1. Ahabw’enki Yesu yaashabire Yehova kurinda abakuratsi be?

 AHA kiro ekyahereerukireyo Yesu atakafiire, akashaba Ishe ow’omu iguru omu muringo gw’omutaano. Akashaba Yehova kurinda abakuratsi be. (Yoh. 17:15, 20) Nangwa, Yehova akaba atwire naareeberera abantu be, naabafaho, kandi naabarinda. Kwonka, Yesu akaba naamanya ngu Sitaane naija kwongyera kuhakanisiza kimwe abakuratsi be. Kandi Yesu akeetegyereza ngu Yehova aine kubahwera kubaasa kusingura Omuregi ogwo.

2. Kurugiirira ahari Zaaburi 33:18-20, ahabw’enki tutaine kutiina embeera zigumire?

² Ensi ya Sitaane neereetera Abakristaayo kugyemeserezibwa munonga ebiro ebi. Nituhikwaho ebigyezo bingi ebirikubaasa kutumaramu amaani nangwa bikagyeza n’okuhamira kwaitu ahari Yehova. Kwonka nk’oku turikuza kureeba omu kicweka eki, tihashemereire kugira ekyatutiinisa. Yehova naaba atutaireho eriisho rye, naareeba embeera zigumire ezi turikurabamu, kandi naaba ayeteekateekire kutuhwera kuzirabamu. Ka tureebe babiri abarikugambwaho omu Baibuli, kutuhwera kumanya ngu Yehova naaguma ataire ‘eriisho rye aha barikumutiina.’​—Shoma Zaaburi 33:18-20.

3. Ni ryari obu turikubaasa kwehurira nk’abari twenka?

³ N’obu turaabe twine eka mpango ey’abarikuramya Yehova, obumwe nitubaasa kwehurira nk’abari twenka. Nk’eky’okureeberaho, abato nibabaasa kuhurira bari bonka baaba nibashoboororera abu barikushoma nabo enyikiriza zaabo, nari baaza omu kibiina ekindi. Bamwe ahariitwe nitubaasa kwehurira kubi nari kugira emiteekateekyere etahikire, turikuteekateeka ngu kufa n’enyehurira zaitu twenka. Nitubaasa kweziringa kugambira abandi oku turikwehurira ahabw’okutiina ngu tibarikwija kutwetegyereza. Kandi obumwe, nitubaasa n’okwebuuza yaaba haine  orikutufaho. Yaaba twehurira kubi ahabwa nshonga ki, nitubaasa kwereeba nk’abataine kihwera kandi twerarikirire. Tihariho obu Yehova areenzire ngu twehurire tutyo. Ahabw’enki twine obuhame obu?

4. Ahabw’enki nabi Eliya yaagizire ngu, “nyowe, nyenka niinye ntsigaireho”?

⁴ Teekateeka ahari Eliya omushaija omwesigwa. Yezebeeli akaba agizire ngu naija kumwita, n’ahabw’ekyo akaba amazire ebiro 40 ahungire. (1 Bag. 19:1-9) Empereruka, ku yaabaire ari wenka omu nyanga y’eibaare, akatakira Yehova ati: ‘Niinye [nabi nyenka] otsigaireho.’ (1 Bag. 19:10) Omuri Israeli hakaba harimu baanabi abandi, ahakuba Obadia akaba asherekire baanabi 100 kugira ngu omwinazi Yezebeeli atabaita. (1 Bag. 18:7, 13) Ahabw’enki shi Eliya yaayehuriire nk’ori wenka? Mbwenu shi akateekateeka ngu baanabi boona abu Obadia yaabaire asherekire bakaba baaherize kufa? Akeehurira nk’ori wenka shi ahabw’okugira ngu abandi bakanga kumwegaitaho omu kuheereza Yehova, bwanyima y’okugyezesa Baali aha Rushozi Karumeeli? Obundi shi akateekateeka ngu tihaine owaabaire naamanya akabi aku arimu, nari akaba naayebuuza yaaba haine orikumufaho? Baibuli terikushoboorora omu bwijwire enyehurira za Eliya. Kwonka eki turikumanya gye kiri ngu Yehova akaba naayetegyereza gye ahabw’enki Eliya yaabaire naayehurira nk’ori wenka, kandi akaba naamanya gye oku araamuhwere.

