1. Nitugasirwa tuta twagamba oku twaizire omu “mazima”?

 “OKAIJA ota omu mazima?” Hatariho kubangaanisa noobaasa kuba ogarukiremu ekibuuzo ekyo emirundi mingi. Eki ni kimwe aha bibuuzo ebi Omukristaayo mugyenzi waawe arikubanza kukubuuza mwaba nimuteeraho kumanyana. Nitukunda kuhurira oku ab’eishe-emwe na banyaanyazi-itwe baamanyire Yehova, kandi nitukunda kubagambira oku turikukunda amazima. (Rom. 1:11) Okugaaniira oku nikwongyera kutwijutsya oku amazima gari ag’omuhendo ahariitwe. Kandi nitweyongyera n’okumariirira kugumizamu ‘nitugyendera omu mazima,’ ekirikumanyisa okuguma nitutwaza omu muringo ogurikureetera Yehova kutusiima n’okutuha emigisha.​—3 Yoh. 4.

2. Nituza kushwijuma ki omu kicweka eki?

² Omu kicweka eki, nituza kweijutsya enshonga zimwe ahabw’enki nitukunda amazima. Bwanyima nituza kushwijuma oku turikubaasa kugumizamu nitworeka ngu nitukunda ekiconco ky’omuhendo eki. Buzima, okweijutsya oku nikwija kutuhwera kwongyera kusiima Yehova ahabw’okutureeta omu mazima. (Yoh. 6:44) Eki nikiija n’okwongyera aha kyetengo kyaitu eky’okubagana n’abandi amazima.

3. Ni nshonga ki enkuru erikutureetera kukunda amazima?

³ Nitukunda amazima ahabw’enshonga nyingi. Enkuru munonga aharizo, n’okugira ngu nitukunda Yehova Ruhanga, Obukomooko bw’amazima. Kurabira omu Kigambo kye Baibuli, tubaasize kumumanya, ti nk’Omuhangi w’eiguru n’ensi oine amaani kyonka, beitu nka Tataitwe ow’omu iguru oine  rukundo, kandi orikutufaho. (1 Pet. 5:7) Nitumanya ngu Ruhanga waitu aine ‘okusaasira n’embabazi, tarikurahuka kugira ekiniga, aijwire embabazi n’amazima.’ (Kur. 34:6) Yehova naakunda oburingaaniza. (Isa. 61:8) Naayehurira kubi yaareeba nitubonabona, kandi ayeteekateekire kwihaho okubonabona kwona omu bwire bwe obuhikire, kandi aine n’ekihika ky’okukikora. (Yer. 29:11) Ekyo ka ni kirungi! Egi niyo nshonga emwe ahabw’enki nitukunda Yehova munonga!

4-5. Ahabw’enki entumwa Paulo naagyeragyeranisa amatsiko gaitu n’enanga y’emeeri?

⁴ Ni nshonga ki endiijo erikutureetera kukunda amazima? Amazima nigatugasira omu miringo mingi. Yetegyereze eky’okureeberaho. Baibuli neetuha amatsiko g’ebiro by’omumaisho. Entumwa Paulo kubaasa kworeka obukuru bw’amatsiko, akahandiika ngu “amatsiko aga tugaine nk’ekitsibo [enanga y’amagara],” n’obuhame obutarikubangaanisibwa. (Heb. 6:19) Nk’oku enanga erikuhamya emeeri kutagyenda neezongazonga, amatsiko gaitu agarikwegamira ahari Baibuli nigatuhamya twaba nitugyezibwa.

⁵ Ebyetooroire ebigambo bya Paulo ebyo, nibyoreka ngu akaba naagamba aha matsiko g’okuza omu iguru agu Abakristaayo entoore baine. Kwonka ebigambo bye nibikwata n’aha Bakristaayo abarikwija kutuura omu paradiso omu nsi ebiro byona. (Yoh. 3:16) Buzima, okwega aha matsiko g’okutunga amagara agatahwaho kituhweraire kubaho twine ekigyendererwa.

