1. Okweteisa nikutwariramu ki?

 TWAKORA ekibi ni kikuru kweteisa. Kurugiirira ahari Baibuli, omuntu orikweteisa naahindura emiteekateekyere ye aha kibi eki akozire, arekyera aho kukikora, kandi amaririira kutagaruka kukikora.—Mat. 3:8; Byak. 3:19; 2 Pet. 3:9.

2. Ahabw’enki twena twine kwega kweteisa? (Nehemia 8:​9-11)

² Abantu boona baine kwega ebirikukwata aha kweteisa. Ahabw’enki? Ahabw’okuba twena nitushiisha buri izooba. Ahabw’okugira ngu turi baijukuru ba Adamu na Haawa, tukahungura ekibi n’okufa. (Rom. 3:23; 5:12) N’ahabw’ekyo twena twine kweteisa. Nangwa n’abashaija abeesigwa, nk’entumwa Paulo, bakaba nibateganisibwa ekibi. (Rom. 7:​21-24) Mbwenu eki nikimanyisa ngu twine kuguma tushobeirwe ahabw’ebibi byaitu? Ngaaha, Yehova n’omunyambabazi, kandi naayenda ngu tushemererwe. Yetegyereze eky’okureeberaho ky’Abayudaaya ab’omu bwire bwa Nehemia. (Shoma Nehemia 8:​9-11.) Yehova akaba atarikwenda barengwe amaganya ahabw’ebibi ebi baakozire enyima, kureka akaba naayenda ngu bamuramye bashemereirwe. Yehova naamanya ngu twayeteisa nitugira okushemererwa. N’ahabw’ekyo naatwegyesa kweteisa. Twayeteisa ebibi byaitu, nitubaasa kugira obwesigye ngu Tataitwe omunyambabazi naija kutusaasira.

3. Nituza kureeba ki omu kicweka eki?

³ Ka twongyere kwega ebirikukwata aha kweteisa. Omu kicweka eki, nituza kwega ebintu bishatu. Eky’okubanza, nituza kwetegyereza eki Yehova yaayegyeise Abaisraeli aha kweteisa. Bwanyima, nituza kureeba oku Yehova yaahwereire abasiisi  kuhika aha kweteisa. Nituza kuhendera turikureeba eki abeegi ba Yesu baayegire aha kweteisa.

EKI YEHOVA YAAYEGYEISE ABAISRAELI AHA KWETEISA

4. Ahabw’enki Yehova yaayegyeise eihanga rya Abaisraeli kweteisa?

⁴ Obu Yehova yaatebeekanisa Abaisraeli nk’eihanga, akakora endagaano nabo. Yehova akabaraganisa ngu baayorobera ebiragiro bye akaba naija kubaha emigisha, kandi abarinde. Aha bikwatiraine n’ebiragiro ebyo akabahamiza ati: “Ahakuba ekiragiro eki, eki ndikukuragiira eri izooba, tikirikukurema, n’obu kwakuba okukuba hare.” (Bir. 30:​11, 16) Kwonka ku bakumugomeire, bakaramya baaruhanga abandi, akaba naija kubaihaho emigisha ye, kandi bakaba nibaija kubonabona. Kwonka nabwo bakaba nibaija kugaruka kusiimwa Ruhanga. Bakaba nibabaasa ‘kugarukira [Yehova] Ruhanga waabo, baahurire eiraka rye.’ (Bir. 30:​1-3, 17-20) Ekirikumanyisa ngu bakaba nibabaasa kweteisa. Ku baakukozire batyo, Yehova akaba naija kubairira haihi, kandi abahe emigisha.

5. Yehova akooreka ata ngu tararugire aha bantu be? (2 Abagabe 17:​13, 14)

⁵ Abantu abu Yehova yaayetooraniire bakamugomera emirundi mingi. Bakaramya ebishushani, kandi baakora ebindi bibi bingi. N’ekyarugiremu, bakabonabona. Kwonka Yehova tararugire aha bantu be abo. Akaguma naabatumaho baanabi kubahiga kweteisa, n’okumugarukira.—Shoma 2 Abagabe 17:​13, 14.

