1. Ahabw’enki Abababulooni baakunzire nabi Danieli?

 NABI Danieli akaba ari omutsigazi obu Abababulooni baamutwara nk’enkwatwa hare munonga n’owaabo. Kwonka akatangaaza abaamutwire nk’enkwatwa. Bakareeba ngu Danieli akaba “ataine kamogo, ari murungi” kandi arikuruga omuka nungi. (1 Sam. 16:7) Ahabw’enshonga ezo, Abababulooni bakamutendeka kuheereza omu kikaari ky’omugabe.—Dan. 1:3, 4, 6.

2. Yehova akaba naareeba ata Danieli? (Ezekieli 14:14)

² Yehova akakunda Danieli, ahabw’eki yaacwiremu kuba, ti ahabw’emireebekyere ye nari ahabw’okugira omwanya mukuru omu kikaari ky’omugabe. Obu Yehova yaagira ngu Danieli ari nka Noa na Yobu abashaija abaabaire bamazire emyaka mingi bari abeesigwa, Danieli naabaasa kuba yaabaire ari omu myaka ya 20 nari atakagihikize. (Kut. 5:32; 6:9, 10; Yob. 42:16, 17; shoma Ezekieli 14:14.) Kandi Yehova akagumizamu naakunda Danieli ebiro by’amagara ge goona.—Dan. 10:11, 19.

3. Nituza kushwijuma ki omu kicweka eki?

³ Omu kicweka eki, nituza kureeba emitwarize ebiri ya Danieli eyaamureeteire kuba ow’omuhendo ahari Yehova. Nituza kubanza kureeba obu yaayoreka buri mutwarize. Bwanyima, tureebe ekyahweraire Danieli kugira emitwarize egyo. Tuhendere turikureeba oku turikubaasa kumutooreza. N’obu ekicweka eki kiraabe kihandiikiirwe eminyeeto, twena nitubaasa kwegyera ahari Danieli.

4. Danieli akooreka ata obumanzi? Ha eky’okureeberaho.

⁴ Danieli akaba ari omutsigazi emanzi. Yetegyereze emirundi ebiri obu yaayoreka obumanzi. Akabanza kworeka ngu n’emanzi bwanyima y’emyaka ebiri Abababulooni baherize kucwekyereza Yerusaalemu. Omugabe Nebukadeneeza owa Babulooni akagira okutiina ahabw’ekirooto ekyabaire nikikwata aha kishushani rutaaba. Akatiinatiinisa kwita abahi b’obwengye boona otwariiremu Danieli, baaba batamugambiire ekirooto kye n’amakuru gaakyo. (Dan. 2:3-5) Danieli akaba aine kugira eki yaakora ahonaaho, kitari ekyo bakaba nibaza kubaita. Akaza ow’omugabe “yaamushaba kumuha obunaku, obu araizireho kumushobororera amakuru g’ekyo kirooto.” (Dan. 2:16) Ekyo kikaba nikyetengyesa obumanzi n’okwikiriza. Tihariho kirikworeka ngu Danieli akaba araashobooroireho ebirooto. Akagambira bagyenzi be abaahairwe amaziina g’Abababulooni Seduraaka, Mesaaki na Abedeneego, “kushaba Ruhanga ow’omu iguru kubagirira embabazi akabashuuruurira ekyo kigambo.” (Dan. 2:18) Yehova akagarukamu okushaba kwabo. Ahabw’obuhwezi bwa Ruhanga, Danieli akashoboororera Nebukadeneeza amakuru g’ekirooto. Danieli n’abagyenzi be bakahonokaho.

5. Obumanzi bwa Danieli bukongyera kugyezibwa buta?

⁵ Ku haahingwireho obwire Danieli aherize kushoboorora amakuru g’ekirooto ekirikukwata aha kishushani rutaaba, obumanzi bwe bukagaruka bwagyezibwa. Nebukadeneeza akaroota ekirooto ekindi ekyamureeteire kutiina. Kikaba nikikwata aha muti muhango. Danieli akaba emanzi yaashobororera omugabe amakuru g’ekirooto, otwariiremu n’obutumwa obwabaire nibworeka ngu akaba naija kugwa eiraro kandi arugye aha ngoma kumara obwire. (Dan. 4:25) Omugabe akaba naabaasa kugira ekiniga aite Danieli. Kwonka Danieli akaba emanzi yaamugambira obutumwa obwo.