6-7. Yvonne agasiirwe ata omu kwega amazima agarikukwata ahari nyentsya?

⁶ Teekateeka ahari munyaanyazi-itwe orikwetwa Yvonne. Tarakuriire omu mazima, kandi omu buto bwe akaba naatiina okufa. Naijuka obu yaashoma ebigambo ebyamugumire omu biteekateeko ebi: “Obwire nibwija kuhika oshangye hatariho nyencakare.” Naagira ati: “Ebigambo ebyo bikandeetera kuraara nindeeba ndikuteekateeka aha biro by’omumaisho. Nkateekateeka nti: ‘Buzima aga tigo gashemereire kuba amagara heza. ‘Ahabw’enki turiho?’ Nkaba ntarikwenda kufa!”

⁷ Bwanyima obu Yvonne yaabaire ari omushogoyo, akabona Abajurizi ba Yehova. Naashoboorora ati: “Nkatandika kwikiriza ngu nimbaasa kugira amatsiko g’okutuura omu Paradiso omu nsi ebiro byona.” Okwega amazima kigasiire kita munyaanyazi-itwe ogwo? Naayongyeraho ati: “Tinkiraara nindeeba ndikwerarikirira ahari nyentsya yangye nari okufa.” Nikireebwa butunu, amazima n’ag’omuhendo ahari Yvonne, kandi naatunga okumarwa ahabw’okubagana n’abandi amatsiko ge aga nyentsya.​—1 Tim. 4:16.

8-9. (a) Omuri kimwe aha kitebyo kya Yesu, omushaija omwe akaba naatwara ata eky’eitungo eki yaaboine? (b) Amazima n’ag’omuhendo gata ahariiwe?

⁸ Amazima ga Baibuli nigatwariramu n’amakuru marungi g’Obukama bwa Ruhanga. Yesu akagyeragyeranisa amazima agarikukwata aha Bukama bwa Ruhanga n’eky’eitungo ekisherekirwe. Nk’oku Matayo 13:44 harikworeka, Yesu akagira ati: “Obukama bw’omu iguru nibushusha nk’eky’obutungi ekyasherekirwe omu musiri, bwanyima omuntu ku yaakigwireho, nawe yaakishereka, yaagyenda, yaatunda ebi yaabaire aine byona ashemereirwe, yaija, yaagura omusiri ogwo.” Yetegyereze ngu omushaija ogu akaba atarikusherura eky’eitungo ekyo. Kwonka ku yaakiboine, akeefeerereza ebintu bingi reero yaakigura. Nangwa, akaguza buri kimwe eki yaabaire aine. Ahabw’enki? Akaba naamanya ngu eky’eitungo ekyo n’eky’omuhendo. Kikaba nikikirira kimwe byona ebi yaayefeerereize.

 ⁹ Nikwo orikutwara otyo amazima? Buzima nikwo okwo! Nitumanya ngu omu nsi egi tihariho ekirikubaasa kugyeragyeranisibwa n’okushemererwa oku twine ahabw’okuheereza Yehova. Twine amatsiko g’okutunga amagara agatahwaho omu biro by’omumaisho turikutegyekwa Obukama bwe. Omugisha ogu twine ogw’okugira omukago murungi na Yehova, nigukirira kimwe byona ebi turikwefeerereza. Okushemererwa kwaitu okurikukirayo ‘n’okumushemeza omuri byona.’​—Kol. 1:10.

10-11. Niki ekyahigire Michael kuhindura entwaza ye?

