EKICWEKA EKY’OKWEGA 31
EKYESHONGORO 12 Yehova Ruhanga, Orikukirayo
Eki Yehova Akozire Kucungura Abantu Abasiisi
“Nikwo Ruhanga yaakunzire atyo ensi, akahayo Omwana we omwe nyamunegyere.”—YOH. 3:16.
ENTIMA
Okureeba oku Yehova atwire naateeraho kutubaasisa kusingura ekibi, n’oku atuteeraireho oburyo bw’okutunga amagara agatahwaho agatarimu kibi.
1-2. (a) Ekibi niki, kandi nitubaasa kukisingura tuta? (Reeba “Ebigambo Ebishobooroirwe.”) (b) Nituza kugamba ahari ki omu kicweka eki, n’omu bicweka ebindi omu Omunaara gw’omurinzi ogu? (Reeba n’ekicweka “Eby’abashomi” omu magaziini egi.)
NOOYENDA kumanya Yehova naakukunda kirikwingana ki? Omuringo murungi gw’okutunga eky’okugarukamu n’okwega aha bi akozire kukucungura kuruga omu kibi n’okufa. Ekibi a n’omuzigu w’amaani, ou otarikubaasa kusingura ahabwawe. Twena nitushiisha butoosha, kandi nitufa ahabw’ekibi. (Rom. 5:12) Kwonka hariho amakuru marungi. Ahabw’okuhwerwa Yehova, nitubaasa kusingura ekibi. Kandi ekyo nitukihamiza kimwe.
2 Yehova atwire naahwera abantu kusingura ekibi kumara emyaka nka 6,000. Ahabw’enki? Ahabw’okugira ngu naatukunda. Kuruga aha kutandika, atwire naakunda abantu, n’ahabw’ekyo akozire kyona ekirikubaasika kubahwera kukirwanisa. Ruhanga naamanya ngu ekibi nikirugamu okufa, kandi tarikwenda ngu tufe. Naayenda ngu tutuureho ebiro byona. (Rom. 6:23) Ekyo nikyo arikukwendeza. Omu kicweka eki, nituza kugarukamu ebibuuzo ebi: (1) Yehova akaha amatsiko abantu abasiisi mu muringo ki? (2) Abantu abasiisi omu bwire bwa Baibuli bakakora ki kusiimwa Yehova? (3) Yesu akakora ki kucungura abantu abasiisi?
YEHOVA AKAHA AMATSIKO ABANTU ABASIISI MU MURINGO KI?
3. Abazaire baitu ab’okubanza bakahinduka bata abasiisi?
3 Obu Yehova yaahanga omushaija n’omukazi ab’okubanza, akaba naayenda ngu bashemererwe. Akabaha omwanya murungi gw’okutuuramu, ekiconco ky’obushwere, n’obujunaanizibwa burikushemeza. Bakaba bari ab’okwijuza ensi na baijukuru baabo, n’okuhindura ensi yoona paradiso ekaba nk’omusiri Edeni. Akabaha ekiragiro kimwe kyorobi. Kandi akabarabura ngu baahenda ekiragiro kye, bakamugomera bakigyendereire, nibaija kufa. Nitumanya ekyabaireho. Maraika omubi owaabaire atarikukunda Ruhanga kandi atarikubakunda, akababeihabeiha kugomera Yehova. Kandi ekyo nikyo baakozire. Bakaremwa kwesiga Ishebo owa rukundo bashiisha. Eki Yehova yaagambire kikahikiirira. Bakatandika kukaikura, kandi baafa.—Kut. 1:28, 29; 2:8, 9, 16-18; 3:1-6, 17-19, 24; 5:5.
