• “Okaba nooshusha ngu ibanyi atwire naashambana.”

• “Nkahemuka, naayehurira nk’otarikureebeka gye, kandi nk’otaine mugasho.”

• “Nkaba ntarikubaasa kugira ou naagambira. Nkafa mamigye.”

• “Okaba nooshusha ngu Yehova tarikunfaho.”

Ebigambo ebyo nibyoreka oku omukazi arikwehurira iba yaaba naareeba ebirikwitsa enshoni. Kandi yaaba atwire naabireeba bwesherekye kumara ameezi nari emyaka, omukazi we naabaasa kuteekateeka ngu tashemereire kugaruka kumwesiga. Omukazi omwe akagira ati: “Nkeebuuza yaaba niimanya gye ibanyi, nari haaba hariho ebindi ebi arikunshereka.”

Ekicweka eki kitebeekanisiibwe kuhwera omukazi ou iba arikureeba ebirikwitsa enshoni. a Nituza kugamba aha misingye erikuhuumuriza, eraamuhamize ngu aine obushagiki bwa Yehova kandi ekamuhwera kugaruka kuba gye omu nyehurira n’omu by’omwoyo. b

N’obu oraabe otaine bushoboorozi ahari byona ebi baro arikukora, noobaasa kugira eki waakora kutegyeka enyehurira zaawe kubaasa kugira obusingye bw’omu biteekateeko. Teekateeka aha nshonga ezi.

Otetaho orubanja. Omukazi naabaasa kwetaho orubanja iba yaaba naareeba ebirikwitsa enshoni. Danielle c naagira ati: “Nkateekateeka ngu ahabw’okugira ngu nkaba nindahuka kugira ekiniga niinye ndeeteire obushwere bwaitu kusiisikara.” Kandi, Alice we akeehurira nk’oine ekirikumuburaho. Akeebuuza ati: ‘Ahabw’enki ibanyi naakunda kureeba abakazi abandi omu mwanya gw’okundeeba?’ Abakazi abamwe nibabaasa kwetaho orubanja ahabwʼoku barikutwaza barikuteekateeka ngu nikyo kirikureetera embeera kwongyera kuba mbi. Danielle naagira ati: “Nkateekateeka ngu ahabwokugira ngu nkaba nindahuka kugira ekiniga niinye ndeeteire obushwere bwaitu kusiisikara.”

 Ku oraabe nooyehurira otyo, kimanye ngu Yehova tarikukucwera orubanja aha bw’ebikorwa bya baro. Yakobo 1:14 nihagira hati: “Omuntu weena ayohibwa, yaabeihwabeihwa okwetenga kwe, kwamwosyosya.” (Rom. 14:12; Fil. 2:12) Yehova tarikukucwera orubanja, kureka naakusiima ahabw’okumuhamiraho.—2 Bus. 16:9.

Ekindi ekirikubaasa kuhwera n’okumanya ngu omushaija yaareeba ebirikwitsa enshoni tikirikumanyisa ngu omukazi we haine ekirikumuburaho. Abarikucondooza aha nshonga egi nibagira ngu ebirikwitsa enshoni nibireetera omuntu kugira ekyetengo ky’okuteerana eki omukazi weena atarikubaasa kwigutsa.

Oteerarikirira ekirenga. Catherine akagira ngu okuteekateeka munonga aha muze gwa iba ogw’okureeba ebirikwitsa enshoni kikamureetera kuhwa aha magufa. Frances akagira ati: “Ninyerarikirira naaba ntarikumanya ahu ibanyi ari.” Abakazi abamwe baagizire ngu nibabwerabwera baaba bari n’Abakristaayo bagyenzi baabo abarikumanya omuze gwa baibabo. Kandi bandi nibeehurira nk’abari bonka ahabw’okugira ngu tihariho orikwetegyereza embeera ei barikurabamu.

