1. Ni bintu ki ebirungi ebi abato baingi baaherize kukora?

 BURI mwaka, enkumi n’enkumi z’Abakristaayo abato nibabatizibwa. Iwe waabatiziibwe? Ku oraabe waabatiziibwe, ab’eishe-emwe na banyaanyako nibashemererwa naiwe, kandi na Yehova naashemererwa! (Enf. 27:11) Teekateeka aha birungi bingi ebi waaherize kukora. Nk’eky’okureeberaho, obaasize kwega Baibuli obundi kumara emyaka. Omu kwega okwo okabaasa kwehamiza ngu Baibuli n’Ekigambo kya Ruhanga. Kwonka okukira ahari ekyo, obaasize kumanya Owaahandiikiise ekitabo ekyo ekirikwera kandi waamukunda. Rukundo ei oiniire Yehova ebaasize kukura waahika n’aha rurengo rw’okuba omwe aha baheereza be abeehaireyo. Ekyo ka ni kirungi!

2. Nituza kushwijuma ki omu kicweka eki?

 ² Buzima omu kutunguuka kwawe kuhika aha kubatizibwa, okwikiriza kwawe kukagyezibwa omu miringo mingi. Kwonka, ku oraagume nookura, noija kugyezibwa omu miringo misya. Sitaane naija kuteeraho kutuubya rukundo yaawe ei oiniire Yehova, kandi ayende n’okukuremesa kumuheereza. (Efe. 4:14) Eki toshemereire kukiikiriza kubaho. Niki ekirikubaasa kukuhwera kuguma ohamiire ahari Yehova, kandi okahikiiriza okwehayo kwawe? Oine ‘kugumizamu’ nootunguuka okaba Omukristaayo okuzire omu by’omwoyo. (Heb. 6:1) Kwonka shi ekyo noobaasa kukikora ata?

3. Abakristaayo boona baine kutunguuka bata bwanyima y’okubatizibwa?

³ Bwanyima y’okubatizibwa, twena twine kukuratira obuhabuzi obu entumwa Paulo yaahaire Abakristaayo omuri Efeso.  Akabahiga kuba Abakristaayo “bakuru.” (Efe. 4:13) Akaba ari nk’orikubagira ngu, ‘mugumizemu nimutunguuka.’ Nitubaasa kwetegyereza eki Paulo yaabaire naamanyisa obu yaagyeragyeranisa okukura kw’eby’omwoyo n’okukura kw’omwana. Omwereere orikuba aherize kuzaarwa naaba naashemeza munonga abazaire be. Kwonka tarikubaasa kuguma ari omwereere. Bwanyima y’obwire, naaba aine kureka “eby’obuto.” (1 Kor. 13:11) Nikyo kimwe n’Abakristaayo. Bwanyima y’okubatizibwa, twine kugumizamu nitutunguuka. Ka tushwijume bumwe aha buhabuzi oburaatuhwere kukora ekyo.

4. Ni mutwarize ki ogurikubaasa kukuhwera kutunguuka omu by’omwoyo? Shoboorora. (Abafilipi 1:9)

⁴ Kura omuri rukundo ei oiniire Yehova. Na hati nookunda Yehova munonga. Kwonka rukundo ei omwiniire neebaasa kwongyera kukura. Eta shi? Entumwa Paulo naagamba aha muringo gumwe, nk’oku kiri omu Abafilipi 1:9. (Kishome.) Paulo akashaba ngu okukunda kw’Abafilipi “kweyongyere kukanya.” N’ahabw’ekyo rukundo yaitu neebaasa kukura. Eki nitubaasa kukikora turikutunga ‘okumanya n’okwetegyereza kwona.’ Oku turikwongyera kumanya Yehova, nikwo turikwongyera kumukunda n’okusiima emitwarize ye, n’omuringo ogu arikukoramu ebintu. Nitukura omu kuteeraho kwaitu kumushemeza, turikuteeraho kwetantara kumureebya omu muringo gwona. Nitufayo munonga kumanya ebi arikukunda, n’oku turikubaasa kukora ebirikuhikaana nabyo.