6. Yehova akakoresa ata baanabi kwegyesa abantu be obukuru bw’okweteisa? (Reeba n’ekishushani.)

⁶ Yehova akaba naakira kukoresa baanabi kurabura abantu be, n’okubahabura. Nk’eky’okureeberaho, Ruhanga akagambira Yeremia kubagira ati: ‘Garuka, iwe Israeli owaagarukire enyima, tindikwija kukureebesa kiniga, ahabw’okuba ndi ow’embabazi, tindikwija kuguma na kiniga ebiro byona. Kwonka oyemere ekibi kyawe, ahakuba ogomeire [Yehova] Ruhanga waawe.’ (Yer. 3:​12, 13) Yehova  kurabira omuri nabi Yoeli, akagira ati: “Mungarukire n’emitima yaanyu yoona.” (Yoel. 2:​12, 13) Akagambira na nabi Isaaya kugira ati: “Mwogye, mweboneze, mwiheho obubi bw’emicwe yaanyu omu maisho gangye, murekye kukora kubi.” (Isa. 1:​16-19) Kandi Yehova arikurabira omuri Ezekieli akabuuza ati: “Nimugira ngu ngira okushemererwa kwona ahabw’okufa kw’omubi? . . . Eki nyenda t’okureka omuhanda gwe omubi, akagumaho? Tinshemerererwa kufa kw’omuntu weena, n’ahabw’ekyo muhindukye, mubone kugumaho.” (Ezk. 18:​23, 32) Yehova naashemererwa abantu ku barikweteisa, ahakuba naayenda ngu bagumeho ebiro byona. N’ahabw’ekyo, Yehova tarikutegyereza kyonka ngu abasiisi bahindure emitwarize yaabo, reero ngu abone kubahwera. Ka tureebe eby’okureeberaho bimwe ebirikworeka ekyo.

7. Yehova arikukoresa eky’okureeberaho kya nabi Hosea n’omukazi we, akeegyesa ki abantu be?

⁷ Yetegyereze eki Yehova yaayegyeise abantu be arikukoresa eky’okureeberaho kya Gomeri muka nabi Hosea. Bwanyima y’okushambana, akatsigaho Hosea yaagyenda n’abashaija abandi. Mbwenu shi akaba atakibaasa kuhwerwa? Yehova orikubaasa kureeba emitima, akagambira Hosea ati: “Irooko, ogarukye okunde ogwo mukazi orikukundwa nkunzi ye endiijo, kandi enshambani nk’oku [Yehova] akunda Abaisraeli, n’obu baraabe bakuratira baaruhanga abandi.” (Hos. 3:1; Enf. 16:2) Yetegyereze ngu muka Hosea akaba naakyejumba omu kibi. Kwonka nabwo, Yehova akagambira Hosea kuzayo kumusaasira, kandi akagarukana nawe. a Nikyo kimwe, Yehova tararugire aha bantu be abagomi. N’obu baraabe baabaire bakozire ebibi by’amaani, akaba naakibakunda, kandi akagumizamu naateeraho kubahwera kweteisa n’okuhindura emitwarize yaabo. Mbwenu shi ekyo nikimanyisa ngu Yehova orikushwijuma emitima, naija kuteeraho kuhwera omuntu okirikukora ekibi ky’amaani kuhika aha kweteisa? (Enf. 17:3) Ka tureebe.

OKU YEHOVA ARIKUHWERA ABASIISI KUHIKA AHA KWETEISA

8. Yehova akateeraho ata kuhwera Kaini kweteisa? (Okutandika 4:​3-7) (Reeba n’ekishushani.)

⁸ Kaini akaba ari mutabani wa Adamu na Haawa ow’okubanza. Akahungura ekibi kuruga aha bazaire be. Kandi, Baibuli neemugambaho eti: “Emicwe ye ekaba eri mibi.” (1 Yoh. 3:12) Obundi egyo niyo enshonga ahabw’enki Yehova ‘atarasiimire Kaini n’emitoijo’ ye obu yaahayo ekitambo. Omu mwanya gw’okuhindura emitwarize ye, ‘Kaini akagira ekiniga kingi, yairirimba aha maisho.’ Niki eki Yehova yaakozire? Akagamba na Kaini. (Shoma Okutandika 4:​3-7.) Yetegyereze ngu Yehova akagamba na Kaini omu muringo gw’embabazi, yaamuha amatsiko, kandi yaamurabura aha kabi akaabaire nikaija kumuhikaho. Eky’obusaasi, Kaini akanga kuhurikiza. Taraikiriize Yehova kumuhwera kweteisa. Mbwenu shi ekyo kikareetera Yehova kurekyera aho kuhwera abasiisi abandi kweteisa? Ngaaha buzima!