6. Niki ekyahweraire Danieli kuba emanzi?

⁶ Niki ekirikubaasa kuba kyahweraire Danieli kuba emanzi omu buri mbeera? Obu Danieli yaabaire akiri muto, naabaasa kuba yaayegyeire aha bazaire be. Bakaba niboorobera ebiragiro ebi Ruhanga yaahaire abazaire  Abaisraeli, kandi bakabyegyesa omwana waabo. (Bir. 6:6-9) Danieli akaba naamanya Ebiragiro Ikumi, otwariiremu n’ebyabaire nibikwata aha bi Omwisraeli arikubaasa kurya, n’ebi ataine kurya. b (Lev. 11:4-8; Dan. 1:8, 11-13) Danieli akeega n’ebyafaayo by’abaheereza ba Ruhanga kandi akaba naamanya ekyabaire kibaho baayanga kugyendera aha mitindo ye. (Dan. 9:10, 11) Ebi Danieli yaarabiremu bikamureetera kugira obwesigye ngu Yehova na baamaraika bakaba nibamushagika.—Dan. 2:19-24; 10:12, 18, 19.

7. Niki ekindi ekyahweraire Danieli kuba emanzi?

⁷ Danieli akaba naayeyegyesa ebi baanabi ba Ruhanga baahandiikire, otwariiremu n’obunabi bwa Yeremia. Omu kwega okwo, Danieli akeetegyereza ngu obwire obu Abayudaaya baabaire baine kumara Babulooni bari enkwatwa bukaba buri haihi kuhendera. (Dan. 9:2) Ku yaareebire oku obunabi bwa Baibuli bwabaire nibuhikiirira akoongyera kwesiga Yehova, kandi n’abarikwesigira kimwe Ruhanga nibabaasa kugira obumanzi. (Gyeragyeranisa Abarooma 8:31, 32, 37-39.) Okukira byona, Danieli akaba naakira kushaba Ishe ow’omu iguru. (Dan. 6:10) Akashaba Yehova kumusaasira ebibi bye kandi yaamugambira oku arikwehurira. Kandi akashaba obuhwezi. (Dan. 9:4, 5, 19) Danieli akaba ari nkaitwe tarazairwe aine obumanzi. Akagira omutwarize ogwo ahabw’okweyegyesa, okushaba, n’okwesiga Yehova.

8. Nitubaasa kukora ki kugira obumanzi?

⁸ Twine kukora ki kubaasa kugira obumanzi? Abazaire baitu nibabaasa kutuhiga kugira obumanzi, kwonka tibarikutuzaara twine omutwarize ogwo. Okugira obumanzi kiri nk’okwega omwoga musya. Noobaasa kwega omwoga waayetegyereza gye eki omwegyesa arikukora reero okamutooreza. Naitwe, nitugira obumanzi twayegyetereza oku abandi barikworeka omutwarize ogwo reero tukabatooreza. Twayegyera ki ahari Danieli? Nka Danieli, twine kumanya gye Ekigambo kya Ruhanga. Twine kugira omukago murungi na Yehova turikugamba nawe twihire aha mutima. Kandi twine kwesiga Yehova, turikuhamiza kimwe ngu ariho kutuhwera. Okwikiriza kwaitu kwagyezibwa, nitwija kuba twine obumanzi.

9. Nitugasirwa tuta twagira obumanzi?

⁹ Nitugasirwa omu miringo mingi twagira obumanzi. Teekateeka aha ky’okureeberaho kya Ben. Akashomera Germany ahu buri omwe yaabaire naikiriza ngu ebintu bikabaho niburuga omu bindi, kandi barikutwara enyegyesa y’okuhanga nk’ekitebyo. Eizooba rimwe, Ben akaikirizibwa kwemerera omu maisho g’abeegi bagyenzi be kushoboorora ahabw’enki naikiriza ngu ebintu bikahangwa. Akagira obumanzi yaashoboorora ebi arikwikiriza. Niki ekyarugiremu? Ben naagira ati: “Omwegyesa wangye akahurikiza gye, kandi ebi naakoreise kushagika ebi ndikwikiriza akabikoramu kopi yaaziha buri mwegi.” Abeegi bagyenzi be bakatwaza bata? “Baingi aharibo bakampurikiza kandi bakagira ngu bakakunda ebi naashobooroire,” nikwo Ben arikugira. Nk’oku kyayorekwa omu ky’okureeberaho kya Ben, abantu nibaha ekitiinisa abarikuba baine obumanzi. Kandi nibabaasa  kureetera ab’emitima eshemereire kwenda kwega ahari Yehova. Buzima, hariho enshonga nungi ahabw’enki twine kuba emanzi.

10. Okuhamira aha muntu nikimanyisa ki? (Yona 4:2)

¹⁰ Kurugiirira ahari Baibuli, ekigambo ky’Oruheburaayo ekirikuvunuurwa ‘okuhamira aha muntu’ nari “rukundo etarikuhinduka,” emirundi emingi nikimanyisa rukundo y’akaramata ei Ruhanga ainiire abaheereza be. Ekigambo nikyo kimwe nikikoresibwa kushoboorora rukundo ei abaheereza ba Ruhanga barikugirirana. (Shoma Yona 4:2.) Yehova naayenda ngu naitwe tumuhamireho. Haahinguraho obwire nitwongyera kumuhamiraho. Yetegyereze oku nabi Danieli yaakikozire.