N’ekya butoosha kwehurira otyo. Kwonka, waaguma nooteekateeka aha bureemezi obwo nooyongyera kwerarikirira. N’ahabw’ekyo, ta omutima aha kuhamya omukago gwawe na Yehova. Okukora ekyo nikiija kukuhwera kuguma ohami.—Zab. 62:2; Efe. 6:10.

Noogasirwa waashoma kandi okateekateeka aha barikugambwaho omu Baibuli abaabaire baine amaganya kwonka abaatungire okuhuumurizibwa ahabw’okushaba Yehova. Obumwe akaba atamaraho buremeezi bwabo, kwonka akaba abahwera kugira obusingye. Nk’eky’okureeberaho, Haana akaba “aine obusaasi bwingi” ahabw’embeera ei yaabaire arimu. Kwonka ‘ku yaagumiizemu naashaba omu maisho ga [Yehova],’ akagira obusingye n’obu yaabaire atarikumanya ekiraabeho.—1 Sam. 1:10, 12, 18; 2 Kor. 1:3, 4.

Gambira abareeberezi kukuhwera. Nibabaasa kuba “nk’omwanya ogw’okwekingaho omuyaga, n’obwegamo bw’eihunga.” (Isa. 32:2.) Nibabaasa n’okukugambira munyaanyazi-itwe ou orikubaasa kugambira enyehurira zaawe kandi oraakuhuumurize.—Enf. 17:17.

Mbwenu shi nikibaasika kuhwera baro kucwa omuze gw’okureeba ebirikwitsa enshoni? Obundi. Baibuli neeyoreka ngu “ababiri nibakira omwe” baaba nibateeraho kusingura oburemeezi nari omuzigu w’amaani.  (Mub. 4:9-12) Okucondooza nikworeka ngu abari omu bushwere baakwatanisa nibasingura omuze gw’okureeba ebirikwitsa enshoni kandi baagaruka beesigana omu bushwere bwabo.

Kwonka kubaasa kusingura omuze ogu, ou ori nawe omu bushwere aine kumariirira kurekyera aho kureeba ebirikwitsa enshoni. Yaashabire Yehova kumuha amaani kandi yaagambiire abareeberezi kumuhwera? (2 Kor. 4:7; Yak. 5:14, 15) Yaakozire entebeekanisa y’okumuhwera kwetantara embeera ezirikubaasa kumugyeza, nk’okumara obwire bukye aha simu nari kompyuta? (Enf. 27:12) Mbwenu shi ayeteekateekire kwikiriza obuhwezi bwawe n’okukugambira amazima? Kyaba nikwo kiri, noija kubaasa kumuhwera.

Ota shi? Teekateeka aha ky’okureeberaho eki. Felicia akataaha omu bushwere na Ethan owaatandikire kureeba ebirikwitsa enshoni akiri muto. Naareetera iba kworoberwa kugamba nawe yaagira ekyetengo ky’okugaruka kureeba ebirikwitsa enshoni. Ethan naagira ati: “Niingambira omukazi wangye buri kimwe. Naampwera kutaho obugarukiro kandi butoosha naateeraho kumanya okundi. Kandi naampwera kutamara obwire bwingi aha Intaneeti.” Felicia naayehurira kubi ahabw’okugira ngu Ethan aine ekyetengo ky’okureeba ebirikwitsa enshoni. Felicia naagira ati: “Kwonka, ekiniga kyangye n’obusaasi tibirikumuhwera kucwa omuze ogwo. Bwanyima y’okumugambira oku ndikukwatwaho ebi arikukora, naaba amaririire kubireka kandi ateeraho kugaruraho obwesigwa.”

Okugaaniira nk’okwo nikuhwera omushaija kurekyera aho kureeba ebirikwitsa enshoni kandi nikihwera n’omukazi kugaruka kumwesiga. Omushaija naaba ataine ki arikushereka omukazi we yaaba ayeteekateekire kugamba aha mize ye, ebi arikukora buri izooba, n’ahu arikuba ari.

