1. Ahabw’enki Yehova yaahangire ebiine amagara?

HARIHO obwire obu Yehova yaabaire ari wenka. Kwonka akaba ataine eihamba. Akaba naayemariirira atari mboijana. Kwonka, akaba naayenda ngu abandi batungye amagara kandi bashemererwe. Yehova arikuhigwa rukundo, akatandika kuhanga ebintu.​—Zab. 36:9; 1 Yoh. 4:19.

2. Yesu na baamaraika bakeehurira bata Yehova ku yaahangire ebintu ebindi?

² Yehova akabanza kuhanga Omwana we kumuhweraho aha mirimo ye. Reero kurabira omu Mwana we ogwo omujigaijo, “nimwo ebintu byona byahangiirwe,” otwariiremu obukaikuru bw’ebihangirwe by’omwoyo ebiine obwengye. (Kol. 1:16) Yesu akashemererwa ahabw’omugisha ogwo ogw’okukora na Ishe. (Enf. 8:30) Kandi n’abaana ba Ruhanga baamaraika nabo bakashemererwa. Bakaba bari nk’abashutami omu ntebe z’omu maisho barikuroreera, obu Yehova n’Omukozi we Omukuru Yesu, baahanga eiguru n’ensi. Baamaraika bakatwaza bata? “Bakateera akaari k’okushemererwa” obu ensi yaahangwa, kandi hatariho kubangaanisa bakagumizamu nibashemerererwa buri kihangirwe kya Yehova, otwariiremu n’abantu ebihangirwe by’omuhendo ebyahererukireyo. (Yob. 38:7; Enf. 8:31) Buri kimwe eki Yehova yaahangire nikyoreka rukundo ye n’obwengye bwe.​—Zab. 104:24; Rom. 1:20.

3. Nk’oku kirikworekwa omu 1 Abakorinso 15:21, 22, ekitambo kya Yesu nikibaasisa ki kubaho?

³ Yehova akaba agyendereire ngu abantu batungye amagara  agatahwaho omu nsi nungi ei yaahangire. Kwonka Adamu na Haawa ku baagomiire Ishebo owa rukundo, ekibi n’okufa bikashweka ensi. (Rom. 5:12) Yehova akatwaza ata? Ahonaaho, akooreka omuringo ogu araacunguremu abantu. (Kut. 3:15) Yehova akacwamu kuhayo ekitambo ekyabaire nikiija kubaasisa abaana ba Adamu na Haawa kucungurwa ekibi n’okufa. Akaba naija kwikiriza buri muntu kucwamu kumuheereza reero aije atungye amagara agatahwaho.​—Yoh. 3:16; Rom. 6:23; shoma 1 Abakorinso 15:21, 22.

4. Omu kicweka eki nituza kugarukamu bibuuzo ki?

⁴ Ruhanga okuraganisa kuzoora abantu nikireetaho ebibuuzo bingi. Nk’eky’okureeberaho, okuzooka nikubaasa kwija kubaho kuta? Mbwenu shi nitwija kubaasa kumanya abakundwa baitu ku baraazookye? Okuzooka nikwija kutureetera okushemererwa mu miringo ki? Kandi okuteekateeka aha kuzooka nikutuhwera kuta kwetegyereza rukundo ya Yehova, obwengye bwe, n’okugumisiriza kwe? Ka tushwijume buri kimwe aha bibuuzo ebi.