¹⁰ Baingi ahariitwe twefeerereize bingi kubaasa kusiimwa Yehova. Abamwe batsigireho emirimo y’ekitiinisa omu nsi. Abandi barekyeire aho kusherura eby’obugaiga. Kandi abandi babaasize kuhindukira kimwe bwanyima y’okwega ebirikukwata ahari Yehova. Eki nikyo Michael yaakozire. Tarakuriire omu mazima. Obu yaabaire ari omutsigazi, akatendekwa kuba omurwani. Naagira ati: “Nkaba ninkitwara nka kikuru kutendeka omubiri gwangye gukaguma guri gye. Obumwe, okaba nooshusha ngu tihaine orikumbaasa.” Kwonka Michael ku yaatandikire kwega Baibuli, akeega oku obushaarizi burikureetera Yehova kwehurira. (Zab. 11:5) Michael arikugamba aha mushaija n’omukazi we abaamwegyeise Baibuli, naagira ati: “Tibarangambiire ngu nyine kurekyera aho omuzaano gw’okurwana, bo bakagumizamu nibaanyegyesa amazima ga Baibuli.”

¹¹ Michael ku yaagumire naayega ebirikukwata ahari Yehova, rukundo ei yaabaire amwiniire yaaguma neeyeyongyera. Na munonga akakwatwaho embabazi ezi Yehova ainiire abarikumuramya. Bwanyima, Michael akeetegyereza ngu aine kucwamu ekirikuhindurira kimwe amagara ge. Naagira ati: “Nkaba niimanya ngu okureka omuzaano gw’okurwana nikyo kirikwija kukirayo kungumira. Kwonka nabwo nkaba niimanya ngu nikiija kushemeza Yehova, kandi nkaba niimpamiza kimwe ngu okumuheereza nikukirira kimwe okwefeerereza kwangye kwona.” Michael akeetegyereza omuhendo gw’amazima agu yaaboine, kandi eki kikamuhiga kukora empinduka z’amaani.​—Yak. 1:25.

12-13. Baibuli ekahwera eta Mayli kwetegyereza ebi yaabaire atarikumanya?

¹² Baibuli neeyoreka oku amazima gari ag’omuhendo, erikugagyeragyeranisa n’etaara erikwakira omu mwirima. (Zab. 119:105; Efe. 5:8) Mayli, kuruga Azerbaijan, naasiima munonga okwetegyereza oku atungire omu Kigambo kya Ruhanga. Akakurira omu ka ebaganisiibwemu ediini. Ishe akaba ari Omusiraamu, kandi nyina akaba ari Omuyudaaya. Naagira ati: “N’obu ndaabe naabaire ntarikuhakanisa okubaho kwa Ruhanga, nkaba nyine ebibuuzo bingi. Nkaba niinyebuuza, ‘ahabw’enki Ruhanga yaahangire abantu, kandi kiine mugasho ki omuntu kubonabona ebiro byona eby’amagara ge, kandi akahendera arikubonabonesibwa omu muriro ogutarikuraara ebiro byona?’ Ahabw’abantu kugira ngu kyona ekirikubaho n’ekigyendererwa kya Ruhanga, nkaba niinyebuuza, ‘Ruhanga shi naahindura abantu eky’okuzaanisa reero ashemererwa arikubareeba nibabonabona?’”

¹³ Mayli akagumizamu naasherura eby’okugarukamu by’ebibuuzo bye. Bwanyima y’obwire, akaikiriza kwega Baibuli kandi yaija omu mazima. Naagira ati: “Obuhame oburikwetegyerezibwa kuruga omu Baibuli bukampwera kuhinduka kuba omuntu orikushemererwa. Enshoboorora nungi eri omu Kigambo kya Ruhanga neendeetera kugira obusingye bw’omu mutima.” Nka Mayli, twena  nituhimbisa Yehova, ‘owaatwetsire okuruga omu mwirima, okutaaha omu mushana gwe ogurikutangaaza.’​—1 Pet. 2:9.

