1. Niki eki twena turikwendeza abanyabuzaare baitu?

“KURUGA obu naayega amazima, nkaba niinyenda ngu buri omwe omu ka yaitu atungye omugisha gw’okuba naanye omu Paradiso,” munyaanyazi-itwe Pauline * nikwo arikugira. “Okukira munonga nkaba niinyenda ngu ibanyi, Wayne, na mutabani waitu omuto banyegaiteho omu kuheereza Yehova.” Oine abanyabuzaare abatakamanyire Yehova bakamukunda? Obundi naiwe nka Pauline nooyenda ngu baheereze Yehova.

2. Nituza kushwijuma bibuuzo ki omu kicweka eki?

² Titurikubaasa kugyema abanyabuzaare baitu kwikiriza amakuru marungi, kwonka nitubaasa kubahiga kwigura ebiteekateeko byabo n’emitima yaabo kwikiriza obutumwa oburi omu Baibuli. (2 Tim. 3:14, 15) Ahabw’enki twine kubuurira abanyabuzaare baitu? Ahabw’enki twine kubatwariza omu muringo gw’embabazi? Nitubaasa kukora ki kuhwera abanyabuzaare baitu kukunda Yehova nkaitwe? Kandi boona omu kibiina kyaitu nibabaasa kutuhwera bata?

3. Kurugiirira ahari 2 Petero 3:9, ahabw’enki twine kubuurira abanyabuzaare baitu?

³ Juba, Yehova naija kucwekyereza ensi y’abantu ababi. Abo bonka abaine ekyetengo kihikire eky’okutunga amagara agatahwaho nibo barikwija kuhonokaho. (Byak. 13:48) Nitumara obwire bwingi n’amaani maingi turikubuurira abantu abu tutarikumanya gye abari omu kicweka kyaitu, n’ahabw’ekyo nikiba kihikire kwenda ngu abanyabuzaare baitu baheereze Yehova naitwe. Tataitwe owa rukundo Yehova, tarikwenda “muntu weena kuhwerekyerera,  kureka naayenda ngu boona bahikye aha kweteisa.”​—Shoma 2 Petero 3:9.

4. Twaba nitubuurira abanyabuzaare nitubaasa kugamba nabo mu muringo ki ogutahikire?

⁴ Twine kuguma nitwijuka ngu hariho omuringo oguhikire n’ogugwire ogw’okumanyisa abantu obutumwa bw’okujunwa. N’obu turaabe nitubaasa kuba abeegyendesereza twaba nitubuurira abu tutarikumanya, nitubaasa kugamba kabukunyukye twaba nitubuurira abanyabuzaare.

5. Twine kwijuka ki twaba nituteeraho kugaaniira n’abanyabuzaare aha mazima?

⁵ Baingi ahariitwe nitwijuka obu twabuurira abanyabuzaare baitu omurundi gw’okubanza, reero twefuuza ngu nangwa kuri twatwarize omu muringo gw’omutaano. Entumwa Paulo akaha Abakristaayo obuhabuzi obu: ‘Ebigambo byanyu bigume biri eby’embabazi, nk’ebirimu omwonyo, mubone kumanya oku mushemereire kugarukamu omuntu weena.’ (Kol. 4:5, 6) Ni kirungi kuguma nitwijuka obuhabuzi obu, twaba nitugaaniira n’abanyabuzaare. Kitari ekyo, nitubaasa kuhendera tubareeteire kwanga amazima omu mwanya gw’okugakunda.

6-7. Ha eky’okureeberaho ekirikworeka obukuru bw’okutwariza gye ou ori nawe omu bushwere otari mu mazima.

⁶ Bagirire esaasi. Pauline, owaaba yaagambirweho, naagira ati: “Omu kubanza nkaba niinyenda kugambira ibanyi aha bintu eby’omwoyo byonka. Tukaba tutarikukira kugaaniira aha bintu ebya butoosha.” Kwonka iba orikwetwa Wayne, akaba atarikumanya bingi ahari Baibuli, kandi akaba atarikwetegyereza ebi Pauline yaabaire naagambaho. Wayne we akaba naareeba ngu eki Pauline yaabaire naateekateekaho kyonka n’ediini ye. Akaba naatiina ngu omukazi we ayeegaitsire aha kabiina k’ediini ak’akabi, kandi ngu abeihirwe.

