1-3. (a) Abakristaayo nibooreka bata ngu beeteekateekire kuteeranira hamwe? (Reeba ekishushani aha kutandika.) (b) Omu kicweka eki nituza kushwijuma ki?

OBU Corinna yaabaire aine emyaka 17, nyina bakamukwata baamutwara omu nkambi ya Soviet. Bwanyima, Corinna nawe bakamukwata baamutwara omu nkambi ya Siberia, mahiro nyingi kuruga omuka owaabo. Bakaba nibamutwariza nk’omuhuuku, obumwe barikumugyema kukorera omu butiti bw’amaani, kandi atajwaire myenda y’obutiti. Corinna na munyaanyazi-itwe ondiijo bakamariirira kuza omu ruteerane n’obu baraabe baabaire nibatwarizibwa kubi.

² Corinna naagira ati: “Omu mwabazyo tukaruga ahu twabaire nitukorera twagyenda mahiro 15 kuza ahu egaari y’omwika erikwemerera. Egaari y’omwika ekatsimbura shaaha munaana z’ekiro, kandi tukagigyenderamu kumara eshaaha mukaaga, reero twagaruka twagyenda mahiro mukaaga ezindi kuhika ahu oruteerane rwabaire ruri.” Mbwenu shi orugyendo orwo rukarugamu ebirungi? Corinna naagira ati: “Omu ruteerane, tukeega Omunaara gw’Omurinzi kandi twayeshongora ebyeshongoro by’Obukama. Enteerane zikatwombeka kandi zaahamya okwikiriza kwaitu.” N’obu baraabe baagarukire bwanyima y’ebiro bishatu, owaabaire naakurira iriisizo  ahu baabaire nibakora, tarakimanyire ngu Corinna na mugyenzi we tibariho.

³ Abaheereza ba Yehova batwire nibatwara okuza omu nteerane nk’ekintu ky’omuhendo. Ahonaaho ekibiina Ekikristaayo kiherize kutandikaho, abakuratsi ba Yesu bakaguma “nibeezirikira kuteeranira omuri hekalu.” (Byak. 2:46) Obundi naiwe nooba oine ekihika ky’okuza omu nteerane butoosha. Kwonka, Abakristaayo boona nibaraba omu mbeera zigumire. Emirimo, okugira bingi by’okukora, nari oburuhe ahabw’okukora munonga, nibibaasa kutureetera kugumirwa kuza omu nteerane. Niki ekirikubaasa kutuhiga kusingura oburemeezi obu, kandi tukaguma nituza omu nteerane tutarikwosha? ^[1] Nitubaasa kuhwera tuta abeegi baitu ba Baibuli n’abandi kureeba obukuru bw’okuza omu nteerane? Omu kicweka eki, nituza kushwijuma enshonga munaana ezirikutureetera kuza omu nteerane kuramya. Enshonga ezi nitubaasa kuzita omu bicweka bishatu: oku orikugasirwa, oku abandi barikugasirwa, n’oku Yehova arikukwatwaho waaza omu nteerane. ^[2]

4. Okuteeranira hamwe nikutuhwera kuta kwega ahari Yehova?

⁴ Enteerane nizitwegyesa. Buri ruteerane rw’ekibiina nirutuhwera kwega ahari Ruhanga waitu Yehova. Nk’eky’okureeberaho, nk’emyaka ebiri ehingwire, ebibiina ebimwe bikaba nibyega akatabo Draw Close to Jehovah omu Kwega Baibuli okw’Ekibiina. Okwega aha mitwarize ya Ruhanga, n’ebi ab’eishe-emwe baabaire nibagarukamu bikakuhwera kwongyera kumukunda. Kandi twongyeire n’okumanya gye Ekigambo kya Ruhanga turikuhurikiza embazo, eby’okureeberaho, n’ebirikushomwa omu Baibuli. (Neh. 8:8) Teekateeka aha bintu by’omuhendo ebi turikwega twaba nitushoma Baibuli buri saabiiti, kandi tukahurikiza n’ebi abandi barikugarukamu!