5-6. Rukundo ei twiniire Yehova neebaasa kwongyera eta kukura? Shoboorora.

⁵ Nitubaasa kukura omu ku turikukunda Yehova turikwongyera kumanya gye Omwana we, orikworeka gye emitwarize nk’eye. (Heb. 1:3) Omuringo murungi gw’okumanya Yesu n’okwega ebitabo bina eby’Engiri. Ku oraabe otakagizire omucwe murungi gw’okushoma Baibuli buri izooba, ahabw’enki otarikutandika hati? Waaba nooshoma ebirikukwata ahari Yesu, fayo kwetegyereza emitwarize ye. Akaba ayorobi kuhikwa, nangwa akakiikira n’abaana bato. (Mak. 10:13-16) Akaba naareetera abeegi be kuhurira baikaikaine, batarikutiina kugamba eki barikuteekateeka yaaba ariho. (Mat. 16:22) Omu muringo ogu, Yesu akatooreza Ishe ow’omu iguru. Na Yehova ayorobi kuhikwa. Nitubaasa kumuhikaho kurabira omu kushaba. Omu kushaba, nitubaasa kumugambira kyona ekiri omu mutima gwaitu. Kandi nituba twine obuhame ngu tarikwija kutucwera orubanja. Naatukunda, kandi naatufaho.​—1 Pet. 5:7.

⁶ Yesu akaba naagirira abantu esaasi. Entumwa Matayo akagamba ahari Yesu ati: “Ku yaareebire emitwe y’abantu, yaabagirira esaasi, ahakuba bakaba baburaburiirwe, bashobeirwe nk’entaama ezitaine muriisa.” (Mat. 9:36) Kandi Yehova naayehurira ata? Yesu akagira ati: “Na Tata ori omu iguru tarikwenda omwe ahari aba bato kuhwerekyerera.” (Mat. 18:14) Eki ka nikihuumuriza! Twayongyera kumanya gye Yesu, rukundo ei twiniire Yehova neekura.

7. Noobaasa kuhwerwa ota waashashaanuka n’Abakristaayo abakuzire omu by’omwoyo?

⁷ Noobaasa n’okwongyera kwega kugira rukundo n’okwongyera aha kutunguuka kwawe kw’Ekikristaayo, orikumanya gye ab’eishe-emwe na banyaanyako omu kibiina kyawe. Yetegyereze oku barikuba bashemereirwe. Tibarikwefuuza ahabw’okucwamu kuheereza Yehova. Babuuze kukugambira ebi barabiremu omu kuheereza Yehova. Waaba nooyenda kucwamu aha nshonga nkuru, bashabe obuhabuzi. Kasita, ‘ahu abahi b’obwengye bari, nihabaho obusingye.’​—Enf. 11:14.

8. Noobaasa kukora ki kyabaho okabangaanisa aha ki Baibuli erikwegyesa?

 ⁸ Singura okubangaanisa. Nk’oku kirikworekwa omu  kacweka 2, Sitaane naija kuteeraho kukuremesa kutunguuka omu by’omwoyo. Omuringo gumwe ogu arikubaasa kukora ekyo nookukureetera kubangaanisa aha nyegyesa za Baibuli ezimwe. Nk’eky’okureeberaho, juba nari bwanyima noobaasa kwija kugwa aha nyegyesa etarikuhaisa Ruhanga ekitiinisa erikugira ngu ebintu bikabaho bubaho. Eki noobaasa kuba waabaire otarikuteekateeka ngu nikiija kubaho obu waabaire okiri muto, kwonka hati obu ori mukuru, noobaasa kuba nooyegyesibwa enyegyesa egi aha ishomero. Ebi abashomesa baawe barikugamba kushagika enyegyesa y’ebintu kubaho bubaho, nibibaasa kureebeka nk’eby’obwengye kandi ebiine obuhame. Kwonka, nibabaasa kuba batakateekateekahoga n’obwegyendesereza aha kubaho kw’Omuhangi. Ijuka omusingye oguri omu Enfumu 18:17: “Obanza kutongana oshusha oti, ebye nibyo bihikire, kwonka kitabaarizibwa ku aija amwomesereza.” Omu mwanya gw’okufa agaikiriza ebi orikuhurira aha ishomero nk’ebihikire, teekateeka n’obwegyendesereza aha biri omu Kigambo kya Ruhanga Baibuli. Condooza omu bitabo byaitu. Gamba n’ab’eishe-emwe na banyaanyazi-itwe, ira abaabaire nibaikiriza ngu ebintu bikabaho bubaho. Babuuze ekyabahamiize ngu hariho Omuhangi orikubakunda. Okugaaniira nk’oku okurikwombeka nikubaasa kukuhwera kuta omutima aha bihikire.

