo, Yosefu akaba ari omuheereza wa Ruhanga omwesigwa, akaba naareebeka nk’oriyo naafubirwa omu mwanya gw’okuheebwa emigisha. Kwonka bwanyima y’emyaka 13, buri kimwe kikahinduka. Yosefu akaihwa omu kihome kandi yaaba owa kabiri omu bushoboorozi omuri Misri.—Okutandika 41:14, 37-43; Ebyakozirwe 7:9, 10.

¹³ Mbwenu shi obutari buringaaniza obwo bukareetera Yosefu kugirira Yehova ekiniga? Mbwenu shi akateekateeka ngu Yehova amurugireho? Ngaaha. Yosefu akategyereza n’okugumisiriza. Niki ekyamuhweraire? N’okwikiririza omuri Yehova. Akamanya ngu Yehova niwe ari omu bushoboorozi. Eki nitukireebera  aha ki yaagambiire beene ishe: “Mutatiina; nimugira ngu ndi omu mwanya gwa Ruhanga? Imwe enaama yaanyu ekaba eri ey’okunkora kubi, kwonka eya Ruhanga ekaba eri ey’okureeta ebirungi okukiza abantu baingi, ngu barekye kufa nk’oku kiri hati.” (Okutandika 50:19, 20) Yosefu akaba naamanya ngu emigisha ya Yehova eshemereire kutegyerezibwa.

14, 15. (a) Ahabw’enki okugumisiriza kwa Daudi nikushemeza? (b) Niki ekyahwereire Daudi kutegyereza agumisiriize?

¹⁴ Omugabe Daudi nawe akahikwaho obutari buringaaniza. Yehova akashuka amajuta ahari Daudi kuba omugabe wa Israeli obu yaabaire akiri muto. Kwonka Daudi akaba aine kutegyereza emyaka 15 atakabaire nangwa n’omugabe w’oruganda rwe. (2 Samueli 2:3, 4) Bumwe aha bwire obwo, Daudi akaba aine kuhunga arikweshereka Omugabe Saulo, owaabaire naateeraho kumwita. * (Reeba obugambo obw’ahansi.) N’ekyarugiremu, Daudi akaba ataine eka eye ahabwe. Akaba aine kutuura omu ihanga erindi nari omu nyanga z’amabaare omu ihamba. Ekyarugiremu, Saulo akaitirwa omu rutaro. Kwonka nabwo Daudi akaba aine kutegyereza emyaka erengire mushanju kubaasa kuba omugabe w’eihanga ryona erya Israeli.—2 Samueli 5:4, 5.

¹⁵ Ahabw’enki Daudi yaabaire ayeteekateekire kutegyereza agumisiriize? Naatuha eky’okugarukamu omu zaaburi ahu emirundi ena yaabuurize ati: “Ndyahitsya hi?” Naagira ati: “Kwonka nyesigire embabazi zaawe [okukunda kwawe okutahwaho], Omutima gwangye guryashemerererwa okujuna kwawe. Ndyayeshongorera Mukama, ahakuba akangirira embabazi nyingi.” (Zaaburi 13:5, 6) Daudi akaba naamanya ngu Yehova naamukunda kandi naija kuguma amuhamiireho. Akateekateeka aha mirundi ei Yehova yaabaire amuhwereire enyima, kandi yaareeba n’omumaisho obu Yehova yaakwihireho okugyezibwa. Daudi akaba naamanya ngu Yehova ahikire kutegyerezibwa.

16, 17. Yehova Ruhanga na Yesu Kristo bataireho bata eky’okureeberaho kirungi ky’okutegyereza?

¹⁶ Yehova tarikutushaba kukora ekintu eki we atarikwenda kukora. Ataireho eky’okureeberaho ekirikukirayo eky’okutegyereza. (Shoma 2 Petero 3:9.) Nk’eky’okureeberaho, enkumi n’enkumi z’emyaka enyima omu kibanja Edeni, Sitaane akoomesereza Yehova ngu ti muringaaniza. Yehova ‘naategyereza’ n’okugumisiriza kugira ngu eiziina rye riije ryezibwe omu bwijwire. Abo abarikutegyereza nibaija kutunga emigisha y’amaani.—Isaaya 30:18.

¹⁷ Yesu nawe akaba oyeteekateekire kutegyereza. Obu yaabaire ari omu nsi, akaguma ari omwesigwa kuhitsya aha kufa. Omu mwaka gwa 33, akaza omu iguru omu maisho ga Yehova yaahayo omuhendo gw’eshagama ye. Kwonka akaba aine kutegyereza kuhitsya  1914 kubona kutandika kutegyeka nk’Omugabe. (Ebyakozirwe 2:33-35; Abaheburaayo 10:12, 13) Kandi nabwo aine kutegyereza kuhitsya obu emyaka rukumi ey’okutegyeka kwe eraahendere, reero abazigu be boona bakabona kucwekyerezibwa. (1 Abakorinso 15:25) Obwo n’obwire buraingwa bw’okutegyereza, kwonka emigisha egyo buzima eshemereire kutegyerezibwa.

18, 19. Niki ekirikwija kutuhwera kuba tweteekateekire kugumisiriza?

¹⁸ Buzima, Yehova naayenda ngu tugumisirize, kandi tube tweteekateekire kutegyereza. Niki ekiraatuhwere kukora eki? Twine kushaba Ruhanga kutuha omwoyo gurikwera. Ijuka ngu okugumisiriza n’omutwarize gw’omwoyo gwa Ruhanga ogurikwera. (Abaefeso 3:16; 6:18; 1 Abatesalonika 5:17-19) N’ahabw’ekyo yeshengyereze Yehova kukuhwera kugumisiriza otegyereize!

¹⁹ Kandi, ijuka ekyahwereire Abrahamu, Yosefu, na Daudi kugumisiriza obwo bategyereize ebi Ruhanga yaabaraganiise kuhikiirira. Okwikiriza kwabo n’okwesiga Yehova nibyo byabahwereire. Bakaba batarikweteekateekaho bonka n’ebi baabaire nibenda. Twateekateeka aha birungi ebi baatungire, naitwe nikituhiga kugumisiriza tutegyereize.

20. Tushemereire kumariirira kukora ki?

²⁰ N’obu twakuba nitugyezibwa hati, tumaririire kuguma tutegyereize. Obumwe noobaasa kwebuuza oti: ‘Ninyija kutegyereza kuhitsya ryari, Yehova?’ (Isaaya 6:11) Kwonka ahabw’obuhwezi bw’omwoyo gwa Ruhanga ogurikwera, nitubaasa kutooreza nabi Yeremia reero tugire ngu Yehova “niwe mugabo gwangye; nikyo ndimugiriraho amatsiko” nari nkamutegyereza.—Okutonzya 3:21, 24.