5. Enteerane zikuhwereire zita kugyendera aha bi orikwega omu Baibuli n’okwongyera kubuurira gye?

⁵ Omu nteerane nitwega kugyendera aha misingye ya Baibuli omu buri kimwe eki turikukora. (1 Tes. 4:9, 10) Nk’eky’okureeberaho, Okwega Omunaara gw’Omurinzi, nikuba nikuhikaana n’ebyetengo by’abaheereza ba Ruhanga. Mbwenu shi Okwega Omunaara gw’Omurinzi kukuhigire kushwijuma ebigyendererwa byawe, kusaasira Abakristaayo bagyenzi baawe, nari kumanya kushaba omu muringo murungi? Oruteerane orw’ahagati ya saabiiti nirututendeka kumanya kubuurira. Nitwega oku turikubaasa kubuurira abandi amakuru marungi, n’oku twine kubeegyesa gye emisingye eri omu Byahandiikirwe.​—Mat. 28:19, 20.

6. Enteerane zaitu nizituhwera zita kuguma tuhami?

⁶ Enteerane nizitugaruramu amaani. Ensi ya Sitaane neebaasa kutuubya okwikiriza kwaitu kandi etureetere kugira amaganya n’okuhwamu amaani. Kwonka enteerane z’ekibiina nizituhiga kandi zitugaruramu amaani. (Shoma Ebyakozirwe 15:30-32.) Omu nteerane zaitu, nitushwijuma obunabi bwa Baibuli. N’ekirikurugamu, nitweyongyera kuhamiza kimwe ebi Yehova arikuraganisa kubaho omu biro by’omumaisho n’okuhikiirira kwabyo. Abo abarikuza omu maisho kwegyesa tibo bonka abarikutugaruramu amaani. Abakristaayo bagyenzi baitu baagarukamu nari bakeeshongora kuruga aha mutima, nibatwombeka. (1 Kor. 14:26) Kandi twaba nitugaaniira n’ab’eishe-emwe enteerane zitakahikire nari zaahwa, nitugarukamu amaani.​—1 Kor. 16:17, 18.

7. Ahabw’enki ni kikuru kuza omu nteerane zaitu?

⁷ Enteerane nizituhwera kutunga obuhwezi bw’omwoyo gurikwera. Yesu Kristo ari omu iguru akagira ati: ‘Oine amatu ahurire eki Omwoyo gurikugambira’ ebibiina. (Kush. 2:7) Eego, Yesu naakoresa  omwoyo gurikwera kwebembera ekibiina Ekikristaayo. Nitwetenga omwoyo gurikwera kubaasa kusingura okwohibwa, kubuurira twine obumanzi, n’okucwamu gye. Mbwenu shi titwine kukoresa gye byona ebi tuhairwe otwariiremu n’enteerane kubaasa kutunga omwoyo gurikwera?

8. Ku turikugarukamu nari tukeeshongora omu nteerane, ekyo nikihwera kita ab’eishe-emwe? (Reeba akabokisi “Butoosha Naarugayo Arikwehurira Gye.”)

⁸ Enteerane nizituha omugisha gw’okworeka ngu nitukunda ab’eishe-emwe. Teekateeka munonga aha mbeera zigumire ezi ab’eishe-emwe omu kibiina kyawe bagumisiriize. Entumwa Paulo akahandiika ati: “Ka tuteekateekye oku twakwezirikisana”! Bwanyima Paulo akashoboorora ngu nitubaasa kworeka ngu nitufayo “tutarikureka kuteeranira hamwe.” (Heb. 10:24, 25) Waaza omu nteerane nikyoreka ngu nookunda kuha ab’eishe-emwe obwire bwawe, kandi ngu nobafaho. Waagarukamu kuruga aha mutima kandi okeeshongora, nikigaruramu ab’eishe-emwe bagyenzi baawe amaani.​—Kol. 3:16.

9, 10. (a) Shoboorora oku ebigambo bya Yesu ebiri omu Yohaana 10:16 birikutuhwera kumanya ahabw’enki kiri kikuru kuteeranira hamwe n’ab’eishe-emwe. (b) Twaba nituza omu nteerane butoosha, nituhwera tuta omuntu oyangirwe ab’eka ye?

