1. Abakristaayo baine kukora ki kugumizamu nibairuka kuhika aha muheru gw’empaka z’amagara agatahwaho?

ABAKRISTAAYO bari omu mpaka z’okutunga amagara agatahwaho. Yaaba nibwo tugiire omu mpaka ezi nari tumaziremu emyaka mingi, twine kugumizamu nitwiruka kuhitsya aha muheru. Obuhabuzi obu entumwa Paulo yaahaire Abakristaayo ba Filipi, nibubaasa kutuhiga kugumizamu kuhitsya obu turaahendere empaka ezi. Abamwe omu kibiina ky’omu kyasha ky’okubanza bakaba bamazire obwire buraingwa nibaheereza Yehova, obu baatunga ebaruha ya Paulo. Bakaba nibaheereza gye Yehova, kwonka Paulo akabaijutsya ngu baine kugumizamu nibairuka omu mpaka z’okutunga amagara agatahwaho baine okugumisiriza. Akaba naayenda ngu bagumizemu nibamutooreza “kuhika aharikuhakanirwa” nari aha kigyendererwa kyabo.​—Fil. 3:14.

2. Ahabw’enki obuhabuzi obu Paulo yaahaire Abafilipi bwizire omu bwire buhikire?

² Obuhabuzi bwa Paulo bukaija omu bwire obuhikire. Ekibiina eki kikaba nikihiiganisibwa kuruga obu kyatandika. Okuhiiganisibwa kukatandika obu Ruhanga yaakoresa omwoyo gurikwera kweta Paulo na Siila ‘kwambuka, kuza Makedonia.’ Kandi bakaikiriza baahikayo nk’omu mwaka gwa 50 Y.A.K. (Byak. 16:9) Okwo bakashangayo omukazi orikwetwa Ludia, owaabahurikiize, reero Yehova akaigura “omutima gwe” kwikiriza amakuru marungi. (Byak. 16:14) Bwanyima akabatizibwa n’ab’omu ka ye boona. Kwonka, Omuregi akaba atashutami. Abashaija b’orurembo orwo bakatwara Paulo na Siila omu maisho g’abacwi b’emanja baabataho orubanja rw’okuteganisa. N’ekyarugiremu, Paulo na Siila bakateerwa baateebwa omu kihome, kandi bwanyima baabaragiira kuruga omu rurembo orwo. (Byak. 16:16-40) Mbwenu shi bakahwa amatsiko baabirugaho? Ngaaha buzima! Kandi shi ab’eishe-emwe b’ekibiina kisya ekyabaire kitandikireho? Ekirungi nabo bakagumisiriza! Hatariho kubangaanisa bakahigwa eky’okureeberaho eki Paulo na Siila baabateeraireho.

3. Paulo akeetegyereza ki, kandi nituza kugarukamu bibuuzo ki?

 ³ Paulo akaba amaririire kutahanika. (2 Kor. 4:16) Akaba naamanya ngu kubaasa kuguma nairuka omu mpaka ezi kuhika aha muheru, aine kuguma ataire omutima aha kigyendererwa kye. Nitubaasa kwegyera ki ahari Paulo? Ni by’okureeberaho ki eby’obunaku obu ebirikworeka ngu nitubaasa kugumisiriza n’obu haakuba hariho oburemeezi? Amatsiko gaitu aha biro by’omumaisho nigabaasa kuhamya gata okumariirira kwaitu kutahwa amatsiko?

4. Paulo akaguma ata naaheereza n’obu araabe yaabaire ari omu mbeera zigumire?

⁴ Teekateeka aha bweziriki obu Paulo yaabaire aine obu yaahandiikira Abafilipi. Akaba akomiirwe omu nju omuri Rooma. Akaba ataine bugabe bw’okuza kubuurira. Kwonka, akaguma naaheereza arikubuurira abaija kumutaayaayira, arikuhandiikira n’ebibiina ebya hare amabaruha. Nikyo kimwe n’obunaku obu, Abakristaayo baingi abatarikubaasa kuruga omu nju nibakora kyona ekirikubaasika kubuurira amakuru marungi abo abarikwija kubataayaayira. Kandi nibahandiikira abu batarikubaasa kuhikaho butunu amabaruha g’okubagumya.

