1. Twine mugisha ki omu kibiina?

KA N’OMUGISHA gw’amaani kuba omwe aha b’omu kibiina kya Yehova! Turi omu paradiso y’eby’omwoyo erimu obusingye n’abantu abashemereirwe. Oine mwanya ki omu kibiina?

2. Entumwa Paulo akakoresa ky’okureeberaho ki emirundi mingi omu baruha ze?

² Eky’okureeberaho eki entumwa Paulo yaakoreise omuri zimwe aha baruha ze nitubaasa kukyegyeraho bingi aha nshonga egi. Omu buri baruha ezo, Paulo akagyeragyeranisa ekibiina n’omubiri gw’omuntu. Kandi akagyeragyeranisa abantu omu kibiina n’ebicweka by’omubiri.​—Rom. 12:4-8; 1 Kor. 12:12-27; Efe. 4:16.

3. Nituza kushwijuma mashomo ki ashatu omu kicweka eki?

³ Omu kicweka eki, nituza kushwijuma amashomo ashatu agu turikubaasa kwegyera aha ky’okureeberaho kya Paulo. Ery’okubanza, nituza kwega ngu buri omwe aine omwanya * omu kibiina kya Yehova. Erya kabiri, nituza kureeba eki turikubaasa kukora twagumirwa kumanya omwanya ogu twine omu kibiina. Kandi eishomo rya kashatu, nituza kureeba obukuru bw’okuguma twine bingi by’okukora omu murimo ogu Yehova atuhaire omu kibiina kye.

4. Niki eki turikwega omu Abarooma 12:4, 5?

⁴ Eishomo ry’okubanza eri turikwega omu ky’okureeberaho kya Paulo n’okugira ngu buri omwe aine omwanya mukuru omu ka Yehova. Paulo naatandika eky’okureeberaho kye arikugira ngu, ‘nk’oku twine engingo nyingi omu mubiri, kandi nk’oku zoona zirikukora emirimo etari emwe, naitwe nikwo turi; turi baingi, kwonka omuri Kristo turi omubiri gumwe, kandi omuntu weena n’orugingo rwa mugyenzi we.’ (Rom. 12:4, 5) Paulo akaba naagamba nshonga ki? Buri omwe ahariitwe aine obujunaanizibwa by’omutaano omu kibiina, kandi naaba ari ow’omuhendo.

5. Ni ‘biconco’ ki ebi Yehova ahaire ekibiina?

⁵ Waateekateeka aha baine omwanya omu kibiina, ahonaaho noobaasa kuta omutima aha baine obushoboorozi omu kibiina. (1 Tes. 5:12; Heb. 13:17) N’amazima ngu kurabira omuri Kristo, Yehova ahaire ekibiina kye “ebiconco” omu bantu. (Efe. 4:8) Ebiconco omu bantu nibitwariramu abari aha Kakiiko Akareeberezi, abarikuhwera Akakiiko Akareeberezi, Obukiiko bw’Eitaagi, abarikutaayaayira ebibiina, abarikwegyesa omu mashomero g’ekibiina, abareeberezi b’ekibiina, n’abaheereza. Ab’eishe-emwe aba boona nibatooranwa omwoyo gurikwera kureeberera entaama za Yehova ez’omuhendo n’okuhamya ekibiina.​—1 Pet. 5:2, 3.

6. Kurugiirira aha biri omu 1 Abatesalonika 2:6-8, ab’eishe-emwe abarikutooranwa omwoyo gurikwera nibateeraho kukora ki?

⁶ Ab’eishe-emwe nibatooranwa omwoyo gurikwera kuhikiiriza obujunaanizibwa butari bumwe na bumwe. Nk’oku ebicweka by’omubiri nk’engaro n’ebigyere birikukorera hamwe kugasira omubiri gwona, n’ab’eishe-emwe abatooraine omwoyo gurikwera nibakora n’amaani kugasira ekibiina kyona. Tibarikwesherurira ekitiinisa. Kureka, nibateeraho kwombeka n’okugumya ab’eishe-emwe bagyenzi baabo. (Shoma 1 Abatesalonika 2:6-8.) Nitusiima Yehova ahabw’abashaija nk’aba abatarikweyendeza kandi abarikwebembeza eby’omwoyo!