9. Yehova akahwera ata Daudi kuhika aha kweteisa?

⁹ Yehova akaba naakunda munonga Omugabe Daudi. Nangwa, akagira ngu ‘n’omuntu ori nk’omutima gwe oku gurikwenda.’ (Byak. 13:22) Kwonka Daudi akakora ebibi by’amaani nk’okushambana, n’okwita. Kurugiirira aha Biragiro bya Musa, Daudi akaba ashemereire kwitwa. (Lev. 20:10;  Kub. 35:31) Kwonka Yehova ahabw’embabazi ze, akaba naayenda kumuhwera kweteisa. b Akoohereza nabi Nasani kutaayaayira Omugabe Daudi, n’obu araabe yaabaire atakoorekire ngu naayenda kweteisa. Nasani akakoresa eky’okureeberaho ekyabaire kigyendereire kumuhwera kwetegyereza eki yaabaire akozire. Daudi akakwatwaho, kandi yaayeteisa. (2 Sam. 12:​1-14) Akahandiika zaaburi eyaabaire neeyoreka ngu ayeteisize kuruga aha mutima. (Enshoboorora ya Zab. 51) Zaaburi egyo ehuumuriize abasiisi baingi, kandi yaabahiga kweteisa. Buzima nikitushemeza kureeba ngu Yehova akahwera Daudi kuhika aha kweteisa.

10. Nookwatwaho ota waateekateeka aha ku Yehova arikugumisiririza abasiisi, kandi akabasaasira?

¹⁰ Yehova naayanga ekibi, kandi tarikukishagika omu muringo gwona. (Zab. 5:​4, 5) Naamanya ngu twena turi abasiisi, kwonka ahabw’okutukunda, naacwamu kutuhwera kukisingura. Butoosha naateeraho kuhwera abakozire ebicumuro by’amaani kweteisa n’okumwirira haihi. Ekyo ka nikituhuumuriza! Twateekateeka aha kugumisiriza n’okusaasira kwa Yehova, nikituhiga kuguma turi abeesigwa n’okurahuka kweteisa twashiisha. Hati ka tugambe aha ku ekibiina Ekikristaayo kyayongyeire kwegyesibwa aha kweteisa.

EKI ABAKURATSI BA YESU BAAYEGIRE AHA KWETEISA

11-12. Yesu akeegyesa ki abakuratsi be aha kusaasira kwa Ishe? (Reeba ekishushani .)

¹¹ Omu kyasha ky’okubanza Y.A.K., nibwo Mesia yaabaire aine kwija. Nk’oku tureebire omu kicweka eky’enyima, Yehova akakoresa Yohaana Omubatizi na Yesu kwegyesa abantu obukuru bw’okweteisa.—Mat. 3:​1, 2; 4:17.

¹² Obu Yesu yaabaire ari omu nsi, akeegyesa abantu aha kusaasira kwa Ishe. Ekyo akakikora arikubagambira enfumu ey’omwana owaarazire. Omutsigazi ogwo akacwamu kwesherurira ebye kumara obwire. Kwonka “ku yaayegarukiremu” akagaruka omu ka, ishe akatwaza ata? Yesu akagira ati: “Ku yaabaire akiri hare munonga, ishe yaamureeba,  yaakwatwa embabazi, yairuka, yaamugwa omunda, yaamunywegyera.” Omwana akaba naayenda kushaba ishe ngu amuhindure omwe aha bakozi be, kwonka ishe akamweta ‘omwana we’ kandi yaamwakiira omu ka ye. Ishe akagira ati: “Akaba abuzire, mbwenu yaazaahuuka.” (Luk. 15:​11-32) Yesu atakaizire omu nsi, akaba naareeba Ishe arikugirira esaasi abasiisi baingi abaabaire nibeeteisa. Enfumu ei Yesu yaagambire buzima neetuhwera kwetegyereza ngu Yehova Tataitwe n’omunyambabazi.