⁷ Pauline naikiriza ngu akaba naamara obwire  bwingi n’ab’eishe-emwe n’abanyaanyazi-itwe omu mwabazyo n’omuri wiikenda, omu nteerane, omu kubuurira, n’aha mikoro. “Wayne obumwe akaba aija omu ka ashanga ntariyo reero agira eihamba,” nikwo Pauline arikugira. Nikyetegyerezibwa kureeba ngu Wayne akaba ainiire omukazi we n’omutabani orushusho. Akaba atarikumanya abantu abu arikukira kuba ari nabo, kandi kikaba nikireebeka ngu banywani ba Pauline abasya n’ab’omuhendo munonga kukira Wayne. Akacwamu kutiinatiinisa Pauline kugaitururwa nawe. Mbwenu shi hariho emiringo ei Pauline yaabaire naabaasa kutwarizamu gye iba?

8. Kurugiirira ahari 1 Petero 3:1, 2, niki ekirikubaasa kukwata munonga aha banyabuzaare baitu?

⁸ Yoreka ngu nootwaza gye omu bikorwa. Obwire obwingi abanyabuzaare baitu nibareeba ebi turikukora kukira ebi turikugamba. (Shoma 1 Petero 3:1, 2.) Pauline akarugaho yaamanya amazima. Naagira ati: “Nkaba nimmanya ngu Wayne naatukunda, kandi akaba atarikwenda kugaitururwa naanye. Kwonka okutiinatiinisa kwe kukampwera kumanya ngu nyine kutandika kugyendera aha buhabuzi bwa Yehova oburikukwata aha bushwere. Omu mwanya gw’okugamba bingi, nkaba nyine kutaho eky’okureeberaho kirungi kurabira omu mitwarize yangye.” Pauline akarekyera aho kugyemesereza Wayne ngu agaaniire nawe ahari Baibuli, kandi akatandika kugaaniira nawe aha bintu ebya butoosha. Wayne akareeba omukazi we arikwongyera kuba ow’obusingye, kandi yaareeba n’omutabani arikutwaza gye. (Enf. 31:18, 27, 28) Wayne ku yaareebire oku obutumwa bw’Ekigambo kya Ruhanga burikuhwera eka ye, akaigura ebiteekateeko bye n’omutima gwe kubwikiriza.​—1 Kor. 7:12-14, 16.

9. Ahabw’enki twine kugumizamu nituhwera abanyabuzaare baitu?

 ⁹ Gumizamu nooteeraho kuhwera abanyabuzaare baawe. Yehova naatuteeraho eky’okureeberaho kirungi. ‘Akaguma’ naaha abantu omugisha gw’okuhurira amakuru marungi kugira ngu batungye amagara agatahwaho. (Yer. 44:4) Kandi entumwa Paulo akagambira Timoseo kugumizamu naahwera abandi. Ahabw’enki? Ahakuba omu kukora atyo, akaba naija kwejuna kandi ajune n’abarikumuhurikiza. (1 Tim. 4:16) Nitukunda abanyabuzaare baitu, n’ahabw’ekyo nitwenda ngu bamanye amazima agari omu Kigambo kya Ruhanga. Ebigambo bya Pauline n’ebikorwa bye bikarugaho byakwata aha ka ye omu muringo murungi. Hati aine okushemererwa ahabw’okuheereza Yehova hamwe na iba. Bombi ni baapayoniya, kandi Wayne n’omureeberezi.