5. Kurugiirira aha Abafilipi 3:12-14, niki ekyahwereire Paulo kuguma ataire omutima aha kigyendererwa kye?

⁵ Paulo taraikiriize obusinguzi bwe obw’enyima nari obweremwa bwe kumuhuzya. Nangwa akagira ngu ‘okwebwa eby’enyima’ kikaba kiri kikuru kubaasa ‘kukununkirira eby’omumaisho,’ ekirikumanyisa okuhendera gye empaka ze. (Shoma Abafilipi 3:12-14.) Ni bintu ki ebyabaire nibibaasa kuhuzya Paulo? Eky’okubanza, Paulo akaba ari omusinguzi omu diini y’Ekiyudaaya. Kwonka obusinguzi bwe akabureeba “nk’eshaabo.” (Fil. 3:3-8) Ekya kabiri, taraikiriize okweshinja kwe ahabw’okuhiiganisa Abakristaayo kumuremesa kuheereza Yehova. Ekya kashatu, tarateekateekire ngu ebi yaabaire yaakoreire Yehova bikaba nibimara. Paulo akagira obuheereza burungi n’obu araabe yaakomirwe, akateerwa enkoni n’amabaare, emeeri ei yaabaire arimu ekafa, kandi akaburwa eby’okurya n’eby’okujwara. (2 Kor. 11:23-27) N’obu Paulo araabe yaabaire yaakozire bingi, kandi yaabonaboine munonga, akaba naamanya ngu aine kugumizamu naaheereza Yehova. Nikyo kimwe naitwe.

6. Ni bintu ki ebimwe “eby’enyima” ebi tushemereire kwebwa?

⁶ Nitubaasa kutooreza tuta Paulo omu ‘kwebwa eby’enyima’? Bamwe omuriitwe twine kusingura enyehurira z’okweshinja ahabw’ebibi ebi twakozire enyima. Ku oraabe nikwo orikwehurira otyo, noobaasa kuta omutima aha kushwijuma ebirikukwata aha kitambo kya Kristo. Twayega, tukateekateeka aha bi twayega, kandi tukashaba aha bikwatiraine n’enshonga egyo erikwombeka, nitubaasa kweihamu okweshinja okwo okutarikwetengyesa. Nitubaasa n’okurekyera aho kwefubira ahabw’ebibi ebi Yehova yaatusaasiire. Yetegyereze eishomo erindi eri turikubaasa kwegyera ahari Paulo. Abamwe nibabaasa kuba baarekire emirimo mirungi y’okwebaisaho kubaasa kwebembeza eby’Obukama. Ku kiraabe nikwo kiri, nitubaasa kwebwa eby’enyima tutandikye kuteekateeka aha migisha ei turikureeba nk’ei twafeereirwe? (Kub. 11:4-6; Mub. 7:10) “Eby’enyima” nibibaasa kutwariramu obusinguzi bwaitu nari okugyezibwa oku twagumiire ira. Hatariho kubangaanisa, okureeba enyima turikwijuka oku Yehova yaatuhaire omugisha kandi akatushagika, nikibaasa kutuhwera kumwirira haihi. Kwonka, titurikwenda kwetaho omutima okashusha ngu tukozire ekirikumara omu kuheereza Yehova.​—1 Kor. 15:58.

7. Kurugiirira aha 1 Abakorinso 9:24-27, niki eki twine kukora kubaasa kuba abasinguzi omu mpaka z’okutunga amagara? Ha eky’okureeberaho.

