Entumwa Paulo akahandiikira Abakristaayo b’omuri Tesalonika ati: “Omuntu weena otarikuhurira eki turikugamba omu baruha egi, [mumuteho akamanyiso].” (2 Tes. 3:14) Tutwire nitugira ngu obuhabuzi obwo n’obw’abareeberezi. Omuntu ku abaire naagumizamu kwehuzya emitindo ya Baibuli na bwanyima y’okuhanwa, abareeberezi babaire nibabaasa kuha orubazo orurikurabura ekibiina. Bwanyima, ababuurizi babaire nibarekyera aho kukwatanisa n’otairweho akamanyiso.

Kwonka, nihetengyesa empinduka. Obuhabuzi obu Paulo yaahaire nibworeka eki Omukristaayo aine kukora omu mbeera zitari zimwe. N’ahabw’ekyo abareeberezi tikirikubetengyesa kuha orubazo rw’okurabura. Ahabw’enki habaireho empinduka? Ka tushwijume ebigambo bya Paulo ebyetooroire enshonga egi.

Paulo akooreka ngu abamwe omu kibiina bakaba bari “abeeremwa.” Bakaba batarikugyendera aha buhabuzi bw’Ebyahandiikirwe obu yaabaire abahaire. Obu yaahereruka kubataayaayira, akabagira ati: “Omuntu weena ku araabe atarikwenda kukora, arekye n’okurya.” Kwonka nabwo, abamwe bakaba bakyangire kukora emirimo y’okwebaisaho, kandi obwo baabaire nibabaasa kugikora. Kandi, bakaba nibeetaasyataasya omu nshonga z’abandi. Abakristaayo bakaba baine kutwariza bata abantu nk’abo?—2 Tes. 3:​6, 10-12.

Paulo akagira ngu mumuteho akamanyiso. Ekigambo ky’Orugriika nikimanyisa okuta eriisho aha omuntu ogwo. Paulo akaha obuhabuzi obu ekibiina kyona, beitu batari bareeberezi bonka. (2 Tes. 1:1; 3:6) N’ahabw’ekyo, buri Mukristaayo owaabaire areeba mugyenzi we atarikworobera obuhabuzi obwo, akaba acwamu ‘kumwetantara.’

Mbwenu shi eki kikaba nikimanyisa ngu omuntu ogwo akaba atwarizibwa nk’oihirwe omu kibiina? Ngaaha, ahakuba Paulo akoongyeraho arikugira ati: “Mumuhabure nk’ow’eishe-emwe.” N’ahabw’ekyo, ab’eishe-emwe bakaba bakwatanisa n’omuntu ogwo, omu nteerane n’omu kubuurira, kwonka bakaba batakwatanisa nawe aha mikoro nari omu bwire bw’okweshemeza. Ahabw’enki? “Abone kukwatwa enshoni,” nikwo Paulo yaagizire. Okuteebwaho akamanyiso kukaba kureetera Omukristaayo ogwo kukwatwa enshoni ahabw’ebikorwa bye, reero ahindura emitwarize ye.—2 Tes. 3:​14, 15.

Nitubaasa kugyendera tuta aha buhabuzi obwo obunaku obu? Eky’okubanza, twine kuhamya ngu ekikorwa ky’omuntu ogwo kirimu ‘obweremwa’ obu Paulo yaagambireho. Akaba atarikugamba aha bantu abarikutaana naitwe omu bi barikucwamu barikwihirira aha muntu waabo w’omunda, nari ebi barikukunda. Kandi akaba atarikumanyisa abatugwisize kubi. Kureka, akaba naagamba aha bantu abaabaire nibagomera obuhabuzi bwa Ruhanga nkana.

Hati, twareeba Omukristaayo mugyenzi waitu arikugomera obuhabuzi bwa Ruhanga, a nitubaasa kucwamu kutakwatanisa nawe twaba nitwejumba omu by’okweshemeza. Ahabw’okugira ngu egi n’enshonga ei buri muntu aine kwecweramu, titwine kugigaaniiraho n’abatari b’eka yaitu. Kandi nitubaasa kukwatanisa n’omuntu ogwo omu nteerane, n’omu kubuurira. Yaahindura emitwarize ye, nitugaruka tukwatanisa nawe nka butoosha.