5. Yehova akahamiza ata Eliya ngu akaba atari wenka?

⁵ Yehova akahwera Eliya omu miringo mingi. Akahiga Eliya kugamba. Emirundi ebiri akabuuza Eliya ati: “Nookora ki aha?” (1 Bag. 19:9, 13) Buri murundi, Yehova akahurikiza Eliya arikugamba enyehurira z’omu mutima gwe. Yehova akagarukamu Eliya arikumweyoreka, kandi akamworeka n’amaani ge. Kandi akahamiza na Eliya ngu hakiriho abandi baingi abarikumuramya. (1 Bag. 19:11, 12, 18) Buzima, Eliya akatunga oburuhuuko bwanyima y’okugambira Yehova ekimuri aha mutima, n’okuhurira oku Yehova yaamugarukiremu. Yehova akaha Eliya obujunaanizibwa bwingi bukuru. Akamugambira kushuka amajuta ahari Hazaeli kuba omugabe wa Siria, Yehu kuba omugabe wa Israeli, na Elisa kuba nabi. (1 Bag. 19:15, 16) Yehova  okuha Eliya obujunaanizibwa obu, kikahwera Eliya kuta omutima aha bintu ebirungi. Kandi akamuha na Elisa kuba omuhwezi we. Noobaasa kutunga ota obuhwezi bwa Yehova waaba nooyehurira nk’ori wenka?

6. Noobaasa kushaba ki waaba nooyehurira nk’ori wenka? (Zaaburi 62:8)

⁶ Yehova naayenda ngu omushabe. Naareeba ebi orikurabamu, kandi naakuhamiza ngu naija kuhurira okushaba kwawe ahu oraamushabire hoona. (1 Tes. 5:17) Naashemererwa kuhurira okushaba kw’abarikumuramya. (Enf. 15:8) Noobaasa kushaba ki waaba nooyehurira nk’ori wenka? Gambira Yehova buri kimwe ekiri omu mutima gwawe, nk’oku Eliya yaakozire. (Shoma Zaaburi 62:8.) Mugambire ebirikukwerarikiriza n’oku birikukureetera kwehurira. Shaba Yehova kukuhwera kumanya oku oraatwaze waaba nooyehurira kubi. Nk’eky’okureeberaho, waayehurira nk’ori wenka kandi okatiina kubuurira aha ishomero, shaba Yehova kukuha obumanzi bw’okugamba. Noobaasa kumushaba kukuha obwengye bw’okushoboorora gye enyikiriza zaawe. (Luk. 21:14, 15) Kandi waaba nooteganisibwa enyehurira mbi, shaba Yehova kukuhwera kukigambaho n’Omukristaayo okuzire omu by’omwoyo. Noobaasa n’okushaba Yehova kuhwera ou orikwenda kuhindura obuhungiro bwawe kukuhurikiza n’okukwetegyereza. Gambira Yehova buri kimwe ekiri omu mutima gwawe, oreebe oku araagarukyemu okushaba kwawe, kandi ikiriza obuhwezi bw’abandi, obwo torikwija kwehurira nk’ori wenka munonga.