⁷ Paulo akeetegyereza gye ekigambo “mwezirikye” ekyagambirwe Yesu. (Luk. 13: 23, 24) Paulo akaba naamanya ngu, nka Kristo aine kwezirika kuhika aha muheru. Akagyeragyeranisa obuheereza bw’Ekikristaayo n’empaka z’okwiruka. (Shoma 1 Abakorinso 9:24-27.) Omwiruki omu mpaka z’okwiruka naaguma ataire omutima aha kuhika aha kimariro, kandi naayetantara ebirikuhuzya. Nk’eky’okureeberaho, abairuki omu myanya y’etauni nibabaasa kwiruka barikuraba omu mwanya ogurimu eby’obushuubuzi nari ebindi ebirikuhuzya. Mbwenu shi nooteekateeka ngu omwiruki naija kwemerera kuranzya omu dirisa kureeba ebiri omu maduuka? Ekyo tarikubaasa kukikora yaaba naayenda kusinga! Naitwe omu mpaka z’okutunga amagara agatahwaho, twine kwetantara ebirikuhuzya. Twaguma tuhamiire aha kigyendererwa kyaitu, turikwezirika nk’oku Paulo yaakozire, nitwija kutunga ekihembo!

8. Nituza kushwijuma mbeera ki ishatu ezigumire?

⁸ Ka tureebe embeera zigumire ez’emiringo eshatu ezirikubaasa kutumaramu amaani. Embeera ezi nizitwariramu ebitarikuhikiirira juba, amagara mabi, n’okugyezibwa obwire buraingwa. Nitubaasa kugasirwa twamanya oku abandi babaasize kugumisiriza omu mbeera ezi.​—Fil. 3:17.

9. Ebintu byaba bitahikiriire nk’oku tubaire nituteekateeka nitukwatwaho tuta?

⁹ Ebitarikuhikiirira juba. Omu buhangwa twine ekihika ky’okutunga ebintu birungi ebi Yehova arikuturaganisa. Nangwa na nabi wa Yehova Habakuuki akaba aine ekihika ky’okureeba Yehova naihaho embeera mbi omuri Yuda, kandi Yehova akamugambira kuguma ‘ategyereize.’ (Hab. 2:3) Kwonka, ebi tutegyereize byareebeka nk’ebirikutuuraho kuhikiirira, nitubaasa kuhwamu amaani n’omuhimbo. (Enf. 13:12) Eki kikabaho aha kutandika kw’ekyasha kya 20. Omu bwire obwo, Abakristaayo abashukirweho omwoyo gurikwera bakaba nibateekateeka kutunga ekihembo kyabo eky’okuza omu iguru, omuri 1914. Kwonka ebintu ku byabuzire kuhikiirira nk’oku baabaire nibateekateeka, bakatwaza bata?

10. Omushaija n’omukazi we bakatwaza bata eki baabaire bainiire ekihika ku kyabuzire kuhikiirira?

¹⁰ Yetegyereze abantu babiri abeesigwa abaasingwire oburemeezi obu. Ow’eishe-emwe Royal Spatz akabatizibwa omuri 1908 aha myaka  20. Akaba naahamiza kimwe ngu juba naija kutunga ekihembo kye ky’okuza omu iguru. N’ahabw’ekyo, ku yaatandikire kuriima munyaanyazi-itwe orikwetwa Pearl omuri 1911, akamugira ati: “Noomanya ekirikuza kubaho omu 1914. Ku turaabe turi ab’okutaaha omu bushwere, ni kirungi tukikore juba!” Mbwenu shi bombi bakaruga omu mpaka z’okutunga amagara, ku bataratungire ekihembo kyabo ky’okuza omu iguru omuri 1914? Ngaaha, ahakuba ekigyendererwa kyabo ekikuru kikaba kiri okuguma nibakora ebi Ruhanga arikukunda, beitu kutari kutunga ekihembo kyabo. Bakaba bamaririire kwiruka omu mpaka baine okugumisiriza. Kandi kwo buzima, Royal na Pearl bakaguma nibaheereza omu bwesigwa kuhitsya obu baaheza obuheereza bwabo omu nsi bwanyima y’emyaka mingi. Hatariho kubangaanisa oine ekihika ky’okureeba Yehova naajuririra eiziina rye n’obushoboorozi bwe bw’okutegyeka, arikuhikiiriza ebi arikuraganisa byona. Gira obuhame ngu ebintu ebi nibiija kuhikiirira omu bwire bwa Yehova obuhikire. Obwire obwo butakahikire, ka tugumizemu nituheereza Yehova Ruhanga omu bwijwire, tutaikiriza ebitarikuhikiirira juba kutumaramu amaani nari kutureetera kutuubya aha buheereza bwaitu.