4. Ahabw’enki Yehova naayanga ekibi, kandi ahabw’enki naatuhwera kukisingura? (Abarooma 8:20, 21)
4 Yehova akahandiikisa omu Baibuli ebyabaireho kutugasira, n’okutuhwera kwetegyereza ahabw’enki naayangira kimwe ekibi. Ekibi nikitutaanisa na Tataitwe, kandi nikirugamu okufa. (Isa. 59:2) Egyo niyo nshonga ahabw’enki Sitaane, owaatandikireho obugomi obwo arikukunda ekibi, kandi akakishagika. Naabaasa kuba yaateekateekire ngu akasingura omu musiri Edeni. Kwonka akaba atarikwetegyereza rukundo ei Yehova aine. Ruhanga taraahindwire ekigyendererwa eki yaabaire ainiire baijukuru ba Adamu na Haawa. Naakunda abantu, n’ahabw’ekyo akabaha amatsiko ahonaaho. (Shoma Abarooma 8:20, 21.) Yehova akaba naamanya ngu bamwe aharibo bakaba nibaija kucwamu kumukunda, kandi bamushabe kubahwera kusingura ekibi. Nk’Omuhangi waabo kandi Ishebo, akaba naija kubateeraho oburyo bw’okucungurwa kuruga omu kibi, n’okumwirira haihi. Yehova akaba naija kukora ki kubaasisa ebyo byona kubaho?
5. Ni ryari obu Yehova yaabanza kuha abantu abasiisi amatsiko? Shoboorora. (Okutandika 3:15)
5 Shoma Okutandika 3:15. Yehova akabanza kuha abantu abasiisi amatsiko obu yaacwera Sitaane orubanja. Ruhanga akaraganisa ngu haine “oruzaaro” orwabaire nirwija kucungura abantu. Oruzaaro orwo rukaba nirwija kucwekyereza Sitaane, rwiheho oburemeezi bwona obu yaareetsireho omu musiri Edeni. (1 Yoh. 3:8) Kwonka omu kubanza, Sitaane akaba naija kuteganisa Oruzaaro orwo nari kumureetera kufa. Ekyo kikaba nikiija kureetera Yehova obusaasi bwingi. Kwonka Yehova akaba ayeteekateekire kugumisiriza obusaasi obwo ahabw’okugira ngu abantu nyamwingi bakaba nibaija kucungurwa kuruga omu kibi n’okufa.
ABANTU ABASIISI OMU BWIRE BWA BAIBULI BAKAKORA KI KUSIIMWA YEHOVA?
6. Abashaija abaabaire baine okwikiriza, nka Abeeli na Noa bakakora ki kwirira haihi Yehova?
6 Ebyasha ebyakuratsireho, Yehova akooreka mporampora oku abantu abasiisi barikubaasa kumwirira haihi. Abeeli, mutabani wa Adamu na Haawa, niwe yaabandize kwikiririza omuri Yehova bwanyima y’obugomi obwabaireho omuri Edeni. Abeeli akahayo ekitambo ahabw’okugira ngu akaba naakunda Yehova, arikwenda kumushemeza, n’okumwirira haihi. Akaba ari omuriisa, n’ahabw’ekyo akabaaga zimwe aha ntaama ze ento yaazihayo ahari Yehova. Yehova akatwaza ata? ‘Akasiima Abeeli n’emitoijo ye.’ (Kut. 4:4) Kandi akasiima ebitambo ebindi nk’ebyo ebyahairweyo abantu abaabaire nibamukunda, kandi barikumwesiga, nka Noa. (Kut. 8:20, 21) Yehova okusiima ebitambo nk’ebyo, akooreka ngu abantu abasiisi nibabaasa kusiimwa, kandi bamwirire haihi. b
7. Abrahamu okuba ayeteekateekire kuhayo omutabani nk’ekitambo nitukyegyeraho ki?
7 Yehova akashaba Abrahamu, omushaija owaabaire aine okwikiriza kwingi kukora ekintu ekyabaire kigumire munonga. Akamugambira kuhayo omutabani Isaaka nk’ekitambo. Abrahamu aine kuba yaagizire obusaasi bwingi. Kwonka nabwo, akoorobera Yehova. Ku yaabaire ari hakye kwita omutabani, Ruhanga akamuzibira. Ekyo nikyegyesa abantu boona abaine okwikiririza amazima makuru. Yehova akaba naija kuhayo Omwana we omukundwa nk’ekitambo ayekundiire. Buzima Yehova naakundira kimwe abantu.—Kut. 22:1-18.