14. Nitubaasa kwongyera tuta kukunda amazima? (Reeba n’akabokusi “ Okugyeragyeranisa Okundi.”)

¹⁴ Aba ni bamwe aha barikworeka oku amazima gari ag’omuhendo. Buzima noobaasa kuteekateeka aha bandi baingi. Ahabw’enki otarikugihindura enshonga y’okwegaho kubaasa kumanya ebindi ahabw’enki twine kukunda amazima? Oku turikwongyera kukunda amazima, nikwo turikwongyera kusherura oburyo bw’okworeka ngu nitugakunda.

15. Ni muringo ki gumwe ogu turikubaasa kworekamu ngu nitukunda amazima?

¹⁵ Nitubaasa kworeka ngu nitukunda amazima butoosha turikweyegyesa Baibuli n’ebitabo ebirikugishoboorora. Yaaba tumazire omu mazima emyaka engahi, butoosha nihaba hariho bingi eby’okwega. Omunaara gw’Omurinzi ogwabandize kushohozibwa gukagira guti: “Amazima gari nk’ekimuri kikye omu ihamba, ekyetooroirwe omwata mubi ogurikuba nigwenda kukiremesa kukura. Waaba ori ow’okubona ekimuri ekyo, nooba oine kugumizamu  noosherura obutaitsya. . . . Waakibona nooba oine kwinama kukicwa. Kwonka nooba otaine kumarwa n’ekimuri kimwe eky’amazima. . . . Gumizamu noorundaana, kandi sherura ebindi.” Okwega ti murimo gworobi, kwonka okuteeraho kwega tikurikufa busha.

16. Ni muringo ki gw’okwega ogu oshangire gurikukora gye? (Enfumu 2:4-6)

¹⁶ Ti twena ngu nitukunda okushoma n’okwega. Kwonka Yehova naatugira ngu twine kugumizamu ‘nitusherura’ okwetegyereza amazima, kandi tugumizemu ‘nitukuronda.’ (Shoma Enfumu 2:4-6.) Eki twateeraho kukikora, nitwija kugasirwa butoosha. Corey arikugamba aha kushoma Baibuli kwe, naagira ngu naata omutima aha mushororongo gumwe-gumwe. Naashoboorora ati: “Ninshoma obugambo bwona obw’ahansi, nshoma ebyahandiikirwe ebijuriziibwe, kandi nyongyera n’okucondooza. . . . Ningasirwa munonga omu kushoma kwangye ndikukoresa omuringo ogu!” Yaaba tukoresa omuringo ogu nari ogundi gwona, nitworeka ngu nitusiima amazima, twata amaani gaitu n’obwire bwaitu omu kugeeyegyesa.​—Zab. 1:1-3.

17. Nikimanyisa ki okugyendera aha mazima? (Yakobo 1:25)

¹⁷ Buzima, nitumanya ngu tikirikumara okwega bwega amazima. Kubaasa kugasirwa omu bwijwire, twine kugyendera aha mazima, ekirikumanyisa okuta omu nkora ebi turikwega. Obwo nibwo amazima garaatureetere okushemererwa okwabuzima. (Shoma Yakobo 1:25.) Nitubaasa kuhamya tuta ngu nitugyendera aha mazima? Ow’eishe-emwe omwe naagira ngu twine kweshwijuma kumanya ahu turikukora gye, n’ahu twine kwongyeramu amaani. Entumwa Paulo akakigambaho ati: “Amazima agu tuhikiremu, tube nigo twagyenderamu.”​—Fil. 3:16.

18. Ahabw’enki nituteeraho kugumizamu ‘nitugyendera omu mazima’?

¹⁸ Teekateeka aha birungi ebirikuruga omu kuteeraho kugumizamu ‘noogyendera omu mazima’! Titurikwongyera kuboneza embeera zaitu kyonka, beitu nitushemeza na Yehova n’ab’eishe-emwe bagyenzi baitu. (Enf. 27:11; 3 Yoh. 4) Mbwenu shi buzima, hariho enshonga ezirikukira ezi, ezishemereire kutureetera kukunda amazima n’okugagyenderaho?