Oine amatsiko ngu naiwe noobaasa kuhwera baro omu muringo nigwo gumwe? Kyaba nikwo kiri, ahabw’enki mutarikushoma hamwe ebiri omu kicweka eki kandi mukabigaaniiraho? Baro naija kutaho ekigyendererwa ky’okureka ebirikwitsa enshoni kugira ngu ogaruke omwesigye. Omu mwanya gw’okwehurira kubi ahabw’okugira ngu nooyenda kumanya ebirikukwata aha mbeera ye, aine kuteeraho kwetegyereza oku oburemeezi bwe burikukukwataho. Ekigyendererwa kyawe kiine kuba kiri eky’okumuhiga kumariirira kusingura omuze n’okumuhwera kugaruraho obwesigwa. Mwembi mwine kumanya ekirikureetera abantu kureeba ebirikwitsa enshoni n’oku oburemeezi obwo burikubaasa kusingurwa. d

 Waaba nootiina ngu iwe n’omushaija waawe timuraagume mwikaikane mwaba nimugamba aha nshonga egyo, mwete omureeberezi orikuboorobera mwembi abe ariho mwaba nimugaaniira. Manya ngu bwanyima ya baro kucwa omuze gw’okureeba ebirikwitsa enshoni, nikibaasa kutwara obwire kugaruka kumwesiga. Otahanika. Teeraho kureeba empinduka nkye ezi arikukora. Gira obwesigye ngu n’obu haahinguraho obwire, waagumisiriza obushwere bwawe nibuza kugaruka buhame.—Mub. 7:8; 1 Kor. 13:4.

Mbwenu shi baro ku yaakugaruka akareeba ebirikwitsa enshoni, nikimanyisa ngu tayeteisize nari ngu aremirwe? Tikwo kiri. Yaaba atwire aine omuze ogwo naabaasa kugumirwa kugucwa. Omuntu naabaasa kugaruka areebe ebirikwitsa enshoni n’obu yaakuba amazire emyaka mingi arikubyetantara. Kubaasa kwetantara kugarukirwa, naaba aine kuteeraho munonga kubyangira, obundi atarikugwisa mukono n’obu yaakuba naareeba ngu asingwire oburemeezi bwe. (Enf. 28:14; Mat. 5:29; 1 Kor. 10:12) Aine ‘kuhindura busya’ ebiteekateeko bye kandi akeega ‘kwanga’ ebikorwa bibi ebirikutwariramu ebirikwitsa enshoni n’emize etashemeire nk’okwemarisa. (Efe. 4:23; Zab. 97:10; Rom. 12:9) Ayeteekateekire kukora empinduka ezo? Kyaba nikwo kiri, naaba naakibaasa kusingurira kimwe omuze ogwo. e

Kandi shi baro ku yaakworeka ngu tarikwenda kucwa omuze ogwo? Buzima noobaasa kucweka entegye, ogire ekiniga kandi oyehurire nk’ou baareebya. Noobaasa kugira obusingye bw’omu biteekateeko waareka enshonga omu mikono ya Yehova. (1 Pet. 5:7) Gumizamu nooyirira haihi Yehova orikweyegyesa, okashaba kandi okateekateeka. Gira obwesigye ngu waakora otyo, Yehova nawe naakwirira haihi. Nk’oku kiri omuri Isaaya 57:15, naaba ari haihi “n’ow’omutima gurikweteisa kandi omucureezi,” kumuhwera kugaruka kuba gye omu by’omwoyo. Teeraho kuba Omukristaayo murungi nk’oku kirikubaasika. Gambira abareeberezi kukuhwera. Kandi guma oine amatsiko ngu omu biro by’omumaisho baro naabaasa kukora empinduka ezirikwetengyesa.—Rom. 2:4; 2 Pet. 3:9.