13-14. Entumwa Petero akeega ki aha bikwatiraine n’okweteisa, kandi akeegyesa ki abandi aha kweteisa? (Reeba n’ekishushani.)

¹³ Entumwa Petero akeegyera bingi ahari Yesu aha bikwatiraine n’okweteisa n’okusaasira. Petero akakora enshobe nyingi, kandi Yesu akamusaasira. Nk’eky’okureeberaho, akeehakana Mukama we emirundi eshatu ngu tarikumumanya, kandi ekyo kikamureetera kweshinja ekirenga. (Mat. 26:​34, 35, 69-75) Kwonka Yesu ku yaazookire, akamweyoreka ari wenka. (Luk. 24:​33, 34; 1 Kor. 15:​3-5) Hatariho kubangaanisa, omu kaire ako akasaasira entumwa ye owaabaire ayeteisize.

¹⁴ Ahabw’okugira ngu Petero akaba ayetegyereize ebirikukwata aha kweteisa n’okusaasira, akaba naabaasa kwegyesa abandi. Bwanyima ya Pentekoote, akaha orubazo Abayudaaya abaabaire batari Bakristaayo arikworeka ngu nibo baitsire Mesia. Kwonka, akabahiga omu muringo gwa rukundo ati: “N’ahabw’ekyo, mweteise, muhindukye, ebibi byanyu biragazibwe, ebiro eby’okugaruka obusya bibone kwija okuruga ahari [Yehova].” (Byak. 3:​14, 15, 17, 19) N’ahabw’ekyo, Petero akooreka ngu okweteisa nikureetera omusiisi kuhindura emiteekateekyere ye etahikire n’emitwarize ye, reero akora ebirikushemeza Ruhanga. Kandi akooreka ngu Yehova naija kuragaza ebibi byabo, nari abiihireho  kimwe. Kandi bwanyima y’emyaka mingi, Petero akahamiza Abakristaayo ati: ‘[Yehova] naagumisiriza ahabwanyu, atarikwenda omuntu weena kuhwerekyerera, kureka naayenda ngu boona bahikye aha kweteisa.’ (2 Pet. 3:9) Ago ka n’amatsiko agarikuhuumuriza aha Abakristaayo baakora ebibi, nangwa n’obu birikuba biri eby’amaani!

15-16. (a) Entumwa Paulo akeega ata aha kusaasira? (1 Timoseo 1:​12-15) (b) Nituza kwetegyereza ki omu kicweka ekirikukurataho?

¹⁵ Saulo owa Taruso n’omwe aha bantu abaabaire nibeetengyera kimwe okweteisa n’okusaasirwa. Akahiiganisa munonga abakuratsi ba Kristo. Abakristaayo baingi nibabaasa kuba baabaire nibamureeba nk’otarikubaasa kusaasirwa n’obu yaakweteisa. Kwonka Yesu ku yaazookire, akaba ataine emiteekateekyere nk’eyaabo. We na Ishe bakaba nibareeba emitwarize mirungi ei Saulo yaabaire aine. Yesu akagira ati: “Omushaija ogwo n’ekintu kyangye eki ntooraine.” (Byak. 9:15) Kandi, Yesu akakora eky’okutangaaza kuhwera Saulo kweteisa. (Byak. 7:58–8:3; 9:​1-9, 17-20) Bwanyima y’okuhinduka Omukristaayo, akaba entumwa Paulo, kandi akooreka ngu naasiima embabazi n’esaasi ezi yaagiriirwe. (Shoma 1 Timoseo 1:​12-15.) N’ahabw’ekyo akeegyesa abandi ati: “Embabazi za Ruhanga ziba ez’okukuhitsya aha kweteisa.”—Rom. 2:4.

¹⁶ Paulo akatwaza ata ku yaahuriire ekibi ky’obushambani ekyabaire kiri omu kibiina kya Korinso? Eki yaakozire nikitwegyesa eishomo rikuru aha ku Yehova arikuhana omu muringo gwa rukundo, kandi ogw’esaasi. Nituza kwongyera kwetegyereza enshonga egyo omu bwijwire omu kicweka ekirikukurataho.