5. Ahabw’enki n’eky’oburyo kuteekateeka ngu abantu nibaija kuzooka omu buteeka, batari boona omurundi gumwe?

⁵ Ahabw’okugira ngu Yehova naaza kukoresa Omwana we kuzoora obukaikuru n’obukaikuru bw’abantu, nitubaasa kuteebereza ngu ti boona nibaija kuzooka omurundi gumwe. Ahabw’enki? Ahakuba abantu baingi munonga baagaruka omu nsi omurundi gumwe, nihabaasa kubaho akavuyo n’akajagararo. Kandi Yehova tarikubaasa kukora ebintu omu muringo gw’akavuyo. Naamanya ngu kubaasa kubaho obusingye, nihaba haine kubaho obuteeka. (1 Kor. 14:33) Yehova Ruhanga akooreka ngu n’omugumisiriza kandi omunyabwengye obu  yaabaire naakora na Yesu kutebeekanisa ensi mporampora kubaasa kutuurwaho abantu. Kandi Yesu naija kworeka emitwarize niyo emwe omu Myaka Rukumi yaaba naakora n’abaraahonokeho ahari Haramagedoni kutebeekanisa ensi kwakiira abaraazookye.

6. Kurugiirira aha Ebyakozirwe 24:15, Yehova naija kuzoora baahi abamwe?

⁶ Ekirikukira obukuru, abaraahonokeho ahari Haramagedoni nikiija kubeetengyesa kwegyesa abaraazookye aha Bukama bwa Ruhanga, n’ebi Yehova arikubeetengyesa. Ahabw’enki? Ahakuba baingi aha baraazookye nibaija kuba bari bamwe aha ‘batahikiriire.’ (Shoma Ebyakozirwe 24:15.) Nibaija kuba baine kukora empindahinduka nyingi kubaasa kugasirwa omu kitambo kya Kristo. Teekateeka aha kiraatwarirwe omu kwegyesa obukaikuru bw’abantu aba boona abataine ki barikumanya ahari Yehova. Mbwenu shi buri omwe naija kwegyesibwa okwe, nk’oku turikwegyesa abeegi ba Baibuli obunaku obu? Abasya shi nibaija kugabwa omu bibiina kugira ngu batendekwe kwegyesa abo abaraazookye bwanyima yaabo? Twine kutegyereza tukareeba. Kwonka nitumanya ngu bwanyima y’Emyaka Rukumi ey’Obutegyeki bwa Yesu, ‘okumanya [Yehova] nikwija kubuga ensi yoona.’ (Isa. 11:9) Emyaka rukumi ka neija kuba erimu bingi by’okukora kwonka ebirikureeta okushemererwa!

7. Ahabw’enki abaheereza ba Ruhanga nibaija kworeka ngu nibafayo baaba nibeegyesa abaraazookye?

⁷ Omu Myaka Rukumi ey’Obutegyeki bwa Kristo, abaana ba Yehova boona ab’omu nsi nikiija kubeetengyesa kukora empindahinduka kumushemeza. N’ahabw’ekyo, boona nibaija kuba nibafayo ahari bagyenzi baabo abazookire baaba nibabahwera kugyendera aha misingye ya Yehova, n’okusingura obutahikiirira. (1 Pet. 3:8) Hatariho kubangaanisa abo abaraazookye nibaija kwiririra haihi n’abaheereza ba Ruhanga abacureezi, nabo abaraabe nibakorerera ‘okujunwa kwabo.’​—Fil. 2:12.

8. Ahabw’enki nitubaasa kugira ngu abaraabe nibaakiira abaraazoorwe nibaija kumanya abakundwa baabo?

⁸ Ahabw’enshonga nyingi, nitubaasa kugira ngu abaraabe nibaakiira abazookire nibaija kumanya abakundwa baabo. Nk’eky’okureeberaho, kurugiirira aha kuzooka okwabaireho ira, nikireebeka Yehova naija kugaruraho abantu kugira ngu babe nibareebeka, nibagamba, kandi nibateekateeka nk’oku baabaire bari batakafiire. Ijuka ngu Yesu akagyeragyeranisa okufa n’okugwejegyera, kandi okuzooka yaakugyeragyeranisa n’okusisiimuka omu turo. (Mat. 9:18, 24; Yoh. 11:11-13) Abantu baasisiimuka omu turo, nibaba enshusha yaabo n’emigambire yaabo neeguma etyo nk’oku baaba bari barikuza kubyama, kandi nibaba nibaijuka ebyabaho batakabyamire. Teekateeka aha ky’okureeberaho kya Laazaaro. Akaba amazire ebiro bina afiire, n’ahabw’ekyo omubiri gwe gukaba gwatandikire kujunda. Kwonka, Yesu ku yaamuzoire, banyaanya ahonaaho bakamumanya, kandi hatariho kubangaanisa na Laazaaro akabamanya.​—Yoh. 11:38-44; 12:1, 2.