7. Ni migisha ki ei abari omu buheereza bw’obutwire baine?

⁷ Bamwe omu kibiina nibabaasa kutooranwa kuheereza nk’abamiisani, baapayoniya ab’omutaano, nari baapayoniya ab’obutwire. Nangwa, ab’eishe-emwe na banyaanyazi-itwe omu nsi yoona omurimo gw’okubuurira n’okuhindura abantu abeegi baguhindwire ogw’obutwire. Omu kukora ekyo, bahwereire baingi kuba abakuratsi ba Kristo Yesu. N’obu ababuurizi aba ab’obutwire barikuba baine ebintu bikye, Yehova abahaire emigisha mingi. (Mak. 10:29, 30) Nitukunda munonga ab’eishe-emwe aba, kandi nitushemererwa kuba nabo omu kibiina!

8. Ahabw’enki buri mubuurizi wa makuru marungi n’ow’omuhendo ahari Yehova?

⁸ Mbwenu shi ab’eishe-emwe abaine obujunaanizibwa n’abari omu buheereza bw’obutwire nibo bonka abaine omwanya omu kibiina? Ngaaha buzima! Buri mubuurizi wa makuru marungi n’ow’omugasho ahari Ruhanga n’ekibiina. (Rom. 10:15; 1 Kor. 3:6-9) Nangwa, kimwe aha bigyendererwa bikuru eby’ekibiina n’okuhindura abantu abeegi ba Mukama waitu Yesu Kristo. (Mat. 28:19, 20; 1 Tim. 2:4) Boona abarikukwatanisa n’ekibiina, otwariiremu ababuurizi abaabatiziibwe n’abatabatiziibwe, nibateeraho kwebembeza okukora omurimo ogu.​—Mat. 24:14.

9. Ahabw’enki nitutwara banyaanyazi-itwe omu kibiina nk’ab’omuhendo?

⁹ Yehova ahaire abakazi Abakristaayo omwanya gw’ekitiinisa omu kibiina. Abakazi  abari omu bushwere, baanyina baana, efaakazi, na banyaanyazi-itwe abatakagiire omu bushwere abarikumuheereza omu bwesigwa naabatwara nk’ab’omuhendo. Ebyahandiikirwe nibikira kugamba aha bakazi baingi abaashemeize Ruhanga omu muringo gw’omutaano. Nibasiimwa ahabw’okutaho eky’okureeberaho kirungi eky’okutwaza omu muringo gw’obwengye, okwikiriza, omujinya, obumanzi, obufura n’okukora emirimo mirungi. (Luk. 8:2, 3; Byak. 16:14, 15; Rom. 16:3, 6; Fil. 4:3; Heb. 11:11, 31, 35) Ka nitusiima Yehova munonga ahabw’okugira abakazi Abakristaayo abaine emitwarize mirungi nk’egyo omu kibiina!

10. Ahabw’enki nitutwara ab’emyaka ya bukuru nk’ab’omuhendo?

¹⁰ Kandi twine omugisha kuba n’ab’emyaka ya bukuru baingi omu kibiina. Ebibiina ebimwe biine Abakristaayo abakaikwire abeehaireyo kuheereza Yehova ebiro byona eby’amagara gaabo. Kandi bamwe aha bakaikwire nibabaasa kuba nibwo baherize kwega amazima. Omu mbeera zombi nibabaasa kuba nibateganisibwa amagara mabi ahabw’emyaka ya bukuru. Oburemeezi obu nibubaasa kuba nibubareetera kugumirwa kukora bingi omu kibiina n’omu murimo gw’okubuurira. Kwonka nabwo, ab’eishe-emwe aba nibakora eki barikubaasa omu buheereza, nibakoresa amaani gaabo kugumya abandi n’okubatendeka! Kandi nitubaasa kubeegyeraho ahabw’okugira ngu nibamanya bingi. Buzima n’ab’omuhendo munonga ahari Yehova, hamwe naitwe.​—Enf. 16:31.

11-12. Abato omu kibiina kyawe babaasize bata kukugumya?

¹¹ Kandi teekateeka, n’aha bato. Baaba nibakura omu nsi egi erikwebemberwa Sitaane Omuregi, kandi eijwiremu emiteekateekyere ye mibi munonga, nibaraba omu mbeera zigumire. (1 Yoh. 5:19) Kwonka, twena nikitugumya kureeba abato nibagarukamu omu nteerane, barikwejumba omu buheereza, kandi baine obumanzi bw’okujuririra ebi barikwikiriza. Eego, abato baine omwanya mukuru omu kibiina kya Yehova!​—Zab. 8:2.

¹² Kwonka, ab’eishe-emwe na banyaanyazi-itwe abamwe nibagumirwa kwikiriza ngu n’ab’omugasho  omu kibiina. Niki ekirikubaasa kuhwera buri omwe ahariitwe kuhurira aine omwanya omu kibiina? Ka tureebe.

13-14. Ahabw’enki abamwe nibeereeba nk’abatari b’omugasho omu kibiina?