8. Ebitambo by’enyamaishwa bingi ebyabaire biheebwayo omu bwire bw’Ebiragiro bikaba nibyoreka ki? (Abaleevi 4:27-29; 17:11)
8 Bwanyima y’ebyasha bingi, Ebiragiro ebyahairwe Abaisraeli bikooreka ngu kikaba nikyetengyesa kuhayo ebitambo by’enyamaishwa bingi kurihiirira ebibi byabo. (Shoma Abaleevi 4:27-29; 17:11.) Ebitambo ebyo bikooreka ngu hakaba hariho ekitambo ekirikukirayo, ekyabaire nikiija kujunira kimwe abantu kuruga omu kibi. Yehova 0akahwera baanabi be kushoboorora ngu oruzaaro orwaraganisiibwe, niwe Omwana wa Ruhanga ow’omutaano, akaba naija kubonabonesibwa, kandi aitwe. Akaba naija kuba nk’entaama y’okuheebwayo nk’ekitambo. (Isa. 53:1-12) Kiteekateekeho, Yehova akatebeekanisa Omwana we omukundwa kuheebwayo nk’ekitambo kujuna abantu kuruga omu kibi n’okufa, otwariiremu naiwe.
YESU AKATUJUNA ATA?
9. Yohaana Omubatizi akagamba ki ahari Yesu? (Abaheburaayo 9:22; 10:1-4, 12)
9 Omu kyasha ky’okubanza Y.A.K., omuheereza wa Ruhanga, Yohaana omubatizi akagamba ahari Yesu owa Nazareesi ati: “Reeba, Omwana gw’entaama wa Ruhanga, orikwihaho ekibi ky’ensi!” (Yoh. 1:29) Ebigambo ebyo bikooreka ngu Yesu n’oruzaaro oru Ruhanga yaabaire araganiise. Akaba naija kuhayo amagara ge nk’ekitambo. Hati okukira obundi bwona, abantu abasiisi baine amatsiko gahami g’okusingura ekibi.—Shoma Abaheburaayo 9:22; 10:1-4, 12.
10. Yesu akooreka ata ngu ‘akaija kweta’ abasiisi?
10 Yesu akata omutima aha bantu abaabaire nibeehurira kubi ahabw’okuba abasiisi, kandi akabeeta kumukuratira. Akaba naamanya ngu abantu nibabonabona munonga ahabw’ekibi. N’ahabw’ekyo akahwera abashaija n’abakazi abaabaire nibamanywa nk’abasiisi. Arikukoresa eky’okureeberaho, akashoboorora ati: ‘Abahuriire tibarikwetenga [omushaho], kureka abarwaire.’ Kandi akoongyeraho ati: “Tindaizire kweta bahikiriire, kureka abasiisi.” (Mat. 9:12, 13) Ekyo nikyo Yesu yaakozire. Akasaasira ebibi by’omukazi owaajubize ebigyere bye n’amarira ge. (Luk. 7:37-50) Akeegyesa omukazi Omusamaria amazima makuru, n’obu araabe yaabaire naamanya ngu naatuura n’omushaija owaabaire atari iba. (Yoh. 4:7, 17-19, 25, 26) Kandi Yehova akaha Yesu amaani g’okwihaho okufa okwarugire omu kibi. Yesu akagakoresa ata? Akazoora abantu otwariiremu abashaija, abakazi, abaana n’abakuru.—Mat. 11:5.
11. Ahabw’enki abantu abasiisi baabaire nibakunda kuba na Yesu?
11 Tikirikutangaaza kumanya ngu n’abantu abaabaire bari abahuuku b’ekibi bakaba nibakunda kuba haihi na Yesu. Akooreka ngu abainiire esaasi n’embabazi. Bakaba nibanguhirwa kuba nawe. (Luk. 15:1, 2) Akabasiima, kandi yaabashumbuusha ahabw’okumwikiririzamu. (Luk. 19:1-10) Yesu akooreka gye oku Ishe ari omunyambabazi. (Yoh. 14:9) Omu bigambo n’ebikorwa, akooreka ngu Ishe aine esaasi, embabazi, naakunda abantu, kandi naayenda kuhwera buri omwe kusingura ekibi. Yesu akahwera abantu abasiisi kugira ekyetengo ky’okuhindura emitwarize yaabo n’okumukuratira.—Luk. 5:27, 28.