9. Nooyegyera ki ahari Melissa?

⁹ Munyaanyazi-itwe orikwetwa Melissa akagasirwa munonga omu kucondooza oku yaakozire aha kuhangwa kw’ebintu. * Naagira ati: “Aha ishomero enyegyesa y’ebintu kubaho bubaho neeyegyesibwa omu muringo ogurikworeka ngu ehikire. Omu kubanza, nkaba nintiina kugira eki naakora aha kubangaanisa kwangye. Nkaba nintiina kucondooza kugira ngu ntashanga enyikiriza zangye nizo zigwire. Kwonka Yehova tarikwenda ngu tumuramye tutaine buhame. N’ahabw’ekyo nkacwamu kugira eki naakora aha kubangaanisa kwangye. Nkashoma ekitabo Is There a Creator Who Cares About You? n’obutabo Was Life  Created? na Obukomooko bw’Amagara—Ebibuuzo Bitaano Ebihikire Kubuuzibwa. Eki nikyo kyenyini eki naabaire niinyenda. Nangwa ku ogire ngu nkakikora kare.”

10-11. Niki ekirikubaasa kukuhwera kuguma ori oshemeire omu micwe? (1 Abatesalonika 4:3, 4)

¹⁰ Yangira ebikorwa bibi. Omu bushogoyo, enyehurira z’okwenda kuteerana nizibaasa kuba ez’amaani, kandi noobaasa kugyemeserezibwa munonga kushambana. Sitaane naayenda ngu okuratire ebyetengo byawe. Niki ekirikubaasa kukuhwera kuguma ori oshemeire omu micwe? (Shoma 1 Abatesalonika 4:3, 4.) Omu kushaba kwawe, gambira Yehova oku orikwehurira. Mugambire oku buzima orikwehurira, kandi omushabe kukuha amaani. (Mat. 6:13) Ijuka ngu Yehova naayenda kukuhwera, beitu kutari kukucwera orubanja. (Zab. 103:13, 14) Ekigambo kya Ruhanga nakyo nikibaasa kukuhwera. Melissa, owaaba yaagambirweho, akaba naateganisibwa ebiteekateeko bitashemeire. Naagira ati: “Okushoma Baibuli buri izooba kikampwera kutahanika. Kikanyijutsya ngu ndi owa Yehova, kandi ngu nyine kumuheereza.”​—Zab. 119:9.

¹¹ Otateeraho kumaraho oburemeezi bwawe wenka. Gambira abazaire baawe ebirikukuteganisa. Amazima gari ngu ti kyorobi kugamba aha nshonga nk’ezi ezirikukukwataho nk’omuntu, kwonka ni kikuru ngu okikore. Melissa naagira ati: “Nkashaba obumanzi reero naagambira taata oburemeezi bwangye. Bwanyima y’ekyo, nkagira oburuhuuko bwingi. Nkaba niimanya ngu Yehova naanyesiimisa.”