7. Nooyegyera ki ahari Mauricio?

⁷ Twena Yehova atuhaire omurimo gw’omuhendo ogw’okukora. Noobaasa kugira obuhame ngu naakumanya, kandi naasiima byona ebi orikukora kuhikiiriza obujunaanizibwa bwawe omu kibiina n’omu buheereza. (Zab. 110:3) Okwejumbira kimwe omu murimo ogu, nikibaasa kukuhwera kita waaba nooyehurira nk’ori wenka? Yetegyereze ebirikukwata aha w’eishe-emwe muto orikwetwa Mauricio. * Bwanyima y’akaire kakye Mauricio aherize kubatizibwa, omwe ahari banywani be ab’aha mara mporampora akatandika kuruga omu mazima. Mauricio naagira ati: “Okumureeba naahaba naaruga ahari Yehova kikandeetera kuteyikiririzamu. Nkebuuza yaaba nimbaasa kuhikiza kimwe okwehayo kwangye, kandi nkaguma omu ka ya Yehova. Nkehurira nk’ori wenka, kandi nkaba ninteekateeka ngu tihaine orikubaasa kwetegyereza enyehurira zangye.” Niki ekyahweraire Mauricio? Naagira ati: “Nkongyera aha buheereza bwangye. Eki kikampwera kutaguma ninyeteekateekaho, n’okutata omutima aha nyehurira zangye ezigwire. Nkashemererwa, n’eihamba ryangye ryatuuba obwo ndikukora n’abandi omu buheereza.” Buzima, nangwa n’obu twakuba tutarikubaasa kubuurira n’abandi butunu, nikitugumya twayejumba omu  buheereza turikuhandiika amabaruha nari turikuteera esimu. Niki ekindi ekyahweraire Mauricio? Naayongyeraho ati: “Kandi nkongyera kukora bingi omu kibiina. Omutima gwangye nkaguta aha kutebeekanisa embazo z’abeegi n’okuziha. Ebi byona bikandeetera kuhurira ninsiimwa Yehova n’abandi.”

8. Okugyezibwa kw’amaani nikubaasa kutukwataho kuta?

⁸ Nitumanya ngu twine kugyezibwa omu biro by’emperu ebi. (2 Tim. 3:1) Kwonka, nitubaasa kugyezibwa omu bwire n’omu muringo ebi tubaire tutarikuteekateeka. Nitubaasa kutunga oburemeezi omu by’entaatsya ahonaaho, tucebeze tushangye twine endwara y’amaani, nari tufeerwe omukundwa. Omu bwire nk’obwo, nitubaasa kurengwa amaganya, na munonga okugyezibwa oku kwabaho kukurataine, nari kwingi omurundi gumwe. Kwonka ijuka ngu, Yehova naaba atutaireho eriisho, kandi ahabw’obuhwezi bwe nitubaasa kugumira okugyezibwa okwa buri muringo, twine obumanzi.

9. Shoboorora kumwe aha kugyezibwa okwahikire ahari Yobu.

⁹ Yetegyereze oku Yehova yaahweraire omushaija omwesigwa Yobu. Akahikwaho ebigyezo bingi by’amaani bikurataine omu bwire bukye. Omu izooba rimwe, Yobu akatunga amakuru mabi ngu amatungo ge gaibwa, abahuuku be baitwa, kandi akagwe akaakizireyo n’okufa kw’abaana be abakundwa. (Yob. 1:13-19) Ahonaaho Yobu akiri omu kuganya kw’amaani, akakwatwa endwara erikureeta obuhurizi bw’amaani, kandi erikutonyora n’omubiri. (Yob. 2:7) Embeera ya Yobu ekaba eri mbi munonga yaahika n’aha kugira ati: “Amagara gangye ngatamirwe, tinkyenda kugumaho.”​—Yob. 7:16.

10. Yehova akahwera ata Yobu kugumira okugyezibwa kwe? (Reeba ekishushani ekiri aha kipampagare.)

¹⁰ Yehova akaba amutaireho eriisho. Ahabw’okugira ngu Yehova akaba naakunda Yobu, akamuha buri kimwe ekirikwetengyesa kubaasa kuba omusinguzi omu kugumisiriza okugyezibwa kwe. Yehova akagamba na Yobu arikumwijutsya obwengye bwe obutaine bugarukiro, n’oku arikufayo munonga aha bihangirwe bye. Akagamba aha nyamaishwa nyingi ezirikutangaaza. (Yob. 38:1, 2; 39:9, 13, 19, 27; 40:15; 41:1, 2) Kandi Yehova akakoresa na Elihu omushaija muto omwesigwa kugumya Yobu n’okumuhuumuriza. Elihu akahamiza Yobu ngu Yehova butoosha naashumbuusha abaheereza be ahabw’okugumisiriza kwabo. Kwonka kandi Yehova akahiga Elihu kuhana Yobu omu muringo gwa rukundo. Elihu akahwera Yobu kureeba enshonga enkuru, arikumwijutsya obukye bwe waamugyeragyeranisa na Yehova, Omuhangi w’eiguru n’ensi. (Yob. 37:14) Kandi Yehova akaha Yobu obujunaanizibwa bw’okushabira bagyenzi be bashatu abaabaire basiisire. (Yob. 42:8-10) Yehova naatuhwera ata obunaku obu twatunga oburemeezi?