⁹ Enteerane nizitubaasisa kuba hamwe n’ab’eishe-emwe. (Shoma Yohaana 10:16.) Yesu akeegyeragyeranisa n’omuriisa w’entaama, kandi abakuratsi be yaabeeta entaama. Teekateeka ahari eki: Entaama ibiri zaaba ziri aha rushozi rumwe, n’ezindi ibiri ziri omu ruhanga, reero endiijo erikuriira omu mwanya ogundi, noobaasa kugira ngu entaama ezo itaano n’obusyo? Buzima, obusyo bw’entaama, n’entaama ezirikuba ziri hamwe, ziri ahansi y’obureeberezi bw’omuriisa. Nikyo kimwe, titurikubaasa kukuratira omuriisa waitu twacwamu kwetaanisa aha bandi tukigyendereire. Twine kuteeranira hamwe n’Abakristaayo bagyenzi baitu ‘nk’obusyo bumwe’ oburikwebemberwa ‘omuriisa omwe.’

¹⁰ Ku turikuza omu nteerane, nitwongyera aha bumwe bwaitu bw’eishe-emwe. (Zab. 133:1) Bamwe aha b’eishe-emwe bagyenzi baitu bangirwe abazaire baabo nari abu barikuzaarwa nabo. Kwonka, Yesu akaraganisa ngu naija kubaha eka erikubakunda kandi erikubafaho omu by’omwoyo. (Mak. 10:29, 30) Waaba nooza omu nteerane butoosha, nooyoreka ngu ori ishe, nyina, mwene ishe, nari munyaanya w’ab’eishe-emwe abo abakundwa! Mbwenu shi eki tikirikutuhiga kukora kyona ekirikubaasika kuza omu nteerane zoona?

11. Okuza omu nteerane nikituhwera kita kuha Yehova ekimushemereire?

¹¹ Omu nteerane, nituha Yehova ekimushemereire.  Ahabw’okugira ngu Yehova n’Omuhangi, tushemereire kumuhimbisa, tukamwebaza, kandi tukamuha ekitiinisa. (Shoma Okushuuruurwa 7:12.) Twashaba Yehova, tukeeshongora, kandi tukamugambaho omu nteerane, nituba nitumuha ekintu ekimushemereire nikwo kuramya. Nitusiima omugisha gw’okuha ekitiinisa Ogwo otukoreire bingi.

12. Yehova naayehurira ata twayorobera ekiragiro kye eky’okuza omu nteerane?

¹² Kandi tushemereire kworobera Yehova. Naaturagiira kutareka kuteeranira hamwe, na munonga omu bunaku obu obw’emperu. Ku turikworobera ekiragiro ekyo twekundiire, Yehova naashemererwa. (1 Yoh. 3:22) okuteeraho kwaitu kuza omu nteerane naakureeba, kandi naakutwara nka kukuru.​—Heb. 6:10.

13, 14. Omu nteerane nitwirira tuta haihi Yehova na Yesu?

¹³ Omu nteerane nitworeka ngu nitwenda kwirira haihi Yehova n’Omwana we. Omu nteerane, Omwegyesa waitu Orikukirayo naatuhabura kurabira omu Kigambo kye Baibuli. (Isa. 30:20, 21) Nangwa n’abatari Bakristaayo abarikwija omu nteerane, nibabaasa kukireeba bagire bati: “Buzima kwo Ruhanga ari omuriimwe.” (1 Kor. 14:23-25) Yehova naaha omugisha enteerane zaitu arikutuha omwoyo gurikwera, kandi arikwebembera n’entebeekanisa zoona ez’okwegyesa. N’ahabw’ekyo, omu nteerane nituhurikiza eiraka rya Yehova, kandi tureeba n’oku arikutufaho. N’ekirikurugamu, nitumwirira haihi.

¹⁴ Yesu akagira ati: “Babiri nari bashatu ku bariteeranira hamwe omu iziina ryangye, naanye ndyaba ahagati yaabo.” (Mat. 18:20) Omusingye oguri omu bigambo bya Yesu ebyo, nigukwata n’aha nteerane zaitu. Kristo omutwe gw’ekibiina, “naataayaayira” ebibiina by’abaheereza ba Ruhanga. (Kush. 1:20–2:1) Kiteekateekeho! Yehova na Yesu nibeejumbira kimwe omu nteerane zaitu kutuhamya. Nooteekateeka ngu Yehova naayehurira ata yaareeba twine ekihika ky’okumwirira haihi n’Omwana we?