12. Niki ekirikubaasa kukuhwera kucwamu gye?

¹² Yebeemberwa emisingye ya Baibuli. Mporampora noija kuguma nootunga obugabe bw’okwecweramu. Kwonka nabwo tokamanyire bingi. Noobaasa kwetantara ota kukora enshobe erikubaasa kushiisha omukago gwawe na Yehova? (Enf. 22:3) Munyaanyazi-itwe orikwetwa Kari naashoboorora ekyamuhweraire kucwamu gye. Akeetegyereza ngu Abakristaayo abakuzire omu by’omwoyo tibaine kuheebwa ekiragiro omu buri mbeera. Naagira ati: “Nyine kwetegyereza emisingye ya Baibuli omu mwanya gw’ebiragiro.” Waaba nooshoma Baibuli, yebuuze oti: ‘Ebi naashoma nibinyegyesa ki aha miteekateekyere ya Yehova? Birimu emisingye ei ndikubaasa kugyenderaho omu mitwarize yangye? Kyaba nikwo kiri, niinyija kugasirwa nta naabigyenderaho?’ (Zab. 19:7; Isa. 48:17, 18) Waashoma Baibuli kandi okateekateeka aha misingye yaayo, nikiija kukworobera kucwamu ebirikushemeza Yehova. Waagumizamu nootunguuka, noija kwetegyereza ngu toine kuheebwa ekiragiro omuri buri mbeera, ahakuba noija kuba noomanya emiteekateekyere ya Yehova aha nshonga.

13. Noobaasa kugasirwa ota omu banywani barungi? (Enfumu 13:20)

¹³ Nywana abarikukunda Yehova. Nk’oku kyaba kyagambirweho, abanywani abu orikutoorana nibaija kukwata munonga aha kutunguuka kwawe okw’Ekikristaayo. (Shoma Enfumu 13:20.) Munyaanyazi-itwe Sara akaba atakiine kushemererwa. Bwanyima haine ekyabaireho ekyamuhweraire kugaruka kugira okushemererwa. Sara naashoboorora ati: “Nkatunga abanywani omu bwire obuhikire. Nyowe n’ondiijo mwishiki tukatandika kwega hamwe Omunaara gw’Omurinzi buri saabiiti. Omunywani ondiijo akampwera kutandika kugarukamu omu nteerane. Ahabw’okuhwerwa banywani bangye, nkatandika kutwara okweyegyesa n’okushaba nk’ebintu bikuru. Nkatandika kugira omukago guhami  na Yehova, kandi nkagaruka naagira okushemererwa.”

14. Julien akatunga ata abanywani barungi?

¹⁴ Noobaasa kunywana ota abantu abarikwija kukuhwera kukora ebirungi? Julien, hati ori omureeberezi, naagira ati: “Obu naabaire ndi muto, nkatunga abanywani barungi ahabw’okwejumba omu buheereza. Abanywani aba bakaba baine omujinya, kandi bakampwera kureeba oku obuheereza burikushemeza. Nkatandika kugira ekigyendererwa ky’okuza omu buheereza obw’obutwire. Kandi nketegyereza ngu nkaba ntwire ninfeerwa okugira abanywani n’emikago mirungi, ahabw’okuguma niinywana ab’orwingano rwangye bonka. Bwanyima, nkatunga n’abanywani barungi aha Beseeli. Eby’okureeberaho byabo bikampwera kutoorana eby’okweshemeza ebirungi, kandi eki kikanyiriza haihi na Yehova.”

15. Ni kurabura ki okurikukwata aha kugira emikago oku Paulo yaahaire Timoseo? (2 Timoseo 2:20-22)

¹⁵ Kandi shi waamanya ngu omuntu omu kibiina kyawe ti munywani murungi? Paulo akaba naamanya ngu abamwe omu kibiina Ekikristaayo omu kyasha ky’okubanza bakaba batarikukora gye omu by’omwoyo, n’ahabw’ekyo akarabura Timoseo kubeetantara. (Shoma 2 Timoseo 2:20-22.) Omukago gwaitu na Yehova n’ogw’omuhendo. Titushemereire kwikiriza omuntu weena kushiisha omukago ogwo, ogu turikuba twine na Tataitwe ow’omu iguru.​—Zab. 26:4.