11. Baibuli neetuhuumuriza eta omu bwire bw’okugyezibwa?

¹¹ Yehova tarikugamba naitwe butunu, nk’oku yaagambire na Yobu, kwonka naagamba naitwe kurabira omu Kigambo kye Baibuli. (Rom. 15:4) Naatugumya arikutuha amatsiko g’ebiro by’omumaisho. Yetegyereze bimwe aha biteekateeko ebiri omu Baibuli ebirikubaasa kutuhuumuriza twaba nitugyezibwa. Omu Byahandiikirwe, Yehova naatuhamiza ngu tihaine ekirikubaasa “kututaanisa n’okukunda” kwe, nangwa n’obu kwakuba okugyezibwa kw’amaani. (Rom. 8:38, 39) Kandi naatuhamiza ngu “ari haihi na boona” abarikumutakira omu kushaba. (Zab. 145:18) Yehova naatugambira ngu twamwesiga, nitubaasa kugumisiriza omu kugyezibwa okwa buri muringo, kandi tugire n’okushemererwa okuringaniire twaba nitubonabona. (1 Kor. 10:13; Yak. 1:2, 12) Kandi  Ekigambo kya Ruhanga nikitwijutsya ngu okugyezibwa kwaitu n’okw’obwire bukye, waakugyeragyeranisa n’ekihembo ky’obutwire eki arikwija kutuha. (2 Kor. 4:16-18) Yehova naatuhamiza ngu naija kwihaho Sitaane Omuregi obukomooko bw’okugyezibwa kwaitu, n’abarikutooreza ebikorwa bye bibi. (Zab. 37:10) Haine Ebyahandiikirwe ebimwe ebi okwatsire omu mutwe kukuhwera kugumisiriza omu kugyezibwa?

12. Yehova naayenda ngu tukore ki twaba turi ab’okugasirwa omu Kigambo kye omu bwijwire?

¹² Yehova naayenda ngu tuteho obwire bw’okwega Baibuli butoosha, kandi tuteekateekye munonga aha bi turikushoma. Twagyendera aha bi turikwegamu, okwikiriza kwaitu nikwongyera kuhama, kandi nitwongyera kwirira haihi na Tataitwe ow’omu iguru. N’ekirikurugamu, nitugira amaani g’okugumisiriza okugyezibwa. Kandi Yehova naaha omwoyo gwe gurikwera abarikwesiga Ekigambo kye. Kandi omwoyo ogwo nigubaasa kutuha ‘amaani agarikukira’ aha ga butoosha kugumisiriza omu kugyezibwa.​—2 Kor. 4:7-10.

13. Eby’okurya by’omwoyo ebirikutebeekanisibwa ‘omwambari omwesigwa kandi ow’obwengye’ nibituhwera bita kugumisiriza omu kugyezibwa?