9. Ahabw’enki abaraazookye batarikwija kuba baine ebiteekateeko n’omubiri ebihikiriire?

⁹ Yehova naaraganisa ngu abantu boona abu Yesu araabe naategyeka tihaine orikwija kugira ati: “Ndwaire.” (Isa. 33:24; Rom. 6:7) N’ahabw’ekyo abaraazoorwe nibaija kuba baine emibiri etaine kamogo. Kwonka tibarikwija kuba abahikiriire ahonaaho. Kitari ekyo, abanyabuzaare baabo nibabaasa kutabamanya. Nikireebeka abantu boona nibaija kuguma nibaba abahikiriire mporampora omu Myaka Rukumi ey’Obutegyeki bwa Kristo. Bwanyima y’emyaka rukumi, Yesu nibwo araagarurire Ishe Obukama. Obwo Obukama nibwija kuba bwaherize  kuhikiiriza omurimo gwabwo omu bwijwire, otwariiremu okureetera abantu kuba abahikiriire.​—1 Kor. 15:24-28; Kush. 20:1-3.

10. Okuzooka nikwija kukukwataho kuta?

¹⁰ Teekateeka oku kiraabe nikishemeza kugaruka kuramutsya abakundwa baawe. Mbwenu shi okushemererwa oku oraabe oine nikwija kukureetera kusheka nari kurira? Okushemererwa shi nikwija kukureetera kweshongorera Yehova? Ekintu kimwe eki turikubaasa kuhamya, n’okugira ngu noija kugirira Yehova n’Omwana we rukundo y’amaani ahabw’ekiconco ky’omutaano eky’okuzooka.

11. Kurugiirira aha bigambo bya Yesu ebiri omuri Yohaana 5:28, 29, abaraayorobere emitindo ya Ruhanga ehikiriire nibaija kutunga ki?

¹¹ Teekateeka aha kushemererwa oku abaraazookye baraatungye baaba nibeeyihaho emitwarize yaabo eya ira barikugyendera aha mitindo ya Ruhanga ehikiriire. Abaraakore empindahinduka ezi nibaija kwikirizibwa kutunga amagara agatahwaho. Kwonka abaraagomere Ruhanga, tibarikwija kwikirizibwa kuteganisa obusingye oburaabe buri omu Paradiso.​—Isa. 65:20; shoma Yohaana 5:28, 29.

12. Yehova naija kuha omugisha boona abari omu nsi mu muringo ki?

¹² Obukama bwa Ruhanga bwaba nibutegyeka, abantu ba Ruhanga boona nibaija kureeba okuhikiirira kw’ebigambo ebiri omu Enfumu 10:22 ebirikugira ngu omugisha ogu Yehova arikuha nigwo gurikutungisa omuntu, kandi tarikugwongyeraho busaasi. Abaheereza ba Ruhanga barikuhwerwa omwoyo gurikwera, nibaija kuba abagaiga omu by’omwoyo, nibaija kuguma nibeeyongyera kuba nka Kristo, barugyeho babe abahikiriire. (Yoh. 13:15-17; Efe. 4:23, 24) Buri izooba nibaija kuguma nibeeyongyera kuba ab’amaani, kandi abantu barungi. Abantu ka nibaija kuba baine amagara marungi! (Yob. 33:25) Kwonka shi okuteekateeka aha kuzooka nikikuhwera kita obunaku obu?