11. Obu Danieli yaabaire akuzire akatunga kugyezibwa ki ahabw’okuhamira ahari Yehova? (Reeba ekishushani ekiri aha kipampagare.)

¹¹ Danieli ahabw’okuhamira ahari Yehova akatunga okugyezibwa emirundi mingi. Kwonka akahikwaho okugyezibwa okwakizireyo ari omu myaka ya 90. Omu bwire obwo, Abameedi n’Abaperesi bakaba baahambire Babulooni eyaabaire neetegyekwa Omugabe Dario. Ab’omu kikaari ky’omugabe bakaba nibanga Danieli kandi bakaba batarikutiina Ruhanga we. N’ahabw’ekyo bakataho oburyo bw’okwita Danieli. Bakagambira omugabe kutaho ekiragiro ekyabaire nikiija kureetera Danieli kucwamu kuhamira ahari Ruhanga we nari omugabe. Eki Danieli yaabaire aine kukora kworeka ngu ahamiire aha mugabe, n’okutwaza nk’abandi akareka kushaba Yehova kumara ebiro 30. Kwonka Danieli akaguma ahamiire ahari Yehova. N’ekyarugiremu, akanagwa omu kiina ky’entare. Kwonka Yehova akashumbuusha Danieli ahabw’okumuhamiraho arikumujuna kutariibwa entare. (Dan. 6:12-15, 20-22) Nitubaasa kuhamira tuta ahari Yehova nka Danieli?

12. Danieli akabaasa ata kuguma ahamiire ahari Yehova?

¹² Nk’oku twaba twareebire, rukundo niyo erikutuhiga kuhamira ahari Yehova. Danieli akahamira ahari Yehova ahabw’okugira ngu akaba naamukunda munonga. Danieli akagira rukundo egyo, ahabw’okuteekateeka aha mitwarize ya Yehova n’oku arikugyoreka.  (Dan. 9:4) Kandi Danieli akateekateeka aha bintu birungi ebi Yehova yaamukoreire n’abantu be.—Dan. 2:20-23; 9:15, 16.

13. (a) Abato nibagyezibwa bata kutaguma bahamiire ahari Yehova? Ha eky’okureeberaho. (b) Nk’oku kirikworekwa omu vidiyo, noobaasa kutwaza ota abandi baabuuza yaaba Abajurizi ba Yehova nibashagika ebitingwa?

¹³ Nka Danieli, abato beetooroirwe abantu abatarikuha Yehova ekitiinisa n’emitindo ye. Abantu abo nibabaasa kwanga omuntu weena orikwikiriza ebirikutaana n’eby’abo. Nangwa abamwe nibabaasa kureetera abato kutahamira ahari Yehova barikubatwariza kubi. Teekateeka aha kyahikire aha omutsigazi orikwetwa Graeme, kuruga Australia. Akahikwaho embeera egumire obu yaabaire ari omu siniya. Omushomesa akabuuza abeegi eki barikubaasa kukora munywani waabo yaabagira ngu n’ekitingwa. Omushomesa akagira ngu abeegi abarikushagika omuntu ogwo beemerere aha rubaju rumwe reero abatarikumushagika beemerere aha rundi. Graeme naagira ati: “Oyihireho nyowe n’Omujurizi wa Yehova ondiijo, abeegi abandi baakemerera aha rubaju orurikushagika ebitingwa.” Ekyakuratsireho kikagyeza obwesigwa bwa Graeme ahari Yehova. Naagira ati: “Abeegi abandi otwariiremu n’omushomesa bakamara eshaaha yoona barikutujuma. Nkakora eki ndikubaasa kujuririra okwikiriza kwangye omu muringo gw’obucureezi kwonka tibaraampurikiize.” Okugyezibwa okwo kukakwata kuta ahari Graeme? Naagira ati: “Ahabw’okugira ngu buri omwe akaba naanjuma nkehurira kubi, kwonka nkashemererwa munonga ahabw’okujuririra ebi ndikwikiriza kandi nkabihamiraho.” c