10. Ahabw’enki twine kuba abagumisiriza?

¹⁰ Ba omugumisiriza. Twakora empindahinduka kuhikaana n’emitindo ya Ruhanga, nikibaasa kugumira abanyabuzaare baitu kwikiriza enyikiriza zaitu ensya n’emitwarize yaitu. Obwire obwingi, ekintu eki barikubanza kureeba n’okutabeegaitaho omu kukuza emikoro y’ediini n’ey’eby’obutegyeki. Omu kubanza abanyabuzaare baitu abamwe nibabaasa kutugirira ekiniga. (Mat. 10:35, 36) Kwonka titushemereire kurekyera aho kubahwera. Twarekyera aho kubahwera kwetegyereza amazima, nituba turi nk’abarikubacwera orubanja ngu tibashemereire kutunga amagara agatahwaho. Yehova tatuhaire obujunaanizibwa bw’okucwera abandi emanja, kureka omurimo ogwo aguhaire Yesu. (Yoh. 5:22) Twaba abagumisiriza, abanyabuzaare baitu nibabaasa kurugaho bahurikize obutumwa bwaitu.​—Reeba akabokusi “ Koresa Omukura Gwaitu Kwegyesa.”

11-13. Nooyegyera ki ahari Alice ahabw’oku yaatwariize abazaire be?

¹¹ Ba omwegyendesereza kwonka ogume ohami. (Enf. 15:2) Yetegyereze eky’okureeberaho kya Alice. Akeega ebirikukwata ahari Yehova ari hare n’abazaire be, abaabaire nibakunda eby’obutegyeki, kandi bataine diini. Akeetegyereza ngu ahonaaho aine kubagambira aha bintu birungi ebi yaabaire naayega. Alice naagira ati: “Waatuuraho kugamba empindahinduka ezi okozire omu nyikiriza zaawe, eka yaawe neija kushoberwa munonga.” Akahandiikira abazaire be ebaruha, yaababuuza emiteekateekyere yaabo aha birikugambwaho omu Baibuli ebi yaareebire ngu nibiija kubashemeza, nka rukundo. (1 Kor. 13:1-13) Akeebaza abazaire be ahabw’okumworora n’okumureeberera, kandi yaabatwekyera n’ebiconco. Ku yaabaire ataayaayiire abazaire be omuka, akakora kyona ekirikubaasika kuhwera nyina aha mirimo y’aha ka. Omu kubanza, abazaire be tibarashemereirwe Alice ku yaabagambiire enyikiriza ze ensya.

¹² Alice ku yaabaire ari omu ka n’abazaire be, akahamira aha ntebeekanisa ye ey’okushoma Baibuli. Naagira ati: “Eki kikahwera maawe kwetegyereza gye ahabw’enki Baibuli eri nkuru ahariinye.” Bwanyima, ishe Alice akacwamu kugira eki yaayega ekirikukwata aha Baibuli kubaasa kwetegyereza ahabw’enki omuhara ahindwire emiteekateekyere ye, kandi arikwenda kusherura n’enshobe omu Baibuli. Alice naagira ati: “Nkamuha Baibuli, kandi naamuhandiikira n’akabaruha naakatamu.” Hakarugamu ki? Ishe Alice omu mwanya gw’okureeba enshobe omu Kigambo kya Ruhanga, akakunda munonga ebi yaashomiremu.

¹³ Twine kuba abeegyendesereza kwonka tugume tuhamire, n’obu twakuba nitugyezibwa. (1 Kor. 4:12b) Nk’eky’okureeberaho, Alice akaba aine kwemera nyina ahabw’okumuhiiganisa. Naagira ati: “Ku naabatiziibwe, maawe akagira ngu ‘ndi omugomi.’” Alice akagarukamu ata? Naagumizamu ati: “Omu mwanya gw’okwehuzya enshonga, omu muringo gw’ekitiinisa nkashoboorora ngu nkaba ncwairemu kuba omwe  aha Bajurizi ba Yehova, kandi ngu ninyija kuhamira aha kucwamu kwangye. Nkateeraho kuhamiza maawe ngu buzima niimukunda. Twembi tukarira, reero naamutekyera eby’okurya birungi. Kuruga obwo, maawe akatandika kwetegyereza ngu Baibuli eriyo neempindura omuntu murungi.”