¹³ Yetegyereze eishomo rya kabiri eri turikwega omu ky’okureeberaho kya Paulo. Naata omutima aha buremeezi obu baingi baine obunaku obu. Nibagumirwa kwikiriza ngu n’ab’omuhendo omu kibiina. Paulo akahandiika ati: “Ekigyere ku kyakugira kiti: Obu ntari mukono, tindi rugingo rw’omubiri, ekyo tikikaakihindura kutaba ky’omubiri. N’okutu ku kwakugira kuti: Obu ntari riisho, tindi rugingo rw’omubiri, ekyo tikikaakuhindura kutaba kw’omubiri.” (1 Kor. 12:15, 16) Paulo akaba naashoboorora nshonga ki?

¹⁴ Waayegyeragyeranisa n’abandi omu kibiina, noobaasa kutamanya ngu ori ow’omugasho. Bamwe omu kibiina nibabaasa kuba baine ekiconco ky’okwegyesa, okutebeekanisa gye ebintu, nari abariisa barungi. Obundi nooteekateeka ngu toine biconco ebyo kuhika aha rurengo nk’orw’abandi. Eki nikyoreka ngu ori omucureezi kandi nooyetwara. (Fil. 2:3) Kwonka yegyendesereze. Waaguma nooyegyeragyeranisa n’abandi abaine etalanta z’omutaano, noija kuhwamu amaani. Noobaasa kutandika kwehurira nk’oku Paulo yaagambire, ngu toine mugasho gwona omu kibiina. Niki ekirikubaasa kukuhwera kusingura enyehurira ezo?

15. Kurugiirira aha 1 Abakorinso 12:4-11, twine kwijuka ki twaba twine ekiconco ky’omutaano?

¹⁵ Teekateeka aha amazima aga: Bamwe aha Bakristaayo b’omu kyasha ky’okubanza Yehova akabaha ebiconco by’omwoyo gurikwera, kwonka ebitarikushushana. (Shoma 1 Abakorinso 12:4-11.) Akabaha okubaasa n’ebiconco bitarikushushana, kwonka buri omwe akaba ari ow’omuhendo. Obunaku obu, titwine ebiconco by’omwoyo gurikwera kubaasa kukora eby’okutangaaza. Kwonka hariho  enshonga emwe etarikuhinduka. Nitubaasa kuba twine etalanta zirikutaana, kwonka twena turi ab’omuhendo ahari Yehova.

16. Tushemereire kugyendera aha buhabuzi ki obw’entumwa Paulo?

¹⁶ Omu mwanya gw’okwegyeragyeranisa n’Abakristaayo abandi, tushemereire kugyendera aha buhabuzi bw’entumwa Paulo obu: “Ekirungi nikwo omuntu weena kugyeza omurimo gwe, akaba nigwo yaayehimbisizamu, kutari kwehimbisiza mu gwa mutaahi we.”​—Gal. 6:4.

17. Twakuratira obuhabuzi bwa Paulo nitugasirwa tuta?

¹⁷ Twakuratira obuhabuzi bw’entumwa Paulo kandi tukashwijuma ebikorwa byaitu, nitubaasa kureeba ngu twine okubaasa n’ebiconco by’omutaano. Nk’eky’okureeberaho, omureeberezi naabaasa kuba ataine kiconco ky’okwegyesa aha puratifoomu, kwonka arikukora gye omu murimo gw’okuhindura abantu abeegi. Nari naabaasa kuba atari mutebeekanisa murungi nk’abareeberezi abandi omu kibiina kye, kwonka ari omuriisa orikufayo ou ab’eishe-emwe barikworoberwa kushaba obuhabuzi bw’Ebyahandiikirwe. Nari naabaasa kuba naamanywa nk’omuntu efura. (Heb. 13:2, 16) Twayetegyereza gye okubaasa kwaitu n’ebiconco ebi twine, nitwija kugira enshonga ehikire erikutureetera kwehurira gye ahabw’eki turikwongyera aha kibiina. Kandi eki nikibaasa kutatureetera kwegomba abandi abaine ebiconco ebirikutaana n’ebyaitu.

18. Nitubaasa kwongyera tuta aha kubaasa kwaitu?

¹⁸ Yaaba twine mwanya ki omu kibiina, twena twine kuteeraho kwongyera kuboneza obuheereza bwaitu n’okubaasa kwaitu. Yehova naatutendeka kurabira omu kibiina kye, kubaasa kuboneza obuheereza bwaitu. Nk’eky’okureeberaho, omu ruteerane rw’aha gati ya saabiiti, nitutunga obuhabuzi oburikutuhwera kwongyera kubuurira gye. Mbwenu shi nooteeraho kukuratira obuhabuzi obwo?