14. Niki ekirikubaasa kutuhwera kuhamira ahari Yehova?

¹⁴ Nka Danieli nitubaasa kuhamira ahari Yehova twayongyera kumukunda. Ekyo nitukikora turikwega aha mitwarize ya Yehova. Nk’eky’okureeberaho, nitubaasa kwega aha ebi yaahangire. (Rom. 1:20) Waaba nooyenda kwongyera kukunda Yehova n’okumuha ekitiinisa noobaasa kureeba vidiyo nari oshome ebicweka ebikurataine “Was It Designed?” Kandi noobaasa kushoma ebiri omu butabo Was Life Created? na Obukomooko bw’Amagara—Ebibuuzo Bitaano Ebihikire Kubuuzibwa. Yetegyereze eki munyaanyazi​-itwe muto orikwetwa Esther kuruga Denmark arikugamba aha butabo obu: “Enshoboorora erimu neeshemeza. Obutabo obwo tiburikukugambira ebi oine kwikiriza, kureka nibworeka obuhame reero oyecweramu.” Ben, owaaba yaagambirweho naagira ati: “Ebi naashomiremu bikahamya okwikiriza kwangye. Bikampamiza ngu Ruhanga niwe yaahangire ebiine amagara.” Bwanyima y’okweyegyesa obutabo obwo, noija kwikiriza eki Baibuli erikugamba ku erikugira eti: “[Yehova] Ruhanga waitu, oshemereire kuhimbisibwa n’okuheebwa ekitiinisa n’obushoboorozi, ahabw’okuba niiwe waahangire byona, ahabw’okukunda kwawe bikahangwa kandi byabaho.”—Kush. 4:11. d

15. Niki ekindi eki turikubaasa kukora kugira omukago guhami na Yehova?

¹⁵ Nitwongyera kukunda Yehova turikweyegyesa ebirikukwata aha Mwana we, Yesu. Munyaanyazi-itwe muto orikwetwa Samira, orikutuura Germany, nikyo yaakozire. Naagira ati: “Nkabaasa kumanya gye Yehova ndikwega ahari Yesu.” Obu Samira yaabaire ari muto akaba naagumirwa kwetegyereza oku  Yehova arikubaasa kugira enyehurira. Kwonka akaba naamanya oku Yesu arikwehurira. Naayongyeraho ati: “Nkakunda Yesu ahabw’okugira ngu akaba naatwaza gye kandi arikukunda abaana.” Ku yaayongyeire kwega ahari Yesu, akoongyera kukunda Yehova. Ahabw’enki? Naagira ati: “Mporampora nkeega ngu Yesu naatooreza Ishe omu muringo oguhikiriire. Hariho bingi ebi barikushushanisa. Nketegyereza ngu egi ekaba eri emwe aha nshonga ahabw’enki Yehova yaayohereize Yesu omu nsi, kugira ngu abantu bamanye gye Yehova.” (Yoh. 14:9) Waaba nooyenda kuhamya omukago gwawe na Yehova oine kwongyera kwega ebirikukwata ahari Yesu. Waakora otyo, noija kwongyera kukunda Yehova n’okumuhamiraho.

16. Nitugasirwa tuta twahamira ahari Yehova? (Yeremia 31:3)

¹⁶ Abarikuhamira aha bandi nibagira emikago ehami kandi erikuhangaara. (Rus. 1:14-17) Ekindi, abantu abarikuhamira ahari Yehova, nibagira obusingye bw’omu mutima. Ahabw’enki? Ahakuba Yehova naaraganisa kuhamira ahari abo abarikumuhamiraho. (Shoma Yeremia 31:3.) Kiteekateekeho, Omuhangi w’ebintu byona naayenda kuba munywani waitu ow’aha mara! Kandi twaba turi banywani be, okugyezibwa, okuhakanisibwa, nari rufu tibirikubaasa kushiisha omukago gwaitu nawe. (Dan. 12:13; Luk. 20:37, 38; Rom. 8:38, 39) Ka ni kikuru kutooreza Danieli tukaguma tuhamiire ahari Yehova!

17-18. Niki ekindi eki turikubaasa kwegyera ahari Danieli?

¹⁷ Omu kicweka eki, twareeba emitwarize ebiri ya Danieli. Kwonka hariho bingi ebi turikubaasa kumwegyeraho. Nk’eky’okureeberaho, Danieli akatunga okworekwa kukurataine n’ebirooto kuruga ahari Yehova kandi akamuhwera kushoboorora obunabi. Bwingi aha bunabi obwo bwaherize kuhikiirira. Obundi nibugamba aha biraabeho omu biro by’omu maisho ebiraakwate ahari buri omwe omu nsi.

¹⁸ Omu kicweka ekirikukurataho, nituza kuta omutima aha bunabi bubiri obu Danieli yaahandiikire. Okwetegyereza obunabi obwo, nikiija kuhwera abato n’abakuru kucwamu omu muringo gw’obwengye hati. Kandi obunabi obwo nibubaasa kutuhwera kwongyera kugira obumanzi n’okuhamira ahari Yehova n’okwetebeekanisiza okugyezibwa okuraabeho omu biro by’omumaisho.