13. Kuhikaana n’ebiri omuri Zaaburi 139:1-4, okuzooka nikwija kworeka kuta ngu Yehova naatumanya?

¹³ Nk’oku twaba twagambire, Yehova ku araazoore abantu, nibaija kuba nibaijuka ebirikubakwataho kandi bakiine n’entwaza yaabo. Teekateeka aha makuru g’eki. Ahabw’okugira ngu Yehova naatukunda munonga, naaguma naatwetegyereza kandi arikwijuka ebi turikuteekateeka byona, oku turikwehurira, ebi turikugamba, n’ebi turikukora. N’ahabw’ekyo ku araabe naatuzoora, naija kugaruraho ebiteekateeko byaitu, emiteekateekyere yaitu, n’emitwarize yaitu. Omugabe Daudi akaba naamanya oku Yehova arikufayo kumanya ebirikukwata ahari buri omwe ahariitwe. (Shoma Zaaburi 139:1-4.) Oku Yehova arikutwetegyereza gye nikitukwataho kita hati?

14. Tushemereire kukwatwaho tuta twateekateeka aha ku Yehova arikutumanya gye?

¹⁴ Twateekateeka aha ku Yehova arikutumanya gye, nituba tutaine kutiina. Ahabw’enki tutaine kutiina? Ijuka ngu Yehova naatufaho munonga. Naafayo aha ntwaza ya buri omwe ahariitwe erikutuhindura ab’omutaano. Naafayo n’obwegyendesereza kumanya byona ebirikutureetera kutwaza nk’oku turikutwaza hati. Ekiteekateeko eki ka nikigaruramu amaani! Titushemereire kuteekateeka eizooba na rimwe ngu turi twenka. Buri dakiika omu izooba ryona, Yehova naaba ari aha rubaju rwaitu, arikwenda kutuhwera.​—2 Bus. 16:9.

15. Okuzooka nikworeka kuta obuhame ngu Yehova n’omunyabwengye?

¹⁵ Okutiina kufa n’ekirwaniso ky’amaani. Abari ahansi y’obushoboorozi bwa Sitaane  nibakoresa ekirwaniso eki kugyemesereza abantu kwehakana banywani baabo nari kwehakana ebi barikwikiriza. Kwonka okutiina okwo tikurikukora ahariitwe. Nitumanya ngu abazigu baitu baatwita, Yehova naija kutugarurira amagara. (Kush. 2:10) Twine obuhame ngu tihaine eki barikubaasa kukora kutwiha ahari Yehova. (Rom. 8:35-39) Yehova ka yaayorekire obwengye bw’ahaiguru munonga kutuha amatsiko g’okuzooka! Ahabw’amatsiko g’okuzooka, naaba naiha ahari Sitaane ebirwaniso bye bikuru, kandi itwe naaba naatuha ekirwaniso ky’omuhendo eky’okugira obumanzi bwingi.

16. Oine kwebuuza bibuuzo ki, kandi ebi orikugarukamu nibibaasa kukuhwera bita kumanya oku orikwesiga Yehova?

¹⁶ Abazigu ba Yehova baakutiinatiinisa ngu nibaza kukwita, noija kuba oyeteekateekire kuta amagara gaawe omu mikono ya Yehova? Noobaasa kukimanya ota? Omuringo gumwe n’okwebuuza oti: ‘Enshonga nkye ezi ndikucwamu buri izooba nizooreka ngu ninyesiga Yehova?’ (Luk. 16:10) Ekindi eki orikubaasa kwebuuza n’eki: ‘Oku ndikutwaza nikworeka ngu ninyesiga okuraganisa kwa Yehova kundeeberera naayebembeza okusherura Obukama?’ (Mat. 6:31-33) Waagarukamu ebibuuzo ebyo ngu eego, obwo n’obuhame ngu oine obwesigye omuri Yehova, kandi noija kuba oyetebeekanisiize okugyezibwa kwonka okuraakuhikyeho.​—Enf. 3:5, 6.

17. (a) Okuzooka nikworeka kuta ngu Yehova n’omugumisiriza? (b) Nitubaasa kworeka tuta ngu nitusiima Yehova ahabw’okugumisiriza kwe?