16. Noobaasa kutaho bigyendererwa ki?

¹⁶ Taho ebigyendererwa ebihikire. Taho ebigyendererwa ebiraakuhwere kuhama okaba omuntu murungi. (Efe. 3:16) Nk’eky’okureeberaho, noobaasa kucwamu kuboneza omu muringo ogu orikwegamu Baibuli n’oku orikugishoma. (Zab. 1:2, 3) Nari noobaasa kureeba ngu oine kwongyera aha mirundi ei orikushaba, n’omuringo ogu orikushabamu. Obundi noobaasa kushanga ngu oine kwongyera kwezibira aha bikwatiraine n’eby’okweshemeza, n’oku orikukoresa obwire bwawe. (Efe. 5:15, 16) Yehova ku araareebe obweziriki bwawe omu kwongyera kutunguuka, naija kushemererwa.

17. Ni kumarwa ki okurikuruga omu kuhwera abantu?

 ¹⁷ Nooba Omukristaayo okuzire omu by’omwoyo waahwera abantu abandi. Yesu akagira ngu okuha nikureeta okushemererwa “okukira okuheebwa.” (Byak. 20:35) Noija kugasirwa munonga waakoresa obwire bwawe n’amaani gaawe g’obunyeeto kuhwera abandi. Nk’eky’okureeberaho, noobaasa kutaho ekigyendererwa ky’okuhwera abakaikwire n’abaine amagara mabi omu kibiina kyanyu. Obundi noobaasa kwehayo ngu bakutume, nari kubahwera kwega kukoresa ebyoma byabo. Ku oraabe ori omutsigazi, taho ekigyendererwa ky’okuba omuheereza, kugira ngu oheereze ab’eishe-emwe na banyaanyako. (Fil. 2:4) Kandi nooyoreka ngu nookunda n’ab’aheeru y’ekibiina orikubagana nabo amakuru marungi g’Obukama. (Mat. 9:36, 37) Kyaba nikibaasika, gira obuheereza bw’obutwire obu waazamu.

18. Okuheereza omu buheereza obw’obutwire nikibaasa kukuhwera kita kukura?

¹⁸ Obuheereza bw’obutwire nibukubaasisa kutunga emigisha mingi y’okutunguuka omu by’omwoyo. Okuba payoniya nikibaasa kukwiguriraho orwigi rw’okuza omu Ishomero ry’Ababuurizi b’Obukama. Noobaasa kuheereza aha Beseeli, nari kuza kwombeka ebyombeko by’ekibiina. Munyaanyazi-itwe muto Kaitlyn ori payoniya naagira ati: “Okwejumba omu kubuurira ndi hamwe n’abarikumanya kubuurira kikampwera munonga kukura omu by’omwoyo bwanyima y’okubatizibwa. Eby’okureeberaho byabo bikampiga kwongyera kumanya ebiri omu Baibuli n’okwongyera kuboneza omu myegyeseze yangye.”

19. Noija kutunga migisha ki waagumizamu nootunguuka omu by’omwoyo?

¹⁹ Waagumizamu nootunguuka omu by’omwoyo, noija kutunga emigisha mingi. Eki nikibaasa kukuhwera kutashiisha obunyeeto bwawe orikwetantara kutaho ebigyendererwa ebitaine mugasho. (1 Yoh. 2:17) Noija kwetantara kugira amaganya agarikureetwa okucwamu kubi. Kureka, noija kutunga obusinguzi n’okushemererwa ebyabuzima. (Enf. 16:3) Eky’okureeberaho kyawe kirungi nikiija kuhiga ab’eishe-emwe abandi, abato n’abakuru. (1 Tim. 4:12) Kandi ekikuru munonga, noija kutunga obusingye n’okumarwa ahabw’okushemeza Yehova, n’okugira omukago murungi nawe.​—Enf. 23:15, 16.