14. Ahabw’enki tutaine kwikiriza okugyemeserezibwa kuturemesa kuheereza Yehova?

¹⁴ Nikibaasa kutwara obwire abanyabuzaare baitu kwetegyereza gye oku turikutwara okuheereza Yehova nka kikuru. Nk’eky’okureeberaho, Alice akacwamu kuba payoniya omu mwanya gw’okukora omurimo ogu abazaire be baabaire bamutooraniire. Eki kikareetera nyina kugaruka kurira. Kwonka Alice akaguma ahamire. Naagira ati: “Waasingurwa okugyemeserezibwa omu nshonga emwe, ab’eka yaawe nibabaasa kugaruka bakugyemesereze omu nshonga endiijo. Beitu waaba ori omunyambabazi kwonka ohamire, abamwe omuribo nibabaasa kuhurikiza.” Eki nikyo kyabaire ahari Alice. Abazaire be bombi hati ni baapayoniya, kandi ishe n’omureeberezi.

15. Kurugiirira ahari Matayo 5:14-16 na 1 Petero 2:12, emicwe mirungi y’abandi neebaasa kuhwera eta abanyabuzaare baitu?

¹⁵ Yehova naayeyiriza abantu haihi ‘ahabw’emicwe mirungi’ y’abaheereza be omu kibiina Ekikristaayo. (Shoma Matayo 5:14-16; 1 Petero 2:12.) Ou ori nawe omu bushwere yaaba atari Mujurizi wa Yehova, waamuhweraire kubaho hamwe n’ab’omu kibiina kyawe? Pauline owaaba yaagambirweho, akataayaayisa ab’eishe-emwe na banyaanyazi-itwe kugira ngu iba orikwetwa Wayne abamanye. Wayne naijuka oku ow’eishe-emwe yaamuhweraire kwetegyereza gye Abajurizi  ba Yehova. Naagira ati: “Akoosha kuza aha murimo yaija yaareeba naanye omupiira. Kandi nkateekateeka nti: ‘Ka n’omuntu wa butoosha!’”

16. Ahabw’enki twine kweta abanyabuzaare baitu kwija omu nteerane?

¹⁶ Omuringo gumwe omurungi ogw’okuhwera abanyabuzaare baitu n’okubeeta kwija kuba naitwe omu nteerane z’ekibiina. (1 Kor. 14:24, 25) Wayne akaija omu ruteerane rwe orw’okubanza, aha Kiijutsyo ahabw’okugira ngu nikibaho abantu baaheza kwinuka aha murimo, kandi omukoro nigutwara obwire bukye. Naagira ati: “Tindayetegyereize gye eki orubazo rwabaire nirugambaho, kwonka nkashemezibwa abantu. Bakaija baandamutsya kandi baankwata omu ngaro. Nkaba nimbaasa kureeba ngu n’abantu b’amazima.” Omushaija omwe n’omukazi we bakaba batwire nibagirira Pauline embabazi, barikumuhwera hamwe n’omutabani omu nteerane n’omu kubuurira. N’ahabw’ekyo Wayne akarugaho yaacwamu ngu naayenda kwetegyereza bingi aha nyikiriza za Pauline. N’ahabw’ekyo, akashaba ow’eishe-emwe ogwo owaabaire naahwera eka ye kumwegyesa Baibuli.

17. Ahabw’enki tutashemereire kwetaho orubanja, kwonka ahabw’enki tutaine kurekyera aho kuhwera abanyabuzaare baitu?

¹⁷ Twine amatsiko ngu abanyabuzaare baitu boona nibaija kutwegaitaho omu kuheereza Yehova. Kwonka, n’obu twakuteeraho tuta kubahwera kuba abaheereza ba Ruhanga, nibabaasa kutaija omu mazima. Kyaba kityo, titwine kwecwera orubanja ahabw’okucwamu kwabo. Ahakuba titurikubaasa kugyema omuntu weena kwikiriza enyikiriza zaitu. N’obu kiraabe kiri kityo, guma noomanya ngu emitwarize yaawe mirungi neebaasa kuhwera abanyabuzaare baawe na munonga baaba nibareeba orikuheereza Yehova oshemereirwe. Bashabire. Gamba nabo omu muringo gw’obwegyendesereza. Otarekyera aho kubahwera! (Byak. 20:20) Gira obuhame ngu Yehova naija kukuha emigisha ahabw’okuteeraho kwawe kubahwera. Kandi abanyabuzaare baawe baacwamu kukuhurikiza, nibaija kujunwa!