12. Yesu akeegyesa ki aha bikwatiraine n’okufa kwe?
12 Yesu akaba naamanya ekyabaire nikiija kumubaho. Akagambira abakuratsi be emirundi erengire ahari gumwe, ngu bakaba nibaija kumureebya, kandi ahanikwe aha muti. (Mat. 17:22; 20:18, 19) Akaba naamanya ngu ekitambo kye kikaba nikiija kwihaho ekibi ky’ensi, nk’oku Yohaana na baanabi baagambire. Kandi akeegyesa ngu bwanyima y’okuhayo amagara ge, akaba ‘naija kweyiriza [haihi] abantu boona’. (Yoh. 12:32) Abantu abasiisi bakaba nibabaasa kushemeza Yehova barikwikiriza Yesu nka Mukama waabo, kandi bakagyendera omu biribatiro bye. Okukora ekyo, kikaba nikiija kubabaasisa ‘kucungurwa kuruga omu butegyeki bw’ekibi.’ (Rom. 6:14, 18, 22; Yoh. 8:32) N’ahabw’ekyo, Yesu ayekundiire akooreka obumanzi yaikiriza kwitwa omu muringo gw’obusaasi.—Yoh. 10:17, 18.
13. Yesu akafa ata, kandi okufa kwe nikutwegyesa ki ahari Yehova Ruhanga? (Reeba n’ekishushani.)
13 Yesu bakamureebya, baamukwata, baamujuma, baamubeiherera, baamusingisa orubanja, kandi baamubonabonesa. Abaserukare bakamutwara ahu yaabaire naaza kwitirwa baamuteerera emisimaari aha muti. Obu yaabaire ariyo naagumisiriza obusaasi obwo, Yehova akagira obusaasi bwingi n’okukiraho. Akaba aine amaani g’okurinda Omwana we kutabonabona, kwonka tarakikozire. Niki ekirikubaasa kuba kyareetaire omuzaire oine rukundo kutwaza atyo? N’ahabwa rukundo. Yesu akagira ati: “Nikwo Ruhanga yaakunzire atyo ensi, akahayo Omwana we omwe nyamunegyere, ngu omuntu weena orikumwikiriza arekye kuhwerekyerera, kureka atungye amagara agatahwaho.”—Yoh. 3:16.
Yehova akagira obusaasi bwingi munonga kureeba Omwana we arikwitwa kugira ngu tucungurwe kuruga omu kibi n’okufa (Reeba akacweka 13)
14. Nooyegyera ki aha kitambo kya Yesu?
14 Ekitambo kya Yesu n’obuhame oburikworeka oku Yehova arikukunda baijukuru ba Adamu na Haawa. Nikyoreka ngu Yehova naakukunda munonga. Akakora ekirikukirayo, arikwemera obusaasi bwingi munonga kugira ngu tucungurwe kuruga omu kibi n’okufa. (1 Yoh. 4:9, 10) Buzima, naayenda kuhwera buri omwe ahariitwe kwangira ekibi n’okukisingura.
15. Twine kukora ki kugasirwa omu kiconco kya Ruhanga eky’ekitambo kya Yesu?
15 Ekiconco ky’ekitambo eki Ruhanga yaahaireyo eky’Omwana we omwe nyamunegyere, nikitubaasisa kusaasirwa ebibi byaitu. Kwonka kubaasa kusaasirwa, twine kugira eki twakora. Yohaana Omubatizi na Yesu Kristo bakagira bati: “Mweteise, ahakuba Obukama bw’omu iguru bwiriire haihi.” (Mat. 3:1, 2; 4:17) N’ahabw’ekyo, okweteisa ni kukuru twaba nitwenda kusingura ekibi, kandi tukairira haihi Tataitwe owa rukundo. Kwonka shi niki ekirikutwarirwa omu kweteisa, kandi nikutuhwera kuta kusingura ekibi? Ekicweka eky’okwega ekirikurataho nikiija kugarukamu ekibuuzo ekyo.
EKYESHONGORO 18 Okusiima Ekitambo
a EBIGAMBO EBISHOBOOROIRWE: Omu Baibuli, ekigambo “ekibi” nikibaasa kumanyisa ebikorwa bitahikire, nari okuremwa kukora ebirikuhikaana n’emitindo ya Yehova ey’emicwe. Kwonka nikibaasa n’okumanyisa embeera y’okutahikiirira, ei twahungwire ahari Adamu. Twena nitufa ahabw’ekibi eki twahungwire.