15. Twaza omu nteerane nitworeka tuta ngu nitworobera Yehova?

¹⁵ Omu nteerane nitworeka ngu nitushagika Ruhanga ohikire kutegyeka byona. N’obu Yehova araabe naaturagiira kuza omu nteerane, kwonka tarikutugyema kworobera ekiragiro ekyo. (Isa. 43:23) N’ahabw’ekyo, kiri ahariitwe kworeka rukundo mpango ei tumwiniire, kandi tukamushagika ahakuba niwe ahikire kutegyeka byona. (Rom. 6:17) Nk’eky’okureeberaho, nitubaasa kuba nitugyemeserezibwa ou turikukorera arikwenda ngu tukore emirimo ye omu mwanya gw’okuza omu nteerane zaitu ez’obutoosha. Gavumenti neebaasa kutuhiiganisa erikututiinatiinisa ngu twaza omu nteerane kuramya nitwija kushashura omutango, nari ngu nibaija kutukoma. Nari nitubaasa kwohibwa kuza omu by’okweshemeza omu mwanya gw’okuza omu nteerane. Omu mbeera ezi zoona, nituba twine kucwamu, ou turikwenda kuheereza. (Byak. 5:29) Twacwamu kushagika Yehova ohikire kutegyeka byona, naashemererwa.​—Enf. 27:11.

16, 17. (a) Nitumanya tuta ngu omu kyasha ky’okubanza Abakristaayo bakaba nibatwara enteerane nka nkuru? (b) Ow’eishe-emwe George Gangas akaba naatwara ata enteerane?

¹⁶ Bwanyima y’Abakristaayo kuteeranira hamwe aha Pentekoote omu gwa 33, bakagumizamu nibateeranira hamwe kuramya Yehova. ‘Obutoosha bakaguma nibeezirika kuteeranira omuri hekalu.’ (Byak. 2:46) Ebigambo by’Orugriika ebirikuvunuurwa nka “baaguma nibeezirika” biine amakuru g’okugumisiriza nari okuteeraho munonga kugumira embeera. Abakristaayo abo kikaba kitarikuboorobera kuza omu nteerane, ahabw’okugira ngu bakaba nibahiiganisibwa obutegyeki bw’Abarooma n’abeebembezi  b’ediini y’Ekiyudaaya. Kwonka n’obu kiraabe kyabaire kiri kityo, bakagumisiriza.

¹⁷ Abaheereza ba Yehova baingi ab’obunaku obu boorekire ngu nibasiima enteerane. George Gangas, owaaheereizeho aha Kakiiko Akareeberezi kumara emyaka erikurenga 22, akagira ati: “Ahariinye, okuteeranira hamwe n’ab’eishe-emwe ni kimwe aha bintu ebirikukirayo kundeetera okushemererwa n’okugarukamu amaani. Ninkunda kuba omwe aha barikubanza aha Kyombeko ky’Obukama kyaba nikibaasika. Ninshemererwa munonga kugamba n’abaheereza ba Ruhanga. Ku ndikuba ndi nabo nimpurira nyine obutebeekana ndi n’ab’eka yangye, omu paradiso y’eby’omwoyo.” Akongyeraho ati: “Nk’oku kampasi butoosha erikuba neereeba obukiizi-bwa-bumosho, naanye ebiteekateeko byangye n’ekyetengo kyangye, nibiba biri aha kuza omu nteerane.”

18. Nootwara ota enteerane zaitu, kandi omaririire kukora ki?

¹⁸ Naiwe nikwo orikwehurira otyo aha bikwatiraine n’okuza omu nteerane kuramya Yehova? Ku kiraabe nikwo kiri, mariirira kugumizamu nooza omu nteerane otarikwosha. Waakora otyo, noija kworeka ngu noikirizana n’Omugabe Daudi, owaagizire ngu, Yehova ‘ninkunda enju yaawe ahu otuura.’​—Zab. 26:8.