HAINE obuheereza obu orikukunda omu kibiina kwonka hati embeera zaawe tizirikukubaasisa kubuzamu? Obundi nooyenda obuheereza obu ondiijo arimu. Nari shana n’obuheereza, nari obujunaanizibwa, obu waabaire oine. Kwonka hati noobaasa kuba nooremesibwa bukuru, amagara mabi, entaatsya mbi, nari obujunaanizibwa bw’okureeberera eka. Nari ahabw’empindahinduka ezibaireho omu kibiina obujunaanizibwa obu otwire oine kumara emyaka mingi oburekuriire abandi. Enshonga yoona ekureeteire kuburugamu, noobaasa kuba nooreeba ngu torikuheereza Yehova nk’oku orikwenda. Omu mbeera nk’ezi, nikyetegyerezibwa ahabw’enki nooyehurira kubi. Kwonka shi, noobaasa kwetantara ota emiteekateekyere etahikire nk’okwehurira kubi, ekiniga, nari enziika? Noobaasa kuguma ota oshemereirwe?

Yohaana Omubatizi nitubaasa kumwegyeraho okuguma tushemereirwe. Yohaana akaba aine obujunaanizibwa bw’omutaano, kwonka naabaasa kuba yaabaire atarikumanya ngu naija kuheereza omu muringo ogu. Naabaasa kuba yaabaire atarikuteekateeka ngu naija kumara obwire buraingwa omu kihome kukira aha obu yaamazire naaheereza. Kwonka nabwo, Yohaana akaguma aine okushemererwa, kandi akaguma aine emiteekateekyere egyo ebiro byona eby’amagara ge. Niki ekyamuhwereire? Kandi nitubaasa kuguma tuta tushemereirwe twaba twine emirabanamu?

Omu kutandika kw’omwaka gwa 29, Yohaana akatandika kutebeekanisiza Mesia omuhanda, arikugira ati: “Mweteise, ahakuba obukama bw’omu iguru bwiriire haihi.” (Mat. 3:2; Luk. 1:12-17) Baingi bakaikiriza. Nangwa n’abantu abarikuruga omu bicweka bya hare bakaija kuhurira obutumwa bwe, baayeteisa, kandi baabatizibwa. Yohaana akarabura n’abeebembezi b’ediini abaabaire nibeetwara nk’abahikiriire ngu nibaija kucwerwa orubanja baaba batakozire empindahinduka. (Mat. 3:5-12) Omwaka gwa 29 gurikuhendera, akakora ekintu kikuru munonga, arikubatiza Yesu. Okuruga obwo, Yohaana akatandika kugambira abantu kukuratira Yesu, Mesia owaaraganisiibwe.​—Yoh. 1:32-37.

Ahabw’omurimo mukuru ogu Yohaana yaakozire, Yesu akagira ati: “Omuri boona abaazairwe abakazi tihakabahoga n’omwe orikukira Yohaana  Omubatizi obukuru.” (Mat. 11:11) Hatariho kubangaanisa Yohaana aine kuba yaashemereirwe ahabw’emigisha ei yaatungire. Nka Yohaana, baingi obunaku obu batungire emigisha mingi. Teekateeka aha w’eishe-emwe Terry. We n’omukazi we, Sandra, bakaba bamazire emyaka erengire 50 omu buheereza obw’obutwire. Terry naagira ati: “Ntungire emigisha mingi. Nkaba payoniya, Omubeseeli, payoniya ow’omutaano, omureeberezi orikutaayaayira ebibiina, omureeberezi wa disiturikiti, kandi hati ndi payoniya ow’omutaano.” Nikishemeza kutunga obujunaanizibwa omu kibiina, kwonka nk’oku turikuza kwegyera ahari Yohaana, kubaasa kuguma tushemereirwe embeera zaitu zaahinduka, nikyetengyesa kuteeraho munonga.

Ekintu kikuru ekyareeteire Yohaana Omubatizi kuguma ashemereirwe n’okusiima obujunaanizibwa obu yaabaire aine. Nk’eky’okureeberaho, obuheereza bwa Yohaana bukagaruka ahansi bwanyima y’okubatiza Yesu, kwonka obwa Yesu bukaguma nibutunguuka. Abeegi ba Yohaana bakeerarikirira baija ahu ari baamugira bati: “Reeba nawe naabatiza abantu boona nibagyenda ah’ari.” (Yoh. 3:26) Yohaana akabagarukamu ati: ‘Oine omugore niwe kishwera; omugambi w’obugyenyi, ku ayemerera aha rubaju rwa kishwera yaamuhurira, ashemererwa munonga ahabw’okuhurira eiraka rye; n’ahabw’ekyo okushemererwa kwangye oku kuhikire.’ (Yoh. 3:29) Yohaana akaba atarikuhayahayana na Yesu, nari kuteekateeka ngu obuheereza bwe tiburi bukuru ahabwa Yesu kwongyera kutunguuka. Kwonka Yohaana akaguma ashemereirwe ahakuba akaba naasiima kukora ‘nk’omugambi w’obugyenyi’ nari munywani wa Yesu.

Emiteekateekyere mirungi ekahwera Yohaana kuguma ashemereirwe n’obu obuheereza bwe buraabe bwabaire butoorobi. Nk’eky’okureeberaho, Yohaana akaba ari Omunaziiri kuruga aha kuzaarwa, n’ahabw’ekyo akaba ataine kunywa viinyo. (Luk. 1:15) Yesu akagamba aha mbeera ya Yohaana ati: “Yohaana akaija atarikurya n’obu kwakuba okunywa.” Kwonka, Yesu n’abeegi be bakaba batari Banaziri kandi bakaba bataine maremesa barikutwaza nk’abandi bantu. (Mat. 11:18, 19) Kandi, n’obu Yohaana atarakozire ky’okutangaaza kyona, akaba naamanya ngu abeegi ba Yesu, otwariiremu n’abaabandize kukuratira Yohaana, ngu bahairwe amaani ago. (Mat. 10:1; Yoh. 10:41) Yohaana omu mwanya gw’okwikiriza ebintu nk’ebyo kumuhuzya, akata omutima aha buheereza obu Yehova yaamuhaire.