11-12. Ahabw’enki turikubaasa kugumizamu nituheereza Yehova omu bwesigwa n’obu twakuba twine amagara mabi? Ha eky’okureeberaho.

¹¹ Amagara mabi. Okutashushana n’omwiruki owa butoosha, tikirikukwetengyesa kuba oine amaani maingi g’omubiri kubaasa kugumizamu ohami omu by’omwoyo. Nangwa, baingi abaine amagara mabi, baabaasize kugumizamu nibatunguuka omu by’omwoyo. (2 Kor. 4:16) Nk’eky’okureeberaho, Ow’eishe-emwe Arthur Secord * akaba aine emyaka 88 kandi amugire bwanyima y’okuheereza aha Beseeli kumara emyaka 55. Eizooba rimwe omushahokazi akahika aha kitanda kye kumureeberera. Akamureeba reero omu muringo gw’embabazi yaamugira ati: “Ow’eishe-mwe Secord, omubiri ogu gugyenzire mahiro nyingi omu kuheereza Yehova.” Kwonka Arthur, akaba atarikuta omutima aha by’enyima. Akareeba omushahokazi ogwo aha maisho, yaamwenya, reero yaagarukamu ati: “Eego, ekyo kihikire. Kwonka ebi twakozire enyima tibyo bikuru. Ebi turikukora hati n’okweyongyerayo nibyo bikuru.”

¹² Shana obundi oheereize Yehova kumara emyaka mingi, kandi hati amagara gaawe nigakuremesa kukora ebi waabaire nookora ira. Kyaba nikwo kiri, gira obuhame ngu Yehova naasiima okuheereza kwawe kw’obwesigwa okw’enyima. (Heb. 6:10) Kandi hati, ijuka ngu okuheereza n’omutima gwaitu gwona tikirikurugiirira aha bwingi bw’ebi turikukora omu buheereza bwa Yehova. Omu mwanya gw’ekyo, nitworeka ngu tumaririire kuhamira ahari Yehova  turikugira emiteekateekyere mirungi aha buheereza, kandi turikukora eki amaani gaitu garikutubaasisa kukora. (Kol. 3:23) Yehova naayetegyereza obugarukiro bwaitu, kandi tarikwenda ngu tukore eki tutarikubaasa.​—Mak. 12:43, 44.

13. Eky’okureeberaho kya Anatoly na Lidiya nikituhiga kita kugumizamu nituheereza Yehova n’obu twakuba nitugyezibwa munonga?

¹³ Okugyezibwa obwire buraingwa. Bamwe aha baheereza ba Yehova bagumisiriize oburemeezi n’okuhiiganisibwa kumara emyaka mingi. Nk’eky’okureeberaho, Anatoly Melnik * akaba aine emyaka 12 obu ishe yaakwatwa akakomwa, akatwarwa omu buzaahe omuri Siberia, mahiro ezirengire 4,000 kuruga owaabo omuri Moldova. Bwanyima y’omwaka gumwe, Anatoly, nyina, ishenkuru, na nyinenkuru nabo bakatwarwa omu buzaahe omuri Siberia. Ku haahingwireho obwire, bakatandika kuza omu nteerane omu kyaro ekindi, kwonka bakaba baine kugyendesa ebigyere mahiro 20 omu rubaare, barikugumisiriza obufuki bw’amaani. Bwanyima, Ow’eishe-emwe Melnik akamara emyaka eshatu omu kihome hare n’omukazi we Lidiya, na muhara waabo ow’omwaka gumwe. Anatoly n’eka ye n’obu baraabe baarabire omu buremeezi kumara emyaka, bakagumizamu nibaheereza Yehova omu bwesigwa. Hati Anatoly aine emyaka 82, naaheereza aha Kakiiko k’Eitaagi omuri Central Asia. Nka Anatoly na Lidiya, ka tukore kyona ekirikubaasika omu kuheereza Yehova, tugumizemu nitugumisiriza nk’oku twabaire nitukora enyima.​—Gal. 6:9.