¹³ ‘Omwambari omwesigwa kandi ow’obwengye’ arikuhwerwa Yehova, naashohoza ebicweka bingi, vidiyo, n’ebyeshongoro ebirikubaasa kutuhwera kuhamya okwikiriza kwaitu, kandi tukaguma nitureeba omu by’omwoyo. (Mat. 24:45) Ebi byona ebirikwizira omu bwire obuhikire, twine kubikoresa omu bwijwire. Munyaanyazi-itwe kuruga omuri United States, juba aherize kugamba oku arikusiima eby’okurya by’omwoyo ebi byona. Akagira ati: “Omu myaka 40 ei mmazire ndikuheereza Yehova, okumuhamiraho kwangye kutwire nikugyezibwa emirundi n’emirundi.” Akahikwaho okugyezibwa kwingi. Ishenkuru akatomerwa omuvugi w’emotoka osinzire yaafa, abazaire be bakaitwa endwara y’akabi, kandi akarwara ekookoro kabiri. Niki ekyamuhweraire kugumisiriza? Naashoboorora ati: “Yehova atwire naandeeberera. Eby’okurya by’omwoyo ebi atwire naatuha kurabira omu mwambari omwesigwa kandi ow’obwengye, bimpweraire kugumisiriza. Ahabw’eby’okurya ebi, nimbaasa kugamba nka Yobu, owaagizire ati: ‘Okuhitsya obu ndifa, tindikwija kureka kuguma ndi omwesigwa!’”​—Yob. 27:5.

14. Yehova naakoresa ata Abakristaayo bagyenzi baitu twaba nitugyezibwa? (1 Abatesalonika 4:9)

¹⁴ Yehova atendekire abantu be kukundana n’okugumyana omu bwire bw’obusaasi. (2 Kor. 1:3, 4; shoma 1 Abatesalonika 4:9.) Ab’eishe-emwe  na banyaanyazi-itwe barikutooreza Elihu, nibaba beeteekateekire kutuhwera kuguma turi abeesigwa twaba twine oburemeezi. (Byak. 14:22) Nk’eky’okureeberaho, teekateeka oku ekibiina eki Diane arimu kyamugumize kandi kikamuhwera kuguma ahami omu by’omwoyo, obu iba yaabaire arwaire munonga. Naagira ati: “Kikaba kigumire munonga. Kwonka tukareeba emikono ya Yehova ey’amaani kandi eya rukundo omu meezi gagumire ago. Ab’ekibiina kyaitu bakatuhwera munonga. Bakaba nibatutaayaayira, batuteerera amasimu, kandi batubumbatira, ebintu ebi twabaire nitwenda kubaasa kugumisiriza. Ahabw’okugira ngu tindikumanya kuvuga emotoka, ab’eishe-emwe na banyaanyazi-itwe bakaba nibahamya ngu naaza omu nteerane n’omu kubuurira obu ndikubaasa.” Ka n’omugisha kuba omwe aha b’eka egi ey’eby’omwoyo eine rukundo!

15. Ahabw’enki turikubaasa kuhamya ngu nitubaasa kugumisiriza okugyezibwa?

¹⁵ Twena nitwija kuhikwaho okugyezibwa. Kwonka nk’oku twayega, titwine kuraba omu kugyezibwa twenka. Yehova kushushana n’ishe omwana oine rukundo, butoosha naaba atutaireho eriisho. Naaba aturi aha rubaju, ayeteekateekire kuhurira okutaka kwaitu n’okutuhwera, twamushaba obuhwezi. (Isa. 43:2) Nituhamiza kimwe ngu nitubaasa kugumisiriza twaba twine oburemeezi, ahakuba atuhaire buri kimwe eki turikwenda kubaasa kugumisiriza. Atuhaire ekiconco ky’okushaba, Baibuli, eby’okurya by’omwoyo bingi, n’ab’eishe-emwe abakundwa abarikubaasa kutuhwera omu bwire bugumire.

16. Nitubaasa kuguma tuta ahansi y’obureeberezi bwa Yehova obwa rukundo?

¹⁶ Ka nitusiima munonga kureeba ngu twine Tataitwe ow’omu iguru orikuba atutaireho eriisho! ‘Emitima yaitu [neeyesiimira] omuriwe.’ (Zab. 33:21) Nitubaasa kworeka ngu nitusiima Yehova ahabw’okutufaho, turikukoresa omu bwijwire byona ebi arikutuha kutuhwera. Kandi naitwe twine kuhikiiriza obujunaanizibwa bwaitu turikuguma ahansi y’obureeberezi bwe. Ekirikumanyisa ngu, twagumizamu nitukora kyona ekirikubaasika kworobera Yehova n’okukora ekihikire omu maisho ge, naija kuguma atutaireho eriisho rye ebiro byona!​—1 Pet. 3:12.