Naitwe twaba nitutwara okuheereza Yehova nk’ekintu ky’omuhendo, nitwija kuguma tushemereirwe. Terry, owaaba yaagambirweho, naagira ati: “Nkata omutima aha bujunaanizibwa bwona obu naahairwe.” Ku arikureeba enyima emyaka ye y’obuheereza obw’obutwire, naagira ati: “Tindikwefuuza kureka ninteekateeka aha birungi ebi ntungire.”

Kubaasa kwongyera kusiima obuheereza bwaitu, nari obujunaanizibwa bwaitu twine kumanya kyenyine ekirikubureetera kuba obw’omuhendo. N’omugisha ‘kukora hamwe na Ruhanga.’ (1 Kor. 3:9) Nk’oku ekintu kirikuguma nikyengyengyeta ahabw’okukireeberera gye, okuteekateeka aha mugisha mukuru gw’okuheereza Yehova nikibaasa kutuhwera kwetantara emiteekateekyere mibi erikuturemesa kushemererwa. Nitwija kwetantara kwegyeragyeranisa n’abandi. Titurikwija kuteekateeka ngu obujunaanizibwa obu Yehova atuhaire ti bukuru nk’obu ahaire abandi.​—Gal. 6:4.

Yohaana naabaasa kuba yaabaire naamanya ngu obuheereza bwe n’obw’akaire kakye, kwonka naabaasa kuba yaabaire atarikumanya ngu nibuza kuhendera ahonaaho. (Yoh. 3:30) Bwanyima y’ameezi nka mukaaga Yohaana aherize kubatiza Yesu omu gwa 30, Omugabe Heroode akata Yohaana omu kihome. Kwonka nabwo, Yohaana akagumizamu naaha obujurizi. (Mak. 6:17-20) Niki ekyabaire nikiija kumuhwera kuguma ashemereirwe omu mpinduka ezi? Akaguma ataire omutima aha by’omwoyo.

Obu Yohaana yaabaire ari omu kihome, akatunga amakuru agarikukwata aha kutunguuka kw’obuheereza bwa Yesu. (Mat. 11:2; Luk. 7:18) Yohaana akaba naahamya ngu Yesu niwe Mesia, kwonka naabaasa kuba yaayebuurize oku Yesu araije  kuhikiiriza byona ebyahandiikirwe ahari Mesia. Ahabw’okugira ngu Mesia akaba naija kuheebwa obugabe, mbwenu shi Yesu akaba naija kuba omutegyeki juba? Kandi shi eki kikaba nikiija kureetera Yohaana kuruga omu kihome? Yohaana aine ekihika ky’okumanya ebi Yesu araakore, akoohereza abeegi be babiri kubuuza Yesu bati: “Niiwe Ogwo orikwenda kwija, nari tutegyereze ondiijo?” (Luk. 7:19) Ku baagarukire, Yohaana aine kuba yaahurikiize gye barikugamba ngu Yesu akaba naatambira abantu. Bakamugira bati: “Empumi zihumwirwe, ebirema nibigyenda, ababembe bashemeziibwe, ebifa-matu nibihurira, abafu bazoirwe, n’abooro babuuriirwe ebigambo ebirungi.”​—Luk. 7:20-22.

Ebi abeegi ba Yohaana baamugambiire bikamugumya. Kikahamya ngu buzima Yesu naahikiiriza obunabi oburikukwata ahari Mesia. N’obu obuheereza bwa Yesu buraabe bwabaire butarikutwariramu okwiha Yohaana omu kihome, Yohaana akaba naamanya ngu obuheereza bwe ti bwa busha. Akaguma ashemereirwe n’obu araabe yaabaire ari omu mbeera egyo.

Nka Yohaana, twata omutima aha by’omwoyo, nitwija kugumisiriza tushemereirwe. (Kol. 1:9-11) Nitubaasa kukora eki turikushoma Baibuli kandi tukagiteekateekaho, kutunga obuhame ngu okuheereza Ruhanga kwaitu ti kwa busha. (1 Kor. 15:58) Sandra naagira ati: “Okushoma eshuura ya Baibuli buri izooba kimpwereire kwirira haihi Yehova. Nikimpwera kumutaho omutima omu mwanya gw’okugwetaho.” Nitubaasa n’okuta omutima aha ripoota y’omurimo gw’Obukama, ekirikutuhwera kutata omutima aha mbeera zaitu, beitu aha bi Yehova ariyo naahikiiriza. Sandra naagira ati: “Entebeekanisa za JW Broadcasting eza buri kwezi nizituhwera kwehurira turi haihi n’ekibiina, n’okuguma tushemereirwe omu buheereza bwaitu.”

Obuheereza bwa Yohaana Omubatizi bukaba buri bugufu kwonka akabuhikiiriza ‘n’omwoyo n’amaani’ nk’aga Eliya, omushaija owaabaire aine enyehurira nk’ezaitu. (Luk. 1:17; Yak. 5:17) Twamutooreza ahabw’okusiima n’okuta omutima aha by’omwoyo, naitwe nitubaasa kuguma tushemereirwe omu buheereza bwaitu, n’obu haakubaho ki.