¹⁷ Yehova yaataireho eizooba n’eshaaha obu araacwekyereze ensi erikwebemberwa Sitaane. (Mat. 24:36) Tarikwija kuremwa kugumisiriza akareetaho okucwekyerera obwire obwo butakahikire. Aine ekihika ky’okuzoora abaafiire, kwonka akigumisiriize. (Yob. 14:14, 15) Ategyereize obwire obuhikire kuhika, reero akabazoora bakaba abahuriire. (Yoh. 5:28) Twine enshonga zihikire kusiima Yehova ahabw’okugumisiriza kwe. Teekateeka ahari eki: Ahabw’okugira ngu Yehova naagumisiriza, abantu baingi otwariiremu naitwe tutungire obwire bw’okuhika “aha kweteisa.” (2 Pet. 3:9) Yehova naayenda ngu abantu baingi nk’oku kirikubaasika bagire omugisha gw’okutunga amagara agatahwaho. N’ahabw’ekyo ka tworekye ngu nitusiima okugumisiriza kwe. Mu muringo ki? Turikuba abeeziriki omu kusherura abaine ekyetengo kihikire eky’okutunga amagara agatahwaho, n’okubahwera kukunda Yehova n’okumuheereza. (Byak. 13:48) Reero nabo nibaija  kugasirwa omu mbabazi za Yehova, nk’oku naitwe turikugasirwa.

18. Ahabw’enki tushemereire kugumisiririza abandi?

¹⁸ Yehova naija kutegyereza agumisiriize kuhitsya aha muheru gw’emyaka rukumi reero tubone kuba abahikiriire. Obwire obwo butakahikire, Yehova ayeteekateekire kwehuzya obweremwa bwaitu. Buzima n’ahabw’ekyo, twine enshonga zihikire ez’okureeba ebirungi omu bandi, kandi tukabagumisiririza. Teekateeka ahari munyaanyazi-itwe ou iba yaatandikire kurwara endwara y’okwerarikirira munonga reero akarekyera aho kuza omu nteerane. “Eki kikaba nikinshaasha munonga,” nikwo arikugira. “Entebeekanisa zaitu ez’ebiro by’omumaisho zikajuumara.” Kwonka oyihireho ebi byona, omukazi ogu akagumisiriza iba. Akeesiga Yehova, kandi tarahanikire. Nka Yehova, akeehuzya oburemeezi obu bwona yaata omutima aha birungi bya iba. Naagira ati: “Ibanyi aine emitwarize y’omutaano, kandi naarwana mashaija kukira mporampora.” Ka ni kikuru munonga ngu tugumisirize ab’omu maka gaitu n’omu kibiina abarikuteeraho kusingura embeera zigumire!

19. Tushemereire kumariirira kukora ki?

¹⁹ Yesu na baamaraika bakashemererwa obu Ruhanga yaahanga ensi. Kwonka teekateeka oku baraashemererwe kureeba ensi eijwire abantu abahikiriire, abarikukunda Yehova kandi bakamuheereza. Teekateeka okushemererwa oku abarikuza kutegyeka na Kristo omu iguru baraagire kureeba abantu nibagasirwa omu murimo gwabo. (Kush. 4:4, 9-11; 5:9, 10) Kandi teebereza amarira g’okushemererwa garikuza omu mwanya gw’amarira g’obusaasi, obu haraabe hatakiriho endwara, enaku, n’okufa ebiro byona. (Kush. 21:4) Okuhitsya obu ebyo biraabeho, mariirira kutooreza Sho ow’omu iguru owa rukundo, ow’obwengye, n’okugumisiriza. Waakora otyo, noija kuguma oine okushemererwa, n’obu waakuhikwaho okugyezibwa kwa muringo ki. (Yak. 1:2-4) Ka nitusiima munonga Yehova ahabw’okuraganisa kwe ngu nihaija ‘kubaho okuzooka’!​—Byak. 24:15.