19. Noobaasa kuhika ota aha kigyendererwa kyawe eky’okuza omu Ishomero ry’Ababuurizi b’Obukama?

¹⁹ Endiijo entebeekanisa nungi y’okutendeka n’Eishomero ry’Ababuurizi b’Obukama. Abarikuza omu ishomero eri n’ab’eishe-emwe na banyaanyazi-itwe abari omu buheereza obw’obutwire abaine emyaka eri aha gati ya 23 na 65. Noobaasa kuba nooreeba ngu torikubaasa kuhika aha kigyendererwa eki. Kwonka omu mwanya gw’okuhandiika omushororongo gw’enshonga ahabw’enki otarikubaasa kurizamu, handiika enshonga ezirikukureetera kwenda kurizamu. Reero oteho entebeekanisa eraakuhwere kuhikiiriza ebirikwetengyesa kurizamu. Ahabw’obuhwezi bwa Yehova n’okukora kwawe n’obweziriki, noobaasa kukora ekibaire nikireebeka nk’ekitarikubaasika.

20. Nitubaasa kwega ki omu Abarooma 12:6-8?

²⁰ Eishomo rya kashatu eri turikwegyera aha ky’okureeberaho kya Paulo riri omu Abarooma 12:6-8. (Kishome.) Paulo naayoreka ngu abari omu kibiina baine ebiconco ebirikutaana aha by’abandi. Kwonka hati naayoreka gye ngu twine kukoresa ebiconco byona ebi twine kwombeka ekibiina n’okukihamya.

21-22. Robert na Felice nitubaasa kubeegyeraho mashomo ki?

²¹ Teekateeka aha ky’okureeberaho ky’ow’eishe-emwe ou turaayete Robert. Bwanyima y’okuheereza omu ihanga erindi, akooherezibwa aha Beseeli omu ihanga rye. N’obu baamuhamiize ngu tibaramuhindwire ahabw’okutakora gye, akagira ati: “Nkaguma nyine ebiteekateeko bitahikire eby’okwereeba nk’oremirwe kumara ameezi maingi. Haine  obu naabaire nimpurira ndikwenda kurekyera aho kuheereza aha Beseeli.” Akagaruka ata kugira okushemererwa? Omureeberezi mugyenzi we akamwijutsya ngu twena Yehova akatutendeka omu buheereza bwaitu obw’enyima kubaasa kuhikiiriza gye obusya obu turimu hati. Robert akeetegyereza ngu aine kurekyera aho kuguma naareeba enyima, kureka aine kuta omutima aha ki arikubaasa kukora hati.

²² Ow’eishe-emwe Felice Episcopo nawe akahikwaho embeera nk’egi. We n’omukazi we bakaruga aha Gileadi omuri 1956 reero baatandika kutaayaayira ebibiina omuri Bolivia. Omuri 1964 bakazaara omwana. Felice naagira ati: “Kikaba kitugumiire kutsigaho obuheereza bwaitu obw’omuhendo. Okuba ow’amazima nkashiisha nk’omwaka gwona ndikwesaasibwa. Kwonka ndikuhwerwa Yehova, nkahindura emiteekateekyere yangye kandi naikiriza obujunaanizibwa bwangye busya obw’okuba omuzaire.” Naiwe nooyehurira nka Robert nari Felice? Noohurira waatamwa ahabw’okugira ngu tokiri mu buheereza obu waabaire orimu ira? Kyaba nikwo kiri, noija kushemererwa waahindura ebigyendererwa byawe kandi okata omutima aha ki orikubaasa kukora hati kubaasa kuheereza Yehova n’ab’eishe-emwe. Kora n’obweziriki, orikukoresa gye ebiconco ebi oine n’okubaasa kwawe kuhwera abandi, reero obwo noija kushemererwa orikwombeka ekibiina.

23. Twine kugira obwire bw’okukora ki, kandi nituza kushwijuma ki omu kicweka ekirikukurataho?

²³ Buri omwe ahariitwe n’ow’omuhendo ahari Yehova. Naayenda ngu tube bamwe aha b’eka ye. Twatunga obwire bw’okuteekateeka aha ki turikubaasa kukora kwombeka ab’eishe-emwe na banyaanyazi-itwe reero tukakora n’amaani kukihikiiriza, nitubaasa kwetantara kwehurira nk’abataine mwanya omu kibiina! Kandi shi oku turikureeba abandi omu kibiina? Nitubaasa kworeka tuta ngu n’ab’omuhendo? Omu kicweka ekirikukurataho, nituza kureeba enshonga nkuru egyo.