14. Paulo akamanya ngu aine kukora ki kubaasa kuhika aha kigyendererwa kye?

¹⁴ Paulo akaba naahamya ngu naija kuhendera empaka z’okwiruka ahikye aha kigyendererwa kye. Ahabw’okuba Omukristaayo oshukirweho amajuta, akaba aine ekihika ky’okutunga ‘ekihembo eky’okweta kwa Ruhanga eky’okuza omu iguru.’ Kwonka, kubaasa kuhika aha kigyendererwa ekyo, akamanya ngu aine kugumizamu ‘naayezirika’ kugyenda omu maisho. (Fil. 3:14) Paulo akakoresa eky’okureeberaho kirungi kuhwera Abafilipi kuguma bahamiire aha kigyendererwa kyabo.

15. Paulo akakoresa ata enshonga y’obutuuzi kuhiga Abakristaayo ba Filipi kugumizamu ‘nibeezirika’ kugyenda omu maisho?

¹⁵ Paulo akaijutsya Abafilipi obutuuzi bwabo obw’omu iguru. (Fil. 3:20) Ahabw’enki ekyo kyabaire kiri kikuru? Omu biro ebyo, obutuuzi  bwa Rooma bukaba nibutwarwa nka bukuru. * Kwonka, Abakristaayo abashukirweho omwoyo gurikwera bakaba baine obutuuzi oburaabahwere kutunga emigisha mingi. Obutuuzi obwo bukaba buri obw’omuhendo munonga waabugyeragyeranisa n’obwa Rooma! Ahabw’enshonga egi, Paulo akahiga Abafilipi kugumizamu nk’abatuuzi abaine emitwarize eshemereire amakuru marungi agarikukwata ahari Kristo. (Fil. 1:27) Abakristaayo abashukirweho omwoyo gurikwera obunaku obu nibataho eky’okureeberaho kirungi barikugumizamu kuhika aha kigyendererwa kyabo eky’okutunga amagara agatahwaho omu iguru.

16. Yaaba twine amatsiko g’okuza omu iguru nari kutuura omu nsi, twine kugumizamu nitukora ki kurugiirira aha Abafilipi 4:6, 7?

¹⁶ Yaaba twine amatsiko g’okutunga amagara agatahwaho omu paradiso omu nsi nari okuza omu iguru, twine kugumizamu kuhika aha kigyendererwa kyaitu. N’obu twakuba turi mu mbeera ki, titwine kuta omutima aha by’enyima; nari kwikiriza ekintu kyona kuturemesa kugumizamu nitutunguuka. (Fil. 3:16) Ebi twineho amatsiko nibibaasa kureebeka nk’ebitarikuhikiirira juba, nari nitubaasa kugira amagara mabi. Nitubaasa kuba tugumisiriize embeera zigumire kumara emyaka mingi. Embeera yoona ei oraabe orimu, ‘oteemereza omutima aha kintu kyona.’ Omu mwanya gw’ekyo, gambira Yehova kurabira omu kushaba n’okweshengyereza, kandi naija kukuha obusingye oburengire okuteekateeka kwawe.​—Shoma Abafilipi 4:6, 7.

17. Nituza kushwijuma ki omu kicweka ekirikukurataho?

¹⁷ Nk’omwiruki orikwezirika omu mpaka z’okwiruka kuhika aha muheru, ka tugume tutaire omutima aha kigyendererwa kyaitu kuhitsya obu turaahendere empaka z’okutunga amagara. Nk’oku embeera zaitu n’amaani gaitu birikutubaasisa, ka tube abeeziriki tugumizemu kuhika aha birungi ebiri omu maisho. Twine kukora ki kubaasa kugumizamu omu muhanda oguhikire turikwirukira aha rurengo oru turikubaasa? Ekicweka ekirikukurataho nikiza kutuhwera kumanya ebi twine kwebembeza n’okumanya ebirikukira obukuru.​—Fil. 1:9, 10.